Te mau tamarii te mea Tei hau ae i te Mau Oaoaraa o te Ao nei

Ia here tatou i ta tatou mau tamarii, ia paari ratou i roto i te Evanelia a Iesu Mesia e ia haapiihia ratou i te viritu, te aroha, e te haavare ore.

Aamu o te Oraraa o Iosepha F. Semita

Te here o te Peresideni Iosepha F. Semita no te Evanelia, ua tuea ïa i to’na here keresetiano no te mau tamarii, no ta’na iho mau tamarii e no te tahi atu mau tamarii. “Te mea tei hau ae i to’u Mau Oaoaraa i te Ao nei, o ta’u ïa mau tamarii here.” Mauruuru e te Atua!¹

Ua papai o Charles W. Nibley, te Epesikopo Peresideni o te Ekalesia e: “aita e otia to te here o te Peresideni Semita no te mau tamarii. I roto i te hoê tere i te mau tuhaa apatoa no Utaha e tae roa’tu i St George …, a porote ai te mau tamarii i mua ia’na, e mea putapu ia ite i to’na here rahi ia hi’o oia i teie mau tamarii. E hopoia na’u te faarevaraa te pupu taata oi tapae matou i te hora i te puhapa i muri mai, te vahi tei reira te nunaa i te tiairaa ia matou, area ra e mea fifi roa ia tatara ia’na i rotopu i te mau tamarii. Ua hinaaro oia e aroha rima ia ratou paatoa e ia paraparau ia ratou tataitahi …

“I te hoê mahana a roohia ai te hoê o ta’na mau tamarii i te ma’i, tei ô vau io’na ra. Ua ite au ia’na i te hoiraa i te fare i te pô ma te rohirohi, te rohirohi e faaruruhia i muri ae i te ohipa, e noa’tu to’na rohirohi, te vai ra râ to’na puai no te hiihii maoro, e rave rahi hora, i te reira aiu i roto i to’na rima a porote ai oia na roto i te fare … ma te faaite i to’na here i te reira aiû, e ma te faaitoito ia’na i roto i te mau rave’a atoa na roto i te maru rahi, te aroha e te here.”²

Ua faaite oia i te maru rahi e te here i to’na utuafare aano e te faatura. I roto i ta’na a’oraa hopea i ta’na mau tamarii, i te 10 no Novema 1918, ua faaite oia ia ratou te mau manao here atoa o to’na aau: “Ia hi’o haati au ia’u nei, te ite nei au i ta’u mau tamarii tamaroa e ta’u mau tamarii tamahine o ta te Fatu i ho mai no’u e o tei roaa ia’u, na roto i Ta’na tauturu, i te horoa i te hoê oraraa tura no ratou i roto i te ao nei—Ua iteahia ia’u te auro o to’u oraraa, oia hoi te mea e anaanatae ai au ia ora i teie oraraa nei.”³

Te Mau Haapiiraa a Iotefa F. Semita

A haapii i te Evanelia a Iesu Mesia i te mau tamarii na roto i te parau e te hi’oraa.

Te tane e te vahine tei fariu i ni’a i te Evanelia a Iesu Mesia e o tei patu iho nei i to raua utuafare, na roto i to raua puai, to raua hioraa maitai e ta raua faaururaa, e horoa raua te hinaaro i roto i ta raua mau tamarii ia apee ia raua i roto i te hoê oraraa viivii ore, hanahana e te haavare ore i roto i te basileia o te Atua e o te riro ei maitai e ei faaoraraa ia ratou. Aita’tu e taata maori ra o vau anae ra te nehenehe e a’o onoono i ta’u mau tamarii, ia oaoa e ia ora ratou. Aita’tu e taata maori ra o vau anae ra te tau’a papu nei i te maitai o ta’u mau tamarii. Aita to’u e oaoaraa mai te mea aita ratou. E tuhaa ratou no’u. Na’u ratou; na te Atua i horoa mai ia ratou na’u, e te hinaaro nei au ia haehaa e ia auraro ratou i te mau titauraa o te Evanelia. Te hinaaro nei au ia rave ratou i te maitai, e ia riro ratou ei feia parau-tia i roto i te mau tuhaa atoa, ia riro ratou ei feia tiama i te haamaitairaa ta te Fatu i tuu i ni’a ia ratou a taio ai Oia ia ratou ei melo no te nunaa o te fafauraa, tei hau i te maitai i te tahi atu mau nunaa, no te mea ua faatusia ratou no to ratou iho ora i roto i te parau mau.⁴

Ua haapiihia tatou e: “te tamarii ra, e tufaa ïa no ô mai i te Fatu ra,” ua riro atoa ratou, ia au i te faaiteraa a Salamo: “ei utu’a” [Salamo127:3]. Mai te peu aita e mana to te mau tamarii ia fanauhia, eaha ïa te utu’a a te Fatu? Eita ratou te tumu i paruparu ai e i veve ai te utuafare, inaha na roto i to ratou fanauraahia ua afai atoa mai ratou i te tahi mau haamaitairaa no te ra’i mai, tei faatupu i te ruperupe o te utuafare e o te Hau Fenua. “Mai te ohe i te rima o te feia puai ra, oia atoa te tamarii a te taata itoito ra. E ao to te taata i î to na piha ohe ia ratou!” [Salamo 127:4–5]⁵

E nunaa keresetiano tatou, te tiaturi nei tatou i te Fatu ia Iesu Mesia, e te manao nei tatou e, e hopoia na tatou te iteraa Ia’na ei Faaora e ei Taraehara no tatou. A haapii atu i te reira i ta outou mau tamarii. A haapii ia ratou e, i te Perofeta Iosepha Semita ra i faahoihia mai ai te Autahuaraa o tei mauhia e Petero, Iakobo, e Ioane, o tei faatoroahia’na i raro ae i te rima o te Faaora iho. A haapii ia ratou e, na te Atua i pii e i maiti ia Iosepha Semita, te Perofeta, i to’na apîraa, no te haamau i te niu o te Ekalesia a Iesu Mesia i roto i te ao nei, no te faahoi mai i te Autahuaraa mo’a, e te mau oro’a o te Evanelia tei riro ei mea faufaa no te faaoraa i te taata i roto i te basileia o te ra’i. A haapii i ta outou mau tamarii ia faatura i to ratou taata tupu. A haapii i ta outou mau tamarii ia faatura i to ratou epesikopo e te mau orometua e tomo ra io outou’na no te haapii ia ratou. A haapii i ta outou mau tamarii ia faatura i te feia paarï. A haapii ia ratou ia here e ia faatura i to ratou mau metua, ia tauturu i te feia veve e te feia riirii. A haapii i ta outou mau tamarii, mai tei haapiihia ia outou iho, ia faatura i te Autahuaraa o ta outou e mau ra, te Autahuaraa o ta tatou e mau nei ei peresibutero i Iseraela.

A haapii i ta outou mau tamarii ia faatura ia ratou iho, a haapii i ta outou mau tamarii ia auraro i te parau tumu o te peresideniraa, e ia ite ratou e mea na roto i te peresideniraa i vai papu ai te mau faanahoraa o te mau pupu, e na roto i te reira i faahereherehia ai te puai e te mana ei maitai, ei oaoa e ei faatiaraa i te nunaa. A haapii i ta outou mau tamarii, ia haere ratou i te haapiiraa, ia faatura i to ratou mau orometua haapii i roto i te mau parau mau e te mau mea parau tia, i roto i te natura mata’u ore o te tane e te natura o te vahine, e i roto i te mau mea faufaa … A haapii i ta outou mau tamarii ia auraro i te ture a te Atua e i te ture o to ratou fenua.⁶

Te tai’o nei tatou i roto i te PH&PF e, e mea titauhia ia haapii te mau metua i ta ratou mau tamarii “ia ite papu roa i te parau no te tatarahapa, te faaroo i te Mesia te Tamaiti no te Atua Ora, e no te bapetizoraa e te horoa no te Varua Maitai na roto i te tuuraa rima, ia tae i te vau o te matahiti ra.” “E e haapii atoa ratou i to ratou ra mau tamarii ia pure, e ia afaro noa to ratou haereraa i mua i te Fatu.” E ia ore te mau metua ia na reira, a mo’e ai te mau tamarii e a huri ê atu ai ratou i te parau mau ra, i reira râ, ua parau te Fatu e, tei nia te hara i te upoo o te mau metua (PH&PF 68:25, 28). E mea hirinai ia feruri e, te metua tane tei here i ta’na mau tamarii ma to’na aau atoa, te faahapahia e te Atua no to’na haapao ore i tei poiherehia e ana e ua tae roa i te fariu ê atu i te parau mau e a riro ai ei mau tamarii overe. Te toparaa teie mau tamarii, ua riro ia ei utu’a na te mau metua e o ratou te faahapahia no te taiva e te pouri o ta ratou mau tamarii …

Mai te peu e mea tiama vau ia tomo i roto i te basileia o te Atua, te hinaaro nei au ia tomo atoa ta’u mau tamarii i reira; e te onoono nei to’u manao ia tomo i roto i te basileia o to’u Atua. Te etaeta nei to’u manao ia haere i reira, na roto i te tauturu a te Fatu, na roto i te haehaa e te haapao, e ua tae roa to’u manao ia amo i ta’u misioni i nia i te fenua nei e ia haapao i ta te Atua i faaue mai i te roaraa o to’u pue mahana i ni’a i te fenua nei. Te reira ta’u i faaoti e te faaitoito nei au na roto i te tauturu a te Atua, ia ore au ia iri. No reira, te hinaaro nei au i pihai atoa ta’u mau tamarii ia’u nei. Te hinaaro nei au ia apee te mau melo o to’u utuafare ia’u, te vahi e haerehia e au, i reira atoa ratou, e ia fana’o atoa hoi ratou i te faateiteiraa ta’u e farii.⁷

E faaururaa to te mau metua i n’ia i ta ratou mau tamarii … e noa’tu aita tatou e ite ra i te faaururaa i roto i to tatou hioraa maitai, te haapapu atu nei au ia outou e, i tupu pinepine’na te ino na roto i te mau raveraa o ta tatou i manao e, eita te reira e faauru i to tatou taata tupu e aore ra i ta tatou mau tamarii … Area ra, te ite nei matou i te mau metua tane e te mau metua vahine e faaite ra i te hioraa hape i ta ratou mau tamarii, e o ta ratou iho i opani’na ia rave i te reira. E riro teie huru tapetepete o te mau metua i te faaore i te varua apo o te mau tamarii e i te aratai ê atu ia ratou i rapae i te e’a o te ora e o te faaoraraa, inaha, mai te peu e haapii te mau metua i ta ratou mau tamarii i te mau parau tumu e haapao orehia ra e ratou, eita ia teie haapiiraa e maahia i roto ia ratou e aore ra e faufaahia, e faaino ra te reira ia ratou.

Aita tatou e feruri nei i teie mau mea ia au i to’na ti’araa mau. Eaha te manao o te tamarii i to’na metua tane e aore ra i to’na metua vahine ia parau raua i to raua tiaturi no ni’a i te Parau Paari tei riro ei tuhaa no te Evanelia a Iesu Mesia, o tei hohia mai na roto i te heheuraa, e a ofati ai raua i teie ture i te mau mahana atoa o to raua oraraa? E paari ïa oia ma te tiaturi e, e mea haavarevare to’na metua tane e aore ra to’na metua vahine, e aita to raua e faaroo i roto i te Evanelia. Te feia e na reira ra, e amo ïa ratou i te mau hopoia teimaha. Eita ïa tatou e riro ei feia papu i roto i ta tatou mau parau, eita atoa tatou e riro ei feia haapao i te mau fafauraa.⁸

Ia paari ta tatou mau tamarii i roto i te here e te maitai.

Te huru o ta tatou mau tamarii na tatou ïa te reira e faatupu. Ua fanauhia ratou ma te ite ore e te haroaroa ore– o ratou te poieteraa e ino ohie noa i roto i te poieteraa animala e pû mai i te ao nei. E haamata te aiû i te haapii i muri mai i to’na fanauraahia, e te mau mea ta’na e haapii tei te huru ïa o te mau taata e haati ra ia’na, te mau faaururaa te reira oia i te paariraa, te maitai e faaitehia ra i ni’a ia’na, te mau hi’oraa maitai hanahana e faaitehia ra ia’na, te faaururaa mo’a o te metua tane e o te metua vahine e o te tahi atu mau taata i ni’a i to’na varua aiû. E e riro mai oia ia au i te huru o te feia e haati ra ia’na, to’na na metua e to’na mau orometua.

… Te mea faufaa roa ae, o te huru oraraa ïa ta [te tamarii] e ora ra. E ite outou ua riro te here ei mea faufaa roa no te tura’i i te tamarii ia haapii, ia haere i mua, e aore ra ia rave i te mau mea atoa. I roto i te haapiiraa i te hoê tamarii, e rahi atu â te mau ohipa e oti i te ravehia na roto i te here havare ore. Te tamarii te ore e vî na roto i te tairi e aore ra na roto i te taparahi, e nehenehe oia ia vî oioi na roto i te here haavare ore e te au papu. E parau mau te reira, e e faufaahia teie parau tumu i roto i mau tuhaa atoa o te oraraa.… A faatere i te mau tamarii, eiaha na roto i te riri e aore ra te mau parau iria e aore ra te parau faahapa, na roto râ i te here e na roto i te faahoturaa i te tiaturi i roto ia ratou.⁹

Mai te peu e tiaturi ta outou mau tamarii e, ua here outou ia ratou e te hinaaro nei outou i to ratou maitai, ua riro ïa outou ei hoa papu no ratou, e i reira ratou e tiaturi ai ia outou, e here ai ia outou e e imi ai ia haapao i ta outou mau aniraa e ia faatupu i to outou mau hinaaro no te mea ua here outou ia ratou. Tera ra, mai te peu mea pipiri outou, e mea ino, e mai te peu aita ratou e tiaturi te here mau ra outou ia ratou, e riro atoa ïa ratou i te pipiri, e eita ratou e taua ia faatupu i to outou mau hinaaro, e eha te hopearaa e tupu mai: e riro ratou ei mau tamarii turituri, paari ore e te tau’a ore.¹⁰

E te mau taeae e te mau tuahine e, … te ani haehaa nei au ia outou ia haapii e ia faatere outou na roto i te varua here e te faaoromai tae roa’tu i te taime e upootia ai outou. Mai te peu e iria mai te mau tamarii e e mea fifi ia faatere ia ratou, a faaoromai tae roa’tu i te taime e manuia ai outou na roto i te here, ua pae ïa to’na varua ia outou, e i reira outou e tarai ai i to ratou natura ia au i to outou hinaaro.¹¹

Tauturu i te mau tamarii ia ore ia mo’e.

Ia ti’a i te Atua, te vaira i rotopu ia tatou tei ere i te paari, no reira ua riro ratou i roto i te faatereraa i ta ratou mau tamarii ei feia faatiatia noa, te manao potopoto e te tau’a tapetepete, i taiâ ai ratou ia faatupu i te riri o ta ratou mau tamarii, no reira aita ratou i tapea i te haerea ino e te ohipa ino o ta ratou mau tamarii, no to ratou here maamaa i te mau mea o teie nei ao ei tahaperaa i te ohipa titiaifaro. Te hinaaro nei au e parau: te vai nei te tahi mau taata o tei rahi roa to ratou tiaturiraa i roto i ta ratou mau tamarii e aita ratou e manao ra te rave nei ta ratou mau tamarii i te hape. Aita ratou e manao ra e nehenehe ratou e hape, no te mea e tiaturi rahi to ratou i ta ratou mau tamarii. Te mea o te tupu mai, e vaiho ratou i ta ratou mau tamarii ia arearea i te poipoi, i te avatea, e i te pö e i te rahiraa o te taime tei muri te mau tamarii i te mau taata ta ratou [te mau metua] i ore i matau, e aore ta ratou e ore e haaroaroa ra. Te vai nei te tahi o ta tatou mau tamarii, no te mea aita ratou i matau i te mau peu o te ao, aita ratou e ite ra i te ino, e no reira, no to ratou manao potopoto topa atu ra i roto i te ino.¹²

Eaha ta tatou e rave nei i roto i to tatou mau fare no te haapiipii i ta tatou mau tamarii; nahea tatou ia haamaramarama ia ratou? Nahea ia faaitoito ia ratou ia faariro i to ratou fare ei vahi hautiraa, e ei vahi e farii ai ratou i to ratou mau hoa no te haapii e aore ra no te arearea? … Te anaanatae ra a nei tatou i to ratou mau hinaaro e ta ratou mau ohipa? Te horoa ra anei tatou no ratou te ite o te pae tino, te maa no te feruriraa, te mau ohipa tuaro no te maitai o to ratou tino, e te tamaraa o te varua, o te tauturu i to ratou tino ia vai viivii ore noa e te puai, ia riro ratou ei mau taata maramarama e te tura, ia riro ratou ei Feia Mo’a haapao e te parau tia?

… Ia horoa tatou i ta tatou mau tamarii tamaroa e i ta tatou mau tamarii tamahine te hoê taime no te faafaearaa, te hoê taime no te hautiraa, e te tahi taime i roto i te fare no te faatupuraa i to ratou hinaaro ia arearea ia au i to ratou hinaaro i te pae tino e te pae feruriraa, oi haere hoi ratou na te porumu e aore ra na te mau vahi tano ore, mai te peu eita te reira e roaa ia ratou i te fare.¹³

Te natura e te rauraa o ta tatou mau faaoaoaraa ua hoê te reira i te maitai e i te natura o to tatou feia api i ti’a roa ai ia tatou ia faaherehere maite ia ratou no te paruru i te viivii ore e i te puai o te ui apï i Ziona.

haamau’a i to ratou taime i roto i te mau faaoaoaraa faufaa ore … Mea tano ia haapiihia ratou ia au e ia rave i te mau faaoaoaraa no te haamaitai i to ratou natura pae taata e to ratou maramarama. Mea maitai ae ia ravehia, te mau faaoaoaraa o te faatupuhia i te fare, te mau himeneraa o te faatupu i te mau taleni o te ui apï, e te mau faaoaoaraa e tahoê nei i te ui apï i te feia paarï …

A piti, mea tia ia tuea ta tatou mau faaoaoaraa i to tatou faaroo e i to tatou varua autaeaeraa. Te parau no te faaoaoaraa, ua riro ia ei hoê titauraa faufaa roa ei maitai no te feia Mo’a, i ti’a roa ai i te feia faatere o te paroita tataitahi ia feruri e ia hiopoa maite ratou i te huru o te mau faaoaoaraa.

A toru, eiaha ta tatou mau faaoaoaraa ia tapu i te ohipa haapiiraa a te mau tamarii. Mea maitai hoi ia ore te haapiiraa a to tatou mau tamarii e faaorehia.

Te hope’a, mea tia ia haapao maite tatou, te mau metua i te huru faaoaoaraa a to tatou mau tamarii, e ia ore ratou ia haere ê atu e imi i te faaoaoaraa i te vahi e i te mau taime atoa ta ratou e hinaaro. Mea tia ia hiopoa maite te mau metua i te mau faaoaoaraa a to ratou mau tamarii i roto i to ratou apiraa, e ia haapao maite ratou i te mau faahoaraa o to ratou feia apï i te mau vahi arearearaa.¹⁴

Haapii i te mau tamarii te faufaa no te faaoromai e no te ohipa.

E hopoia na te mau metua ia haapii i ta ratou mau tamarii te mau parau tumu no te Evanelia e ia maitai to ratou feruriraa e ia ite ratou nahea ia rave i te ohipa i roto i to ratou apîraa. Mea tia i te mau tamarii, mai to ratou aiûraa e tae roa’tu i te taime e faaru’e ai ratou i te fare o to ratou metua, ia ite i te hamani i te fare e ia amo i te mau hopoia o te oraraa na roto ia ratou iho, ia ite ratou te vaira te tau no te tanu, te vai atoa ra te tau no te auhune, ia ite ratou e, o ta te taata e ueue o ta’na atoa ïa e ooti. E ino ïa te tupu mai mai te peu e ueuehia te mau peu tano ore i roto i te apïraa, e tupu mai ïa te veve e te papu ore i roto i te mau matahiti hope’a o te oraraa ia ueue-anae-hia te mau huero no te hupehupe. E faatupu te ino i te ino, e faatupu te maitai i te maitai …

Ia horoa te mau metua i Ziona i ta ratou ra mau tamarii te tahi ohipa e ti’a ia ravehia ei haapiiraa ia ratou ia rave i te ohipa, e ia ite ratou i te amo i te mau hopoia e tuuhia i roto i to ratou rima. A faaineine ia ratou i roto i te tahi ohipa o te nehenehe e haapapu i te hoê oraraa maitai ia haamata anae ratou i to ratou iho oraraa. A haamanao, ua parau te Fatu “e ore roa ïa te feia ohipa ore noa e amu i te faraoa o te feia rave ohipa ra,” ia riro ra te mau taata i Ziona ei taata rave ohipa (PH&PF 42:42). Eiaha atoa ratou e ata paoho noa, e e parau i te parau maamaa e te mau parau maau, e te faatupu i te teoteo e te hiaai i te mau mea pae tino, no te mea ua riro teie mau mea ei hara i mua i te aro o te Fatu.¹⁵

Te ohipa, o te taviri ia no te oaoa mau i te pae tino nei e i te pae varua. Mai te peu e milioni ta te hoê taata, mea tia ia haapiihia ta’na mau tamarii ia rave i te ohipa, mea tia ia farii te mau tamarii tamaroa e te mau tamarii tamahine i te hoê faaineineraa e tauturu ia ratou i roto i te mau ohipa o te hoê oraraa utuafare.¹⁶

E mea oaoa roa no te mau metua ia faatupu i te hiaai o to ratou mau tamarii, tera ra e ohipa ino mau i nia i te tamarii ia horoa anae te mau metua i te mau mea atoa ta te tamarii e ani. Mea tano i te ore e faatupu i te mau mea ta ratou e hinaaro e o ta ratou e manao nei i roto ia ratou iho eere i te mea ino. Mea pinepine ae te mau taime e farii ai tatou i te mau oaoa ia au i te mau mea ta tatou e hiaai nei eiaha râ na roto mai i to tatou haaraa. E nehenehe paha ta te hoê tamarii o tei horoahia e rave rahi tao’a i te ore e farii i te oaoa, no te mea aita oia i hiaai i tera mau tao’a. Mea tia ia haapii maite tatou i te faufaa e te auraa o te mau hiaai no te faatupu i te oaoa i roto i to tatou oraraa.

Te mau rave’a e faaohipahia e te Atua no te haavi i to tatou mau hiaai, e mau ravea titiaifaro ia, e mai te peu e faaohipa te mau taata o te mau nei i te mana no te haapii e no te aratai i te mau hiaai o te mau tamarii ia au i te hioraa o te Atua, e rahi ae ïa te puai e te maitai o te mau tamarii ia aro i te mau fifi e tupu mai i roto i to ratou oraraa. E eaha te rave’a a te Atua? I te mau vahi atoa, ua haapiihia tatou i te mau haapiiraa o te faaoromai e o te tiai. Te hinaaro nei tatou i te mau mea hou roa tatou e nehenehe ai e farii i teie mau mea, e no te mea ua tiai maoro tatou no te farii i teie mau mea, e rahi roa’tu ïa to ratou faufaa ia farii anae tatou i teie mau mea. Oia hoi, ua faataahia te taime no te ueue e te taime no te auhune; e mai te peu ua haapiihia te mau tamarii, e ooti ratou i te mau hinaaro ta ratou i ueue ma te faaoromai e te haaraa, e haapii ïa ratou i te oaoa ia tupu anae te opuaraa ta ratou i opua.¹⁷

ia haroaroa ratou i te parau mau e ia taahi ratou i roto i te maramarama o te horoahia i te mau taata atoa o te farii i te reira. Ua parau mai te Fatu, “O te titau vave mai ia’u nei e ite mai oia ia’u, e e ore roa oia e faaruehia.” (PH&PF88:83). No reira, tei ia tatou nei te hopoia ia haamata i te omuaraa o to tatou oraraa na roto i te haereraa na te e’a afaro e te pirihao e tapae ai i te faaoraraa mure ore ra.¹⁸

Mana’o Tauturu i te Haapiiraa

Nahea te mau tamarii i tuuhia i roto i to tatou rima e riro ei “faufaa na te Fatu” e ei “utu’a maitai na’na”? (Salamo 127:3). Eaha te mau haamaitairaa no te ra’i mai ta te mau tamarii e afai mai “ o te faatupu i te ruperupe o te utuafae e o te nunaa”?
No te aha mea tia i te mau metua ia haapii i ta ratou mau tamarii ia tiaturi i te Fatu ra ia Iesu Mesia? Eaha atu te tahi mau haapiiraa e te tahi atu mau parau tumu e tia ia haapiihia i te mau tamarii? (A hi’o Mosia 4:14–15; PH&PF 68:25–28). Nahea teie haapiiraa ia faatupuhia?
Eaha te mau mea e tupu mai, mai te peu aita te mau tamarii e haapiihia i te mau parau tumu o te Evanelia?
No te aha mea faufaa ia tahoê e ia taui ore te mau metua i roto i te haapiiraa a to ratou mau tamarii? No te aha mea faufaa ia horoa ratou i te hoê hioraa o te tuea i te mau mea ta ratou e haapii?
Eaha te mea faufaa ae i roto i te feruriraa o te hoê tamarii? Nahea te mau metua ia tiaturihia e ta ratou mau tamarii? Eaha te ohipa e tupu mai na roto i te pipiri e te ino i nia i te mau tamarii?
Eaha te auraa o te parau: haapiiraa i te tamarii “na roto i te iria”? Eaha te mau ohipa e nehenehe e tupu mai na roto i tera huru haapiiraa?
Eaha te rave’a a te Atua no te haapii e no te aratai i Ta’na mau tamarii? Nahea tatou ia apee i To’na hioraa i roto i to tatou iho utuafare?
Nahea outou e apee ai i te a’o a te Peresideni Semita no te faatiaraa i te mau aratairaa no te faaoaoaraa o te utuafare? Nahea te mau tamarii e haapiihia ai ia imi i te mau opuaraa maitatai na roto i te faaoromai e na roto i te ohipa?