Te Faaroo: Te Niu o te Parau Ti’a Atoa

Te Faaroo i te Atua te Metua e i Ta’na Tamaiti o Iesu Mesia, o te parau tumu matamua ïa o ta tatou Haapa’oraa faaroo e te niu o te parau ti’a atoa.

Aamu o te Oraraa o Joseph F. Smith

Ua faatumu o Joseph F. Smith i to’na faaroo i ni’a i to’na Metua i te Ao ra, e i ni’a i te Fatu o Iesu Mesia, e i ni’a i te parau mau ohie e tamau o te evanelia. I te apîraa o Joseph F. Smith, ua faaitoitohia to’na faaroo na roto i te haamo’araa o to’na metua vahine i te ohipa e te parau ti’a.

Ua parau oia: “Te haamana’o maitai nei au i te hoê mea i tupu a vai tamarii ai au. E vahine îvi to’u mama, e utuafare rahi hoi no te faaamu. I te hoê tau faatupuraa raau [i ropu i te matahiti 1849 e 1852] a tatara ai matou i ta matou vairaa umara putete, ua faaue oia i ta’na mau tamaroa ia maiti i te mau umara putete maitai roa no te uta’tu i te pû o te tufaa ahuru; e mea varavara hoi te umara putete i taua taime ra. E tamaiti na’ina’i au i te reira tau, e na’u e faahoro i te mau puahorofenua. A tapiri atu ai matou i te e’a o te pû o te tufaa ahuru no te huri i te mau umara putete i raro, haere maira te hoê o te mau papa’i parau i rapae e parau maira i to’u mama, ‘E te vahine îvi Smith, aita roa e ti’a ia oe ia aufau i ta oe tufaa ahuru.…Tama’i maira oia i to’u mama no te aufauraa i ta’na tufaa ahuru ma te parau e, e ere roa oe i te mea ara maitai e te paari; na ô faahou maira oia, te vaira te tahi mau taata itoito o te nehenehe ia rave i te ohipa, e te tauturuhia nei ratou e te moni tufaa ahuru. Pahono riri atura to’u mamaia’na na ô atura: … Te hinaaro ra anei oe i te tape’a i ta’u haamaitairaa? Ia ore au e aufau i ta’u tufaa ahuru, e mea ti’a ia’u ia titau i te Fatu ia tape’a i ta’na mau haamaitairaa. Te aufau nei au i ta’u tufaa ahuru, eiaha noa i te mea e, e ture na te Atua area râ, no te mea te titau nei au i te hoê haamaitairaa.’ ”

Ua faataa te Peresideni Smith e: “Ua maitai oia i te haapaoraa i te mau ture a te Atua.… Teie te tahi, ua ara maitai taua vahine îvi ra ia tapa’ohia to’na i’oa i roto i te buka ture a te Fatu. E mea ti’a i taua vahine îvi râ ia farii i te mau faufaa o te fare o te Atua. Aita roa te hoê oro’a o te evanelia e tape’ahia ia’na, no te mea ua haapao oia i te mau ture a te Atua, e aita oia i mairi i ta’na ohipa.”¹

Haapiiraa na Joseph F. Smith

E mea titauhia te faaroo i te Atua e i Ta’na Tamaiti, ia Iesu Mesia.

Te ti’aturi nei tatou i te Atua, te Metua o to tatou Fatu e Faaora o Iesu Mesia, Tei Hamani i te ra’i e te fenua, te Metua o to tatou varua. Te ti’aturi nei tatou ia’na ma te puai, te farii nei tatou ia’na i roto i to tatou aau, i roto i ta tatou faaroo ekalesia, i roto i to tatou nei tino. Ua ite tatou e, ua here oia ia tatou, e te farii nei tatou ia’na ei Metua no to tatou varua e ei Metua no to tatou Fatu e Faaora o Iesu Mesia.²

Matamua.… E mea ti’a ia roaa te faaroo i te Atua, te faaroo, o te parau tumu matamua ïa o te ekalesia i heheuhia mai, e te niu o te parau ti’a atoa.

Te faaroo i te Atua, o te ti’aturiraa ïa e, o oia, e “o oia ana’e te Tavana Rahi e Taata tiamâ, e i roto ia’na e vai ai te îraa o te tiamâ, te maitai roa, te mau horo’araa atoa e te parau tumu,” e i roto ia’na te faaroo o te tahi atu â mau taata maramarama e faatumuhia ai ia roaa te oraraa e te ora; e teie atoa, o oia te taata rahi i Hamani i te mau mea atoa, o oia te puai hope, te ite hope i te mau mea atoa na roto i ta’na mau ohipa e te mana o to’na Varua e tae i te mau vahi atoa [a hi’o Joseph Smith, haaputuraa no te, Lectures on Fatih (1985), api 10].

Aita e titau-noa-hia te faaroo i te Atua tera râ, ia Iesu Mesia atoa, ta’na Tamaiti, te Faaora o te mau taata atoa e te Arai o te Fafauraa Apî; e i te Varua Maitai hoi, te faaite papu no te Metua e no te Tamaiti, “o te ore e taui na roto i te mau matahiti atoa e a muri noa’tu.”³

To tatou faaroo ia Iesu Mesia o te niu ïa o ta tatou ekalesia, te niu ïa no to tatou ti’aturi i te faaoreraa hara, no te faateiteiraa i muri a’e i te poheraa, no te ti’a faahouraa mai te pohe mai e haere atu ai i te ora mure ore. Na to tatou faaroo i roto i te mau parau haapiiraa o tei faahoihia mai na roto i te tautururaa a te Peropheta Iosepha Semita i haapapu, i faaitoito ia tatou e i faati’a ma te mâro ore i to tatou faaroo e to tatou ti’aturi i te misioni mo’a a te Tamaiti a te Atua.⁴

Ua parau mai Paulo ia tatou, o te faaroo nei o te ti’aturi ïa i te mau mea e tiaihia nei, e te ite i te mau mea aore e hi’ohia nei [a hi’o Hebera 11:1]. Te faaroo i te Atua [oia hoi] te ti’aturi ïa e te ora nei Oia, e o oia te haamauruuru i te feia e imi papu e o tei here Ia’na. E arata’i te faaroo i te Atua i te mau taata i te ite e te îraa atoa e te haavare ore i mua ia’na.…

E au tatou i te tamariirii i mua i teie parau tumu o te evanelia. No haamata noa’tura to tatou mau taata maitai roa i te taa i te auraa o teie parau tumu no te oraraa e no te ora, teie parau tumu no te tura. Ua haapiihia tatou, e mea na roto i te faaroo te mau ao i hamanihia ai. O vai to tatou e faaroo rahi no te faaoti i te mau mea rahirahi? Ua taotiahia to tatou faaroo i ore ai tatou e nehenehe e ora i te mau parau tumu riirii o te evanelia o ta te Atua i heheu ia tatou o te titau ia vai te hau e te oaoa i roto i te oraraa totiare. E faaroo iti roa to tatou no te faatupu i teie mau parau tumu riirii o tei heheuhia mai ia tatou no te faatere i to tatou oraraa o te mau mahana atoa. E mea faaoromai te Fatu ia tatou, e ua a’o ia tatou te tahi vahi iti i ò nei, ei te tahi vahi iti i ò, reni i ni’a i te reni e parau i ni’a iho i te parau ia nehenehe tatou ia farii i taua faaroo râ o tei horo’ahia i te mau Feia Mo’a i mutaa ihora na roto i te reira i opanihia ai te vaha o te mau liona, e i ore ai te ahu rahi o te umu ura i haapaapaa râ.… Te tamata nei to tatou orometua rahi o Iesu Mesia, … i te haapii ia tatou i te mau parau tumu o te oraraa e te ora tei riro ei mau parau tumu no te mana, te haapiiraa i te mau taata i haere mai i rapae i te hohonuraa o te oto, mai roto mai i te mau huru haehaa o te taata nei i te mau teitei o te hanahana e te ite o te Atua.⁵

Te parau mau oia ïa, e mea ti’a i te mau tamaroa e te mau tamahine tataitahi a te Atua na mua roa ia roaa te faaroo i te Atua—te faaroo e, te vai nei Oia, e mea parau ti’a Oia, o Oia te Mana Hope, o Oia te faatere i te mau mea atoa, e e vai te maitai roa Ia’na râ. E mea papu e, aita to outou e iteraa no te reira mau mea tera râ, e mea ti’a ia vai te faaroo i roto ia outou e e parau mau te reira. O te parau tumu matamua te reira o te haapaoraa i heheuhia mai. Ua papa’ihia e, aore e faaroo ra, e ore roa te Atua e mauruuru. Ua papa’i-atoa-hia e, e ora te taata parau-ti’a na roto i te faaroo. No reira te parau atu nei Au, e mea ti’a ia vai te faaroo o te mau taata atoa i te Atua, Tei Hamani i te mau mea atoa, te Faatere o te ra’i e te fenua. Aita ana’e e faaroo, aita atoa ïa te mau ao e hamanihia; aita ana’e te reira, eita atoa ratou e vai i roto i to ratou mau ti’araa; area râ, na roto i te faaroo e ti’a te mau mea atoa nei i te Atua e i te taata nei.⁶

I roto i ta’na heheuraa i te taata nei, ua faaohie roa te Atua i ta’na parau ia nehenehe i te mau taata haehaa, noa’tu e aita ratou i farii i te haapiiraa taa ê, ia oaoa i te faaroo rahi, ia maramarama i te mau haapiiraa o te evanelia, e ia oaoa i te hau o to ratou mau ti’aturiraa no te haapaoraa.⁷

Eita roa te faaroo, te haapaoraa, te faanahonahoraa faaroo a te taata i te ao nei e ti’a i ni’a a’e i te parau mau. E mea ti’a ia vai te parau i te niu o te faaroo mai te mea e aita, e faufaa ore e aore ïa e manuïa i roto i ta’na mau opuaraa. Te parau nei au e tei te niu te parau mau, tei raro e tei te tupuai o teie ohipa rahi a te Fatu i faati’ahia na roto ia Iosepha Semita te peropheta.⁸

Te Faaroo, te hoê horo’araa na te Atua, e fariihia te reira na roto i te haapaoraa.

E horo’araa tamau te faaroo na te Atua i te taata nei, o te fariihia na roto i te haapaoraa, mai te tahi atu mau haamaitairaa. Te tane e te vahine i roto i teie Ekalesia o te hinaaro i te afai i to’na faaroo i te hoê faito teitei, e haapao ia i te mau peu mo’a e te mau oro’a i roto i te Ekalesia ma te auraro i te ture o te haapaoraa i te hinaaro o te Atua. Na roto i te reira mau mea, e auaa hoi ratou, i farii ai te taata i te iteraa maitai roa no te mau opuaraa a te Atua i roto i teie ao. Te auraa no te faarava’iraa i te faaroo oia ïa, te faarahiraa i te puai e no te mea hoi e, eita te hoê taata e nehenehe ia faaohipa i te mau mana atoa i roto i teie oraraa nei o tei horo’ahia ia’na na roto i te faarava’iraa i to’na faaroo, e nehenehe i taua mau mana ra ia faaohipahia i roto i to ratou îraa i roto i te tau e a muri atu, ia ore ra, i teie nei ïa.⁹

Ua parauhia e, te faaroo, o te hoê horo’araa na te Atua, e parau mau ïa; area râ, eita te faaroo e roaa mai te mea e aita e ohipa; eita te faaroo e roaa mai te mea e, aita te mau faaueraa a te Atua e haapa’ohia.¹⁰

Hoê o te mau arata’iraa a te misioni a te Ekalesia, o te haapiiraa ïa i te evanelia a te Mesia i roto i te ao nei. E horo’a te reira i te hoê parau poro’i faufaa roa eiaha no te ora o te pae varua ana’e o te taata nei oia atoa râ to ratou maitai pae tino. Eita te reira e haapii mai e, o te faaroo ana’e te titauhia tera râ, e mea titau-atoa-hia te ohipa. Te ti’aturi ia Iesu, e mea maitai ïa area râ, e mea ti’a ia ora i te reira no te tauturu i te taata ti’aturi ia rave i te ohipa no to’na ora e no te tauturu ia vetahi ê ia na reira atoa.¹¹

Te ti’aturi nei tatou e, e mea ti’a ia tatou ia ora i ta tatou haapaoraa faaroo i te mau mahana atoa o te hepetoma, i te mau hora atoa o te mahana, e i te mau taime atoa. Na roto i te ti’aturiraa e te faaohiparaa, e itoito tatou i roto i te faaroo, e tupu rahi te Varua o te Atua i roto ia tatou, e haere to tatou ite i mua, e nehenehe ia tatou ia paruru i te ohipa o te tumu hoi te reira tatou i faaô ai i roto.¹²

Te ani nei au ia outou, e to’u mau taea’e e to’u mau tuahine, e tamarii ta outou i Ziona, e tei ia outou ra hoi te hopoi’a rahi, a haapii ia ratou i te mau parau tumu o te evanelia, a haapii ia ratou ia vai te faaroo i roto i te Fatu o Iesu Mesia, e ia bapetizohia no te faaoreraa i te mau hara ia rae’ahia to ratou matahiti i te vau.¹³

E paturu te faaroo i te Atua ia tatou i roto i te mau taime o te ati.

Ia hinaaro i te upooti’a i te mau ahoaho ei faataaraa i te mau uiraa o te titau i te taime no to ratou tatararaa, e mea ti’a ia vai te faaroo e te ti’aturi aueue ore i te Atua ia upooti’a o ta’na ohipa.¹⁴

Te titauraa i te hoê ite hohonu no te parau mau, e mea faufaa roa ia. E mea faufaa atoa ia roa i te Feia Mo’a i te Mau Mahana Hopea Nei te iteraa i te parau ti’a a te Atua, te hoê iteraa rahi e te faaroo ia’na e i to’na aroha. E mea titauhia taua iteraa ra ia nehenehe ia maramarama maitai i te evanelia e ia haapao i te mau faaueraa. Ia ui te taata ia’na iho e, te vaira anei i roto i to’na aau te hoê iteraa papu e te aueue ore no teie mau mea. Ua tupu anei te hoê mea ia outou … o te nehenehe ia taui i to outou faaroo i roto i te mau opuaraa a te Fatu, i ta’na parau ti’a e to’na aroha aueue ore e aore râ, i roto i te mana faaora o ta’na evanelia, te parau poro’i o te ora? Mai te mea e, aita to outou faaroo i a’ahia, e te titauhia nei outou ia imi i taua iteraa râ.

I roto i te mau papa’iraa mo’a, e rave rahi mau hi’oraa maitai no te mau taata tei niu i to ratou oraraa i ni’a i te faaroo aueue ore i te Atua. E mea ti’a atoa i te hoê taurearea ia turu’i i ni’a i te hoê pou mai te reira te huru.

A ere ai oia i ta’na mau faufaa pae tino, e tae noa’tu hoi e ua haamauiui maitaihia oia i te poheraa o ta’na mau tamarii, ua ti’aturi matapo noa Ioba i te Manahope.…

Na roto ia Aberahama, ua roaa faahou te tahi hi’oraa na tatou no te haapao maitai i te parau a te Atua, e te faaroo e i te pae hope’a, e opere tatou i to’na mau maitai.… No to Aberahama hinaaro i te ti’aturi i te Atua i roto i te tamataraa rahi e fariihia ra e te hoê metua tane—te faatusiaraa i ta’na tamaiti—ua faaite te reira i te faaroo hohonu e te ti’aturi papu e, te vai nei te mana e te hinaaro o te Manahope ia haapa’o i ta’na mau fafauraa, e riro paha e, eita i te mea papu i roto i te tahi mau huru tamataraa.… Area râ, e na reira ihoa oia no te taatoaraa o te ti’aturi ia’na, no te mea, te fafauraa, no te taatoaraa ïa.

Na taua iteraa ra, taua faaroo ra e taua ti’aturiraa ra e horo’a i te hoê tufaa faufaa i te ekalesia i heheuhia mai.… Ua haapii Aberahama i taua parau mau ra o te ti’a ia tatou ia nenei i ni’a i to tatou aau e, e taata parau-ti’a te Atua e, e haapao maite oia i ta’na mau fafauraa atoa. No reira, ua haamaitaihia anei oia i roto i te mau tamataraa e na reira-atoa-hia tatou no te mea, ua tiaturi oia i te Fatu e ua haapao i to’na reo. I muri mai, ua parau ihora te Fatu: “E haamaitai rahi roa vau ia oe na, e faarahi au i to huaai; mai te fetia o te ra’i ra, e mai te one tahatai ra: e e noaa te uputa oire o to ratou mau enemi i to oe ra huaai; e e maitai te mau fenua atoa o te ao nei i to oe na huaai.”[Genese 22:17–18.]

Hoê atoa huru i teie mahana; mai te mea aita to te Feia Mo’a e iteraa mau e, te e’a o ta ratou e tapapa nei ua tano ïa i te hinaaro o te Atua, e rohirohi ratou i te mau tamataraa, e e paruparu i raro a’e i te hamani-ino-raa.… Tera râ, taa ê noa’tu i te reira, na roto i te ti’aturi tei neneihia i ni’a i to ratou aau no te Atua, noa’tu e eaha o te tupu mai, e oaoa ratou ia rave i to’na hinaaro, ma te maramarama i te mau fafauraa o ta ratou e farii i te pae hopea. Mea na reira te ao nei i rê ai, e i te fariiraa i te korona hanahana o ta te Atua i fataa no ratou o tei here, tei faatura e tei haapao ia’na.…

Aita roa e taata e farii i te îraa o te mau haamaitairaa a te Atua maori râ, ia haafatata atu i te hoê maa faito iti a’e o te faaroo i te parau ti’a na te Atua tei faahoho’ahia i te mau hi’oraa i faahitihia a’e nei. E mea ti’a ia’na ia nenei i roto i to’na varua te ti’aturi i te parau ti’a e te aroha o te Atua. E imiraa te reira na te tataa iho, eita e ti’a i te hoê taata ia rave no te tahi. E mea ti’a i teie mau haapiiraa ia haapiihia e ia faaohipahia ei hi’oraa na te feia apî o Ziona, no te hopoi itoito i roto i to ratou varua te parau mau o te faatiamâ ia ratou e ia tapea papu i te faaroo. Ia ti’a ratou i mua i te Atua i roto i ta ratou mau putuputuraa e ia faahaamana’ohia ratou i ta’na mau faufaa maitai, na roto i te faahoi-raa-hia mai o te Buka a Moromona, i Kirtland, i Ziona [Jackson County, Missouri], i Nauvoo, i roto i te mau mahana tamataraa o te exodo, e i roto atoa i te medebara. Ia faito ratou i te aroha o te Atua i roto i ta’na mau fafauraa e, e mea nahea te mau ati i mairi o te mau tamataraa mauiui i mono ai i te parahiraa o te mau haamaitairaa i ni’a i to’na nunaa; ia faaapî i ta ratou mau fafauraa, ma te ti’aturi hohonu e te aueue ore i te maitai e te aroha o te Fatu. E mea ti’a i te taata tataitahi ia haapii i teie haapiiraa, e ia nenei i te reira i roto i to’na varua ma te faahohonu e ma te haapapu ia ore oia ia faatea ê ia’na i te ite i te here o te Atua, noa’tu e, e ti’a mai te pohe e o hade i ni’a i to’na e’a.

E mea maitai te Atua; eita roa ta’na mau fafauraa e iri; a ti’aturi noa i to’na maitai e to’na aroha, e paratu tumu ti’a te reira. No reira, a tu’u i to tatou ti’aturi i roto Ia’na.¹⁵

Te vai nei te mau taata o te parau nei e, e melo paruparu te vahine. Aita roa vau e ti’aturi i te reira. I te pae tino, e paha; tera râ, i te pae varua, i te pae morare, i te pae ekalesia e i te pae faaroo, o vai te melo tane e aifaito i te hoê vahine o tei ti’aturi papu? Ua rava’i te faaroo o Daniela no te paturu ia’na i roto i te apoo o te liona teie râ, ua ite mata te mau vahine i ta ratou mau tamarii tamaroa i te pihaehae-raa-hia e te ati e o tei farii i te mau opuaraa haamauiui taehae a satane, no te mea ua ti’aturi ratou. Ua hinaaro tamau ratou i te faatusia, e ua hau a’e ratou i te mau melo tane aueue ore, paieti, haapao maitai e te faaroo.¹⁶

Te itoito o te faaroo, o te ti’a papuraa ïa i mua i te patoiraa, e i muri mai i to outou raveraa i te mea e nehenehe ia outou ia rave. Te itoito o te faaroo o te itoito ïa o te haereraa i mua. Te taata e te vaira teie huru mo’a ia’na, e haere tamau ïa oia i mua; eita ratou e faatiahia ia faaea faahou mai te mea e hinaaro ratou. E ere ratou i te mau hamaniraa o to ratou iho puai e o to ratou iho paari; ei mau mauihaa ratou no te hoê ture teitei e te hoê opuaraa mo’a.¹⁷

Na roto i te faaroo, e nehenehe tatou ia tomo i roto i te faaearaa hau o te Atua.

Ua parau te mau peropheta i tahito râ no ni’a i te “tomoraa i roto i to te Atua faaearaa” [a hi’o Alama 12:34; PH&PF 84:23–24]; eaha ïa te auraa? I roto i to’u feruriraa, o te tomoraa ïa i roto i te ite e te here o te Atua, te faaroo i roto i ta’na opuaraa e i roto i ta’na faanahoraa, ia taa ia tatou e, tei ni’a tatou i te e’a papu e aita tatou e imi nei i te tahi atu mea, aita tatou i aueue i te mata’i o te parau haapiiraa êe e aore râ, i te haavare a te taata nei, e i te paari o te mau peu faahemaraa o te haavare ra. Ua ite tatou e, no ô mai te parau haapiiraa i te Atua, e eiaha tatou e ui i te hoê noa’tu taata no te reira; no ratou iho to ratou mau mana’o, to ratou iho mau feruriraa e to ratou mau hape. Te taata o tei tapae i te reira faito o te faaroo i te Atua, tei iriti i te feaa e te taiâ i roto ia’na, ua “ô ïa i roto i to te Atua faaearaa.”¹⁸

Mai te mea aita e tauturu a te Varua Maitai, aita roa e taata e ite i te mau hinaaro o te Atua e aore râ, o Iesu te Mesia—te Faaora o te ao e aore râ, te e’a o ta’na e titau ra, te ohipa o ta’na e rave e aore râ, to’na faaroo, e faariihia ïa te reira e te Atua, na te reira e haapapu ia’na i to’na ora mure ore, o te horo’a hau a’e te reira i te mau horo’a atoa a te Atua.¹⁹

Eita te hoê taata e nehenehe ia farii i te horo’a o te ora mure ore maoti râ, ia titau oia i te faatusia i te mau tao’a atoa o te ao nei. Eita tatou e nehenehe ia rave i te reira mai te mea e, e vaiiho tatou i to tatou here ia faatumuhia i ni’a i te mau tao’a o te ao nei.

… Tera râ, mai te mea e haapue tatou i ta tatou mau tao’a i ni’a i te ra’i; mai te mea e faa’ere tatou i to tatou here i te mau tao’a o teie ao, e a parau ai tatou i te Fatu to tatou Atua e, “E tau Metua, ia tupu râ to oe hinaaro eiaha to’u,” [a hi’o Luka 22:42]] i reira e haapaohia ai te hinaaro o te Atua i te fenua nei mai tei te ao atoa ra, e e faati’ahia te basileia o te Atua i roto i to’na puai e to’na hanahana. E ru’uru’uhia te hara e o Satane atoa e e ti’avaruhia mai ni’a’tu i te fenua nei, e tupu te reira mai te mea e rae’ahia ia tatou te faito o te reira huru varua e te faaroo.²⁰

Mana’o Tauturu i te Haapiiraa

Eaha te faaroo? No te aha te faaroo i te Atua e ia Iesu Mesia i riro ai ei “niu no ta tatou ekalesia”?
Eaha te mea o ta tatou i maramarama no ni’a i te Atua e ia Iesu Mesia o te tauturu ia tatou ia roaa te faaroo i roto ia raua? No te aha e mea ti’a i to tatou faaroo ia niuhia i ni’a i te parau mau? (A hi’o Alama 32:21.)
Nahea e roaa ai te faaroo? Nahea tatou ia haamaitai e ia faaitoito i to tatou faaroo?
Nahea tatou ia tauturu i ta tatou mau tamarii ia faarahi i to ratou faaroo i roto ia Iesu Mesia?
No te aha e mea ti’a i te Feia Mo’a i te Mau Mahana Hopea Nei ia roaa te faaroo i roto i te “parau ti’a e te aroha papu” o te Fatu e i te “mana faaora o ta’na evanelia” no te faaoromai i te enemi?
Eaha te mea o ta tatou e haapii no ni’a i te faaroo na roto i te mau hi’oraa maitai o Aberahama, Ioba, te feia faatere e te mau melo matamua o teie tau tu’uraa evanelia? Mea nahea te faaroo i te Atua i te haapuairaa e i te haamaitaira ia outou i roto i to outou mau iteraa rau fifi roa?
No te aha e mea faufaa no tatou ia ite e, te hororaa o ta tatou e tamau nei “ua au ia i te hinaaro o te Atua”? Nahea tatou e ite ai i te reira?
Eaha te “itoito o te faaroo,” e nahea te reira ia tupu maitai i roto i to tatou oraraa o te mau mahana atoa?
No te aha e mea ti’a ia tatou ia faatusia i te mau tao’a atoa o te ao nei ia roaa te horo’araa o te ora mure ore?
Eaha te auraa o te parau ia tomo i roto i te faaearaa o te Atua? Nahea tatou ia tomo i roto i te reira faaearaa i teie nei?