1 Ahpw, rotidio sohte pahn duwehte ah lokolok, ni ahnsou me nahnmwarki en Asiria tep ekis kaloke sahpw en Sepulon, oh sahpw en Napdali, oh mwuhr ahpw kaloke laud irail me mihmi nan ahl en kohlahng Sehd Weitahta palio Sordan nan wein Kalili.

2 Aramas akan me kin weweid nan rotorot kilangehr marain lapalap ehu; irail me kin mihmi nan sahpw en soukoapwoaroapwoar, maraino kamarainih iraildahr.

3 Komwi katohtowehlahr tohn wehi, oh kalaudehla arail peren—irail perendahr mwohmwi duwehte peren en ahnsou en rahk, oh duwehte aramas arail kin peren ni arail nehkpeseng dipwisou kan.

4 Pwe komwi kawelahr arail mehn wisik toutou kan, oh tuhkehn pohn pwopwerail kan, arail mehn kamakam kan.

5 Pwe nan mahwin koaros e kin mie ngihl kapingiping, oh likou kan ntahla; ahpw met e pahn wia isihs oh kahs en isihs.

6 Pwe seri kis ipwidiongkitailehr, kisin pwutak emen kohiengkitailehr; oh e pahn wiahla atail kaun; oh e pahn mwareniki, Kupwuramwahu, Sounkaweid Kupwurokong, Koht Wasalapalahpie, Sahm Poatoapoat, Nahnmwarki en Popohl.

7 Sapwellime doadoahk en kaun oh popohl sohte pahn imwila, nan mwoahl en Depit, oh sapwellime kaweid nan wehio, oh e pahn koasoanehdi tenek pwung oh kopwung pahrek sang met kohkohlahte. Sapwellimen Kauno Wasalapalap loaloapwoat me pahn kahrehda.

8 Kauno ketin kadaredohngehr Seikop sapwellime mahseno oh e kamaraindahr Israel.

9 Oh aramas koaros pahn ese, iei Ipram oh Mehn Sameria kan, me kin nda nan mohngiongarail pohnmwahso oh aklapalap:

10 Takain koaskoasok kan pwupwidier, ahpw kitail pahn pwurehng koasokehkihda takai pweilaud kan; tuhke sikamohr kan tupwidihsangehr, ahpw kitail pahn wiliankihdi tuhke sihdar kan.

11 Eri Kauno pahn koasonehdi kahpwal ong Resin, oh kapatapene ah imwintihtih kan;

12 Mehn Siria kan mwowe oh Mehn Pilisdia kan mwuri; oh irail pahn kapwonehla Mehn Israel kan. Eri pwehki soahng pwukat koaros sapwellime engieng saikinte uhdihsang irail, ahpw e kin ketin kapahweite lime kan.

13 Pwe aramas akan sohte kin sohpeidohng ih me kin kaloke irail, re pil sohte kin rapahki Kauno Wasalapalap.

14 Eri Kauno pahn ketin lupukasang Israel moange oh pwadaiki, rah oh kadoke nan rahn ehute.

15 Me mah, iei ih me moangehu; oh soukohp me kin padahk likamw, iei ih me pwadaikio.

16 Pwe kaun akan en aramas pwukat kahredahr arail sapwungala; oh irail akan me re kin kaweid kamwomwalahr.

17 Eri Kauno sohte pahn perenki neirail pwutak pwulopwul kan, oh sohte pahn kupwur kalahnganohng neirail seri sepwoupwou kan oh lihodi kan; pwe irail koaros kin liksansalmwahu oh wiewia suwed, oh irail koaros kin lokaia mwahl. Eri pwehki soahng pwukat koaros sapwellime engieng saikinte uhdihsang irail, ahpw e kin ketin kapahweite lime kan.

18 Pwe wiewia suwed kan duwehte isihs en kisiniei; e pahn kapwonehla dihpw tekatek kan, oh dihpw en nanwel kan, oh re pahn kohda duwehte ediniei me kin kohkohda.

19 Sang engieng en Kauno Wasalapalap sahpwo pahn rotala, oh aramas akan pahn rasohng kahs en kisinieio; sohte emen pahn kak komourala rie ohl.

20 Oh e pahn porki peh pali koahiek oh men mwonge; oh e pahn mwongehki peh pali soakoahiek oh sohte itariki; irail pahn pein kangkang pein pehrail—

21 Manase, Ipram; oh Ipram, Manase; irail patpene oh uhwong Suda. Eri pwehki soahng pwukat koaros sapwellime engieng saikinte uhdihsang irail, ahpw e kin ketin kapahweite lime kan.