Iralaud 7
Seikop pousehla wadewadek sang nan Aiseia: Aiseia karasaraski mesaia o—Mesaia o pahn sapwellimaniki koahiek en koasoakoasoi—E pahn ketin sohpeisang soun kamakam akan—E sohte pahn likamwada—Karasahiong Aiseia 50. Ele Sounpar 559–545 Mwohn Krais.
1 Ei, Kauno mahsanih: ia duwe, I kadarkumwailahr, de I keseikumwailahr douluhl? Iei met Kauno mahsanih: Ia nein amwail nohno kisinlikoun kamweid? Ihs me I mweidkumwailahng, de ihs me I pweipwandehng me I netikinkumwailahng? Ei, ihs me I netikinkumwailehng? Kilang, pwehki dipamwail akan me kumwail pein netkinkumwailla, oh pwehki amwail sapwung kan amwail nohno mweisang.
2 Eri, ahnsou me I kohdo, sohte aramas; ahnsou me I lukuwer, mehlel, sohte me sapeng. Kumwail peneinei en Israel kan, ia duwe, limei kat sohte kak lellewei rehmwail pwe en doareikumwailla, de I sohte ahneki manaman en kapitkumwaila? Kilang, I kak kamadahkihda nan madau ei mahsen, I kawekala pilap akan ong sapwtehn oh arail mwahmw akan matala pwehki pihl akan ahr madada, oh irail mehkihla arail men nimpil.
3 I kin karotongehla pahnlahng, oh I kin perehkihla likoun nsensuwed.
4 Kauno Koht ketkihongie ewen aramas semen, pwe I en kak ese ia mwomwen ei pahn koasoai ong kumwail, Peneinei en Israel kan. Ni ahnsou me kumwail kin luwet e kin pangipaninginie I en sangkenei. E kin ketin panginiehda pwe I en rong duwehte me semen men.
5 Kauno Koht ketin ritingadahr salengeiet, oh I sohte kahngohdiong, de pil sohpeisang.
6 I mweidehng irail en woakih pohn tihnseweie, oh sohte irehdi ahr lahlaweie. I sohte kin ruksang ahr kandipih meseie oh kanamenekihe.
7 Arail lahlaweie sohte pahn kamedekeiehla, pwe Kauno Koht pahn seweseie. Eri I pahn kanengamahiong duwehte takai kehlail ehu, pwe I ese me I sohte pahn namenekla.
8 Oh Kauno ketin karanih ie, oh e kin ketin doareiehla. Ihs me pahn pelian ie? Mweidehng sen kesihnen pene. Ihs me kin wiahiong ie kahpwal? Mweidehng en keido, pwe I pahn kemehki ei koasoai kehlail.
9 Pwe Kauno Koht pahn ketin sewese ie. Oh irail koaros me pahn uhwong ie, kilang, irail koaros pahn sohrala duwehte likou me loangenmwet kan pahn kangala.
10 Ihs rehmwail me kin wauneki Kauno, me kin peikiong mahsen en sapwellime ladu, me kin kekeid nan rotorot oh sohte marain?
11 Kilang kumwail koaros me kin sounda kisiniei, me kin kapikapil kin kumwail dimwamwahi kan, kekeid nan pein amwail marain en kisiniei oh nan dimwamwahi kan me kumwail pein parada. Met kumwail pahn alehsang ie—kumwail pahn mehla nan amwail nsensuwed.