Te Autahuaraa, e Faatereraa na te Atua

Te autahu’araa mo’a, o te tura e te mana ïa o te Atua i hohia i te taata nei no te faatere e te haamaita’i i To’na nunaa.

Aamu o te oraraa o Joseph F. Smith

I te 28 raa o to’na matahiti, ua tavini Joseph F. Smith ei papa’i parau i roto i te Apooraa o te Peresideniraa Matamua e o te Tino Hoê Ahura Ma Piti Aposetolo. I te 1 no Tiurai 1866, i te pae hopea no te rururaa faaineineraa i matauhia a te Apooraa, ua faaite atu te Peresideni Brigham Young i to’na ra mau taeae: “I te mau taime atoa e faauru mai ai te Varua ia’u, te ite ra vau te hau i roto i to’u aau. Inaha, te mana’o nei au e faataa i te Taeae ra o Joseph F. Smith ei aposetolo e ia riro hoi ei hoê o na tauturu no’u.” I muri ihoa, ua ani oia i te Taeae tataitahi ia faaite i to ratou mana’o no taua piiraa ra, e ua paturu ratou paatoa i te Peresideni Young ma te “rotahi o te aau”.

Ua tuu ae râ ratou i to ratou pu’e rima i nia i te upoo o Joseph F. Semita, e faahiti ae râ te Peresideni Young: “E te taeae Joseph F. Smith, te tuu nei matou i to matou pu’e rima i nia i to upoo i te i’oa o Iesu Mesia, e na roto i te mana o te Autahu’araa mo’a te faataa nei matou ia oe ia riro ei Aposetolo i roto i te Ekalesia a Iesu Mesia i te Mau Feia Mo’a i te Mau Mahana Hopea Nei, e ia riro ei ite taaê i mua i te mau nunaa o te ao nei. Te haamau nei matou i nia i to upoo’na te mau tura atoa, te mana e te mau taviri o teie nei Aposetoloraa Mo’a; e te faataa nei matou ia oe ia riro ei tauturu i roto i te Peresideniraa Matamua o te Ekalesia e o te Basileia o te Atua i te ao nei. Teie mau haamaitairaa, te haamau nei matou i nia ia oe na roto i te i’oa o Iesu Mesia e na roto i te tura o te Autahu’araa Mo’a. Amene”¹

I te 8 no Otopa 1867, ua paturuhia e ua faataahia o Joseph F. Smith ei melo no te Tino Hoê Ahuru Ma Piti Aposetolo i roto i te amuiraa rahi, e ta’ahiraa faufaa rahi teie i roto i to’na taviniraa i te mau tau maoro ei melo i roto i te mau apooraa faatere o te autahu’araa o te Ekalesia. A tavini ai oia 50 matahiti tiahapa te maoro, ua fana’o te Ekalesia taatoa i to’na aravihi, to’na ite e to’na paari i roto i te faatereraa o te autahu’araa e i roto i te Ekalesia.

Haapiiraa na Joseph F. Smith

Te autahu’araa, o te mana ïa o te Atua no te faatere e te haamaitai i To’na ra nunaa.

Te Autahu’araa Mo’a, o taua ïa tura râ o ta te Atua i ho mai i te taata nei, ia ti’a ia’na ia faaite i te hinaaro o te Atua, mai te huru râ e, o te mau melahi iho tei faahiti hua mai i te reira; na roto i taua tura râ, ua horoahia te mana i te mau taata maori râ o ta ratou e taati i nia i te fenua nei e taati atoahia ïa i te rai ra, e ta ratou e faataaê i te fenua nei, e faataaê atoahia ïa i te rai ra; na roto i taua tura râ, te mau parau e faahitihia e te taata i roto i te faaohiparaa i taua mana ra, e riro ïa ei parau na te Fatu, ei ture na te Atua i te nunaa, ei papairaa mo’a e ei faaueraa na te Atua… E mea na roto i taua tura râ te Fatu Manahope e faatere ai i To’na nunaa, e i te tau i muri nei, e faatere oia i te mau nunaa atoa o te ao nei.²

E rave rahi te mau mea e nehenehe e parau no ni’a i te tura e te tiaraa o te autahu’araa. O te parau tumu rahi te reira no te faatereraa e no te faanahonahoraa, na roto i te reira ua faaterehia’na e e faatere faahouhia te mau ito e te mau puai o te nunaa o te Atua i te mau tau atoa. Na roto i teie parau tumu, e faatere ai te Atua i to’na mau ao atoa. E mea na roto i teie parau tumu te Ekalesia a Iesu Mesia i te Mau Feia Mo’a i te Mau Mahana Hopea Nei e arataihia ai… O te tura te reira ta te Atua i heheu e i faahoi faahou mai i rotopu i te tamarii a te taata nei no te faatere e no te aratai ia ratou i roto i te paturaa ia Ziona e i te pororaa i te Evanelia i te mau nunaa atoa o te ao nei, ia tia i te mau tamarii tamaroa e i te mau tamarii tamahine atoa a Adamu ia faaroo i te parau o te Evanelia, e ia tia ia ratou ia farii i te ite o te parau mau ra, eiaha noa i nia i te fenua nei, i te ao varua atoa ra.³

Te Autahu’araa a Melehizedeka e aore ra te Autahu’araa Mo’a… o te reira te tura e faatia i te taata tataitahi e aore râ i te mau… pupu tei reira te autahu’araa o te Ekalesia, ia haa i roto i te mana e i te i’oa o te Fatu; oia hoi te tiamaraa, te ti’araa e te tura no te faahaere, no te aratai, no te faaau, no te faatere e no te peresideni, o te mauhia ra e te Atahuaraa e o tei hohia i te taata nei ei rave’a no te haapii ia’na, no te haapautuutu ia’na i roto i te Ekalesia e no te aratai atoa ia’na i te pae varua e i te pae tino nei, no te tavana ia’na e no to’na faateiteiraa.⁴

Ua haamau te Fatu i te iraa o te Autahu’araa i nia i te fenua nei … na roto i te heheuraa e te faaueraa titiaifaro no te ra’i mai.… Ua faati’a oia i te hoe faanahoraa e aore râ i te hoê faatereraa o tei hau roa i te aravihi, o tei rahi ae i te paarii e i te maramarama o te taata, e ore ai te varua o te taata e haroaroa i te mau nehenehe, te mau mana, e te huru mau o te Autahu’araa Mo’a, maori râ ia tauturuhia e te Varua o te Atua. E mea fifi mau no te taata ia haroaroa i te mau raveraa o te Autahu’araa, te tura o to’na mana, to’na rahi e to’na puai. Tera ra, maoti ae te maramarama o te varua i riro ai ei mea ohie ia haroaroa i te reira.⁵

Noa’tu to ratou mau paruparu, ua vehihia te mau tane i taua tura râ i tia ai ia ratou ia parau e ia rave i roto i te i’oa o te Metua e o te Tamaiti. E no reira, e ruuruuhia te Atua, mai te peu e parau ratou na roto i To’na râ varua i roto i ta ratou rave faaotiraa i ta ratou mau hopoi’a ei Tavini No’na, e faatura e e faatupu Oia i ta ratou e parau, no te mea e parau ratou na roto i te tura o Ta’na i ho mai. Tera râ, ia ravehia te mau mea’toa na roto i te titiaifaro. Aita te Atua e faatupu i te hoê noa ae ohipa parautia ore a te taata. Ia rave râ te taata e mau râ i te Autahu’araa i te mau mea parautia, ua ruuruuhia ïa te Atua i te faatupuraa i te reira mai te huru râ o Oia iho tei rave i te reira.⁶

Te mea faufaa roa ae, teie ïa: ua faatia te Fatu i Ta’na Ekalesia, ua faanaho Oia i Ta’na autahu’araa, e ua tuu Oia i te tura i ni’a i tetahi mau taata, mau apooraa e mau tino, e no reira, e hopoia ïa na te nunaa o te Atua te oraraa ia au i te faito e ite ai ratou e, e mea tiama te reira i mua Ia’na.⁷

Te mau tane anae te mau i te autahu’araa, area te mau haamaitairaa râ no te tane e te vahine atoa ïa.

Ua faaohipahia te Autahu’araa i mutaa râ ia au i te faanahoraa patereareha. O ratou o tei mau i te reira, ua faaohipa ïa ratou i te reira na mua roa ia au i to ratou tiaraa ei metua tane. Mai te reira atoa no Elohima. Ta’na titauraa rahi matamua ia tatou nei, oia hoi to tatou here, to tatou faatura, e to tatou faaroo Ia’na, no te mea o Oia te Metua tei Poiete i te mau taata atoa.… E mau atoa te mau tane i te autahu’araa mai Ia’na râ te huru. Tera râ, no te mea eita e tia i te mau taata ia mono i te Atua ma te ore e mau i taua tura ra ei mau ti’a No’na ra, no reira e mea ti’a ihoa ïa ia piihia e ia faatoro’ahia ratou.⁸

Te faanahoraa patereareha no o mai ïa i te Atua ra i mutaa râ, e e vai noa â na roto i te mau tau e a muri noa’tu.… E mea tia ia haroaroa maitai te mau tane, te mau vahine e te mau tamarii i teie faanahoraa e teie tura i roto i te mau utuafare o te nunaa o te Atua e ia imi ratou i te faariro i te reira ia au i ta te Atua i faataa, ei faatiamaraa e ei faaineineraa i Ta’na ra mau tamarii i te faateiteiraa matamua.⁹

Noa’tu te huru o te mau roo maitai, o te mau fana’oraa e o te hanahana e faariihia e te hoê taata na roto i te Autahu’araa, e faarii atoahia te reira e ta’na ra vahine. Ua hoê hoi oia e ta’na ra tane i roto i te Mesia. No reira, te mau roo maitai atoa o ta’na ra tane, no’na atoa ïa, to’na mau haamaitaraa no’na atoa ïa, to’na hanahana no’na atoa ïa, no te mea ua hoê raua—ma te faataa orehia.… Mai ta Paulo i parau: “Aita râ te tane i taaê i te vahine, aita atoa te vahine i taaê i te tane i te Fatu nei.” {A tai’o 1 Korinetia 11:11}. To’na auraa râ, teie ïa: eita te tane e farii i te hanahana, te roo maitai e aore râ te faateiteiraa ma te faaere i ta’na ra vahine, eita atoa te vahine e farii i te reira ma te faaere i ta’na râ tane. Ua riro râ raua toopiti atoa râ ei hoê i roto i te taatoaraa.… Ua hohia te Autahu’araa o te Tamaiti a te Atua i te taata nei, inaha ia tae i te taime e faarii ai oia i te faito hinuhinu e te maitai roa ra, i reira oia e haa ai mai ta te Mesia e ta te Atua e haa atoa râ.… Noa’tu tei ni’a i te tane te mana e te fana’o o te Autahu’araa i te haamauraahia, e tei ni’a atoa ia’na te mana no te faaohipa i te reira, e faarii atoa râ te vahine i taua mau maitai ra, taua mau haamaitairaa ra, taua mau mana ra, taua mau tiaraa râ e taua mau fana’oraa râ e ta’na râ tane ei apiti no’na ra.… Aita te mana i horo’ahia i te vahine ia haa oia anae râ i rapae ae i ta’na ra tane, aita atoa te mana i horo’ahia i te tane ia haa oia anae râ i rapae i te Mesia.¹⁰

E faautuahia te mau vahine ia au i te mau ohipa o ta ratou iho i rave, oia atoa no te mau tane, noa’tu te mau râ te tane i te tura o te autahu’araa e noa’tu ua faarirohia oia ei upoo e ei taata faatere.… Oia atoa, ia faahiti tatou i te parau no te mau tane râ, te faahiti atoa râ ïa tatou i te parau no te mau vahine, no te mea e o atoa te mau vahine i roto i ta te mau tane e ua riro ratou ei tuhaa rotahi.¹¹

Ua titauhia te mau taviri o te autahu’araa no te faatere i te Ekalesia.

Te Autahu’araa ia au i to’na tatararaa i matauhia, o te tura ïa i horo’ahia i te taata no te haa i te i’oa o te Atua. Te mau tane atoa o tei faatoro’ahia i roto i te hoê noa ae faito o te autahu’araa, ua tuuhia ïa i ni’a ia ratou taua tura râ.

Tera râ, te mau mea atoa i ravehia i raro ae i teie tura, ia na reirahia ïa i te taime e te vahi tano, ia au i te raveraa tano e ia au i te faanahoraa tano. Te mana no te faatereraa i teie mau ohipa, ua riro ïa ei mau taviri no te Autahu’araa. Hoe noa taata e mau râ i te iraa o teie mau taviri, oia hoi te peropheta peresideni o te Ekalesia. E nehenehe râ te peropheta e horo’a i te hoê tuhaa o teie mana i te hoê taata ê atu, e no reira e mau ïa taua taata râ i te mau taviri no taua ohipa râ i faataahia. E mea na reira ïa te peresideni hiero, te peresideni titi, te episekopo o te paroita, te peresideni misioni e te tiai pupu o te mau tataitahi râ i te mau taviri e haa ai i roto i taua tino râ e aore i roto i taua tiahapa râ. Aita to’na autahu’araa i faarahihia na roto i taua piiraa taaê ra, … mai teie te huru, aita te autahu’araa o te tiai pupu o te mau peresibutero i rahi ae i to te melo tataitahi o pupu. Tera râ, te mau râ oia i te mana no te faatere i te mau ohipa tumu i roto i te … pupu, oia hoi te mau taviri o taua tuhaa râ o taua ohipa ra.¹²

O [te] Peresideni te auvaha o te Atua, te heheu parau, te tatara parau, te ite e te Peropheta o te Atua no to te Ekalesia atoa. O oia te mau ra te mau taviri o teie Autahu’araa Mo’a—te mau taviri no te iriti i te mau uputa o te mau Hiero o te Atua e no te iriti i te mau oro’a o To’na ra Fare no te faaoraraa o te feia ora e o te feia i pohe. O oia te mau râ i te mana taati, i ti’a ai i te taata ia taati, e o ta te taata hoi e taati i ni’a i te fenua nei, e taati atoahia ïa i te ra’i ra. E te mau taata o tei farii i te tura e te piiraa no o mai i te peropheta ra, o ta ratou e faataaê i ni’a i te fenua nei e faataaê atoahia ïa i te ra’i ra. O teie te faanahoraa o te Autahu’araa Mo’a.¹³

E faatere te autahu’araa na roto i te ture o te here.

Ua heheu mai te Fatu i te parau tumu rahi o te faanahoraa ei mauhaa no te faatere i Ta’na Ekalesia, o ta te Fatu iho i haamau i roto i te Ekalesia, te tura o te Autahu’araa Mo’a, oia hoi te Autahu’araa Teitei, mai te Aposetoloraa, te mau Hitu Ahuru e te mau Peresibutero. E i muri iho, ua haamau atoa Oia i te mau faanahoraa o te Autahu’araa Iti, oia hoi te mau Episekopo, te Tahu’a, te Haapii, e te Diakono—ua haamau te Atua i teie mau faanahoraaa i roto i te Ekalesia no te faatere i te nunaa. No te aha? No te haavi ia ratou? Aita. No te haapepe ia ratou? Aita. E parau râ vau hoê tauatini ae taime: aita roa. No te aha ïa? Ia ti’a ia ratou e tae noa’tu i ta ratou mau tamarii ia fana’o i teie mau faanahoraa ia roaa to ratou ite, ia faaarahia ratou, ia arataihia ratou, ia farii ratou i te mau heheuraa e i te faaururaa no te rave i ta te Fatu e hinaaro râ ia ratou ia rave, e ia riro hoi ratou ei feia maitai roa ra i roto i to ratou oraraa.¹⁴

Te faaterehia râ tatou e te ture, no te mea ua here tatou i te tahi e te tahi, inaha tei roto ia tatou te faaoroma’iraa roa, te aroha e te au i te taata nei. Ua niuhia te taatoaraa o ta tatou fanahoraa i ni’a i te manao ia haavi ia tatou iho, i ni’a i te parau tumu no te horo’a e no te rave e i ni’a i to tatou hinaaro ia faaruru i te ino eiaha râ ia rave’tu i te ino. Ta tatou poro’iraa, teie ïa: “Ei hau to teie nei ao, e ia ite auhia mai te taata nei.” [Luka 2:14]. Ia vai te here, te aroha, e te faaoreraa i te hara i roto i te feia atoa e ati mai i te Ekalesia a Iesu Mesia i te Feia Mo’a i te Mau MahanaHopea Nei. I roto i ta tatou Ekalesia, e mana to te ture, area ra taua ture râ, o te ture ïa no te aroha.¹⁵

Eiaha roa te hoê noa ae taata ia faatitihia. Eita roa te tura o te Autahu’araa e faaterehia e aore ra e faaohipahia i roto i te hoê faito iti noa ae no te parau tia ore ma te ore e faainaina i te Atua. No reira, ia ohipa noa’tu tatou e te mau taata, eiaha roa tatou e na reira ma te riri e te manao ino ia ratou.¹⁶

Aita hoê ae taata o te mau nei i te hoê noa ae tiaraa mana i roto i te Ekalesia e nehenehe e amo i ta’na hopoi’a na roto i te tahi atu varua, maori râ i te varua no te aumetuaraa e no te autaeaeraa i ni’a i te feia o ta’na e peresideni ra. Eita e tia i te mau taata o te mau nei i te mana ia faatere arii e ia faatere faahepo, eita atoa ratou e faatiti atu, ia vai râ i roto i to ratou aau te tiaturiraa e te aroha o te feia o ta ratou e peresideni râ, na roto i te maitai, te here mau, te varua maru, te faauru papu,te hioraa maitai eita e roaa ia faahapahia. Ia na reira ratou, ma te maru o to ratou aau, ma te here i to ratou nunaa, e aratai ïa ratou i te nunaa na te e’a titiaifaro, e e haapii atoa hoi ia ratou i te rave’a e roaa ai te faaoraraa, na roto i te a’o e te hi’oraa maitai: A pee mai ia’u mai ia’u e pee atoa râ i to tatou upoo faatere.¹⁷

A auraro i te mana e te tura o te autahu’araa mo’a.

E mea tia no tatou ia faarii e ia auraro i te Autahu’araa Mo’a o tei faaho’i faahouhia mai i ni’a i te fenua nei i teie tau tuuraa Evanelia, na roto ia Iosepha te Peropheta. Ua ite au e mea maitai te reira, no te mea ua opuahia no te tapea i te parau ti’a e no te paturu i te Ekalesia e no te faarahi i te ite o te mau taata, i roto i te mau ohipa maitai, i roto i te haapaoraa i te mau opuaraa a te Fatu, e e mea faufaa te reira i roto i te faatereraa tano o te nunaa o te Atua i nia i te fenua nei, e i roto i ta tatou iho faatereraa, oia hoi te faatereraa i to tatou mau utuafare, te faatereraa i ta tatou iho e aore ra i ta te amui mau ohipa pae tino nei e mau ohipa pae varua atoa.¹⁸

A auraro i taua mana râ e i taua tura râ o ta tatou e pii nei te Autahu’araa Mo’a ia au i te faanahoraa a te Tamaiti a te Atua, e o tei horo’ahia i te taata nei e te Atua iho. A auraro i taua Autahu’araa râ. Eaha taua Autahu’araa râ? O te tura mau ïa o te Atua i horo’ahia i te taata nei e te Atua ra. O taua parau tumu râ o ta tatou e auraro.… Eita te Autahu’araa o te Tamaiti a te Atua e faaohipahia na roto i te hoê noa tuhaa iti o te parautia ore; eita atoa to’na ra mana, to’na viivii ore e to’na tura e parahi i pihaiho i te taata hara, o te tamata i roto i to’na varua i te haavare i te Atua râ e i to’na ra taata tupu. Eita te mana e parahi mai na roto i te faahepo i ni’a i te taata o te ore e auraro i te reira i roto i to’na oraraa ma te ore e haapa’o i te mau titauraa o te ra’i ra.¹⁹

Te auraro ra anei outou i teie Autahu’araa? O outou o te mau ra i taua autahu’araa râ, te ti’araa e te tura no o mai i te Atua râ no te faatere i te i’oa o te Metua e o te Tamaiti e o te Varua Maitai, e hinaaro anei outou e haamou i te tiaturiraa e i te here o te Atua, te titauraa e te hiaai o te Metua o te mau taata atoa ra? Inaha, a ho mai ai Oia i taua taviri râ e i taua haamaitairaa râ i ni’a ia outou, te hinaaro râ e te tiai râ Oia ia faaohipa outou i to outou piiraa.²⁰

Ia auraro outou i te autahu’araa mo’a i roto ia outou iho na mua roa, e auraro atoa ïa outou i te reira i roto i te mau taata o te peresideni nei i n’ia ia outou, e i roto i te feia e tavini râ i roto i te mau piiraa rau o te Ekalesia.²¹

Eita … i te mea maitai ia haafaufaa ore te Feia Mo’a i te Mau Mahana Hopea Nei e tae noa’tu i te mau tamarii a te Feia Mo’a i te Mau Mahana Hopea Nei i teie parau tumu mo’a no te tura i heheuhia mai te ra’i mai i roto i teie tau tuuraa Evanelia o ta tatou e ora nei. E mea mo’a te reira, e e mea ti’a ia tapea mo’ahia te reira e te nunaa. Ia auraro e ia faaturahia te reira e ratou, noa’tu o vai te taata e mau râ i te reira, e noa’tu o vai te taata e mau râ i taua hopoi’a râ i roto i te Ekalesia. E mea tia i te feia api tamaroa e i te feia api tamahine e tae noa’tu i te taatoaraa o te nunaa ia auraro i teie parau tumu e ia ite e, e ohipa mo’a te reira, e eita roa e ti’a ia haafaufaa orehia te reira e eita atoa e ti’a ia parauhia to’na parau na roto i te faatura ore no te mea e faautu’ahia tatou no te reira. Na te faatura ore i teie mana e aratai i ni’a i te aratia o te pouri e o te taivaraa, e na te reira atoa e tapu ia tatou i te mau tiaraa e i te mau fanaoraa o te utuafare o te Atua; inaha, na roto i teie tura te mau oro’a o te Evanelia e ravehia ai na te ao atoa nei e i roto i te mau tiahapa mo’a atoa, e ahiri aita te reira eita ïa te mau oro’a e oti i te ravehia. Te feia e mau ra i teie tura ia auraro ratou i te reira i roto ia ratou iho. Ia ora ratou no te farii tiama i te tura i tuuhia i ni’a ia ratou e ia farii tiama atoa ratou i te mau tiaraa e tuuhia i ni’a ia ratou.²²

Mana’o Tauturu i te Haapiiraa

Eaha te autahu’araa? No teaha te Fatu i horo’a ai te tura o te autahu’araa i te taata nei?
Nahea tatou ia “haroaroa i te mau raveraa o te Autahu’araa?
Nahea te tane e te vahine o te Atua e faarii amui ai i te haamaita’iraa, te mana, e te fana’o o te autahu’araa?
Nahea te autahu’araa ia haamaita’i i to outou oraraa? Nahea te reira ia haamaitai i te feia e ora râ i roto i to outou utuafare?
Eaha te mau taviri o te Autahu’araa? No teaha ratou i horo’ahia mai ai? O vai te mau râ i te mau taviri atoa o te Autahu’araa? O vai te mau râ i te mau taviri i roto i te paroita e i roto i te titi?
I roto i teihea varua te feia e mau râ i te autahu’araa e amo ai i ta ratou mau hopoi’a? (A tai’o PH&PF 121:41–46) Eaha te faaururaa o te taata e mau râ i te autahu’araa i roto i te utuafare e i roto i te Ekalesia ia faaite oia i te “here mau” e te “maru o te aau”?
Nahea tatou ia auraro i te autahu’araa e nahea tatou ia haamo’a i te reira? Eaha te tahi mau ohipa o ta tatou e rave ra no te “haafaufaa ore” i teie mana mo’a?
Nahea te hioraa maitai o te Faaora e tauturu ai ia tatou ia haroaroa nahea ia faaohipa e ia auraro i te tura o te autahu’araa?