Te Peresideni o te Autahuaraa Teitei o te Ekalesia

Ia paturu e ia faaroo tatou i te Peresideni o te Ekalesia o te mau râ i te mau taviri o te autahuaraa mo’a e o te aratai nei i te Ekalesia a te Atua i nia i te fenua nei.

Aamu o te Oraraa o Joseph F. Smith

Ua paturuhia te Peresideni Joseph F. Smith ei Peresideni no te Ekalesia a Iesu Mesia i te Feia Mo’a i te mau Mahana Hope’a nei i roto i te hoê amuiraa taaê i te 10 no Novema 1901, o oia te ono o te Peresideni. Na roto i teie piiraa, ua tupu ïa te tohu a te Peresideni Lorenzo Snow e, e riro Joseph F. Smith ei Peresideni no te Ekalesia.¹

Ua piihia oia ei Aposetolo na te Peresideni Brigham Young i te matahiti 1866 e ua tavini atoa oia i raro ae i na Peresideni e maha: Brigham Young, John Taylor, Wilford Woodruff e o Lorenzo Snow. Ua faaite pinepine te Peresideni Joseph F. Smith i to’na iteraa papu no nia i te “mana no o mai i te Atua râ … i te parau ti’a, i te faatura, i te tiamaraa o te oraraa, i te maramarama e i te huru atua o te misioni e o te piiraa” o teie mau tavini na te Atua.²

I roto i na matahiti 17, ua tavini oia ma te itoito ei Peresideni no te Ekalesia, ma te haehaa rahi e te aau tae. Ua parau oia i te Feia Mo’a: “Aita vau e farii nei te moni i roto i teie ohipa, e o teie noa hoi ta’u ohipa, maoti râ te faaotiraa i ta’u hopoi’a mai ta te Fatu e tiai nei.”³

Ua faaite papu mai oia e, na te Atua e aratai nei i teie Ekalesia: “Te hinaaro nei au e parau ia outou na e, mai te taime te Ekalesia a Iesu Mesia i te Feia Mo’a i te mau Mahana Hope’a nei i faatiahia ai, aita roa’tu hoê noa ae taime e, ua aratai te hoê taata i te Ekalesia. Aita hoi i roto i te tau o Iotefa, aita atoa ho’i i roto i te tau o Brigham Young, aita roa’tu mai te omuaraa, e eita roa ïa. Eita roa hoi te faatereraa o teie ohipa i rotopu i te mau taata o te ao e vaihohia i roto i te rima o te mau taata. Na te Atua hoi teie ohipa.⁴

Haapiiraa na Joseph F. Smith

Na te Atua iho e aratai i Ta’na ohipa e i To’na nunaa.

Ua faatia te Atua i te mau mea atoa i roto i to ratou haapaoraa. E fare no te haapa’o te fare o te Atua, eere i te hoê fare no te arepurepu. I roto i teie fare, o te Atua iho te Faatere Manahope, e e titauhia ia haapa’o tatou ia’na. Ua tuea te hoho’a e te huru o te Mesia i to te Atua, o Ta’na anae Tamaiti Fanau Tahi, e o Oia to tatou Faaora e to tatou Atua … I pihai iho i te Atua e i te Mesia, ua tuuhia i nia i te fenua nei te hoê taata o te mau nei i te mau taviri e te mana o te Autahuaraa, e i ni’a ia’na ua tuu atoahia te tiaraa no te peresideniraa. O oia te auvaha o te Atua i mua i te mau taata atoa, i roto i te mau mea no te paturaa ia Ziona e no te faaoraraa i te pae varua e i te pae tino.⁵

Eita te hoê noa ae taata e aratai i te nunaa o te Atua e Ta’na ohipa. E maiti râ te Atua i te mau taata e e faariro hoi ia ratou ei mauhaa i roto i Ta’na rima no te faaoti i Ta’na mau opuaraa, area tei te Metua te hanahana e te mana, inaha tei Ia’na râ te paarï e te hinaaro no te aratai i to’na nunaa e no te haapa’o maite ia Ziona. Eere na’u e eere atoa na te Feia Mo’a i te Mau Mahana Hope’a nei e aratai nei i te Ekalesia a Iesu Mesia, e te hinaaro nei au ia ite papu outou i te reira. A haamana’o na te Atua e aratai nei i te ohipa. Na’na teie ohipa. Eere na te taata nei. Mai te peu ua riro teie ohipa ei ohipa na Iotefa Semita, e aore râ na Brigham Young, e aore râ na John Taylor, Wildford Woodruff, e aore râ na Lorenzo Snow, eita roa ïa teie ohipa e upooti’a i te mau tamataraa ta’na i faaruru’na.⁶

Ia faatura e ia aruehia te [Peresideni o te Ekalesia], tei riro ei mauhaa i roto i te rima o te Atua no te haamau i te nahonaho i rotopu i te arepurepu e i te tahi mau ture no te tauturu ia tatou ia ite i te vahi e ti’a ia haerehia.⁷

E toru Tahua Rahi Peresideni e ti’a nei i te Upoo o te Ekalesia i nia i te fenua nei.

O te Atua Metua, o te Atua Tamaiti, o te Atua Varua Maitai, o ratou ïa te mau melo no te Atuaraa te pupu faatere faito ore i nia i te mau hamaniraa atoa a te Metua. E toru taeae o te ti’a nei ei upoo faatere no te Ekalesia … e aita’tu ta ratou opuaraa, oia hoi te faatupuraa i te maitai o te mau taata atoa, te aupururaa i te nunaa o te Fatu. Ta ratou tutavaraa, o te tahoêraa ïa i te mau taata atoa e o te turairaa i te mau taata ia patu ia Ziona, te taata i ni’a i to’na parahiraa e i roto i to’na ti’araa.⁸

I roto i te omuaraa o ta’na ohipa, ua heheu mai te Fatu e mea tia ia vai e toru tahua rahi no te peresideni i te Autahuaraa Teitei o te Ekalesia e i nia i te Ekalesia paatoa. (PH&PF 107:22, 64, 65, 66, 67, 91–92.) Ua tuu Oia i nia ia ratou te tura e titauhia no te peresideni i nia i te mau ohipa atoa o te Ekalesia. Te mau nei ratou i te mau taviri o te fare o te Atua e o te mau oro’a o te Evanelia, e o te mau haamaitaraa atoa o tei faahoihia mai i te fenua nei i teie nei anotau tuuraa Evanelia. Tei ni’a teie tura i na tahua rahi e toru o te peresideniraa. O ratou na peresideni e toru. E te pii nei te Fatu ia ratou ei peresideni. (PH&PF 107:29.) Area râ, te vai ra hoê noa peresideni o te peresideni nei, e e peresideni atoa to’na mau tauturu.⁹

Te piihia nei te apooraa e peresideni nei i te Ekalesia te Peresideniraa Matamua, oia ïa te peresideni e to’na na tauturu e piti, i pihai iho te vai nei te Tino Hoê Ahuru Ma Piti Aposetolo, ua tuea to ratou mana o to te Peresideniraa Matamua, tera râ tei raro ae ratou i te aratairaa a te Peresideniraa Matamua.¹⁰

Mea ti’a ia piihia e ia parauhia te taata faatere e peresideni nei i te Ekalesia, ei “Peresideni”; hoê a huru i te mau tauturu i roto i te Peresideniraa Matamua, no te mea mai ta te Fatu i parau e peresideni atoa ratou (PH&PF 107:22, 24, 29); eere râ i te mea tano ia faahiti faufaa ore noa i te Peresideni o te Ekalesia, eere i te mea tano ia pii ia’na ei “Perofeta,” ei “Hi’o”, ei “Heheu parau”, no te mea no’na iho teie mau piiraa, e no to’na mau tauturu, e no te mau Aposetolo tataitahi … Inaha, e piiraa teie no to ratou mau mana pae varua, e mea mo’a roa teie mau piiraa.¹¹

I te mau taime atoa te vai nei te hoê upoo faatere i roto i te Ekalesia, e mai te peu e rave-ê-hia’tu te Peresideniraa o te Ekalesia i te pohe e aore râ i te tahi atu mau ati, e riro ïa te mau Aposetolo ei upoo faatere no te Ekalesia, tae roa’tu i te taime e faanaho faafouhia ai te hoê peresideniraa, oia ïa e toru tahua rahi peresideni o te mau i te tiaraa o te Peresideniraa Matamua i nia i te Ekalesia, e e hopoi’a na te Tino Hoê Ahuru ma Piti Aposetolo te faatereraa ia au i te huru i faataahia, e na’na hoi e haapapu e, ua faanaho faahouhia te Peresideniraa Matamua, e na reira eita ia te ohipa e te haapa’o i roto i te Autahuaraa o te Ekalesia e marirau.¹²

E mau te Peresideni o te Autahuaraa Teitei i te mau taviri o te autahuaraa mo’a.

Ua riro te autahuaraa ei tura i horo’ahia i te taata nei no te faatere i te i’oa o te Atua. E farii te mau tane atoa o tei faatoro’ahia i roto i te hoê noa ae tuhaa o te autahuaraa i teie tura na roto i te monoraa.

Tera râ, te mau ohipa atoa i faaterehia i raro ae i teie nei tura, ia na reirahia i te taime tano, i te vahi tano, ia au i te raveraa mau e ia au i te faanahonahoraa mau. Te mana no te faatere i teie mau ohipa, o te mau taviri ïa o te autahu’araa.¹³

Tei te Peresideni o te Ekalesia te mau taviri, te tura e te mana no te faatere i te Ekalesia e i te Autahuaraa a Melehisedeka e a Aarona. Aita roa’tu hoê noae ohipa e aore râ e piiraa i roto i te Ekalesia o ta te Peresideni o te Ekalesia e ore e nehenehe e amo e aore râ e rave, e aore râ o te titauhia ia’na ia rave [PH&PF 107:9). Te mau nei oia i te tiaraa patereareha, te mau nei oia i te tiaraa tahua rahi e aposetolo atoa, hitu ahuru, peresibutero, episekopo, tahua, haapii e diakono i roto i te Ekalesia; tei te Peresideniraa o te Ekalesia a Iesu Mesia i te Feia Mo’a i te mau Mahana Hope’a nei teie mau tiaraa atoa, e nehenehe ia ratou ia haa i roto i teie mau piiraa ia hinaaroo anaehia.¹⁴

Hoê anae taata e mau i te taime hoê te mau taviri o te Basileia o te Atua i ni’a i te fenua nei. Ua mau Iesu i teie mau taviri a ora ai Oia i te ao nei; i To’na râ revaraa, ua ho atu Oia i te reira i ni’a ia Petero, o oia te peresideni e aore râ te upoo o te mau aposetolo e ua ti’a ia’na ia aratai e ia farii i te heheuraa no te Ekalesia, ia a’o i te mau taeae atoa. I muri iho te upootiaraa o Satane e te feia ino i ni’a i to te Ekalesia, e te faasatauroraahia te Faaora e te haapoheraahia te mau aposetolo, ua rave êhia’tu te mau taviri o te basileia…. Mai te taime te mau taviri o te autahuaraa a iritihia ai mai te fenua nei e tae roa mai i te tau a farii ai Iotefa Semita i te mau taviri, aita roa hoê noa ae taata i mau i te Autahuaraa, e tae noa’tu i te mau taviri e te tura no te patu i te Ziona o te Atua, e ia faaineine i te hoê ekalesia aore ra i te nunaa no te ho’i pitiraa mai o te Mesia.¹⁵

Te haamaramarama papu nei Te Buka Haapiiraa e Te Mau Parau Fafau e, noa’tu e tiaraa to te taata faatere tataitahi o te Ekalesia ia faatere ia’na iho: “Tei te Autahu’araa a Melehizedeka te tiaraa no te peresideniraa e tei te reira te mana e te tiaraa i nia ae i te mau toro’a i roto i te Ekalesia i te mau anotau atoa o te ao nei, no te haapaoraa i te mau mea atoa no te pae varua”. (PH&PF 107:8)

I muri iho, i roto i teie iho heheuraa te na o râ te mau irava 65 e 66 e:

“No reira, e mea tia ïa ia faataahia te hoê no roto mai i te Autahuaraa Teitei ia faatre i nia i te autahuaraa , e e parauhia oia te Peresideni no te Autahuaraa Teitei no te Ekalesia:

Oia hoi, i te tahi mau parau ê atu ra, o te Tahu’a Teitei Faatere i nia ae i te Autahu’araa Teitei no te Ekalesia.”¹⁶

O teie te mea faufaa ia haamana’o, oia hoi e mea teitei ae te autahuaraa i te mau toro’a atoa e vaira i roto i te autahu’araa, e te feia atoa e mau râ i te Autahuaraa a Melehizedeka, na roto i te mana e te tura, e faaoti ratou i te mau oro’a atoa o te autahuaraa, ia pii noahia’tu ratou e te hoê o te mau nei i te tura mau, e taua tura râ, ua faaahuhia ïa i ni’a i te Peresideni o te Ekalesia e aore râ i ni’a i te hoê o ta’na e maiti. Tei raro ae te mau taata faatere atoa i te aratairaa a te Peresideni e na te Atua e aratai nei Ia’na. Ua maiti atoahia oia e te Fatu ia riro ei upoo faatere no te Ekalesia, e riro ïa oia ei peresideni i muri iho i te fariiraa e te patururaa a te Autahuaraa o te Ekalesia. (PH&PF 107:22).¹⁷

Ua faataahia te Peresideni ia farii i te mau heheuraa no te Ekalesia taatoa.

Ua faataa atoa te Fatu i te hoê taata i te taime hoê i te ao nei no te tape’a i te mau taviri no te heheuraa no te taatoaraa o te Ekalesia e to’na mau faanahoraa, faatereraa, oro’a, e te mau haapiiraa. Tei nia te varua heheuraa i te mau melo atoa no te haamaitai e no te haamaramarama i te mau taata atoa o te farii i te mau heheuraa, e ia au i to ratou mau piiraa. Area râ no te Ekalesia, hoê anae ïa taata te nehenehe e farii i te mau heheuraa, e ua riro ïa te reira ei faaueraa e aita ïa e marôraa faahou. E apitihia oia e to’na mau tauturu, e peresideni oia i nia i te taatoaraa o te Ekalesia i roto i te ao atoa nei; oia ia te mau nei te Peresideniraa Matamua i te mana no te horo’a i te aratairaa i roto i te mau ohipa atoa o te paturaa e o te faatereraa e te faatureraa o te Ekalesia.¹⁸

Ia au i to ratou faaroo, ua ite te Feia Mo’a i te mau Mahana Hope’a nei e, e mea na roto anae i … te Peresideni o te Ekalesia te mau aparauraa i te Atua e riro ai ei ture e ei haapiiraa i to te Ekalesia, e e tae mai teie mau heheuraa i te mau taime atoa, noa’tu te huru o te mau tumu parau, i te pae varua aore râ i te pae tino, ia au i te hinaaro o te Atua, e i te hope’a e e tae teie mau heheuraa i te Feia Moa parau ti’a, mea faufaa te mau heheuraa no te a’o e aore râ no te aratai.¹⁹

I te taime te hoê taata e tia ai no te rave i te tiaraa no te faatere e no te faaue, e aore râ no te haava i to’na mau taeae, i to’na ihoa râ feia faatere, e mea tia ia tapea oioihia oia, oi tupu hoi te amahamaha, te orurehau e te huehue. Ua ite te mau tane e te mau vahine atoa o te Ekalesia e, eere i te mea tia ia faatupu i teie huru varua. I te taime e tupu ai teie mau huru mana’o, e mea tia ia huna oromaihia te reira, no te mea eita te reira e tuea i te faanahoraa o te Autahuaraa, e i te varua e te maitai o teie ohipa. Eiaha tatou e farii i te mau mea eere no roto mai i te mana o te autahuaraa o ta te Atua i faatia e i faataa no te faaite i to’na mana’o e to’na hinaaro i to te ao nei.²⁰

Eita roa ïa e tuea e e tano ia mana’o e, i muri mai i to te Atua piiraa i te hoê taata e i to’na faataaraa i ta’na ohipa, eita Oia e haapa’o ia’na e e haere atu oia i te tahi atu taata no te faaoti i te hoê a opuaraa. Eiaha roa’tu outou e farii i teie huru mana’o. Mai te peu te mana’o râ ratou mai te reira te huru, te faariro râ ïa outou i te Atua Manahope mai te hoê Atua tauiui te huru, e mai te hoê Atua faatupu ino, mai te hoê Atua amahamaha. Eita roa’tu te Basileia o te Atua e nehenehe e faatiahia i nia i te fenua nei mai teie te huru.²¹

Mai te peu e hara te Peresideni o te Ekalesia, e iriti îa te Atua ia’na mai roto mai i to’na tiaraa. Te faaite papu nei au na roto i te i’oa o te Atua no Isaraela e, eita roa te Atua e farii i te upoo o te Ekalesia, te taata Ta’na i maiti ia faaea noa ei upoo faatere i te taime e ofati ai oia i Ta’na mau ture e e taiva ai oia; i te taime iho e na reira ai oia, e tatara ïa te Atua ia’na. No te aha? No te mea, te fariiraa i te hoê taata ino ia amo i te reira tiaraa, mai te huru râ ïa e, te fariihia râ oia ia faareru i te pape puna. Eita roa Oia e faatia i te reira huru.²²

E faatura e e haapa’o te Atua i To’na mau tavini

Eere [teie] i te ohipa na te taata e ohipa râ na te Atua Manahope, e e hopoi’a Na’na te hi’oraa e, te feia e amo noa’tu i te reira ti’araa, ua rotahi ïa e o Oia râ, e farii ïa i Ta’na mau aratairaa, e e haapao ïa ia au i To’na hinaaro.²³

E mauhia te autahuaraa o te [Atua] e te feia parau ti’a, e te feia tua aano no te amo i te mau hopoia, e te feia o ta’na e faaohipa no te faatere e no te faaafaro i te mau ohipa o Ta’na Ekalesia, ia au i te mau faaueraa o To’na râ hinaaro. E i te taime taua mau taata râ e hi’o atu ai i te tahi atu vahi, i taua iho taime râ, e faarii ratou i te mau faahemaraa a Satane e a riro ai ratou ei mau tavini no te Diabolo, e aramoinahia ia ratou te faanahonahoraa mau e roaa ai ia ratou te mau haamaitairaa o te autahuaraa. E faarue ratou i te e’a o te basileia o te Atua, e tei ni’a ïa ratou i te e’a âtaâta.²⁴

E faatura e e haapa’o te Atua i To’na mau tavini i mua i te aro o te nunaa. E paturu Oia ia ratou i roto i te ti’a. E faateitei Oia ia ratou i ni’a. E faateitei Oia ia ratou i mua i To’na aro e e ai’a ratou i To’na hanahana e amuri noa’tu.²⁵

Te faaite nei au i to’u iteraa papu no nia i te mana o te Atua i mauhia e te feia i ti’a mai i muri iho i te Perofeta Iotefa Semita i roto i te peresideniraa o te Ekalesia. Ua riro ratou ei feia no te Atua…. E nehenehe au e faaite i to’u iteraa papu i nia i te parau tia, te faatura, te tiamaraa o te ora, te maramarama, te hanahana o te misioni e te piiraa o Brigham [Young], o John [Taylor], o Wilford [Woodruff] e o Lorenzo [Snow]. Ua faauruhia ratou e te Atua no te amo i te misioni o to ratou mau piiraa, e ua ite papu vau i te reira. Te haamauruuru nei au i te Atua no teie iteraa papu e no te Varua e turai nei ia’u ia fatata’tu i teie mau taata, i ta ratou misioni, i teie nunaa, i te Atua e i to’u Faaora.²⁶

E au mau taeae e mau tuahine, ta’u ohipa, ta’u hopoi’a, o te pororaa ïa i te Evanelia a Iesu Mesia e To’na faasatauroraa e To’na tiaraa mai te pohe mai, e To’na parahiraa i te terono ma te mana, ma te hanahana e te faahiahia i te pae atau o to’na Metua, to tatou Atua…. E mea tia roa ia rave au i te mau mea atoa, ma to’u puai e ma to’u ite rahi ae no te aupuru i te feia atoa o ta te Atua i tuu mai i roto i to’u rima. Mea tia atoa ia’u ia amo i ta’u hopoi’a i mua i te feia o ta te Atua i hinaaro ia riro vau ei hoê orometua haehaa e ei haapii no te Evanelia.²⁷

E ohipa teie na te Atua e te ani nei au ia tatou nei eiaha ia haamo’e i te reira. Te ani nei au ia outou eiaha e faaore i te tiaturi, no te mea e parau mau te reira. E tupu te mau mea atoa ta’na i tohu no nia i ta’na ohipa. Eita e mau i to te ao nei ia tape’a, o te Atua iho te tapea râ i te hoe, e e aratai Oia i To’na nunaa ia rê.²⁸

I te mau taime atoa e parau vau i te hoê parau au i mua i te Atua, i te mau taime atoa e faahiti au i Ta’na parau mau, mea na roto ïa i te mana o To’na Varua Mo’a, e te rave nei au i te reira no To’na faatura e no To’na hanahana. Aita vau i rave noa ae i te hanahana no’u iho. Aita vau e titau nei i te hanahana, aita vau e titau nei hoê noa ae o taua mau mea nei, maori râ te riroraa ei melo no te Ekalesia a Iesu Mesia, te fanaoraa ia ti’a para’o ore noa, te viivii ore, te aueue ore e te pautuutu i roto i te basileia o to’u Atua e o Ta’na Mesia.²⁹

O te basileia ïa o te Atua anae e te reira anae o ta’u e mana’o nei no’u iho. Aita vau e farii nei i te moni i roto i teie ohipa, o teie noa hoi ta’u ohipa, oia ïa te haaraa ma te haehaa i roto i ta’u hopoi’a o ta te Fatu e ho mai ia au i to’u puai. Tera ra, e basileia te reira no te Atua. Te auraa o ta’u parau, oia hoi: te basileia o te Atua, o te faanahoraa ïa o te Ekalesia a Iesu Mesia i te Feia Mo’a i te mau Mahana Hope’a nei, e o Iesu Mesia hoi te Arii e te upoo.³⁰

Mana’o Tauturu i te Haapiiraa

O vai te aratai nei i te Ekalesia? No teaha mea faufaa no tatou nei ia haroaroa i te parau “eita te hoê taata e aratai i te mau taata o te Atua e tae noa’tu i ta’na ohipa?
Eaha te mau haamaitairaa i fafauhia i te mau melo o te Ekalesia ia apee papu anae ratou i te Peresideni o te Ekalesia? (a hi’o atoa PH&PF 21: 4–6) Eaha te mau haamaitairaa ta outou i farii i apee ai outou i te mau aratairaa a te mau perofeta ora?
Nahea tatou ia paturu i te Peresideniraa Matamua e te Pupu o te Hoê Ahuru ma Piti Aposetolo i roto i ta ratou ohipa?
Eaha te auraa o te mau piiraa perofeta, hi’o, e heheu parau? No vai teie mau piiraa?
Eaha te mau taviri o te autahuaraa? Eaha te auraa ia paturu i te Peresideni o te Ekalesia ei taata hoê roa i nia i te fenua nei o te mau nei e o tei hamanahia no te faaohipa i te mau taviri o te autahuaraa?
No teaha e mea faufaa ia ite e, o te Peresideni anae o te Ekalesia tei faataahia no te farii i te mau heheuraa no te Ekalesia paatoa? Nahea tatou ia paruru ia tatou i te mau perofeta haavare e i te mau heheuraa hape?
Nahea tatou e ite papu e, e aratai noa te Peresideni o te Ekalesia ia au i te hinaaro o te Atua?