Eiaha e Imi Hara ia Vetahi Ê

E pee tatou i te hi’oraa maitai a te Fatu na roto i te faaoreraa hara e te aroharaa i tei hamani-ino ia tatou.

Aamu o te Oraraa o Joseph F. Smith.

I roto i te mau matahiti e rave rahi o to’na oraraa, ua ite o Joseph F. Smith i te mau faainoraa rahi i te Ekalesia e to’na mau melo. Ua faaino pinepine hia oia e te mau taata o tei pato’i i te ohipa a te Fatu e i ta’na Ekalesia, e ua hamani-ino-hia oia e ratou. Noa’tu te hamani-ino-raa, ua rave oia i ta’na ohipa na roto i te hau, ma te matau-ore e te pahono-ore i ta’na mau enemi—o to’na i parau “e ere ratou i ta’u mau enemi” e “enemi râ ratou i te taata o ta’u e tamata nei i te tavini.”¹

Te haamana’o nei o ta’na tamahine o Edith Eleanor i te hoê taime i to’na apîraa “i te mau parau apî ii roto te afata teata i te faainoraa i to’u metua tane. E parau hape e te haavare ta te mau taata i te fare haapiiraa. I te hoê mahana, ua riri vau i to’u ho’iraa’tu i te fare. I to to’u metua ho’iraa mai i te pô i te fare ua ani ia’na ‘Papa, no te aha aita oe e rave i te hoê noa a’e mea? Aita oe e parau a’e i te hoê parau, e no reira, te nenei nei ratou i te mau haavare, e aita oe e rave nei i te hoê noa a’e mea no te paruru ia oe!’ “Ua hi’o mai to’na metua tane ia’na, e ua ataata rii, e ua na ô atura oia i te parau. Aia, eiaha e riri, aita ratou e faaino nei ia’u, te faaino nei ratou ia ratou iho. Aita oe i ite e, ia parau te hoê taata i te parau haavare no te tahi, o ratou iho ta ratou e faaino nei?’ ”²

Ua hinaaro te Peresideni Smith e faahoi i te maitai no te ino e ua hinaaro papu oia i te rave i te maitai, e no reira, mai te meae, e ite oia e, ua faaino oia ia vetahi ê, eita oia e hau, haapa’o ora roa to ratou mauiui. Ua parau mai oia “Ua rave anei au e ua parau anei au i te hoê mea no te faaino ia oe? Mai te peu e ua rave au i te reira, te hinaaro nei au i te faaite e, e ere ïa i te mea opuahia. Aita roa vau e hinaaro i te haamauiui i te hoê a’e taata.… E o outou o tei hamani ino mai ia’u, outou tei haamauiuihia e au, mai te mea e, te vaira, a faaite mai ia’u i hea vau i te haamauiuiraa ia outou, e imi au i te mau rave’a atoa no te faatitiaifaro i te reira. Aita to’u mana’o ino i roto i to’u aau i to’u nei mau taea’e. E aroha ana’e e te hinaaro ia rave i te maitai”³

Haapiiraa na Joseph F. Smith

Eiaha e imi hara ia vetahi ê

Te ti’aoro nei matou i to matou mau taea’e e to matou mau tuahine, i roto i te evanelia a Iesu Mesia, eiaha ratou e faatura noa ia ratou iho na ratou i te ora parau-ti’araa; ia faatura atoa râ e ia here, e ia aroha i to ratou taata tupu tataitahi. Te ti’aoro nei matou ia outou eiaha e haapa’o noa i te faaueraa rahi roa a’e o tei horo’ahia e te Atua i te taata, te hinaaroraa i te Fatu to outou Atua, ma to outou aau atoa, to outou mana’o e to outou puai, te faaitoito atu nei râ matou ia outou ia haapa’o atoa outou i te piti o te ture, te aroharaa i to outou taata tupu mai ia outou iho (a hi’o Mataio 22: 36–40) e fahoi te maitai no te ino, eiaha e faaino ia vetahi ê no te mea ua faainohia ami outou. Aita ta outou e faufaa ia tuparari i te fare o vetahi ê (e faahohoaraa noa teie). E farii tatou ia ratou ia faa’ea i roto i te fare ta ratou i patu no ratou iho, e e tamata tatou i te faaite atu ia ratou i te hoê raveraa maitai a’e, e i te paturaa i te hoê fare maitai a’e no ratou e i reira tatou e titau ai ia ratou ma te maru, na roto i te Varua o te Mesia, o te tereteti’ano mau, ia tomo i roto i te fare maitai a’e.⁴

E te mau taea’e e te mau tuahine, te hinaaro nei matou ia vai hoê noa outou. Te ti’aturi nei e te pure nei matou ia hoi outou i to outou mau faaearaa ma te mana’o i roto i to outou aau e mai te hohonuraa o to outou varua ia faaore outou i te hara ia outou iho, e mai teie mahana e a muri noa’tu, eiaha roa outou e mana’o ino faahou i te taata. Noa’tu e, e melo anei no te Ekalesia a Iesu Mesia i te Feia Mo’a i te Mau Mahana Hopea Nei e aore râ, aita, e hoa anei e aore râ, e enemi, e taata maitai anei e aore râ, e taata ino. E mea ino roa tera no te hoê taata o te mau nei i te autahu’araa, o tei farii i te horo’a o te Varua Maitai, i te faatupu-noa-raa i roto ia’na iho te mana’o nounou, te inoino, te taho’o e te farii ore i to’na taata tupu. E mea ti’a ia tatou i te parau i roto i to tatou aau e, na te Atua e haava i rotopu ia taua. No’u râ, e faaore au i ta oe hara. Te hinaaro nei au i te faaite atu ia outou e, te Feia Mo’a i te Mau Mahana Hopea Nei o te tape’a noa i te inoino i roto i to ratou mau varua, ua rahi a’e ïa ta ratou hara i ta tei hara mai ia ratou ra. A hoi i to outou fare e a tatara i te nounou e te riri u’ana i rapae i to outou mau aau; faaore i te mana’o faaore ore i te hapa; e faatupu i roto i to outou mau aau te varua o te Mesia o tei pi’i mai ni’a mai i te tatauro “E ta’u metua,e faaore mai i ta ratou hara, aore hoi ratou i ite i ta ratou e rave nei.”[Luka 23:34.] O teie te varua e ti’a i te Feia Mo’a ia farii i te maororaa o te mahana.⁵

Mai te peu e, e ite au e, ua inoino te tahi ia’u, e haere au ia ratou ra ma te oaoa e aita vau e faaea ia faarerei roa râ vau ia ratou e ia ite au i ta’u hape ia ratou ra. E mai te peu e ua hape ihoa au i to’u nei taea’e, eita vau e ani ia’na ia taahi mai i te afaraa no te faaafaro i te hape—e haere roa vau ia’na ra e, e rave au i te mau mea atoa e roaa ia’u i te rave no te faaore i tera hape. E ere ta’u misioni i te faainoraa, te raveraa i te ino, e rave râ, i te maitai.⁶

A taui i ta outou hi’oraa to outou na mata eiaha e hi’o faahou i te ino, e hi’o râ i te maitai, te parau-ti’a, a arata’i, a faauru i tei ha’ere na te e’a aita e hape i reira, e o te ore hoi e farii i te hape. A hi’o i te maitai i roto i te mau taata, e mai te mea aita a ratou e maitai; a tauturu ia ratou ia maitai; a hi’o i te maitai, a faarahi i te maitai, a paturu i te maitai, a faaiti i te paraparau i te ino. Aita e maitai i te faarahiraa i te ino, i te haaparareraa i te ino e aore râ, i te papa’iraa e aore râ, i te aparauraa. Aita e maitai i reira. E mea maitai a’e ia huna tatou i te ino e ia faarahi i te maitai e ia faaurû i te taata atoa ia vaiiho i te ino e ia haapii i te maitai ia riro a tatou ei misionare no te faaoraraa i te taata, te haapiiraa e te arata’iraa i ni’a i te e’a no te parau-ti’a, eiaha râ te parahiraa ei haava e te haavaraa i tei hape, ia riro râ ei faaora no te taata.⁷

Te titau nei tatou i te aroha, e aroha atoa ïa tatou. Te titau nei tatou i te hamani-maitai, e hamani-maitai atoa ïa tatou. Te titau nei tatou i te faaoreraa hara, e faaore atoa ïa tatou i te hara. E te mau mea atoa ta outou e hinaaro ia vetahi ê e na reira atoa outou ia ratou ra. [a hi’o Mataio 7:12].⁸

Aroha i to outou mau enemi.

Na te Fatu te Atua e aroha’tu i te mau taata o te imi nei ia Ziona. E te Atua e, e aroha mai i tei arata’i-hapa-hia, tei hape, tei ma’ama’a, tei ere i te paari. E tu’u mai i to oe Vaura i roto ia ratou ra, e faataui oe i to ratou ha’erea hape, to ratou ma’ama’a, e faahoi mai ia ratou i te parauti’a e i to oe ra hau. Te ani nei au ia aroha oe i to’u mau enemi—o tei haavare no’u nei e o te parau ino nei no’u nei. Te taparu nei au i te Atua to’u Metua i te Ao ra, ia aroha mai ia ratou; Inaha, o ratou te na reira nei, ma te ore e ite i ta ratou e rave nei, ua arata’i-hape-hia ïa ratou, e te mau taata o tei ite i ta ratou e rave nei, o ratou o te titau nei i te aroha o te Atua. Ia aroha mai te Atua ia ratou. Ia aroha mai oia ia ratou. Eita vau e hamani-ino ia ratou no te hoê noa a’e maitai no’u i teie ao. Eita vau e tapu i to ratou haerea i mua. Eita Eita, te ani nei au i to’u nei mau taea’e ia vaiiho noa i te enemi o to tatou nuna’a e ia ratou o te faaineine nei i to ratou iho e’a e tae atu ai i te haamouraa e o te ore e tatarahapa e o te rave nei i te hara ma te ite i te mea ta ratou e rave ra, o tei ite e, te ofati nei ratou i te ture a te Atua, o te parau ino nei e te haavare nei i te mau tavini o te Fatu. E aroha mai ia ratou. Eiaha e a’a ia ratou, no te mea o te reira ta ratou e hinaaro nei. A vaiiho ia ratou. A vaii ho ia haere.⁹

E faaite papu vau ia outou e mea fifi roa no’u i te here i to’u mau enemi—te enemi o te Ekalesia a Iesu Mesia i te Feia Moa i te Mau Mahana Hopea Nei—mai ta’u e here nei i to’u mau hoa. Te faaite nei au e, aita vau e rave hope roa nei i te reira, e mea fifi roa no’u te reira. Area râ, i te tahi taime, e tamaru mai te Varua o te Atua i to’u aau, eita hoi e ti’a ia’u ia parau e: E vaiho vau i te faautuaraa i roto i te rima o te Fatu.¹⁰

I roto i te evanelia a Iesu Mesia, te titauhia nei outou ia aroha i te mau taata atoa e ia here i te Atua. Ua titauhia ia outou ia here i to outou taata tupu, ia faaore i te hara, ia aroha i to outou taata tupu, mai tei faaitehia mai i roto i te pure a te Faaora i ni’a i te satauro—“E ta’u metua, e aroha mai ia ratou, aita ratou i ite i ta ratou e rave ra.” [Luka 23:34]. No reira, e haamana’o tatou i to tatou mau enemi, e pure tatou no ratou, ia ore ratou ia pauroa i te mo’e ê, ia horoahia râ ia ratou te aroha faaora e te mana faaora o te evanelia a Iesu Mesia, ia putapu to ratou aau, ia tatarahapa ratou i ta ratou mau hara, e ia faahoi ratou no te mau ino ta ratou i rave ia nehenehe ia ratou e faahoi, ia haapa’o hoi ratou e, ia tamahia ratou i ta ratou ra mau hara na roto i te tatarahapa, te bapetizoraa no te haamatararaa o te hara na te hoê o te mau nei i te mana no te rave i te reira oro’a mo’a.

Ua here tatou i te mau taata atoa. Aita to tatou e inoino i te taata ê, eita tatou e aro ia ratou mai te mea e, aita ratou e haapeapea mai ia tatou. Eita tatou e aro i te mau ture a vetahi ê, eita tatou e aro i ta ratou mau Ekalesia e to ratou mau ti’aturiraa. Aita e faufaa i te reira, e ere atoa te reira i ta tatou misioni, e vaiiho tatou ia ratou ia haamori mai ta ratou e hinaaro mai ta ratou e au e i te vahi ta ratou e hinaaro nei.… Ta tatou hopoi’a te haere - ti’a-raa ïa i mua, te rave- faaoti-raa i ta tatou ohiapa, te porohaere-raa i te evanelia na roto i te hi’oraa maitai e te mau haapiiraa tano, e faaite tatou i to tatou maramarama ia ite ratou e ia ite ratou, i te maramarama mai ta te Atua e ite nei, ia farii ratou i te reira, ia pe’e ratou i te reira, ia ti’a ia ratou.¹¹

E enemi to te ohipa a te Fatu, aita râ te Atua e vaiiho ia manuïa ore ta tatou mau tutavaraa.

E enemi to te ohipa a te Fatu, e enemi atoa to te Tamaiti a te Atua. Te vai nei te taata o te faaino nei i te Feia Mo’a i te Mau Mahana Hopea Nei. Te vai atoa ra o te tapiri nei i to ratou mata i te mau mea tiamâ e te maitai i roto i teie ohipa i te mau mahana hopea nei e o te haaparare nei i te haavare e te hi’oraa ino no ni’a i te nuna’a o te Atua.¹²

“Ahiri outou no teie nei ao, e au mai teie nei ao i to’na iho: no te mea râ e ere outou i to teie nei ao, o vau i maiti ia outou no roto mai i teie nei ao, e riri mai ai teie nei ao ia outou” (Ioane 15:19) Te feia i pe’e ia Iesu, o to’na ïa nuna’a maitihia, e no te mea ua maitihia ratou e a’na, ua riri te ao ia ratou.… Ua riro te faaino ei faufaa ai’a no te nuna’a maitihia. E titau anei ïa tatou i te faaino a to te ao nei? Aita. Area râ, eiaha tatou e haaparuru i te mea e, ua tae mai te reira i ni’aia tatou.¹³

Aita vau e ti’aturi nei e, i vai nâ te hoê nuna’a taata o tei arata’ihia e te heheuraa e o ta te Fatu i farii ei nuna’a no’na, o tei ore i ririhia e i hamani-ino-hia e te feia ino e te aau ino.¹⁴

Mai te mahana o to te Peropheta Iosepha Semita faaiteraa i to’na orama e ta’e mai i teie nei, ua u’ana roa te aroraa a te enemi o te parau-ti’a atoa i ni’a i teie nei ohipa; mai te reira atoa te enemi o te parau mau, o te maitai, o te faatura, o te haapa’o maitai, o te ora viivii ore, o te enemi o te Atua mau, o te enemi o te heheuraa no ô mai i te Atua ra e o te faaurûraa mai te ra’i ra.¹⁵

Ia’u nei, aita to’u e enemi. E ere to’u mau enemi no’u iho, e enemi ratou i te Fatu o ta’u e tavini nei! Aita te Diabolo e hinaaro ia’u. E taata iti haihai au area râ, e riri rahi to’na i te Autahu’araa mai te au i te Haapa’oraa a te Tamaiti a te Atua!¹⁶

Te ti’araa mau, te arata’i nei te evanelia ia tatou i roto i te hoê tere taa ê atu i te tere o te ao nei. Ua riro ta tatou mau ohipa ei patoiraa i te mau tahuti, e te haafifi nei te reira i te huru o te tereraa o te oraraa. E te mau taata oraraa maitai e ua rava’i ratou, aita ratou e au ia haapeapeahia ratou. E riri ratou.… E ere i te mea maitai no te mau melo ia farii ratou i te mau pato’iraa e te mau a’oraa a te mau taata o te hinaaro ia pe’e tatou i te ao. E misioni taa ê ta tatou; e e ti’a ia tatou ia rave i te reira ia au i te hinaaro o te Atua, e e haerea taa ê to tatou i to te taata nei. Aita to tatou e ro’o maitai. E faainohia tatou.¹⁷

Eiaha e mata’u, eiaha e haaparuru i ta outou mau ohipa tutavaraa i te parau mau, a ora outou ia au i te huru o te Feia Mo’a. O teie te e’a mau, eita te Fatu e vaiiho i ta outou mau tutavaraa ia fifi. Aita teie Ekalesia e fifi i te pato’iraa e te hamani inoraa no rapae mai. E rahi a’e te ati i te haapa’o-ore-raa, te hara e te tau’aore-raa, no roto atu i te Ekalesia; e mea rahi atoa’tu te fifi, ia ore te taata tataitahi e rave i te maitai e ia ore oia e faaohipa i te mau haapiiraa heheuhia e to tatou Fatu e te Faaora o Iesu Mesia. Ia rave tatou i te parau-ti’a, e maitai te mau mea atoa, e tauturu mai te Atua o to tatou mau metua ia tatou, e ei reira te patoi’araa e riro ai ei haaparareraa i te ite o te parau mau.¹⁸

E vaiho tatou i to tatou mau enemi i roto i te rima o te Atua.

Ua papa’ihia, e te ti’aturi nei au e, e parau mau te reira, noa’tu e, e mea ti’a ia tupu te faainoraa, o tei faatupu râ i te mea e hapa’i ra, e ati to’na [Mataio 18:7]; tei raro a’e ratou i te rima o te Fatu, oia atoa tatou. Eita tatou e faahapa ia ratou. E vaiiho râ tatou ia ratou i roto i te rima o te Mana Hope, na’na e faautua ia ratou ia ti’a i to’na hinaaro. Ta tatou ohipa, o te faatupuraa ïa i te parauti’a i te ao nei, te tutavaraa i te faarahi i to tatou ite i te hinaaro o te Atua e to’na mau haerea, e ta’na ra mau parau mau hanahana o ta’na i heheu mai na roto ia Iosepha te peropheta, eiaha noa no te faaoraraa o te feia ora no te faaoraraa atoa o te feia i pohe ra.¹⁹

Na te Atua e faautua i to tatou mau enemi i te taime e au ia’na e i te huru raveraa e au ia’na, e haapa’o noa tatou i ta tatou hopoi’a, e tape’a i to faaroo, e rave tatou i te ohipa ti’a i teie ao, e e vaiiho tatou i te hopearaa o te mau mea atoa i roto i te rima o tei faatere i te mau mea atoa no te maitai o tei here ia’na e o tei haapa’o i ta’na faaueraa.²⁰

Aita to tatou e mana’o ino i roto i to tatou nei aau i te mau mea ora atoa. Te faaore nei tatou i tei hamani ino ia tatou. O tei parau ino no tatou, o tei haavare no tatou i mua i te ao atoa nei, aita to tatou e mana’o ino no ratou. Te parau nei tatou, na te Atua e haava i rotopu ia ratou e tatou; na’na e faautua ia ratou i ta ratou mau ohipa (a hi’o PH&PF 64:11). Eita tatou e amo i te rima no te tama’i ia ratou, e faahoa râ tatou ia ratou, mai te peu e tatarahapa ratou i ta ratou mau hara e ia ha’ere mai ratou i te Fatu e ia ora. Noa’tu te ino ta ratou i rave, noa’tu te ma’ama’a o ta ratou mau ohipa, ia tatarahapa ratou, e farii tatou ia ratou ma to tatou aau atoa e, e rave tatou i te mau mea atoa te ti’a ia tatou ia rave no te tauturu ia ratou ia faaora ia ratou iho.²¹

Mana’o Tauturu i te Haapiiraa

Eaha te mau mana’o i ta’e mai i roto i to outou aau i te taime outou a faaore ai i te hara a te mau taata tei i hamani ino mai ia outou? I to outou mana’oraa, no te aha tei roto te hara rahi a’e i te Feia Moa o te ore e faaore i te hara ia vetahi ê? (a hi’o atoa PH&PF 64:9–11).
Mai te mea e, ua ite tatou e, ua riri te hoê ia tatou, eaha ta tatou e rave?
Nahea te “hi’oraa [noa] i te maitai” i roto i te mau peu a vetahi ê i te tauturu mai ia tatou ia faatupu i “ta tatou misioni … no te faaora i te taata nei?
No te aha e titauhia ia tatou ia here e ia aroha i to tatou mau enemi? Eaha ta tatou e parau no to tatou mau enemi i roto i ta tatou mau pure?
No te aha te mau Feia Mo’a e farii ai i te “faainoraa o te ao nei”? E nahea tatou i mua i teie faainoraa? No te aha eita te Ekalesia e “fifi i te pato’iraa e te faainoraa no rapa’e mai i te Ekalesia”
Ia haamani ino mai vetahi ê ia tatou, no te aha e mea ti’a ia tatou ia vaiiho i to ratou faautuaraa “i roto i te rima o te Mana Hope”?
Nahea te Faaora i to’na mau enemi? Nahea tatou ia pe’e i to’na hi’oraa maitai na roto i faahoaraa i to tatou mau enemi?