1 Rong ie mwahu, kumwail akan me kin wiewia mour pwung. Kilenglahng paipalap me kumwail paldihsang ieo, oh nan pwoahr me kumwail weiweidahsang ieo.

2 Kilenglahng amwail pahpa kahlap Eipraam oh Sara me kaipwihkumwaildi; pwe I malipehda ih kelehpw oh kapaiada.

3 Pwe Kauno pahn ketin koaloalamwahuih Saion, ong koaros me kousoan nan mohn ihmw kan; oh e pahn ketin wekidala sapwtehno en duwehla Ihden, oh e pahn duwehla sapwellimen Kauno mwetuwelo. Peren oh nsenamwahu pahn mie wasao, kaping kalahngan oh ngilen koul en kaping.

4 Kumwail rong ie, nei aramas akan; oh rong ei mahsen kan, Kumwail tohn ei wehi; pwe I pahn kadarewei kosonned ehu, oh I pahn wiahiong ei koasoandi en wia kamarainpen aramas akan.

5 Ei mour pwung me kerendohr; I kadarewehr komour, oh limei kat pahn kadeik aramas akan. Deke kan pahn awiawih ie, oh irail pahn kin koapwoaroapwoarki limei kat.

6 Kilengdahla nanleng, oh kilengdihla pohn sampah; pwe nanleng pahn sohrasang duwehte ediniei, oh sampah pahn meringla duwehte likou mering; oh irail kan me kin mihmi loale pahn mehla pil duwehte. Ahpw ei komour pahn kohkohlahte, oh ei mour pwung sohte pahn sohrala.

7 Kumwail rong ie, kumwail akan me kin mour pwung, aramas akan me I ntingihdier ei kosonned akan nan ahr mohngiong kan, kumwail dehr masak ma aramas kasarowei kumwail, de pil masak arail wiewia suwediong kumwail.

8 Pwe loangenmwet kan pahn kangirailla duwehte likou ehu, oh mwahs pahn kangirailla duwehte ahr kin kang winen sihpw. Ahpw ei mour pwung pahn kohkohlahte, oh ei komouro pahn sang ehu dih lel ehu dih.

9 Pwourda, pwourda! Ahniki kehlail, kehliki Kauno; pwourda duwehte nan kawahko. Kaidehn komwi me ketin doakoapeseng Rahap, oh kawehla drakono?

10 Kaidehn komwi me ketin kamadahda sehdo, sehd en nan madauo; me ketin wiahda ahl ong irail me komw ketin doarehla ko pwe irail en keid loale?

11 Eri, irail akan me Kauno ketin kamaiaudahr pahn pwurodo oh wie kokoul kohdo nan Saion; oh re pahn peren poatoapoat oh wiahla aramas sarawi kei; oh re pahn alehdi nsenamwahu oh peren; pahtou oh nsensuwed pahn sohrala.

12 Ngehi iei Ih me ketin koaloalamwahwih kumwailo. Kilang, ihs kumwail me kumwail pahn masangki aramas, me uhdahn pahn mehla, me wia nein aramas, me uhdahn pahn duwehla dihpw?

13 Oh kumwail manokehla Kauno me ketin wiaikumwailda, me ketin sohngedier nanleng, oh koasoanedier poahsoan kan en sampah, oh kumwail uhsehlahte masepwehk rahn koaros, pwehki amwail masak lingeringer mwuledek en imwintihtio, me mwomwen me e onopadahr en kaweikumwaila? Oh ia ahn imwintihtio lingeringeren?

14 Me selidi kan pahn kasaledekla ahnsou mwadang, oh re sohte pahn mehla nan imweteng, oh re sohte pahn men mwengehda.

15 Ahpw ngehi me Kauno amwail Koht, me kupwurehda ilok kan en pwungupwungidek; mwarei iei Kauno, Wasa Lapalap.

16 Oh ngehi me kin kihong kaweid nan awamwail akan, oh perehkin kumwail mwetehn ni limei kat, pwe I en kak sohngedi pahn lahng oh koasoanehdi poahsoan kan en sampah, oh mahsanihong Saion: Kilang, kumwail iei nei aramas.

17 Serusalem pirida, pwourda, oh kesihnenda, ke nimalahr kep en lokolok me Kauno ketikihonguhkehr nan sapwellime engieng—ke nimalahr mwoahrok en nan kepo oh wasaskiseli.

18 Oh nanpwungen nah pwutak kan me e naitikihdier, sohte me kak kahluwa; nanpwungen nah pwutak kan me e apwaliada sohte me kak kolada peh.

19 Noumw pwutak riemen pwukat me samwodohr rehmw, ihs me pahn poakeiukala—ke tehnlahr oh kamwomwalahr, oh lehk oh mahwin lelohnguhk—oh ihs me I pahn kansenamwahuiekin uhk?

20 Noumw pwutak kan lipwongmasalahr, ihte meh riemenet me saik; irail kin wonohn ni ewen ahl akan koaros; duwehte kouwol lawalo men eh lohdi nan uhk ehu, re kehnehr engieng en Kauno, oh omw Koht ketin angiangihrailda.

21 Eri kumwail rong met, kumwail wie lokolok, oh sakaulahr, ahpw kaidehn wain me kahrehda.

22 Kauno ketin mahsanih, Kauno oh amwail Koht pahn ketin kasalehda pwuhng en sapwellime aramas akan; kilang, I ketikihsangehr nan pehmwail kan kep en lokoloko, mwoahrok en nan kep en ei engieng; kumwail solahr pahn pwurehng nim.

23 Ahpw I pahn kiheng nan pehn irail kan me kahpwalihiukalahr; me kin ndahiong uhk: Dairukedi, pwe se en kak sok pohmw—oh ke kin wendieng nanial oh re kin sok pohmw likamwete kowe pwehl.

24 Saion, pirida, pwourda oh kehlailada; pwuhrieng nan ahmw likou kaselel kan, kowe Serusalem, kahnihmw sarawi: pwe sang met kohla me samin kan solahr pahn pidolong nan omw kahnihmw.

25 Serusalem, sipedasang rehmw pwelipar akan; kesihnenda, mwohndieng nan dewemwen; sapwadasang sahl me pire tepinweremwen, kowe serepein kalidu en Saion.