1 Mahsen en Seikop, rien Nihpai, me e kaweidkihong aramas en Nihpai kan:

2 Kilang, riei ohl kesempwal akan, Ngehi, Seikop, Koht ketin malipeie, oh kasarawialahr ni wiepen sapwellime koasoandi sarawio, oh kamanamanla sang rieio, Nihpai, me kumwail kin wiahki amwail nahnmwarki de silepamwail, oh me kumwail kin koapwoaroapwoarki en wia doarepemwail, pwe kilang kumwail ese me I kaweidkinkumwailehr soangen kaweid tohtoh kouwalahpie.

3 Ahpw, I pwurehng kaweid kumwail; pwe kamwahupen palingenamwail akan me I nsenohki. Iei, I inenen pwunodkin kumwail; oh kumwail esehier met. Pwe I kin ngoangki panawih kumwail; oh I padahkihong kumwail mahsen en ei pahpao; oh I padahkihong kumwail duwen soahngkan koaros me ntingdier, sangete ni kepikipikdahn sampah.

4 Oh met, kilang, I pahn kaweidkin kumwail duwen soahng koaros me wiewiawi met, oh me pahn wiawi mwuhr; eri, I pahn wadekehng kumwail mahsen en Aiseia. Oh mahsen pwukat me riei pwutako mwahuki I en kaweidkin kumwail, pwe en wia kamwaupemwail, pwe kumwail en kak esehla oh kalinganahki mwaren Koht.

5 Oh met, mahsen me I pahn wadekada kan iei mahsen kan me Aiseia ketihtihki duwen peneinei en Israel kan; eri, kumwail en karasahiong pein kumwail, pwe kumwail wia kisehn peneinei en Israel. Oh soahng tohto me Aiseia ketihtihkier me kumwail kak karasahiong pein kumwail, pwe kumwail iei peneinei en Israel.

6 Oh Iet mahsen oko: Kauno Koht mahsanih: Kilang, I pahn kapahwei limeiet pohn wein Mehn Liki kan, pwehn kasalehda ei koasoandi sansal kan ong aramas akan; oh irail ahpw pahn kol pehn noumwail pwutak kan oh kahreirail, oh pahn wa noumwail serepein kan pohn pwopwerail akan.

7 Oh nanmwarki kan pahn kin apwalih kumwail duwehte pahpa kan, oh lih nanmwarki kan pahn kin apwalih kumwail duwehte nohno kan; irail pahn poaridi mwohmwail, oh kamwakelehsang pwelipar en paten nehmwail kan; oh kumwail pahn dehdehki me ngehi me Kauno; pwe mehmen me kasikasikie sohte pahn namenekla.

8 Oh met Ngehi, Seikop, pahn kawehwehda duwen mahsen kat. Pwe kilang, Kauno ketin kasalehiongie irail ko me Mehn Papilon ko kemelahr oh salihdier, me mih Serusalem, iei, wasa me se kohsangie.

9 Ahpw, Kauno ketin kasalehiongie me irail pahn pwurehng pwurodo. Oh e pil ketin kasalehiongie me Kauno Koht, Koht Sarawi en Israel, pahn ketin pwaredohng irail ni paliwar; oh mwurin eh pahn pwaredohng irail, irail pahn kaloke oh kalohpwuala ih, nin duwen dahme tohnlengo padahkihongie.

10 Oh mwurin arail pahn kasalehiong Koht Sarawi en Israel arail keptakai oh pohnmwahso, kilang, e pahn ketin kadeikirailda. Rahno pahn kohdo me irail pahn lokolok oh ahneki kahpwal.

11 Eri, mwurin arail pahn pekeusla, tohnlengo mahsanih, tohto irail pahn lokolongki, ahpw sohte pahn mehkihla, pwehki ahn me loaloapwoat kan arail kapakap akan; irail pahn mwerpeseng, oh kamakam, oh kailok; ahpw, Kauno pahn ketin mahkohng irail, ma irail pahn kamehlele arail Sounkomouro, irail pahn pwurehng pwurpene nan sapwerail sahpw akan me re sohsohki.

12 Oh meid pahi Mehn Liki kan, me soukohpo ntingihdier duwe; pwe kilang, ma re pahn koluhla oh sohte mahwiniong Saion, oh dehr iangala mwomwohdiso ndand oh suwedo, irail pahn komourla; pwe Kauno Koht pahn ketin kapwaiada sapwellime inouo me e ketin inoukihongehr sapwellime seri kan; oh kahrepe wet me soukohpo ntingihkihdi mepwukat.

13 Eri, irail me pahn mahwiniong Saion oh sapwellimen Kauno aramas en inouo pahn kamwakelehsang pwelipar en paten nehrail akan; oh sapwellimen Kauno aramas akan sohte pahn namenekla. Pwe aramas me kin kasikasik Kauno iei irail sapwellime; pwe irail me kin kasikasikte ketdohn Mesaia o.

14 Oh kilang, nin duwen mahsen en soukohpo, Mesaia o pahn ketdo keriau pwe en ketin kapwurepene sapwellime aramas akan; eri, e pahn ketin pwarohng irail ni manaman oh lingan kouwahlap, oh kamwomwala arail imwintihti kan, eri ni ahnsou me rahno pahn lelledo irail ahpw pahn kamehlehla; oh e sohte pahn kamwomwala irail akan me kamehlele.

15 Oh irail me sohte kamehlele pahn kamwomwomwla, nan kisiniei, oh melimel, oh rerrer en sahpw, oh kakerehdi nta, oh soumwahu, oh lehk. Oh irail ahpw pahn dehdehki me Kauno Koht, iei wia Koht Sarawi en Israel.

16 Dipwisou kan pahn kapwurupwursang me lapalap, de me sensel kan pahn lapwada?

17 Kauno me Mahmahsen: Irail akan me sensel pahn me lapalap akan pahn saledekla, oh dipwisou lohdi kan me aramas lemei kalowehdi pahn kopwurupwursang; pwe Koht Wasa Lapalahpie pahn kapitala sapwellime aramas en inouo. Kauno me Mahmahsen: I pahn pelian irail akan me pahn pelian kumwail—

18 Oh irail me kin kalokeikumwail, I pahn kamwengehkin irail pein udukarail; oh irail pahn sakaukihla pein ntahrail rasehng wain me iou; oh koaros pahn dehdehki me Ngehi Kauno iei amwail Sounkomour oh Soundoar, Wasa Lapalahpie en Seikop.