Te Taatiraa Mure Ore o te Tane e te Vahine

Te tane e te vahine o tei taatihia no te tau mure ore i raro ae i te tura o te autahu’araa mo’a, na roto i to raua haapao maitai,e farii ïa raua i te faateiteiraa i roto i te basileia tiretia o te Atua.

Aamu o te oraraa o Joseph F. Smith

Atavini ai oia ei tauturu no te Peresideni John Taylor, ua haere o Joseph F. Smith i te fenua Vaihi ma te apeehia e to’na hoa faaipoipo o Julina. Te na o ra oia i te parauraa no’na: “aita e ahihiraa to’na haapao maitai, mai te fetia poro ni’a to’na huru mau, e mea tamau oia mai te taime ra e maitai ae i te auro ra.”¹ I te fenua Vaihi, ua roohia te Peresideni Semita i te hoê ma’i ino roa e ua aupuru o Julina ia’na e tae roa’tu i te taime ua maitai oia. E nau avae i muri iho, i te avae Mati 1887, ua tia ia Julina e te mau tamarii ia ho’i atu i te fenua marite e ua faaea mai o Iosepha F. Semita i te fenua Vaihi.

I te 15 no Mati, ua papai oia i roto i ta’na puta aamu: “Ua faarue te pahi auahi i te uahu i te hora 12 e 15 minuti mairi i te hora 12, ua haamata oia i to’na tere i rapae mai i te uahu; e ua hio hopea vau i te hohoa o te feia i herehia e au, ta’u mau tamarii here ia tia i te Atua ia haafarerei faahou ia matou na roto i To’na ra aroha. I te mo’eraa te pahi ra i to’u mata, ua haavitiviti au i te haere i te tahi vahi maitai ae no te nana faahou i te pahi auahi ra Australia e to’na ra mau tao’a herehia e tae roa’tu i te taime ua mo’e oia i muri mai i te moua ra o Diamond Head. E a parahi ai au e o vau anae ra, ua oto to’u varua e ua ta’i au e ua mauiui to’u mafatu i te faarueraa ia ratou o tei riro ei mau tao’a rahi roa ae na’u i te fenua nei”.²

Noa’tu te mauiui o te taaeraa, ua ite te Peresideni Semita i te mana e te fafauraa o te tumu parau mure ore ra o tei heheuhia i to te ao nei e te Peropheta Iosepha Semita ra: “Eaha te reira? Te taatiraa o te tane e te vahine no teie tau e no te tau mure ore ra.… O vai tei ite i te hopoia o te tae mai na roto i te taatiraa o te tane e te vahine ra, hou Iosepha Semita a heheu mai ai i te reira na roto i te ohie i to te ao nei? Ua ara’ara to’u mata. Mai te mea te vai nei te hoê mea i te ao nei o te faariro ia’u ei taata maitai ae, e aore râ ei tane maitai ae, o teie ïa tumu parau ta te Fatu i heheu mai, o te faaite nei ia’u i ta’u mai hopoia.³

Haapiiraa a Iosepha F. Semita

Ua haamau te Atua i te faaipoiporaa no to tatou hanahana mure ore e to tatou faateiteiraa.

Ua haamau te Atua i te faaipoiporaa i te matamua ra. Ua hamani Oia i te taata ia au i To’na ra hoho’a e to’na ra huru, te tane e te vahine, e i te taime o to raua hamaniraa, ua opuahia ia taati ia raua na roto i te taatiraa o te faaipoiporaa, e aita hoi to te hoê e maitai roaraa mai te mea aita te tahi ra.⁴

Te taatiraa tiama o te tane e te vahine, o te ravea ïa no raua no te faatupu i to raua mau hinaaro teitei e te mo’a roa ae. No te Feia Mo’a i te Mau Mahana Hopea Nei, aita te faaipoiporaa i opuahia e to tatou Metua i te Ao ra ia riro ei taatiraa noa no teie nei oraraa, o te hoê ra taatiraa o te vai a muri ae i te mau tamataraa o te tau, o te vai e a muri noa’tu, o te horo’a i te faatura e te oaoa i roto i teie nei ao, te hanahana e te mau ora mure ore i roto i te mau ao amuri ae.⁵

[Na te Evanelia] e tahoê i te tane e te vahine i roto i te hoê fafauraa mure ore o te matirimonio, te mo’a e te ma, horo’ahia e te Atua, o te faatia i te mau titauraa e o te au i te mau hinaaro ma o te varua. E riro te tane e te vahine ei hoê – tane e te vahine no teie tau e no te tau mure ore. E mana’o faahiahia mau teie!⁶

Eita te Atua e titau noa area ra e faaue atoa oia ia faaipoipo. I te vai tahuti oreraa te taata, hou te hara i o mai ai i te ao nei, ua faatupu to tatou Metua i te Ao ra i te faaipoiporaa matamua. Ua taati Oia i to tatou na metua matamua i roto i te mau auraa o te taatiraa mo’a, e ua faaue Oia ia raua ia fanau, ia rahi e ia faai i te fenua nei. Aita teie faaueraa i tauihia, i faaruehia e aore i faaorehia; area ra ua tupu â oia i te puai na roto i te mau u’i atoa o te taata nei.⁷

[Te mau taata] … te haere noa’tu ra to ratou aau i te mana’o pipiri e te paieti ore, i te tiaturiraa e, mea hape te faaipoiporaa e e ohipa haama te mau tamarii. Te patoi nei te Ekalesia a Iesu Mesia i te reira feruriraa, e te tiaturi nei e te haapii nei oia ei Evanelia mau, te faaueraa rahi matamua a te Atua i te taata nei i roto i te mau papairaa mo’a: “Ia fanau orua, e ia rahi roa, e faai i te fenua nei, e e haavi iho.” [Genese 1:28]

… Ua faaue, ua faatia, e ua haamau te Atua i te faaipoiporaa. Ua faaite papuhia te reira i roto i te heheuraa a te Atua i te Peropheta Iosepha Semita, mai ta’na i parau i roto i te Buka Fafau, tuhaa 49:15 “E teie faahou a, oia mau ta’u e parau atu ia outou e, o te faaore i te faaipoiporaa aita hoi oia i faatoro’ahia e te Atua, no te mea ua haapaohia te faaipoiporaa e te Atua no te taata nei.”⁸

Te faaipoiporaa … e tumu parau ia e aore ra e oro’a no te Evanelia o tei riro ei mea faufaa rahi roa no te oaoa o te mau taata, noa’tu e rave rahi o te haafaufaa ore nei i te reira. Aita e tumu parau faufaa ore e aore ra te titau orehia i roto i te opuaraa no te ora, area ra aita’tu e tumu parau faufaa rahi ae e o te titauhia no te oaoa o te taata nei i te faaipoiporaa—eiaha no teie noa oraraa, no te oraraa atoa ra amuri ae.⁹

E fana’o hanahana ia taatihia te tane e te vahine no teie tau e no te tau amuri atu.

E fana’o hanahana ia faatiahia te taata ia haere i roto i te Hiero o te Atua ia taatihia ei tane e ei vahine i roto i te mau auraa o te faaipoiporaa no teie tau e no te tau mure ore na roto i te tura o te Autahu’araa Mo’a, oia hoi te mana o te Atua, no te mea o tei taatihia ia au i te reira raveraa ra “eita roa ïa e tia i te taata ia faataaê” no te mea ua taati te Atua ia raua.¹⁰

Te tane e te vahine ra o te o i roto i teie nei oroa no te faaipoiporaa, te o nei raua i roto i te hoê ohipa rahi atu i ta raua i ite, e ohipa faufaa rahi roa mai te ora e te pohe e te haereraa i mua amuri noa’tu. Na te reira e faataa mai te oaoa mure ore e aore ra te oto mure ore.¹¹

No teaha [te Atua] i haapii ai ia tatou i te tumu parau no te taatiraa mure ore i rotopu i te tane e te vahine?… Ia tia i te tane ia farii i ta’na ra vahine na roto i te mana o te Atua, no teie tau e no te tau mure ore, ia tia ia’na ia titau i ta’na ra vahine, e i te vahine ra i ta’na ra tane, i roto i te ao e haere mai nei.¹²

E faaora hoê hoêhia paha te mau tane e te mau vahine, area râ te mau tane e te mau vahine eita ratou e faateiteihia hoê hoê anae ra. E mea tia ia raua ia taatihia i roto i taua taatiraa ra o tei heheuhia i roto i teie tau tuuraa Evanelia hopea nei. Aita ra te tane i taaê i te vahine, aita atoa te vahine i taaâ i te tane i te Fatu nei. Parau noa’tu â te mau tane e te mau vahine i ta ratou parau e aore ra i to ratou manaoi no ni’a i teie parau tumu, e mea papu roa ïa e, eita ratou e farii i te faateiteiraa i roto i te basileia o te Atua mai te mea e feia otahi ratou…

Ua haere mai tatou i o nei ia riro mai te Atua ra te huru. Ua hamani Oia ia tatou i te matamua ra mai To’na ra huru e mai To’na ra hoho’a, ua hamani Oia te tane e te vahine. Eita roa tatou e riro ia au i te hohoa o te Atua, ahiri eita tatou i te tane e te vahine…. Ia riro tatou mai Ia’na ra te huru, e ite tatou e, e ti’a tatou i mua i To’na aro ia au i te hohoa i hamanihia ai tatou, ei tane e ei vahine. Eita te vahine e tae i reira ona anae ra, e eita atoa hoi te tane e tae i reira ona anae ra, no te titau i te faateiteiraa…. E ti’a ia raua ia tapae hoê hoê anae i te faito o te faaoraraa ra, tera ra, ia faateiteihia raua, e faateiteihia ïa raua ia au i te ture o te basileia tiretiera. Aita’tu e ravea taaê e faateiteihia ai raua.¹³

Aita e taatiraa no teie tau e no te tau mure ore e ravehia i rapae i te ture a te Atua ra, e i te faanahonahoraa o To’na ra fare. E hinaaro paha te mau taata i taua taatiraa ra, e faatupu paha ratou i taua huru taatiraa râ i roto i teie oraraa, eita râ taua taatiraa ra i te mea mana maori ra ia ravehia e ia faati’ahia na roto i te mana o te Atua, na roto i te i’oa o te Metua e o teTamaiti, e o te Varua Maitai.¹⁴

E faaipoipo te Feia Mo’a i te Mau Mahana Hopea Nei no te tau e no te tau mure ore, eiaha noa e tae atu i te tau e faataa te pohe i te tane e te vahine ra. Te mau faaipoiporaa i ravehia i raro ae i te ture tivira e te faatereraa o te mau orometua no te mau faaroo ee, e mea faaturahia e e mana noa i roto i teie oraraa, area râ ia haamanahia no te oraraa mure ore, e mea tia i te mau fafauraa ia ravehia no te tau mure ore, e mea tia i teie mau taatiraa ia ravehia ia au i te ture a te Atua ra e i raro ae i to’na ra mana, ia ore te reira ia ravehia, aita to tera e mana i te tau i muri mai. E vahine ta te tane, e e tane ta te vahine, e tamarii ta te mau metua, a muri noa’tu, mai te peu e e rave ratou mai tei anihia e ana, oia hoi te taata o tei mau i te tura no te faatere i te mau mea atoa i roto i To’na ra basileia.¹⁵

Ia faaipoipo i roto i te faaroo i te taime tano e i roto i te fare o te Fatu.

Te parau nei matou i te feia api, a faaipoipo, ia tano ra te faaipoiporaa. A faaipoipo i roto i te faaroo, e ia faaterehia taua oro’a ra i te vahi ta te Atua i faataa. A ora parautia outou ia tia ia outou ia farii tiaam i taua haamaitairaa ra.¹⁶

Te hinaaro nei au ia ite te feia api tamaroa i Ziona, te faanahoraa no te faaipoiporaa, eere i te faanahoraa i hamanihia e te rima taata. No o mai i te Atua ra. E mea poupou…. Aita i faanahohia no te faaohieraa i te au o te taata nei, no te faatia i te feruriraa taata, e i to’na ra mau mana’o; ia faaipoipo e ia faataa, no te faatupu e no te faarue, ia tia no’a i to’na ra hinaaro. E mau utua rahi o tei apee i te reira, e mau utua rahi atu i teie nei tau, e tae roa’tu i te tau mure ore, no te mea e fanauhia mai te mau varua i teie ao nei, e e o mai te mau tane e te mau vahine i roto i teie nei ao. Ua vai te faaipoiporaa, ei paruru i te hui taata. Ia faaorehia te reira, e haafifihia te mau opuaraa a te Atua, e ore te oraraa viivii ore e e tae mai te ino e te tiraurau, e e vai anoano noa te fenua nei.¹⁷

E o mai i roto i te feruriraa e mea hinaarohia te oraraa otahi e te mau utuafare nainai no te mea e iti mai te mau hopoia. Te varua o te ape i te hopoia e ape atoa ïa i te ohipa. E mono te tutautohe e te arearea i te ohipa e te faaitoitoraa u’ana. Te here i te arearea e te oraraa ohie e riro ïa ei fifi no te feia api tamaroa o te ore e faariro i te faaipoiporaa e te faarahiraa o te utuafare ei hopoia mo’a….

… Te mouraa te utuafare, e itehia te reira mouraa i roto i te nunaa, na roto i te mau tau i muri nei. Na te tau e faaite mai i te maitai o te mau ture a te Atua e tae noa’tu i te parau mau e na o ra e, tei roto te oaoa mau o te taata i te amoraa i te hopoia, eiaha ra i roto i te arearea e te haapao ore.

E ma’i pee te huru o te ao nei. Aita e nehenehe ia tatou ia ora i roto i teie mau raveraa totiare maori râ ia farii atoa tatou i te mau hopearaa o teie mau raveraa. E faahemahia to tatou feia api no te pee atu i te hohoa o te ao nei. Ua tupu ae na te manao haafaufaa ore i te mau hopoia no te faaipoiporaa. Te mau mana’o imiraa moni, e aperaa te reira no te faataime i te faaipoiporaa ia tae atu i te taime e roaahia te tahi ohipa. Te tahi o ta tatou feia api tuiroo, te hinaaro nei ratou e faaoti roa i ta ratou mau haapiiraa i te fenua ai’a e aore ra i te fenua atea. No te mea e riro mai ratou ei feia faatere no te sotaiete, eita i te hi’oraa mai te reira huru ratou e eita atoa i te mea maitai te reira aperaa ta ratou. E mea maitai ae ïa no te pae rahi o teie feia api tamaroa ia ore roa e haere i te haapiiraa teitei, i te faariroraa i ta ratou haapiiraa teitei ei tumu no to ratou faataimeraa i te faaipoiporaa hau atu i te matahiti ti’a.¹⁸

Te hinaaro nei te feia api tamaroa ia roaa ia ratou te mau fare mai te aorai te huru, o tei nehenehe mau i te mau tao’a atoa i roto, e fare tano no teie anotau mai to vetahi ra hou ratou a faaipoipohia ai. Te mana’o nei au e, e mea hape te reira. Te mana’o nei au e, e mea tia i te feia api tamaroa e i te feia api tamahine atoa, e tae roa mai i teie nei mahana e no te huru hoi o te mau mea, e mea tia ia ratou i te o atu i roto i te taatiraa mo’a no te faaipoiporaa e ia aro tahoe raua no te manuiaraa, ia upootia raua i ni’a i te mau fifi, e ia vai hoê raua i roto i te manuia, e ia tauturu raua ia raua iho i te pae tino nei, ia manuia hoi raua. Ei reira raua e haapii ai i te here i te tahi e te tahi, e e vai tahoe raua i te maoraraa o to raua oraraa, e e haamaitai rahi mai te Fatu ia raua.¹⁹

E tia i te feia faatere e i te mau orometua no to tatou mau faanahoraa feia api ia haapii i te huru mo’a e te hopoia o te faaipoiporaa, mai tei heheuhia mai i te mau mahana hopea nei ia tatou. E tia i te hoê manao no te faaipoiporaa, e na te reira e turai i te feia api tamaroa e aore ra i te feia api tamahine melo no te ekalesia ia faaipoipo maori ra ia ravehia te reira na roto i te mana i haapaohia e te Atua.²⁰

Ia patuhia te faaipoiporaa i nia i te mau tumu parau no te here e te paieti mo’a.

Eiaha te fifi ia tupu mai i roto i te faatura e te mana’o maitai i te utuafare mai te peu e faatiahia i nia iho i te tumu parau no te viivii ore, te here mau, te parautia e te titiaifaro. Te tane e te vahine ra o te tiaturi mau i tet ahi e te tahi, e o te opua i te haapao i te mau ture no te Atua i roto i to ratou mau oraraa e o te rave faaoti i ta ratou misioni i te fenua nei, eita roa e oaoa maori te utuafare. To ratou mau aau, to ratou mau manao, to ratou varua e to ratou mau hinaaro, ua haamauhia ïa i ni’a i te faatiaraa i te hoê utuafare, i te faaitoitoraa i to te utuafare e te paturaa i te hoê basileia no ratou iho; e hinaaro ratou e haamau i te niu no te tupuraa mure ore o te mana, o te hanahana, o te faateiteiraa, e o te faatereraa arii, o te mau ao hope ore.²¹

Ia au i te Evanelia, eere te hoê utuafare i te utuafare mai te mea aita e vaira te tiaturiraa mau e te here mau i rotopu i te tane e te vahine. Te utuafare, e vahi te reira no te nahonaho, no te here, no te tahoe, no te faafaearaa, no te tiaturi, no te tiaturiraa papu; e vahi aita te mana’o huna e o mai, te vahi ra e vai ai te tiaturiraa mau o te vahine e o te tane, te roo maitai e te viivii ore i te tahi e te tahi.²²

Eere Ziona i te hoe vahi no te aroraa i rotopu i te tane e te vahine. Ua opua te Atua ia vai hoê raua, e ua faaite papu Oia i te reira. Te faataaraa ia raua, eere te reira Ta’na ohipa, e aore te manaoraa raua e, e mea taaê ta raua mau titauraa atoa e ua riro te faataaêraa, eiaha ra te taatiraa, ei tumu no to raua hamaniraahia.²³

Eaha ia te hoê utuafare maitai– te hoê utuafare hioraa maitai, te huru utuafare ta te feia mo’a i te mau mahana hopea nei e hinaaro? Te hoê utuafare o te ore e tuu i te mau ohipa no te ao nei na mua. Te hoê utuafare e metua here i to’na utuafare o ta te Atua i horoa mai ia’na, o tei haafaufaa ia ratou, e o ta ratou e farii i roto i to ratou ra aau. Te hoê utuafare e tiaturi, e tahoe, e here e te vaira te aupuru mo’a i rotopu i te metua tane e te metua vahine e te mau tamarii e te mau metua ra. Te hoê utuafare e metua vahine o te oaoa i ta’na ra mau tamarii, o te paturuhia e te metua tane—e mau taata viiviiore, te ma e te faatura i te Atua ra.²⁴

Te mau metua … e ti’a ia ratou ia here e ia faatura i te tahi e te tahi, na roto i te mau peu faatura e te aau maru i te mau taime atoa. Ia haapao te tane i ta’na ra vahine ma te peu mâ e te faatura. Aita roa e tia i te tane ia parau ino ia’na, aita e tia ia’na ia faahiti i te parau hape no’na ra, e haapa’o ra oia ia’na i te mau taime atoa ma te faatura rahi i roto i te utuafare, i mua i te aro o te mau tamarii ra.… Ia faatura atoa te vahine i ta’na ra tane…. Ia riro te vahine ei tumu no te oaoaraa o ta’na ra tane, e e ora oia e e faaohipa oia i te mau ravea ia oaoa te utuafare ra, ia riro te reira ei vahi herehia e ta’na ra tane i te fenua nei. O teie te huru o te tane, te vahine, te metua tane e te metua vahine i roto i te otia mo’a o taua vahi mo’a ra i parauhia: te utuafare.²⁵

E te mau taeae e te mau tuahine e, eita te hoê mea e faatiahia ia ti’a mai i rotopu ia orua—te metua tane e te metua vahine, te tane e te vahine; aita e tia ia tupu mai te hoê putapuraa taaê, aita hoê ae mea e tia ia faatiahia i rotopu ia orua e o te faataaê ia orua i te tahi e te tahi; aita orua e faatia i te reira. E mea faufaa roa te reira no to outou maitai e to outou oaoa e no te tahoeraa o te titauhia i roto i te utuafare. E paruparu anae to tatou paatoa. I te tahi mau taime e ite te tane i te hoe paruparu i ta’na ra vahine, e e parau ino oia ia’na. I te tahi mau taime, e mana’o mai te vahine ra aita ta’na tane i rave i te mea tano e e parau ino atoa oia ia’na. Eaha te maitai e noaa mai? Eere anei te faaoreraa i te hara i te hoe huru maitai ae? Eere anei te aroha i te huru maitai ae? Eere anei te here i te hoê huru maitai ae? Eita anei i te mea maitai ae ia ore e parau i te mau hape, ia ore ia faarahi atu te mau paruparau na roto i te tapitiraa i te mau parau? Eere anei te reira i te ohipa maitai ae? E aita anei te tahoeraa i rotopu ia orua e te fanauraahia te mau tamarii i roto i te taatiraa o te fafauraa api e te mure ore, e riro mai ei mea maitai ae ia faaore outou i te faahiti i te mau paruparu e te mau hape o te tahi e te tahi? Eere anei i te mea maitai ae ia tau’a ore e ia tanu roa i te hape o te tahi e ia faahiti i te mea maitai anae o ta outou e ite ra i te tahi e te tahi, e ia huna hoi te hape e eiaha hoi e faarahi i te reira, eere anei te reira i te mea maitai ae?²⁶

Te vai ra anei te mana’o oaoa ae i teie mana’o e, te hoe tane o te here i ta’na ra vahine e o ta teie vahine hoi e here ra, e ua vai parautia teie tane i ta’na ra vahine e ua vai parautia te vahine ra i ta’na ra tane te mau mahana o to’na ra oraraa e vahine na’na e e metua vahine, e tia mai oia i te poipoi no te tiafaahouraa matamua, ahuhia i te tahuti ore e te ora mure ore, e haamata faahou i to raua huru oraraa mai ta raua i ora na i roto i teie nei oraraa, ei tane e ei vahine, ei metua tane e ei metua vahine, ei metua no ta raua mau tamarii, e ua patu hoi raua i te niu no te hanahana mure ore e te faateiteiraa mure ore i roto i te basileia o te Atua.²⁷

O te faaipoiporaa i haamo’ahia e i haapa’ohia e te Atua, o te reira te niu o te utuafare hanahana- o te haamaitai, o te faaoaoa, o te faateitei, e o te aratai i te maororaa o te oraraa i pihaiiho i to tatou mau metua i te ra’i ra, e i roto hoi i te ora mure ore, te ora tahoe, e te haereraa i mua.²⁸

Mana’o Tauturu i te Haapiiraa

No teaha te Atua i haamau ai te faaipoiporaa? Nahea te faaipoiporaa mure ore e tauturu ai ia tatou ia farii i te mau “tutavaraa teitei ae e te mo’a”?
No teaha te faaipoiporaa e riro ai “ei tuhaa faufaa ae no te oaoa o te taata nei”? No teaha e rave rahi te mau taata e haafaufaa ore nei i te reira?
Nahea te haereraa-i-mua mure ore e te oaoa mure ore e riro ai ei mea faufaa no te taatiraa mure ore o te tane e te vahine? Eaha to outou mana’o ia farerei faahou outou i ta outou tane e aore ra i ta outou vahine no te tau mure ore?
No teaha tatou e faaipoipo ai i roto i te hiero?
Eaha te mau utua no tatou e no te feia i ofati i te mau auraa o te fafauraa api mure ore ra no te faaipoiporaa?
Eaha te tahi mau faahemaraa e faaoaoaraa o te aratai i te tahi mau taata ia faataime e aore ra ia ape i te faaipoiporaa? Nahea tatou ia ite e mea tia ia tatou ia faaipoipo?
Ua tohu te Peresideni Iosepha F. Semita e, te aperaa i te mau hopoia o te faaipoiporaa, e haamou te reira i te nunaa i te mau matahiti i muri mai.” Nahea ra te mau nunaa i te iteraa i te reira haamouraa?
Nahea te fafauraa o te faaipoiporaa mure ore e haapuai ai i te mau apiti ia faaruru i to ratou mau ati e to ratou mau fifi”?
No teaha “te tiaturiraa mau” i rotopu i te tane e te vahine i riro ai ei mea faufaa roa? Eaha te tahi atu mau ateributi te tia ia faaohipahia i rotopu i te mau tane e te mau vahine? Nahea te mau peu tahape—mai te faaino, te faahaehae, te manao tahoo e te teoteo—e haaparuparu ai i te faaipoiporaa?
Eaha te auraa o te parau ra ia vai hoê te tane e te vahine? Eaha te tahi mau tusia te tia i te mau apiti ia rave no te vai hoe noa? Eaha te tahi mau mea ta te mau apiti e nehenehe e rave no te haapuai i to ratou taatiraa mure ore?