1 Oh ngehi ahpw pahn koulkiheng me I kin poakpoake oapwoat koul duwen ih, me pid sapwellime mweten waino. Maing komwi me I kin poakohng me sapwellimanki mwetin wain ehu pohn dohl pwelmwahu ehu.

2 Oh e ketin kelehda, oh akerasang takai kan loale, oh ahpw padokedieng loale tuhkehn wain me keieu kaselel, oh pil kauwada wasahn doulik ehu nanwerengeo; oh pil wiahda wasahn tiak kreip kan; e ahpw kin kasikasik kreip kaselel kan sang tuhkehn wain kan, ahpw e wah kreip katik kei.

3 Oh met, kumwail Mehn Serusalem kan, oh ohl en Suda kan, kumwail menlau tehk mwahu nan pwungen ngehi oh ei mwetin waino.

4 Dahme anahnepen wiawihong nan mwetin waino me I sohte wia loale? Eri, ahnsou me I kasikasik en wah kreip e ahpw wahda kreip katik kan.

5 Oh met kumwail kohla; I pahn ndahiong kumwail dahme kumwail pahn wia nan ei mwetin waino—I pahn kihsang kelepe, oh e pahn mwongehla; oh I pahn kawehla kehl kan, oh e pahn tiatipeseng;

6 Oh I pahn kawehla; e sohte pahn kin mwetida de uhpwel; ahpw dihpw suwed oh tekatek kan me osada; I pahn pil koasonehdi depwek kan en dehr kamwerehdi kotou powe.

7 Israel iei sapwellimen Kauno Wasalapalap mwetin waino, oh ohl en Suda kan iei sapwellime tuhkeh ko.

8 Meid suwed ong kumwail me kin alialehda ihmw kan oh sahpw tohto, lao sohla wasahn ehn ekei arail kousoan!

9 I rongehr, Kauno Wasalapalap mahsanih, ni mehlel tohto ihmw pwukat pahn tehnla, oh kahnihmw lap oh kaselel kan pahn sohla kanenge.

10 Ei, mwetin wain en sahpw eiker eisek pahn wiahda ehu pad de uwen kalon en wain limau elep, oh ehu ohmer en weren tuhke de kapakap en weren tuhke eisek riau elep pahn wiahda ehu epah de eisek kis ehu en ohmer.

11 Meid suwed ong irail me kin pirida ni menseng, pwe irail en nim sakau, lao lel nihpwong, oh irail parikihla sakau!

12 Oh nan arail kamadipw kan irail kin kemwekemweitki keseng arp, oh paiolin, damporin, oh keseng pepeuk, oh niminim wain; ahpw re sohte kin kilang doadoahk en Kauno, de pohnese doadoahk kan me e ketin wiadahr.

13 Eri, nei aramas akan samwalahr nan kaludu, pwehki arail sohte kak wehwehki; oh arail kaun akan duhpeklahr, oh neirail aramas akan lokolongki ahr men nimpildahr.

14 Eri, ehl kalaudelahr pein ih, oh sarapesengehr; oh arail lingan, oh neirail aramas akan, arail pweidah kan, oh me pahn perenda, pahn kohdihla loale.

15 Oh ohl lemeio pahn dairukedi, oh ohl kehlailo pahn karakarahkala, oh me aklapalap akan pahn akitikitikla.

16 Ahpw Kauno Wasa Lapalap pahn ketin lapalapala nan mwoale, oh Koht me sarawi pahn ketin sarawihkihla wiewia pwung kan.

17 Sihmpwul kan ahpw pahn mwonge ni wiepen arail kin mwonge, oh Mehn Liki kan pahn mwonge wasa me mworourou kan kin mwonge ie.

18 Meid suwed ong irail akan me kin wurahdekehki arail wiewia suwed akan sahl soh katepe, oh dihp akan rasohng wawaingki sahl kuruma ehu.

19 Me pahn nda: mweidehng en ketin karuwaruhdo, en ketin mwadangodohng sapwellime doadoahk, pwe kitail en kak kilang; oh mweidehng sapwellimen Koht Sarawi en Israel kaweid en kohdo, pwe kitail en esehla.

20 Meid suwed ong irail akan me kin kahdaniki suwed me mwahu, oh mwahu me suwed, me kin wekidohng rotorot ni marain, oh marain ong ni rotorot, me kin wekidala mehkot katik ong me mem oh mem ong me katik!

21 Meid suwed ong irail akan me kin kosekose me irail loalokong oh koahiek!

22 Meid suwed ong irail akan me kin kehlail en nim wain, oh ohl kehlail kan me kin doaloapene sakau kehlail kan;

23 Me kin pilada me suwedo pwe en ale kisakis, oh soikala ehn me mour pwungo eh wiewiahn mour pwung!

24 Eri, duwehte kisiniei eh pahn isikada ahlek, de isikala dipenihd, iei duwen kalewemwail akan e pahn mwoasoahngotala, oh amwail mpwek pahn kohda rasohng pwelpar; pwehki arail keselahr sapwellimen Kauno Wasa Lapalap kosonned akan, oh soikalahr sapwellimen Koht Sarawi en Israel mahseno.

25 Eri, Kauno ahpw pahn engiengda pahn sapwellime aramas akan, oh e ketin kapalahng irail lime kan, oh ketin kaloke irail; dohl akan pahn rerer, oh paliweren me melahr akan pahn mwerpeseng nan werengen ahl akan. Mendahte soahng pwukat wiawi sapwellime engiengo sohte pahn tokedi, ahpw e pahn kapahweite limeo.

26 Oh e pahn ketin langahda kilel ehu ong wehi doh kan, oh e pahn malipehkinirail kepitie pwe irail en kohdo sang keimw en sampah; oh kilang, irail pahn mwadangete kohdo; sohte emen rehrail pahn pwangada de dipekelekel.

27 Sohte me pahn sohla kehn wasa de meirla; sohte me arail kateng pahn mwer, de sahl en arail suht ohla;

28 Me neirail arep kan pahn keng, oh neirail kesik ketieu kan koaros onopadahr en kesik, oh pahn nehn neirail oahs akan kehlail duwehte takai, oh neirail daiahkan pahn marahra duwehte kisinieng kehlail, ngilarail pahn duwehte ngilen laion.

29 Irail pahn ngiringir duwehte laion pwulopwul men; mehlel, irail pahn ngiringir, oh kalowehdi kenerail mahn, oh wahlahng wasa me sohte me kak kihsang.

30 Oh ni rahno irail pahn ngiringiriong irail duwehte ngilen nan madau; oh ma irail pahn kilenglahng nan sahpwo, kilang, irail pahn kilangada rotorot oh pahtou, oh marain en nanleng pahn rotorotala.