Te Faaurûraa e te Hanahana o te Mau Papairaa Mo’a

E mea ti’a i te mau melo o te Ekalesia ia tai’o na roto i te faaroo i te mau papa’iraa mo’a e ia ora ma te haapa’o i te mau parau tumu tei haapiihia i roto i te mau buka tumu o te Ekalesia.

Aamu o te Oraraa o Joseph F. Smith

I to ratou tere i te Faa i Roto Miti i te matahiti 1848, e parahi o Mary Fielding Smith, ta’na tamaiti Joseph e te tahi atu mau melo o te utuafare no te tai’o i raro a’e i te maramarama o te mori lamepa e o te auahi, i te mau papairaa mo’a. I reira te haapiipiiraa pae varua matamua a Joseph i horo’ahia ai e to’na metua vahine i roto i te fare ie, a puhapa ai ratou i te fenua aihere.¹ Ua haamana’o te Peresideni Joseph F. Smith e: “I to’u tamariiraa, ua putapû roa to’u aau i te mana’o e i te tiaturi aueue ore e, te mau heheuraa i horo’ahia mai e tei horo’a-atoa-hia mai na roto i te Peropheta Iosepha Semita … e parau te reira na te Atua, mai te au atoa i te mau parau a te mau pìpì i mutaa ihora a faaite ai ratou i te iteraa papu no te Metua e no te Tamaiti. Ua apee mai te iteraa o to’u aau o to’u vai tamariiraa i te mau oaoaraa e te mau otoraa o na matahiti e ono ahuru tiahapa a ohipa ai au i roto i te aua misioni, i roto i te mau nunaa atoa o te ao nei, e i u nei atoa i rotopu i te mau tavini haamanahia o te Atua ra.”²

I te amuiraa rahi i faatupuhia i te 10 Atopa 1880, ua tuu atu te Peresideniraa Matamua o te Ekalesia—oia te Peresideni John Taylor e to’na na Tauturu o George Q. Cannon e o Joseph F. Smith—i mua i te Ekalesia, te buka Poe Tao’a Rahi e te tahi atu mau tuhaa o te Te Parau Haapiiraa e te Mau Parau Fafau ei mau “heheuraa na te Atua i te Ekalesia a Iesu Mesia i te Feia Mo’a i te Mau Mahana Hopea Nei e i to te ao atoa nei.”³ Na roto i te ma’itiraa tahi, ua farii te mau melo o te Ekalesia i taua mau heheuraa ra no te faananea’tu i te mau papairaa mo’a a te Ekalesia. Te na ô ra te Peresideni Smith, e vai tamau te mau papairaa mo’a ei “tao’a varua.”⁴ Ua faaohipa oia i te papairaa mo’a i roto i ta’na haapiiraa a ora ai oia, e na roto i to’na feruri hohonuraa i te mau papairaa mo’a i farii ai oia i te heheuraa rahi i parauhia Te Parau Haapiiraa e te Mau Parau Fafau tuhaa 138 i parauhia, Ta Joseph F. Smith Orama no nia i te Faaoraraa i te Feia Pohe.

Haapiiraa na Joseph F. Smith

E hopoi mai te mau papa’iraa mo’a i te parau no te aroha e te hoê faufaa pae varua.

I [te feia atoa] tei arepurepu te mana’o no te rahi o te haapiiraa e vai nei i te ao nei, e parau atu vau e: A imi i te Mau Papairaa Mo’a, a imi i te Atua na roto i te pure e i reira, a tai’o i te mau parau haapiiraa o tei porohia e te Mesia i roto i ta’na a’oraa i nia i te mou’a i roto i te Mataio, o tei faaite-faahou-hia i te feia mo’a i tahito i te fenua [Marite] (3 Nephi). Na roto i te taioraa i teie mau buka tumu, e i te imi hohonuraa i te auraa o te mau mana’o faito ore, e nehenehe ia outou ia tamata i te mau philosophia e i te mau parau tumu o te pae morare o te ao nei ia aifaito i ta ratou. Eita te paari o te taata e nehenehe ia faafaitohia i te reira. E arata’i ratou i te mau pìpì aau hau a te Mesia ia faaaea hau noa ia maitai te taata mai ia’na i maitai roa ra. Aita roa e philosophia i parau a’e nei mai ta Iesu i parau na, “A haere mai ia’u nei.” Mai te haamataraa o te ao nei e tae roa mai i teie nei, aita roa e philosophia i tiaoro i te taata i te parau no te aroha, aita atoa i fafau e i faaite i te mana faaora e vai ra i roto ia’na. “E haere mai outou ia’u nei e te feia atoa i ha’a rahi e tei teiaha i te hopoi’a e na’u outou e faaora,” o ta’na ïa pii i te mau tamarii tamaroa e te mau tamarii tamahine a te taata nei [Mataio 11:28].

Ua pahono te Feia Mo’a i te Mau Mahana Hopea Nei i teie piiraa, e na roto i te reira, e rave rahi tauasini i roaa te ora e te hau o tei hau ê atu i te ite taata nei; taa ê noa’tu i te mau tamataraa o te tino, te arepurepuraa e te ati ta ratou i farerei. Te faaea maitai ra ratou i roto i te ite e, aita e taata e nehenehe ia parau e aore râ, ia haapii i te parau haapiiraa mai te reira te huru; o te parau mau te reira a te Atua ra.⁵

Te mea tei faateitei i te natura o te faaurûraa e te mo’araa o te mau Papairaa Mo’a, o te varua ïa i papaihia ai te reira, e te tao’a varua o ta ratou e hopoi na te feia o te tai’o maite ma te tuutuu ore. No reira, e mea ti’a ia faaaifaito maitai to tatou mana’o no te mau Papairaa Mo’a i te mau tumu i papaihia ai te reira. Ua titauhia te reira no te fa’aaano i te mau horo’ara a te varua, no te heheu e no te faa’eta’eta i te autaatiraa i rotopu ia’na e to’na Atua. E mea ti’a ia taiohia te Bibilia e te tahi atu â mau buka o te Papairaa Mo’a o tei auhia e te feia faaroo tei hiaai i te mau maa varua e o tei imi i te parau mau o te varua.⁶

Te faaotiraa rahi roa a’e ta te taata e nehenehe e rave i roto i teie nei ao, o te haamâtau papu maitairaa ïa i te parau mo’a, ia ore te hi’oraa e aore râ, te huru o te tahi noa’tu mea ora i te ao nei e haafariu ê ia ratou i te ite i roaa ia ratou ra. “I nia i te taahiraa ava’e o te Fatu,” te orometua rahi roa a’e i te mau orometua atoa i fariihia e to teie nei ao, te e’a aueue ore e te papu ia pee e aita atu ai e o ta’u i ite i te ao nei. E nehenehe tatou e farii i te mau parau, te mau parau haapiiraa, e te mau parau mo’a a te Fatu, ma te mata’u ore ia ore taua hi’oraa maitai ra ia iri ê i te hopoiraa e te faatupuraa i ta’na iho parau, e i te faatiaraa i ta’na mau parau haapiiraa e ta’na mau titauraa.⁷

Ua haapii mai te mau papa’iraa mo’a o teie anotau ia tatou i te parau a te Atua ma te faaite papu e, o Iesu te Mesia.

Na roto i te faaiteraa a te Varua Mo’a o te Atua ia’u, ua ite au e, teie buka, Te Parau Haapiiraa e te Mau Parau Fafau o ta’u e mau nei i roto i to’u nei rima, e parau ïa na te Atua no roto mai ia Joseph F. Smith i to te ao nei, i te mau melo ihoa o te Ekalesia a Iesu Mesia i te Feia Mo’a i te Mau Mahana Hopea Nei i te ao atoa nei, e na roto i te horo’araa e te mana o te Atua ua iriti oia i teie buka (te Buka a Moromona) mai roto mai i to’na re’o tumu, e i te mau mea i ootihia i nia i api auro e tae roa mai i roto i te re’o e taiohia e tatou mai roto atu i te tapo’i o teie buka; e tei roto i te reira te îraa o te Evanelia mure ore. E arata’i te reira i te mau taata ia roaa te ite i te parau mau ia nehenehe ratou ia faaorahia e ia faaho’ihia i mua i te aro o te Atua ma te farii i To’na hanahana e i te mau ora mure ore.⁸

Ua iriti te Mesia i te mau uputa o te menema, e ua haavi i te pohe e i te apoo e ua riro ei “matamua no te feia i mairi i te ta’oto ra.” [1 Korinetia 15:20.]. … Ua ite [Ta’na mau] pìpì e ua haapapu i te parau no te tia-faahou-raa, eiaha roa to ratou iteraa papu ia pato’ihia. I vai maitai noa ra, ei parau mau, e ei mea papu.

Tera râ, o teie noa anei te parau faaiteraa o ta tatou e tia’i nei? Aita atu ai ta tatou tiaturiraa maoti râ, o te iteraa papu ana’e o te mau pìpì i mutaa ihora? Mauruuru i te Atua i te mea e, te vai atura â. Auaa te tahi atu parau faaiteraa e vai nei ia tatou i tia ai ia tatou ia riro ei ite no te parau mau o te iteraa papu o te mau pìpì i mutaa ihora. E hi’o tatou i te Buka a Moromona; e faaite te reira i te poheraa e te tia-faahou-raa o Iesu Mesia na roto noa i te parau faaiteraa rii e te hape ore; e mea tia ia tatou ia hi’o i te Parau Haapiiraa e te Mau Parau Fafau tei reira te mau heheuraa o teie tau tuuraa evanelia e, e ite maramaramahia ia tatou te parau faaiteraa i reira. Tei ia tatou te iteraa papu o te Peropheta Iosepha Semita, o Oliver Cowdery e o Sidney Rigdon e, ua ite ratou i te Fatu ia Iesu Mesia—oia iho tei faasataurohia i Ierusalema—e ua faaite hoi oia ia’na iho i ratou ra [a hi’o PH&PF 76:22–24].⁹

Te Buka a Moromona, e buka ïa [no] te papairaa mo’a i iritihia na roto i te horo’araa e te mana o te Atua, inaha, na te re’o o te Atua i faaite i na ite tootoru e ua iritihia te reira na roto i te horo’araa e te mana o te Atua e e parau mau hoi te reira. Ua faaite na ite tootoru i te parau mau no te reira, e taa ê atu i te Peropheta Iosepha Semita, ua faaite atoa na ite toova’u e, ua hi’o ratou e ua fafa i api e ua tape’a hoi i te reira, e ua ite atoa hoi i te mau mea i ootihia i nia i te reira, e ua ite ratou e, i mau na hoi Joseph F. Smith i api i iritihia ai te Buka a Moromona.¹⁰

Te Buka a Moromona, o ta Joseph F. Smith i afa’i mai i teie nei u’i e ua riro na hoi oia ei mauhaa i roto i te rima o te Atua, ua iritihihia te reira i roto i te re’o Heremani, Farani, Tanemateta, Tuite, Pays de Galles [Peretane], Vaihi, Hindustani[Fenua Initia], Paniora e Holane, e iritihia’tu â hoi teie buka i roto i te tahi atu â reo, ia au i te mau tohuraa i roto i reira, e ia au atoa i te mau fafauraa a te Fatu ia Joseph F. Smith, e faataehia te reira i te mau fenua atoa e te mau opu atoa e te mau nunaa atoa i raro i te ra’i nei, e tae noa’tu e, ua fana’o te mau tamarii tamaroa e te mau tamarii tamahine a Adamu i te evanelia mai tei faaho’ihia mai i te fenua nei i roto i te tau tuuraa o te îraa o te evanelia.¹¹

E e faaite mai te Atua i ta’na mau opuaraa i te Ati Lamana ia tae i to’na taime ia feaa ore râ te mana’o o te feia i tiaturi i te Buka a Moromona e to’na tumu mo’a—ua haapapu-maite-hia te reira i roto i taua buka ra area râ, nahea oia i te rave i te reira i roto i to’na mau hu’ahu’araa, eaha te mau mauihaa ta’na e faaohipa no te faatupu i ta’na mau opuaraa, e nehenehe te reira e ui maerehia, taa ê noa’tu i te parau i heheuhia na. Hoê o taua mau mauihaa o tei itehia e tatou, o te Buka a Moromona ia.¹²

E parau vau i to’u mau taeae, tei roto i te Parau Haapiiraa e te Mau Parau Fafau te tahi o te mau parau tumu hanahana roa i heheuhia na i te ao nei, te tahi ra, ua heheuhia mai ia i roto i te îraa e aore hoi te reira i heheu a’ehia na i te ao nei; e faatupuraa hoi te reira i te fafauraa a te mau peropheta i tahito ra e, i te mau tau hopea nei, e heheu mai te Fatu i te mau mea i te ao nei o tei vai-huna-noa-hia mai mua’tu i te faatumuraa o te ao nei; e ua heheu mai te Fatu i te reira na roto i te Peropheta Iosepha Semita.¹³

Te tiaturi nei au i te huru mo’a o Iesu Mesia no te mea, ua roaa ia’u te iteraa mau e, o Iesu te Mesia, te Tamaiti a te Atua Ora, na roto i te faaiteraa a Joseph F. Smith i roto i teie buka, te Parau Haapiiraa e te Mau Parau Fafau e, ua ite oia Ia’na, e ua faaroo hoi Ia’na, e ua farii oia i te mau haamaramaramaraa no o mai Ia’na, e ua haapa’o atoa oia i taua mau parau ra, e ua tia oia i teie mahana i mua i to te ao nei ei ite hopea rahi mau, ei ite ora no te huru mo’a o te misioni a te Mesia e i To’na mana no te faaora i te taata i te pohe tino e i te pohe piti tei apee i te mau hara iho a te taata, na roto i te haapa’o-ore-raa i te mau oro’a o te evanelia a Iesu Mesia.¹⁴

A tai’o i te mau buka tumu ia roaa te ite i te parau a te Atua.

Te mea ta’u i ite i to’u tai’oraa i te mau irava o te Papairaa Mo’a oia hoi, ua afa’i mai te Varua i te hoê maramarama apî i to’u feruriraa e ua faaite i to’u iteraa, te mau mana’o e te mau hi’oraa e au ei mea apî ia’u e noa’tu e, ua mâtau vau i taua mau Papairaa Mo’a ra, e i tai’o na hoi au i te reira e rave rahi taime. Te vai nei te hoê mea taa ê mau ta’u i ite o tei apiti i te tai’oraa i te parau a te Atua oia hoi, ia tai’o ana’e, e faaineinehia te reira no te faaapî i te aau, no te faaora i te varua taata, e no te haafatata ia’na, maite mea e nehenehe, i te punavai o te maramarama, o te parau mau, o te paari, o te aroha e o te ite. No reira, e mea tia i te Feia Mo’a i te Mau Mahana Hopea Nei ia tai’o pinepine noa i te parau a te Atua mai tei papaihia i roto i te Bibilia, te Buka a Moromona e te Parau Haapiiraa e te Mau Parau Fafau, e mai tei aparauhia e te mau Peresibutero faatere o te Ekalesia ei haapapuraa i te mau ture a te Atua i roto i te feruriraa o te tamarii a te taata nei.

E ia tai’o tatou i te parau a te Fatu, e mea tia ia feruri ma te faaau i te reira ia tatou, e mea tia atoa ia tatou ia feruri e, te haapa’o ra anei tatou i te mau titauraa o te Evanelia e aore anei, e tei roto anei i to tatou aau te Varua o te apiti i te ohipa e te parau a te Fatu. Eita e ti’a ia tatou ia tai’o no te parau noa e, ua oti ta tatou tai’oraa; ia tai’o râ tatou ma te varua e ma te maramarama, ia tia ia tatou ia haafaufaahia, e ia tia i te parau mau ia heheuhia mai, i te faito tia, i to tatou feruriraa, e ia haapapuhia te reira i to roto i to tatou mana’o e ore ia te reira e mo’ehia ia tatou, ia riro râ ei punavai o te tia ia pihaa e tae noa’tu i te ora mure ore, o te riro hoi ei pû no te parau mau, no te maramarama, no te popou e no te hau i roto i to tatou aau e a muri noa’tu.¹⁵

E mea tia i te mau melo taatoa o te Ekalesia a Iesu Mesia i te Feia Mo’a i te Mau Mahana Hopea Nei ia haamatau i te mau parau i papaihia i roto i te Faufaa Apî, te mau mea ihoa ra o tei faahitihia e te Faaora o tei papaihia e te mau aposetolo e te Faaora Iho. E mea tia ia tai’o-maite- hia te Buka a Moromona, e mea tia atoa ia tai’o maitai-mau-hia te Parau Haapiiraa e te Mau Parau Fafau e te Feia Mo’a i te Mau Mahana Hopea Nei. O te mau buka tumu teie a te Ekalesia e tei roto i te reira te parau mau, e ere i te parau hape, e ere i te mau parau e te mau feruriraa o te taata, e ere i te mau aamu tei hamanihia ei faahoho’araa, e ere atoa i te mana’oraa noa tera râ, o te parau mau ïa, e parau na te Atua, inaha, ta te Atua parau e parau mau ïa, e o teie te mau mea te tia i ta tatou mau tamarii tamahine, e ta tatou mau tamarii tamaroa, to tatou mau metua tane e to tatou mau metua vahine ia maramarama. Ia ite tatou i te parau mau e na te parau mau tatou e faatiamâ i te hape, i te haavare, i te peu iho tumu, i te ite hape e i te mana’o nevaneva o te taata e te mau philosohia faufaa ore o te ao nei. Mai te mea e tia ia tatou ia haapii i te parau mau, ei reira tatou e tiamâ ai i te mau parau hape e i te mana o te parau hape o tei riro ei mea puai roa i roto i te ao nei.

… Te hinaaro nei tatou ia ite ta tatou mau tamarii tamaroa e ta tatou mau tamarii tamahine i te parau mau a te Atua, eiaha ra te mau mana’o nevaneva o te ao nei, e ua hinaaro matou ia tai’o outou i taua mau buka ra e roaa ia outou te iteraa i ta te Fatu parau ia tatou.

E tai’o te tahi pae o to tatou feia maitatai i te mau buka e rave rahi o tei nene’ihia i teie mahana, o tei parauhia e, te mau aamu no te taata tera râ, aita to ratou e taime no te tai’o i te Parau a te Fatu. Mea nehenehe rave rahi o teie mau buka area râ, e faahiti noa te reira i te mau parau monamona ma te mana’o e aore râ, ma te faaau i te mau tiare tei u’a i nia i te tumu e aore e a’a. E roaa ia outou te parau mau i roto i te mau buka i fariihia ei buka tumu na te Ekalesia. Te ite nei au e rave rahi o to tatou feia te tai’o nei i te mau mea i papaihia e te feia papai aamu i te tai’o i te mau mea a te Atua. Aita ratou i ite i te ihotumu mau o te Evanelia a Iesu Mesia, aita ratou i ite e aore râ, aita ratou i maramarama i te mau oro’a o te Autahu’araa e te mau parau tumu o te faatereraa ta te Atua i heheu mai i te tamarii a te taata nei no te haamau i te basileia o te Atua i nia i te fenua nei. Oia mau— ua hau atu to ratou ta’a i te mau parau maramarama i to ratou ite no te Bibilia, no te Buka a Moromona e no te Parau Haapiiraa e te Mau Parau Fafau.¹⁶

E mea maere ia faaroo i te rahiraa uiraa o te hapono-tamau-hia i te Peresideniraa o te Ekalesia, e i te tahi pae o to’u mau taeae o tei mau i te mau toro’a faatere, o tei titau i te haamaramaramaraa i nia i te mau mea papu roa o te Evanelia. E hanere e hanere te uiraa, te parauraa e te rata tei haponohia ia matou i tera taime e tera taime o te titau mai i te ite e te haamaramaramaraa i nia i te mau mea i papai-papu-hia i roto i te mau heheuraa a te Atua— tei roto i te Buka a Moromona, te Parau Haapiiraa e te Mau Parau Fafau, te Poe Tao’a Rahi e te Bibilia—e au e, te taata tei ite i te tai’o, e tia ïa ia’na maramarama.¹⁷

Tei roto i te evanelia te parau mau. Mai te mea o te reira iho â, e te faaite nei hoi au i to’u iteraa papu e, e parau mau te reira, e mea faufaa ïa to tatou faaitoitoraa ia maramarama i te parau mau, e ia faaite i te reira i ta tatou mau tamarii, na roto i te varua e i te raveraa. … E mea ti’a ia ravehia i te mau mahana atoa e i roto i te mau utuafare na roto i te faaueraa, te haapiiraa e te hi’oraa maitai. … A horo’a hoê ahuru minuti no te tai’o hoê pene i te mau parau a te Fatu i roto i te Bibilia, te Buka a Moromona, te Parau Haapiiraa e te Mau Parau Fafau, hou te taotoraa e hou te haereraa atu i te ohipa. A faaamu i to outou varua i roto i to outou utuafare, e tae noa’tu hoi i te vahi taata.¹⁸

Mana’o Tauturu i te Haapiiraa

Nahea te papairaa mo’a ia “arata’i … i te pìpì aau hau a te Mesia i te hau mau” e nahea te reira ia tauturu ia tatou ia maitai roa? Mea nahea ratou i te tautururaa ia outou ia riro ei pìpì hau na te Mesia?
Eaha te mau “tumu i papaihia ai [te mau papairaa mo’a]”? E mea nahea te reira i te “faa’eta’eta … i te autaatiraa” i rotopu ia tatou e te Atua.?
Eaha ta outou huru ia taio outou i te mau papairaa mo’a? Na roto i teihea huru tatou e ti’a ai ia taio i te mau papairaa mo’a?
Eaha te mau irava i roto i te Buka a Moromona, te Parau Haapiiraa e te Mau Parau Fafau e aore râ, i te Buka Poe Tao’a Rahi o tei haapuai i to outou iteraa papu e o Iesu te Mesia? Eaha te mau irava o tei haapuai i to outou iteraa papu i te piiraa mo’a o te Peropheta Iosepha Semita?
Mea nahea te mau opuaraa a te Atua i te faaiteraahia i teie mahana i rotopu i te mau huaai o te feia o te Buka a Moromona?
Eaha te tahi pae o “te mau parau tumu hanahana tei ore i heheuhia na i to te ao nei” o te itehia i roto i te Buka a Moromona, te Parau Haapiiraa e te Mau Parau Fafau, e te Buka Poe Tao’a Rahi? Nahea to teie mau parau tumu tauiraa i to outou oraraa?
Eaha te auraa o te parau e, ia tai’o maite i te mau papairaa mo’a? No te aha e mea ti’a ia tatou ia na reira? Nahea outou i te manuïaraa na roto i te tai’oraa e te haapiiraa i te reira?
Nahea tatou ia haapapu e, eita to outou mau utuafare e vaiiho i te mau buka aamu, te radio teata e te tahi atu mau ohipa faaoaoaraa ia riro ei matamehai i te taioraa i te mau papairaa mo’a?
Eaha te faufaa no te tai’oraa i te papairaa mo’a a te taata iho e a te utuafare i te mahana hoê? Mea nahea to outou e aore râ, to te tahi atu mau taata i te faaô manuïaraa i te tai’oraa o te papairaa mo’a i roto i te oraraa taata e te oraraa utuafare?