Ia Vai te Aroha i roto i to tatou Aau

Ia atuatu tatou i te feia hepohepo e ia î tatou i te maitai e te aroha no te mau taata atoa.

Aamu o te Oraraa o Joseph F. Smith

Ua faaue te Perofeta Joseph F. Smith i te Feia Mo’a i te mau Mahana Hopea nei ia here i to ratou taata tupu e ia atuatu i te feia tei roto i te hepohepo—i te pae tino e i te pae varua—ma poupou e te aroha mau. “Te taime a ite ai te Feia Mo’a i te mau Mahana Hopea nei i ta ratou hopoi’a, i reira ratou e ite ai e, e hopoia na ratou … te faaîraa i to ratou varua i te maitai, te here, te aroha, e te faaoreraa i ta vetahi hapa.”¹

Ua riro oia iho ei hi’oraa maitai no te taviniraa rahi, mai tei itehia a tere ai oia i te fenua Vaihi ei Peresideni no te Ekalesia ma te apeehia e te Epesikopo Charles W.Nibley. Teie ta te Episekopo i faati’a mai:

“I to matou taeraa’tu i te uahu no Honululu, ua putuputu rahi mai te mau ihotupu Mero ma te hei arapoa i tuihia i te mau tiare rau, te nehenehe e te noanoa atoa. Ua î hoi matou i te hei arapoa, to’na râ te hei rahi roa ae. Ua faaoto te pupu pû no Vaihi i te mau pehe no te manava ia matou…. E mea nehenehe mau ia ite i te reira huru aroha hohonu, te here taaê o teie mau taata no’na e ua tahe roa’toa hoi to ratou mau roimata. I rotopu i teie rahiraa taata, te ite râ vau i te hoê vahine iti ruhiruhia, te haihai e te mataru’i i te haereraa mai ma te opaopa, no to’na anei paari, e iva ahuru paha to’na matahiti. Tei roto i ta’na rima te tahi tau mei’a rii. Noa’tu o te reira anae ta’na faufaa, ua pupu râ oia i ta’na e mau râ ei tapao no to’na aroha. Ua pii oia, Iotefa, Iotefa. I te taime ihoa a ite ai te peresideni ia’na, haere oioi maira oia i mua ia’na e tauahi ihora, apa ihora ia’na ma te tuutuu ore, ma te mirimiri i ta’na upoo e parau ihora, “Mama, Mama, to’u Mama here e.”

E ma te roi mata i ni’a i to’na papari’a, ua huri mai oia i to’u pae, e parau mai ra ‘Charlie, ua atuatu o’na ia’u i to’u apîraa, a vai ai au i roto i te ma’i, e aore e taata no te haapa’o ia’u. Ua rave oia ia’u e ua riro oia ei mama no’u.’

Aue hoi te putapu e…. Mea nehenehe mau ia hi’o i te varua rahi e te poupou o te here, o te aroha e o te maitai i faaitehia i te perofeta a pae ahuru matahiti hau i teie nei; teie vahine ravai ore e te ruhiruhia o tei pupu mai i to’na tapa’o aroha—te tahi mau mei’a rii—te tao’a hoê roa e mauhia râ e ana—no te pupu atu i roto i te rima o ta’na Iotefa i here!”²

Haapiiraa a Joseph F. Smith

Eiaha e opipiri i te feia riirii e i te feia veve.

Te ture rahi, mai tei haapiihia e te Fatu, o te here ïa i te Atua ma to tatou aau atoa, ma to tatou mana’o atoa, e ma to tatou puai atoa; e mai te reira atoa hoi te tahi râ: a here i to taata tupu mai ta oe e here ia oe iho. “ Te ture atoa e te mau perofeta, tei teie nei ïa pue ture e piti nei.” [A hi’o Mataio 22:37–40.] No reira, faaohipa anae i te aroha e te faaoreraa i ta vetahi hapa, te here i te tahi e te tahi e a imi i te mau rave’a atoa no te tauturu i te feia e vaira i roto i te oto, oi tae hoi te reo o te vahine ivi i te Atua râ no te faahapa i te feia o tei ore i faatamaa ia’na, o tei ore i faaahu ia’na, e o tei ore i tuu ia’na i raro ae i te tapoi o te hoê fare. A ara ia ore te tamarii otare ia overe haere noa ma te tipaeraa ore, ma te maa ore, ma te ahu ore, ma te rave’a ore no te haamaitai i to’na feruriraa. A ara ia parahi mai te aroha i roto i ta outou mau ohipa taatoa, ia parahi mai te aroha i roto i to outou aau, ia tupu te hinaaro i roto ia outou no te aupuru i te feia riirii, i te feia tei roohia i te ati, e ia tamahanahana i te feia i tapeahia i roto i te fare tapearaa, mai te peu te hinaaro râ ratou i te tamahanahana, e ia haamaitai i te feia o tei roohia i te ma’i e o tei horo’a hoi i te hoê hapaina pape to’eto’e na te hoê perofeta na roto i te i’oa o te perofeta, e e farii hoi oia i te hoê horoa i ta te perofeta.

O ratou o te na reira i te feia riirii i rotopu ia tatou, e parauhia no ni’a ia ratou ia tae i te hoê mahana: “I poia na vau, e ua horo’a mai outou i te maa na’u; i poiha na vau, e ua horo’a mai outou i te pape na’u. E taata ê au, e ua ite mai outou ia’u, i vaitahaa na vau, e ua faaahu mai outou ia’u, i pohe na vau i te ma’i, e ua utuutu mai outou ia’u; i roto vau i te tapearaa, e ua haere mai outou ia’u ra.” E eita ia tatou e parau e: “E te Fatu i nafea matou i ite ai ia oe i te poiharaa, e ua faaamu ia oe,” o outou ta te tahi o te farii nei i te maramarama, e ite paha outou ta outou e rave i te taata riirii, e tai’ohia ïa mai te huru ua ravehia no’Na, te Metua o to ratou varua. [A hi’o Mataio 25:31–45.]³

Mea tia ia haapiihia ta tatou mau tamarii ia faatura i to ratou mau metua tane e to ratou mau metua vahine, to ratou mau taeae e tuahine e tae noa’tu i te mau taata atoa e ia haapii ihoahia râ ratou ia faatura i te feia paarî e i te feia huma, te feia riirii e te feia veve, e o ratou o te haavahavahahia ra e te mau taata.⁴

Ua manuia noa’na matou i te horo’araa i te tahi mau mea no te taata veve, e aita roa matou i pato’i na i te maa i te feia o tei ani mai i te reira. Te ti’aturi nei au e, teie te huru o te Feia Mo’a i te mau Mahana Hope’a nei. Te mana’o nei au e, e farii poupou te nunaa Momoni ia aupuru rahi i te feia riirii e i te feia veve, e aita e Feia Mo’a i te mau Mahana Hope’a o te faaroo nei i to’u reo e aore râ o te parahi râ i te mau vahi atoa o te ore e taafa i ta’na tuhaa no to’na taata tupu e vai râ i roto i te hepohepo….

Ua ite’na vau i te mau taata i te haereraa i rapae i to matou fare ma te faraoa e te pata i roto i to ratou rima (ua au to’na monamona i te faraoa a te hoê arii, no te aravihi o to te utuafare ia tunu i te faraoa e ia hamani i te pata) e ia tae atu ratou i rapae i te aua, hue ihora i taua maa râ i ni’a i te purumu. Eere te maa ta ratou i hinaaro. Ua hinaaro râ i te moni. No te aha? No te haere paha ïa i te hoê fare pereraa e aore ra i te hoê fare inuraa. Tera râ, na ratou iho e amo i ta ratou hopoi’a. O te huru noa o to ratou faatiaraa o ta tatou e ite atu e ia au atoa i te faaiteraa a te varua maitai e vaira i roto ia tatou; a tatini noa’tu te feia ino o ta tatou e horoa i te maa, e mea maitai te reira, eiaha râ te hoê o ratou, e taata maitai anei, ia faarue mai i to outou utuafare ma te maa ore i roto i ta’na rima.⁵

Te aroha e aore râ te here, o te parau tumu rahi roa ae ïa i roto i to tatou oraraa. Mai te peu e faatoro tatou i te rima tauturu i te feia i faatitihia, mai te peu e tauturu tatou i te feia e oto râ e e mauiui râ, mai te peu e faateitei e e haamaitai tatou i te mau taata atoa, e misioni ïa na tatou te raveraa i te reira, e tuhaa faufaa te reira no ta tatou Ekalesia ia na reirahia.⁶

A aroha i to taata tupu mai ia oe iho.

E mea ohie no te hoê taata ia parau e, te ti’aturi nei oia i te Atua e i te toto taraehara o Iesu Mesia, te ti’aturi nei oia i roto i te tatarahapa o te hara, i te bapetizoraa ia matara te hara, e i te tuuraa rima no te horoaraa i te Varua Maitai. Tae roa mai i teie nei, e mea ohie i te hoê taata ia haere i mua. Area râ, eere i te mea ohie ia here i to tatou taata tupu mai ia tatou iho. O tera ïa te fifi e tinaihia, i reira tatou e faaohipa ai i to tatou mana taatoa ia tae tatou i te hope’a, e te tinai noa râ tatou e rave rahi matahiti i teie nei, e tamata vau i te parau, ua ara tatou i teie po’ipo’i e ua ite tatou ia tatou iho tei te avae â o taua fifi râ, aita â tatou i piri noa’tu i te teiteiraa o taua fifi ra. Te parau mau, oia hoi e mea iti roa te mau tane, te mau vahine, i roto atoa i te Ekalesia a Iesu Mesia i te Feia Moa i te mau Mahana Hope’a nei o te nehenehe e parau e: “Te here nei au i to’u taata tupu mai ia’u iho”.

Aita tatou e here i to tatou taata tupu mai ta tatou e here nei ia tatou iho. Ua parau te hoê taata e: “I rotopu i te mau tamarii atoa a to’u metua vahine, o vau iho ta’u i here roa ae. Noa’tu e rave rahi mau tamarii ta to tatou Metua, e hoê a to tatou toto, e e mero paha tatou no te hoê a nunaa, hoê a faaroo, o te ti’aturi râ i te hoê Atua e i te Fatu ia Iesu Mesia, o tatou iho ta tatou e here roa ae. Te tupu nei teie huru i te mau mahana atoa o to tatou oraraa, i te mau taime atoa a amui ai tatou te tahi i te tahi. Te ite pinepinehia nei teie ohipa i rotopu i te tane e te vahine faaipoipo: i rotopu i te metua tane e te mau tamarii, e mea pinepine roa i te itehia i rotopu i te mau tamarii. O te reira anei te huru Keresetiano? O te reira anei te haapiiraa a Iesu Mesia? Aita roa, aita te mau buka ta’u e tai’o nei, to’u haroaroaraa i te mau parau tumu o te ora e te faaoraraa e tuea nei i te reira huru mana’o. Te haapii nei râ te mau papa’iraa mo’a ia tatou ia here tatou i te tahi e te tahi, ia faatuea to tatou maitai, to tatou mau hinaaro, to tatou oaoa i te maitai, te mau hinaaro, te oaoa o to tatou taata tupu—eiaha e parau i te mau parau tano ore i te feia o ta tatou e here nei.⁷

Nahea tatou ia here i to tatou taata tupu mai ta tatou e here nei ia tatou iho. Te mea e rave pinepinehia nei e to te ao nei, oia hoi e rave rahi te mau taata pipiri e te tau’a ore ia vera mâ o te ore e horo’a i to ratou aau atoa i te mau mea o te nehenehe e haaamaitai i te oraraa o to ratou mau taata tupu; e e haapa’o noa ratou ia ratou iho e i to ratou iho maitai ma te parau e: “A vaiho i to taata tupu, na’na iho e haapa’o ia’na iho.” Eere te reira te varua e au ia haapaohia e te Feia Mo’a i te mau Mahana Hope’a nei.⁸

Ia ite anae tatou i te mau hape, i te mau paruparu e aore râ i te mau hapepa haavare e aore râ ti’a mau i roto i to tatou mau taeae e tuahine, eiaha tatou e haere atu e tihotiho parau, e faaite atu i to tatou mau hoa e i to tatou mau taata tupu, mai te peu e faaohipa tatou i te autaeaeraa e te aroha, … e haere ïa tatou e farerei i to tatou mau hoa o tei roohia i te mauiui, te mana’o tapitapi e a faaite atu ai ia ratou to tatou huru, to tatou mana’o, e ia rave na roto i te opuaraa no te tauturu ia ratou ia upooti’a to ratou mau paruparu, e tupu mai ïa te maitai i roto ia ratou e i roto ia tatou. Eita tatou e haere ma te mana’o faahapa e te mana’o ino no te faaî i to ratou aau i te feii.⁹

Te faaue nei au ia haapii tatou i te here i te tahi e te tahi, e i reira e tupu te hoaraa mau. Ua parau te hoê taata, “e nehenehe ia tatou ia horo’a ma te here ore, area râ eita tatou e nehenehe e here ma te horo’a ore.”Oia ia te hinaaro nei tatou ia here i te tahi e te tahi, e mai ta te Fatu i parau ia Petero, ia haapa’o tatou i ta’na mau mamoe (Ioane 21:15–17), a haapuai i te tahi e te tahi. Mea tano ia paturu tatou i te tahi e te tahi, eiaha râ e faaino, e ume i raro e aore râ e parahi i ni’a i te mau paruparu o to tatou mau taata tupu e o to tatou mau taeae e aore râ i nia i te ino ta tatou e ite nei i roto i te mau taata, a faaite râ mai te peu e ite tatou i te hoê viretu, e a faatiama ia tupu mai te maramarama e te ora, te mana, te faaitoitoraa i te mau taata o te ite mai, e tae noa iho ra o ratou o tei hape, e o te vai nei i roto i te poiri, ia arata’ihia mai ratou i te maramarama.¹⁰

Te haapii nei to’u faaroo ia’u ia aroha i te mau taata atoa. Area ra noa’tu, aita vau e au nei i ta ratou mau ohipa ino e te poiri o to ratou feruriraa, ua hamanihia ratou ia au i te hoho’a e te huru o to’u Metua, e to’u Atua—e e mau taeae e e mau tuahine ratou no’u. Te titauhia nei au ia here i to’u taata tupu mai ia’u iho. Aita paha vau i tae i te hoê faito maitai roa, te vai noa râ paha te tahi huru pipiri i roto ia’u nei o te tape’a nei ia’u ia here i to’u taata tupu mai ia’u iho; area ra, te opua nei au i te rave i te ohipa maitai no to’u mau taata tupu, no te mea e titauraa te reira o te Evanelia.¹¹

I roto i teie tau tuuraa Evanelia, ua heheu mai te Atua ia tatou nei te îraa o te Evanelia, o te haapii nei i te taata teie parau tumu o te faatusiaraa ia oe iho no te maitai o vetahi ê, e o te haapii nei ia tatou e tupu te maitai i nia ia tatou ia rave anae tatou i te maitai no vetahi ê…. E rave rahi i roto i te ao nei o te haapa’o nei ia ratou iho e aita ratou e hinaaro e tau’a ia vetahi ê maoti râ i te tau’araa ia ratou iho…. Te hopoi’a a te mau taata, mai ta’u e haro’aro’a nei, i roto i te Evanelia mo’a ta tatou i farii, tei roto ïa i te parururaa i te maitai, te viretu, te faatura, e te ti’araa o te mau tane e o te mau vahine taatoa mai ta tatou e paruru i to tatou iho.¹²

Ua mito te Atua i Ta’na Ekalesia no te aupuru i te feia i roto i te hepohepo.

Ua mito te Atua i Ta’na Ekalesia, i roto i te taatoaraa o taua faanahoraa râ, ia ti’a i te mau varua atoa ia farii i te aupuru e te atuatu i te taime e vai ai ratou i roto i te hepohepo.¹³

Ua faaue te Atua i to’na nunaa ia haamana’o i te taata veve e ia horo’a i te mau ravea no te paturu ia ratou…. Aita tatou e faariro nei i te aroha ei ohipa imiraa moni, te tiaturi nei râ tatou i te tauturu a te tahi e te tahi. Te titau nei te parau poro’i o te Evanelia i te faaroo e te tatarahapa, te titau atoa râ ra oia ia faahotuhia te mau ohipa tumu o te ora. No reira, ua heheu mai te Fatu i te opuaraa no te faaoraraa tahuti o To’na mau taata.

No te tauturu i te feia veve, ua faanahohia te haapaeraa maa, te hoê o te mau opuaraa no te horo’a i te feia veve te maa e te tahi atu mau mea o te oraraa, tae roa’tu i te taime e nehenehe ai ratou e mito ia ratou iho. Oia mau, e mea iti roa te mau faanahoraa e vaira no te tatara i te mau fifi rû. Ua imi noa te Ekalesia i te rave’a na to’na iho mau melo e tauturu ia ratou iho, eiaha râ e rave i te faanahoraa a te tahi atu mau taatiraa totauturu e pahono râ i te mau titauraa rû anae. Ia iriti anaehia taua mau tauturu râ e aore râ ia hami anae te reira, e mea papu roa e ani faahouhia te reira, i reira ïa e u’ana roa’tu ai te veveraa o te feia riirii no te mea aita ratou e haapiihia râ ia mito ia ratou iho, maori râ ia tiaturi i te tauturu a vetahi ê, e aita atoa hoi ratou e tiaturi i to ratou iho puai…. No reira, to matou manao no ni’a i te i te aroha, o te tinairaa ïa i te mau fifi rû e o te tuuraa i te feia veve i roto i te ti’araa e mito ai ratou ia ratou iho, e ia tae i te taime ua maraa mai ratou i roto i te maitai, e na reira atoa ïa ratou i te tauturura ia vera mâ. Ua horoahia te hopoia i te feia manao paari no te opere i te moni, i te rahiraa o te taime, na te mau episekopo o te Ekalesia e ara i te atuaturaa i te feia veve.

Te tuu atu nei matou i te hoê faanahoraa tano a te Fatu no ni’a i te mahana haapaeraa maa i te mau Ekalesia o te ao taatoa nei ei rave’a paari e te te ti’a no te haapa’oraa i te feia veve…. E riro teie ei ohipa ohie no te mau taata ia haapao i teie titauraa, oia ïa ia haapae i te maa e te pape hoê mahana i roto i te ava’e, e ia horoa’tu no te feia veve te maa tei haapaehia i taua mahana râ, e ia horoa faarahi atu mai ta ratou e hinaaro. Ua faati’a te Fatu i teie ture, e mea ohie e e mea tano maitai, hoê ture o tei patuhia i ni’a i te tanoraa e te maramarama, e eita ïa e riro noa ei pahanoraa no te tautururaa i te feia veve, ei haamaitairaa atoa râ i roto i te mau taata o te haapa’o i teie ture. E tupu rahi mai te varua, e tupu te tahoêraa o to tatou varua i te Varua Mo’a, e i reira e tupu mau a te puai i te pae varua e te mana, te mau mea ta te nunaa taata e tia ia farii. No te mea e apitihia te haapaeraa maa i te pure, na teie ture e haafatata i te mau taata i te Atua râ, e faaateahia to ratou mau mana’o, hoê taime i te ava’e, i te mau ohipa o te ao nei, e e haafatatahia ratou i te ohipa ihotumu o te Evanelia—te hareraa e farerei i te otare e te vahine ivi e parahi râ i roto i te ati, e na te reira hoi e faaatea i te taata i te viivii o teie nei ao. [Iakobo 1:27]¹⁴

Te haapaeraa maa tano o te haapaeraa maa ïa e au i te varua aroha i te Atua e i te taata tupu, ua riro te opuaraa o te haapaeraa maa ei faatupuraa i te mâ o te aau e te hinaaro tae—hoê haapaeraa ti’a e te hohonu mau no te Atua—e riro ïa teie huru haapaeraa maa ei faaoraraa i te mau hape atoa; e ore te nounou, e tupu te aroha no to tatou taata tupu, e e haapa’o tatou i te feia riirii e i te feia veve ma te oaoa.¹⁵

E faariro te Evanelia ia tatou ei feia aau uraeva e ua tae roa i te nounou ia maitai o vera mâ.

Te faaue nei e te taparu nei matou i to matou mau taeae e tuahine i roto i te Evanelia a Iesu Mesia, eiaha ia auraro noa ia ratou iho na roto i te hoê oraraa tano, ia faatura e ia here atoa râ i to outou taata tupu e ia outou tataitahi.¹⁶

Te mana’o nei au mea tia ia tatou ia ora i ta tatou haapa’oraa. Mea tia ia tatou ia haapa’o i te mau faaueraa a te Atua. Mea tia ia tatou ia farii e ia oaoa i te varua o te Evanelia i roto i to tatou aau e ia amo i te mau hotu o te varua i roto i to tatou oraraa; ia vai te faaroo, te tiaturiraa e te aroha, te here, te haehaa e te faaoreraa hara i roto i to tatou varua no tatou tataitahi, e ia faaore i te pari e te riri o te faatupu i te iria, te tapitapi, te amahamaha i rotopu i te mau taata e te varua iria. Oia hoi, a faaore i te tairoiro i roto ia outou. O ratou o te faatupu e o te tape’a i te tairoiro, te nounou e aore râ te pohehae i roto i to ratou aau, te faaino râ ïa ratou ia ratou iho, e e hau atu ïa te tataitauatiniraa te ino o ta ratou e faatupu i ni’a ia vetahi ê. Oia hoi, a faaore tatou i teie mau mea i roto i to tatou aau e i to tatou mana’o. Ia ora tatou i te hoê oraraa ti’a, ia here e ia maitai te tane i ni’a i to’na hoa faaipoipo, e ia maitai e ia here te vahine i to’na hoa haaipoipo, ia here, ia maitai e ia haapa’o raua i te maitai o ta raua mau tamarii, ia tahoê ratou mai te hoê utuafare tahoê o te Ekalesia, e a rau’ahia ai teie huru i rapae ae i te mau oti’a i Ziona, i reira te hau mileniuma e tae mai ai i rotopu ia tatou, e e tupu te hau i nia i te fenua e te au maitai i rotopu i te mau taata i te mau vahi atoa.¹⁷

Ua faanahonahohia te Evanelia no te tinai te mau mea i roto ia tatou e ore e tuea râ i ta te Atua e i te opuaraa no te faaoraraa o Ta’na i heheu mai i te taata nei. Ua faanahonahohia te reira ia ti’a ia tatou ia ora ia au i te mea e farii ai tatou i te îraa o te maramarama o te parau mau, ia haroaroa i te mau opuaraa a te Atua, ia nehenehe ia ora i pihai iho ia’Na, e ia tuea tatou i To’na mau hinaaro i te mau taime atoa. Ua faanahonahohia te mau parau tumu o te Evanelia ia riro tatou ei feia aau uraeva, ia aano to tatou mau feruriraa, ia rahi to tatou nounou i te raveraa i te maitai, ia ore te tairoiro, te nounou e te riri i roto i to tatou aau, ia tupu te hau i roto ia tatou, ia tia ia haapiihia tatou, e ia hinaaro tatou i te faatusia i to tatou mau hiaai e i ta tatou iho mau titauraa no te maitai o to tatou mau taata tupu e no te faahaereraa i te basileia o te Atua i mua. Te hoê taata o te ore e nehenehe e faatusia i to’na mau hinaaro, o te ore e nehenehe e parau i roto i to’na aau “To’u Metua ia tupu to oe hinaaro, eiaha ra to’u” e ere ïa i te tamarii na te Atua o tei fafariu mauhia; tei roto noa â oia i te hape e te pouri e tapoi nei i te ao, e o te huna nei i te mau taata i mua i te aro o te Atua.¹⁸

Mana’o Tauturu i te Haapiiraa

Eaha na faaueraa rahi roa ae e piti? (A hi’o Mataio 22:37–40) No teaha mea faufaa mau teie na faaueraa?
Eaha te aroha? (A hi’o atoa Moroni 7:45–48). Eaha ta tatou e nehenehe e rave ia faaohipa tatou i te aroha i roto i ta tatou mau ohipa taatoa e ia parahi mai te aroha i roto i to tatou aau. “Eita te Aroha e pau” (Moroni 7:46)
Eaha ta tatou hopoia i mua i te mau taata riirii e aore râ i mua i “te feia aita e auhia nei e te mau taata”?
Nahea tatou e nehenehe ai e parau “Te here nei au i to’u taata tupu mai ta’u e here nei ia’u iho”? Nahea tatou e aparau ai i te mau hapehape o vetahi ê? (Luka 6:41–42). Nahea tatou e faaite ai i te mau viretu i roto ia vetahi ê?
Eaha te mau haamaitairaa e tupu na roto i te haapaoraa i te mahana haapaeraa maa i roto i te avae e te horoaraa i te mau ô? Ma te pure, a hi’o nahea outou ia tauturu i te Ekalesia ia atuatu i te feia riirii mai te imiraa i te mau melo apî e te mau melo otahi; mai te raveraa i te ohipa i roto i to outou oire, mai te faarahi i te mau ô o te haapaeraa maa, e aore râ mai te raveraa i te mau ohipa totauturu e te mau ohipa no te mau taata atoa.
Eaha te mau “hotu o te varua i roto i to tatou oraraa”? (Galatia 5:22–23) Eaha te mau haamaitairaa ta tatou e ta vetahi ê e farii ia faatusia anae tatou i to tatou iho mau hiaai no te maitai o vetahi ê?
Nahea te Evanelia a Iesu Mesia e “tinai ai i te tairoiro, te au ore ia vetahi ê, te riri mai roto mai i to tatou aaua” e i te tautururaa ia tatou iho ia aroha ia vetahi ê?