Te Ohipa Hanahana o te Tatarahapa e o te Bapetizo

E mea faufaa te tatarahapa e te bapetizo ia riro ei mau tamarii ai’a no te basileia tiretiera.

Aamu o te Oraraa o Joseph F. Smith

Ua bapetizohia o Joseph F. Smith i te 21 no Mati 1852 i te Oire no Roto Miti, i roto i te pape no City Creek i te poro poromu o te Temple Square. Ua faaotihia te oro’a e te Peresideni Heber C. Kimball, e melo i roto i te Peresideniraa Matamua e e hoa fatata roa no te metua tane o Iosepha i taparahi pohehia. A faati’a ai oia i te huru o taua mahana râ, ua parau Joseph F. Smith: “Ua feruri au i roto ia’u iho e ua hara anei au—e parau mau roa aita vau i faaea hara ore noa—ua faaorehia râ te reira; e ua tamâhia vau; ua puta pû roa to’u aau, e ua mana’o ihora vau e, eita vau e haamauiui faahou i te mau manumanu rii. E te hinaaro nei au i te rave i te ohipa maitai i te mau vahi atoa e ni’a i te mau taata atoa e i te mau mea atoa. Te ite ra vau i te hoê oraraa apî e te hiaai apî ia rave i te mea maitai. Aita roa hoê a’e huahua hinaaro i te rave i te ino i roto ia’u. Parau mau, e tamarii rii roa â vau i to’u bapetizo-raa-hia area râ, teie te faaûrûraa i tae mai i ni’a iho ia’u, e ua ite au e, no ô mai i te Atua, e ua riro te reira mai te hoê ite ora no’u na roto i to’u fariiraa i te Fatu.” ¹

I roto i te taatoaraa o to’na oraraa, ua tamata te Peresideni Smith i te faahanahana i te mau fafauraa o ta’na i rave i roto i te taime o to’na bapetizoraa. Ua haapii oia e, ia tatarahapa i te hara, e mea faufaa te reira no te haapaoraa i teie mau fafauraa; “Te ti’aturi nei au i te parau tumu o te tatarahapa, no te mea ua tamata au i te reira e ua ite au e e mea maitai. Mai te mea i roto i te hoê taime nevanevaraa ua parau vau e aore râ, ua rave vau i te hoê mea o tei faainoino i to’u taea’e, eita roa vau e oaoa e aore râ, e matara i rapae i taua mau taupupuraa maoti râ, ia haere au e tatarahapa e e faaafaro i ta’u hapa ra ia’na. I reira ïa te hopoi’a e mâmâ ai e i reira vau e ite ai i te huru mau o te tatarahapa.”²

Haapiiraa na Joseph F. Smith

E mau parau tumu mau te tatarahapa e te bapetizo no te evanelia.

Te hinaaro nei au e parau ia outou e e parau mau te mau parau tumu o te evanelia—te mau parau tumu no te faaroo i te Atua, te tatarahaparaa i te hara, te bapetizoraa no te faaoreraa i te mau hara na roto i te mana o te Atua, e te tu’uraa o te rima no te horo’araa i te Varua Maitai; e parau mau roa teie mau parau tumu e e mea titauhia no te faaoraa i te mau tamarii a te taata, noa’tu e o vai ra ratou e aore râ, tei hea roa ratou.… Aita te hoê taata e nehenehe ia tomo i roto i te basileia o te Atua maoti râ, ia fanau faahouhia oia i te pape e te Varua. E mea titauhia teie mau parau tumu, no te mea na te Atua te reira i parau. E ere hoi e na te Mesia ana’e te reira i parau mai na to’na iho reo, e na roto i te reo o ta’na mau pìpì mai te mau u’i e te mau u’i o te mau tau tahito ra tera râ, i roto i teie mau mahana hopea nei, ua horo’a atoa mai ratou i taua iteraa papu ra e ua faaite i te reira i to te ao nei. E parau mau te reira i teie mahana mai te matamua mai â, no reira, e mea ti’a ia tatou ia haapao.³

E mea ti’a ia tatou ia haapao i te hinaaro o te Metua. E mea pinepine au i te faaroo i te taata ia parau e, “Te mea o te titauhia i te hoê taata i te ao nei oia ïa, ia vai parau-ti’a e ia vai afaro noa oia,” ei reira te faateiteiraa e te hanahana e roaa ai ia’na. O ratou o te mana’o ra mai te reira te huru, aita ia ratou i haamana’o i te parau a te Fatu e, “Ia ore te taata ia fanau faahou ra, e ore oia e ite i te basileia o te Atua ra.” [A hi’o Ioane 3:3.].… Noa’tu e eaha to’na huru, to’na tura, e to’na parau-ti’a, e titauhia oia ia haere na teie uputa ia nehenehe ia’na ia tomo i roto i te basileia o te Atua. E titau mai te Fatu i te reira. No reira, mai te mea e pato’i oia e aore râ, e otohe oia i te tomo na te uputa o te aua mamoe ra, eita ia oia e riro ei taata tufaa i te Atua ra e e taata tufaa e te Mesia ra.⁴

E mea mure ore te parau no te tatarahapa, e e vairaa to’na, e ua riro te reira ei tufaa taato’a no te evanelia a Iesu Mesia hoê â ia huru e: “eiaha roa oe e taparahi noa i te taata,” e aore râ, “eiaha roa to oe ei Atau ê atu, ia’u nei.”

Te bapetizoraa ia matara te hara na te hoê i mau i te mana, e parau tumu mure ore ïa, no te mea, na te Atua i faatupu e i faaue i te reira, e aita hoi te Mesia i ape ia ore e faatura i te reira; ua haapao râ oia ia nehenehe ia’na ia faati’a i te ture o te parau-ti’a.⁵

Ua haapii te Fatu na roto ia Iosepha Semita i teie mau parau tumu i titauhia no te faaoraa i te mau tamarii a te taata nei i roto i; te tatarahapa e te bapetizoraa na roto i te faahopuraa e te Mesia, ua tanuhia tatou e o Oia atoa i roto i te pape, i roto i te pape o te menema, e ia ti’a faahou mai roto mai i te pape o te menema ei hoho’a no To’na ti’a faahouraa mai te pohe mai e a haere atu ai i te ora, e te bapetizoraa a te Varua Maitai na roto i te tu’uraa rima.⁶

Te Tatarahaparaa mau ana’e te fariihia e te Atua.

E faaorahia e e faateiteihia te mau taata i roto i te basileia o te Atua na roto i te parau-ti’a, no reira e mea ti’a ia tatou ia tatarahapa i ta tatou mau hara, e ia haere i roto i te maramarama mai te Mesia i roto i te maramarama, ia tamâ to’na toto i ta tatou mau hara atoa, e ia aupuruhia tatou e te Atua e ia farii i to’na hanahana e te faateiteiraa.⁷

Te tatarahapa, o te otoraa ïa i te hape i ravehia? E, tera râ, o te reira ana’e ïa? Aita roa. Te tatarahaparaa mau ana’e te fariihia e te Atua, aita atu ai. Eaha te tatarahapa mau? E ere ïa i te oto noaraa no te mau hara i ravehia, te faaîraa ma te haehaa mau e te mihiraa i mua i te Atua tera râ, o te faarue roaraa e te vaiihoraa i te ino, te faaapîraa i te oraraa taato’a, te tauiraa i te ino i roto i te maitai, te viivii i roto i te peu maitai, te pouri i te maramarama. Taa ê noa’tu i te reira, te faaafaroraa i te mau peu iino o tei ravehia e tatou, te aufauraa i ta tatou mau tarahu e i te faahoiraa i ta te Atua e i ta te taata hoi mau ti’araa- o te ra ïa ta tatou mau aitarahu. O tera ïa te tatarahapa mau, e ia faaohipa i te hinaaro e te mana’o o te mau puai o te tino e o te varua no te faatupuraa i teie ohipa hanahana no te tatarahapa; i reira te Atua e farii ai i te reira.⁸

Aita te faaîraa na roto noa i te parau e fariihia e te Atua mai te mea aita te reira e faaohipahia. E mea titauhia te ohipa oia atoa te faaroo; e mea ti’a ia tatou ia rave oia atoa ia faahua rave.⁹

O vai te nehenehe ia parau i roto i to’na aau, i mua i te Atua e i te taata e, “Ua tatarahapa mau au i ta’u mau hara atoa.” … E mea rahi to’u paruparu e to’u mau hapehape. E rave rahi to’u paruparu mai ia outou atoa na, e ua ite atoa ra vau e, ua hau atu ta’u i ta outou.… Aita â i roaa ia’u i te ora i te piti o teie parau tumu o te evanelia a Iesu Mesia; e te hinaaro nei au ia ite e, o vai ra te taata i upoo ti’a i te reira. Te hinaaro nei au ia ite i te taata poro o tei manuïa i te raveraa i te reira. Tera râ, te tama nei au, te hinaaro nei au ia outou ia maramarama, e to’u mau taea’e e to’u mau tuahine, te tamata noa nei â vau.¹⁰

Eita outou e nehenehe ia rave i te hoê taata taparahi taata,… te hoê taata faaturi, te hoê taata haavare e aore râ, te hoê taata peu iino i roto i teie oraraa nei, e na roto noa i te faaotiraa i te hoê oro’a o te evanelia, e tamâ ia’na i te hara e ia arata’i ia’na i mua i te aro o te Atua. Aita te Atua e faati’a i te hoê faanahoraa mai teie te huru, aita atoa te reira e nehenehe ia ravehia. Ua parau oia, a tatarahapa outou i ta outou mau hara. E tatarahapa te feia parau-ti’a ore i ta ratou mau ohipa parau-ti’a ore. O ratou o tei pohe ma te ite ore i te evanelia, e faaitehia te reira ia ratou, e o ratou o tei hara i te maramarama, e faahoi ia ratou i te koderane iti hopea no ta ratou mau ofatiraa ture e to ratou faarueraa i te evanelia, hou ratou a hoi mai ai. Eiaha e haamo’e i te reira. Eiaha ia mo’ehia ia outou e te mau peresibutero o Iseraela oia atoa ia outou e te mau metua vahine i Iseraela; e, ia imi outou no te faaora i tei ora e aore râ, i tei pohe, a haamana’o e nehenehe outou e rave i te reira mai te mea ua tatarahaparaa e ua farii ratou i te faanahoraa o te ora.11¹¹

Ua tae i te taime faahauraa … e mea ti’a ia tatou … ia ani i te Fatu ia horo’a mai i te varua o te tatarahapa, e, ia farii ana’e i te reira, ia pe’e i ta’na mau faaitoitoraa; na roto i to tatou faahaehaaraa ia tatou iho i mua Ia’na e i te imiraa i te faaoreraa hara te tahi i te tahi, e mea ti’a ia tatou ia faaite i te aroha e te piripiri ore ia ratou o te hinaaro i ta tatou faaoreraa hara o ta tatou i ani e o ta tatou i tia’i no te Ra’i mai.¹²

Mai te mea e te vaira te ora tei reira atoa te ti’aturi, e mai te mea tei reira te tatarahapa tei reira ïa te hoê fana’oraa no te faaoreraa hara; e mai te mea tei reira te faaoreraa hara, te vaira ïa te hoê fana’oraa no te faahaereraa e te faarahiraa e tae roa’tu e, ua roaa te ite ato’a o teie mau parau tumu no te faateitei e no te faaora ia tatou e no te faaineineraa ia tatou ia tomo i roto i te parahiraa o te Atua te Metua.¹³

Na roto i te bapetizoraa e tomo tatou i roto i te Ekalesia e i te basileia o te Atua.

I muri mai i te tatarahaparaa, te ohipa toe i titauhia o te bapetizoraa ïa tei riro ei parau tumu faufaa no te evanelia—aita roa e taata e nehenehe ia farii i taua fafauraa o te evanelia mai te mea aita te reira. O te uputa ïa o te Ekalesia a te Mesia, eita tatou e tae i reira na te tahi atu e’a, no te mea ua parau te Mesia, “te niniiraa” e aore râ, “te pipiraa,” e ere ia i te bapetizoraa. Te auraa no te parau te bapetizo oia ia, te otuhiraa i raro i te pape, e ia ravehia e te hoê taata o tei mau i te mana, i te i’oa no te Metua, e no te Tamaiti, e no te Varua Maitai. Te bapetizoraa o te ravehia e aita e mana mo’a e mea faufaa ore ia. E tapa’o te reira no te tanuraa e te ti’a faahouraa o Iesu Mesia, e ia ravehia mai te au i te reira e te hoê i haamanahia e te Atua, mai te au i teie papa’ihia, mai te mea e aita, ua faahapa ia i te ture e ore ia e fariihia e a’na, e eita atoa ia e tupu te hoê faaoreraa hara, no taua tumu ra hoi i opuahia te reira tera râ, o oia e faaroo to’na, o tei tatarahapa maue ua “tanuhia i roto i te Mesia na roto i te bapetizoraa, na te hoê i mau i te mana mo’a, e farii ia i te faaoreraa o te mau hara, e e farii i te horo’araa a te Varua Maitai na roto i te tu’uraa rima.¹⁴

E bapetizohia tatou i roto i te i’oa no te Metua e no te Tamaiti e no te Varua Maitai. E arata’ihia tatou i roto i te Ekalesia e te Basileia o te Atua na roto i te i’oa no te Metua e no te Tamaiti e no te Varua Maitai, e e haamori tatou i te Metua. E haapao tatou i te Tamaiti e e pee tatou i to’na e’a.²⁰

E hopoi’a na te mau Feia Mo’a i te Mau Mahana Hopea Nei ia haapii i ta ratou mau tamarii i te parau mau, e ia arata’i ia ratoui te e’a e tano ia ratou ia haere, ia haapii ia ratou i te mau parau tumu matamua o te evanelia, te titauraa i te bapetizoraa no te faaoreraa i te mau hara, e no te riroraa ei melo i roto i te Ekalesia a te Mesia.¹⁶

Te bapetizoraa otuhi no te faaoreraa i te mau hara, na te hoê i mau i te mana, e parau tumu mau, no te mea ua haapii te Mesia i te reira; ua haapao te Mesia i te reira, eita oia e a’e—eiaha no te mea e, e taata hara Oia e e mea titauhia ia bapetizohia no te faaoreraa i Ta’na mau hara area râ, no te mea ra, e mea ti’a Ia’na ia rave ei faati’araa i te mau parau-ti’a atoa oia hoi, te faati’araa i te ture.¹⁷

Ua tu’u o Iesu ia’na iho ia bapetizohia; ua haamau oia i te oro’a o te tama’araa hopea a te Fatu, e ua titau ia faaturahia te reira; e ua faatere i te tahi mau oro’a o ta’na i mana’o e e mea faufaa no te ora o te taata nei. I roto i te ohipa i tupu e o Nikodemo, ua haapapu oia i te bapetizoraa o ta’na i faaau e te fanauraa i te pape e te Varua e mea titauhia no te ora o te taata [a hi’o Ioane 3:1–5].¹⁸

Ua itehia i rotopu i te tahi o to tatou mau taata, te hoê hi’oraa ti’a ore no te huru mo’a ia rave ana’e i te tahi o te mau oro’a o te Autahu’araa Mo’a. Oia mau, eita e ravehia te faatereraa a te mau taata i rotopu ia tatou nei o tei mau i te mana … no te mau oro’a viivii o te ao nei … area râ, no te mea e, te vaira ra te Autahu’araa i roto i te Ekalesia a Iesu Mesia i te Feia Mo’a i te Mau Mahana Hopea Nei, ua rava’i ïa no te faariro ei oro’a tumu e te faufaa i te mau oro’a atoa e faaterehia nei e te hoê mana mau i roto i te Ekalesia. No te faaoti i te tahi noa’tu oro’a mai teie te huru, e parau e e rave te taata e faatere ra eiaha na roto ia’na noa e na roto i to’na iho mana tera râ, na roto i te mana o to’na faatoro’a- raa-hia e to’na piiraa ei ti’a no te mau tura o te ra’i. Aita tatou … e rave nei i te oro’a o te bapetizoraa mai te hoê faaiteiteraa; tera râ, na roto i te rave’a haehaa tei faati’ahia i roto i te Ekalesia a te Mesia te ti’a ia faahau eiaha ra ia tatara i te huru mo’ a o teie mau oro’a rau.¹⁹

E faateitei te Atua i te feia o tei tatarahapa, e o tei bapetizohia, e o tei vai faaroo noa.

Te vai nei te mau haamaitairaa o te evanelia a Iesu Mesia e ta te ao e tae mai, o te ore e roaa i te mana o te taata e aore râ, o te ore e roaa i te hoo a te moni, e o te ore i te hoê taata ia farii na roto i to’na iho maramarama e aore râ, i to’na paari maoti râ, na roto i te auraroraa i te tahi mau oro’a, mau ture e te mau faaueraa o tei horo’ahia mai. E mea maitai, i to’u hi’oraa, no te Feia Mo’a i te Mau Mahana Hope Nei ia haamana’o tamau noa e, ua horo’ ahia te mau haamaitairaa faito ore o te evanelia ia ratou na roto i to ratou faaroo, e ua faaorehia te mau hara na roto i te bapetizoraa e te tatarahapa, e na roto i te vai faaroo tamau raa i nehenehe ai ia ratou ia tape’a noa i te mau horo’araa e te mau haamaitairaa o te ora mure ore.²⁰

Te parau atu nei matou ia outou, o outou tei tatarahapa i ta outou mau hara, tei tanu-atoa-hia e te Mesia i roto i te bapetizoraa, tei faatiahia mai roto mai i te pape o te apoo i te hoê ora apî, tei fanauhia i te pape e te Varua, tei riro ei mau tamarii na te Metua, tei riro ei feia tufaa i te Atua ra, tei riro ei feia tufaa e te Mesia—te parau nei matou ia outou, mai te mea e hinaaro outou i te haapa’o i te mau ture a te Atua, e ia faaea i te rave i te ino … ia faatupu i te faaroo i te Atua, ia ti’aturi i te parau mau e ia farii i te reira, ia vai parau-ti’a i mua i te Atua e i mua i te taata, e faateiteihia outou, e e tu’u te Atua ia outou i te upoo, mai te mea e, e haapa’o outou i teie mau faaueraa. O ratou atoa o te haapa’o i te mau faaueraa a te Atua, outou anei e aore râ, o te tahi atu anei, e ti’a mai ïa e e ore e marua, e faatere ratou eiaha ra no te pee atu, e haere i te teitei raa eiaha ra i raro. E faateitei te Atua ia ratou e e faaite hoi ia ratou i mua i te mau nunaa o te fenua nei, e e tu’u hoi oia i ni’a ia ratou te tapa’o o ta’na fariiraa, e e pii hoi oia ia ratou na’ na. Teie te iteraa papu o ta’u e horo’a ia outou.²¹

O teie hoi te evanelia a Iesu Mesia, ia ite i te Atua mau ra e i Ta’na Tamaiti o ta’na i tono mai i roto i te ao, e iteraa teie tei roaa mai na roto i te haapa’oraa i ta’na mau faaueraa atoa, te faaroo, te tatarahapa, te bapetizoraa na roto i te otuhiraa ia matara te mau hara, te horo’araa i te Varua Maitai na roto i te tu’uraa rima e na roto i te mana mo’a, eiaha ra na roto i te hinaaro o te taata nei. O te ra ïa te evanelia a Iesu Mesia oia hoi, te mana o te Atua, ia ora te feia atoa i faaroo ra: te haapa’oraa i te parau mau, te auraroraa i te ture o ta te Atua i faati’a i roto i to’na fare no te mea, te fare o te Atua o te hoê ïa fare no te haapa’oraa e ere hoi i te hoê fare no te ahuehue noa.²²

Te faaite papu nei matou e, ua faata’ahurihia te mau patu o tei faata’a ê i te taata nei i te Atua, e te paraparau faahou mai nei te Fatu i To’na hinaaro i te taata nei. “Tera râ,” na ô ihora te hoê e, “Nahea tatou e ite ai i teie mau mea? Nahea tatou e ite ai e, aita tatou i vai i roto i te hape?” Ia outou atoa na te parau nei matou e, a tatarahapa i ta outou mau hara ma te haavare ore, e a haere ia bapetizohia e ia farii i te Varua Maitai na roto i te tu’uraa rima, e na taua Varua râ e faaite ia outou to outou iteraa papu, e riro outou ei mau ite mai a matou atoa, e e nehenehe ia outou ia ti’a mai ma te taia ore e ia faaite i te iteraa papu no te parau mai ia matou e na reira nei.²³

Mana’o Tauturu i te Haapiiraa

Eaha te “tatarahapa mau”? No te aha te tatarahapa i tu’uhia ai i mua a’e i te bapetizoraa?
Eaha to tatou huru ia ofati ana’e i te hoê ture a te Atua? No te aha e mea maitai a’e ia haapa’o i te mau ture a te Atua i te rave i te hara ma te mana’o e, e tatarahapa i muri a’e?
Mea nahea te parau tumu o te tatarahapa i te horo’araa ia tatou te ti’aturi? (A hi’o atoa Moroni 7: 41.) No te aha te tatarahapa i hi’ohia ai ei “ manuïaraa no te tupuraa e te faatupuraa”?
Eaha to outou huru i te iteraa e, ua faataahia te hoê taata e Iesu Mesia no te bapetizo ia tatou i roto i te i’oa no te Metua e no te Tamaiti e no te Varua Maitai? (A hi’o atoa PF&PH 20:73). Eaha te mea o ta outou i ite i to outou bapetizo-raa-hia e aore râ, i to outou haereraa i to vetahi ê bapetizoraa?
No te aha te mana o te autahu’araa no te bapetizo i faufaa roa ai no taua oro’a râ, i te tahi atu “oro’a hanahana e ravehia e to te ao nei”? Nahea te haehaa o te oro’a o te bapetizoraa e nehenehe ai ia paruruhia e ia faahanahanahia?
Eaha te ite e te mau haamaitairaa o ta outou i farii na roto i te tatarahapa e te bapetizo? Nahea outou ia haapa’o maitai i taua mau haamaitairaa ra?
Eaha ta tatou fafauraa e rave ia bapetizo ana’ehia tatou? (A hi’o atoa Mosia 18:8–10; PH&PF 20:37). Mai to outou mai â bapetizo-raa-hia, mea nahea to outou auraroraa i ta outou mau fafauraa i te Faaora?