1 Ahpw kilang, aramas tohto—ni rahno me I pahn usehla wia doadoahk kapwuriamwei nanpwungarail, me I pahn tamanda ei inou kan me I wiahiongehr aramas akan, pwe I pahn pwurehng kihwei pehi kan keriapak pwe en kihpene nei aramas akan, me iei peneinei en Israel;

2 Oh pil, me I pahn tamataman inou kan me I wiahiong kowe, Nihpai, oh pil ong ahmw pahpa, me I pahn tamataman kadaudokomw kan; oh me mahsen en kadaudokomw kan pahn kohwei sang nan aweiet ong kadaudokomw akan; oh ngilen ei mahsen akan pahn kohwei ni imwin sampah, pwe en wia kilel ehu ong nei aramas akan, me iei peneinei en Israel kan;

3 Oh pwehki ngilen ei mahsen akan pahn kohwei—Mehn Liki tohto pahn nda: Paipel! Paipel! Miehier nait Paipel, oh sohte kak en mie pil ehu Paipel tohrohr.

4 Ahpw Kauno Koht ketin mahsanih: Irail pweipwei kei, e pahn mie neirail Paipel; oh e kohsang rehn Mehn Suhs akan, nei aramas en inou en mahso. Oh ia mwomwen arail kalahngan ong Mehn Suhs akan pwehki Paipel me re alehdier sang rehrail? Ei, dahme mih nan ehn Mehn Liki kan arail madamadau? Irail kin tamataman kahpwal akan, oh doahdoahk kan, oh medek en Mehn Suhs akan, oh arail loaloapwoatohng ie, wewahdo komour ong Mehn Liki kan?

5 Kumwail Mehn Liki kan, kumwail tamataman Mehn Suhs oko, nei aramas en inou en mahso? Soh; ahpw kumwail keriairailla, oh kailongkin irail, oh sohte men kapwureirailpene. Ahpw kilang, I pahn kapwukoahkin kumwail mepwukat koaros; pwe ngehi Kauno sohte pahn manokehla nei aramas akan.

6 Kumwail pweipwei, me kin nda: Paipel, miehier nait Paipel, oh se sohte anahne pil ehu Paipel. Mie ehu Paipel kumwail alehdi likin me kohsang rehn Mehn Suhs akan?

7 Kumwail sehse me mie wehi tohto a kaidehn ehute? Kumwail sehse me ngehi, Kauno amwail Koht, me ketin kapikada aramas koaros, oh me I tamataman irail akan me kin mihmi pohn deke kan en nansed; oh I kin kakaun nanleng oh sampah; oh I kin kihwei ei mahsen ong aramas koaros, mehlel, wehi kan koaros pohn sampah?

8 Dahme kumwail kaulimki amwail pahn alehdi ekei ei mahsen? Kumwail sehse me kadehdehn wehi riau e kasalehiong kumwail me ngehi iei Koht, me I tamataman ehu wehi duwehte mehteio? Eri, I kihwei ei mahsen akan ong ehu wehi duwehte mehteio. Oh ni ahnsou me wehi riau pwukat pahn ehupene ara kadehde kan pahn pil ehupene.

9 Oh I wia met pwe I en kak kasalehiong aramas tohto me I duduwehte aio, rahnwet, oh kohkohlahte; oh I kihwei ei koasoai sang ni pein nsenei. Oh pwehki ei nda ehu mahsen a kumwail sohte anahne medemedewe me I sohte kak pil kihwei ehu mahsen tohrohr; pwe ei doadoahk saikinte imwsekla; oh e sohte pahn imwisekla lao lel imwilahn aramas, de pil sang ahnsouo kohkohlahte.

10 Eri, pwehki eh mie Paipel rehmwail kumwail sohte anahne medewe me e audaudkidahr ei mahsen kan koaros; de pil medewe me I sohte pahn ketikihwei ekei me pahn ntingdi.

11 Pwe I mahsanihong aramas koaros, ni palimese oh ni palikapi, oh ni paliepeng, oh ni palieir, oh pohn dekehn nan sehd akan, me irail pahn ntingihdi mahsen akan me I pahn mahsanihong irail; pwe sang nan pwuhk kan me pahn ntingida I pahn kadeingki sampah, emen emen aramas nin duwen ah wiewia kan, nin duwen dahme ntingdi.

12 Pwe kilang, I pahn mahsanihong Mehn Suhs akan oh irail pahn ntingihdi; oh I pahn pil mahsanihong Mehn Nihpai kan oh irail pahn pil ntingihdi; oh I pahn pil mahsaniong ekei keinek en peneinei en Israel, me I pil kahluwahla, oh irail pahn ntingihdi; oh I pahn pil mahsanihong wehi kan koaros pohn sampah oh irail pahn ntingihdi.

13 Oh kedekedeo Mehn Suhs akan pahn alehdi mahsen en Mehn Nihpai kan, oh Mehn Nihpai kan pahn alehdi mahsen en Mehn Suhs akan; oh Mehn Nihpai kan oh Mehn Suhs akan pahn alehdi mahsen en ekei keinek en Israel me salongalahr kan; oh keinek en Israel me salongalahr kan pahn alehdi mahsen en Mehn Nihpai oh Mehn Suhs akan.

14 Oh kedekedeo nei aramas akan, me iei kisehn peneinei en Israel, pahn kopwurupwurpene nan uhdakarail nan sapwarail sahpw en sohso kan; oh ei mahsen akan pahn kohpene wiahla mahsen ehute. Oh I pahn kasalehiong irail akan me kin uhwong ei mahsen oh uhwong nei aramas akan, me wia peneinei en Israel, me ngehi iei Koht, oh I inoukihong Eipraam me I pahn tamatamante kadaudoke kan kohkohlahte.