ការការពារខ្លួនយើងប្រឆាំងនឹងគោលលទ្ធិខុសឆ្គងនៃថ្ងៃចុងក្រោយ

សេចក្ដីផ្ដើម

បន្ថែមលើការបង្រៀន « ភាពពោរពេញនៃដំណឹងល្អនៃព្រះយេស៊ូវគ្រីស្ទ » ( គ. និង ស. ២០:៩ ) ព្រះគម្ពីរមរមនធ្វើឲ្យអ្នកដើរតាមព្រះគ្រីស្ទមានភាពរឹងមាំ ដើម្បីទាស់នឹងការបង្រៀន និងគំនិតខុសឆ្គង ដែលមានជាទូទៅក្នុងថ្ងៃចុងក្រោយ ។ របៀបមួយដែលវាសម្រេចបានការណ៍នេះ គឺដោយការបង្ហាញឲ្យឃើញនូវមារសត្រូវរបស់ព្រះគ្រីស្ទ និងការស្គាល់គោលលទ្ធិខុសឆ្គងដែលពួកគេបានពង្រីកឲ្យរាលដាល ។ ពេលសិស្សសិក្សាពីដំណើររឿងនានានៃអ្នកបង្រៀនខុសឆ្គងនៅក្នុងព្រះគម្ពីរមរមន ពួកគេនឹងរៀនញែកឃើញរវាងសេចក្ដីពិតនៃដំណឹងល្អ និងគំនិតខុសឆ្គងនៃលោកិយ ។

ការអានពីសាវតា

ដាល្លិន អេក អូក « Be Not Deceived » Ensign ឬ Liahona ខែ វិច្ឆិកា ឆ្នាំ ២០០៤ ទំព័រ ៤៣–៤៦ ។
ដាល្លិន អេក អូក « As He Thinketh in His Heart » ( ល្ងាចមួយជាមួយអែលឌើរ ដាល្លិន អេក អូក ថ្ងៃទី ៨ ខែ កុម្ភៈ ឆ្នាំ ២០១៣ ), lds.org/broadcasts ។
នែល អិល អាន់ឌើរសិន « Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ១៨–២១ ។

យោបល់សម្រាប់ការបង្រៀន

នីហ្វៃទី២ ២៨:៣–៩, ១២–១៥, យ៉ាកុប ៧:១–១២, អាលម៉ា ១:២–៦, ៣០:១២–១៨, ៣៩–៤៤, យ៉ូសែប ស្ម៊ីធ—ម៉ាថាយ ១:២២

ការស្គាល់ និងការការពារខ្លួនយើងទាស់នឹងគោលលទ្ធិខុសឆ្គង

សូមឲ្យសិស្សពិចារណាពីគំនិតខុសៗគ្នាដែលមាននៅក្នុងពិភពលោក អំពីបញ្ហាដូចតទៅនេះ ៖ សេចក្ដីពិតដែលត្រូវបានប្រទានដោយព្រះទល់នឹងសាបេក្ខនិយមខាងសីលធម៌ ( គំនិតដែលថាពុំមានត្រូវ ឬខុសជាទូទៅទាំងអស់នោះទេ ) សេរីភាពខាងសាសនា ទល់នឹង សិទ្ធិនៃក្រុមដែលមានចំណាប់អារម្មណ៍ពិសេស និង សិទ្ធិដើម្បីរំលូតកូន ទល់នឹង សិទ្ធិដើម្បីមានជីវិតរស់នៅ ។ នៅពេលអ្នកពិភាក្សាពីបញ្ហាទាំងនេះ សូមគិតពីការសរសេរវានៅលើក្តារខៀន ។ សូមទុកពេលឲ្យសិស្សពីរបីនាទី ដើម្បីពិភាក្សាពីមូលហេតុដែលយើងត្រូវតែប្រុងប្រយ័ត្ន ក្នុងការក្រសោបយកគំនិតត្រឹមត្រូវនានា ។

សូមពន្យល់ថា នៅជិតចុងបញ្ចប់នៃជីវិតទ្រង់ ព្រះយេស៊ូវគ្រីស្ទបានព្យាករអំពីស្ថានភាពខាងវិញ្ញាណដ៏គ្រោះថ្នាក់ដែលនឹងមាននៅក្នុងថ្ងៃចុងក្រោយ ។ សូមអញ្ជើញសិស្សម្នាក់ឲ្យអាន យ៉ូសែប ស្ម៊ីធ—ម៉ាថាយ ១:២២ ឮៗ ។ ( អ្នកអាចនឹងចង់ចង្អុលបង្ហាញថា ឃ្លា « អ្នកជម្រើសដោយផ្អែកទៅតាមសេចក្ដីសញ្ញា » សំដៅដល់សមាជិកទាំងឡាយនៃសាសនាចក្រនៃព្រះយេស៊ូវគ្រីស្ទ ។

តើការគំរាមកំហែងអ្វីខ្លះ ដែល « ព្រះគ្រីស្ទក្លែង » និង « ហោរាក្លែង » បង្កើតជាបញ្ហានៅក្នុងជំនាន់របស់យើង ?

សូមបង្ហាញ ហើយអានសេចក្តីថ្លែងការណ៍ខាងក្រោមនេះ ដែលថ្លែងដោយប្រធាន អ៊ែសរ៉ា ថាហ្វ ប៊ែនសឹន ( ឆ្នាំ ១៨៩៩–១៩៩៤ ) ៖

រូបភាព
ប្រធាន អ៊ែសរ៉ា ថាហ្វ ប៊ែនសឹន

« ព្រះគម្ពីរមរមនបង្ហាញឲ្យឃើញនូវមារសត្រូវរបស់ព្រះគ្រីស្ទ ។ ព្រះគម្ពីរនេះផ្ចាញ់ផ្ចាលគោលលទ្ធិក្លែងក្លាយទាំងឡាយ ហើយបង្ក្រាបការទាស់ទែងគ្នា ។ ( សូមមើល នីហ្វៃទី២ ៣:១២ ) ។ ព្រះគម្ពីរនេះពង្រឹងពួកអ្នកដើរតាមដោយរាបសារបស់ព្រះគ្រីស្ទ ប្រឆាំងនឹងគម្រោងការ យុទ្ធសាស្រ្ត និងគោលលទ្ធិដ៏អាក្រក់របស់អារក្សនៅសម័យរបស់យើង ។ បែបផែននៃការក្បត់សាសនានៅក្នុងព្រះគម្ពីរមរមន គឺស្រដៀងគ្នានឹងបែបផែនដែលយើងមាននៅពេលបច្ចុប្បន្ននេះដែរ ។ ជាមួយនឹងព្រះតម្រិះដ៏ឥតព្រំដែនរបស់ទ្រង់ ព្រះបានធ្វើឲ្យព្រះគម្ពីរមរមន លេចចេញជារូបរាងឡើង ដើម្បីឲ្យយើងអាចឃើញកំហុស ហើយចេះដឹងពីរបៀបតយុទ្ធនឹងគំនិតនៃការអប់រំ នយោបាយ សាសនា និងទស្សនៈវិជ្ជាដែលខុសឆ្គងនាសម័យយើងនេះ » ( Teachings of Presidents of the Church: Ezra Taft Benson [ ឆ្នាំ ២០១៤ ] ទំព័រ ១៣២ ) ។

តើសេចក្ដីថ្លែងការណ៍នេះបង្រៀនអ្វី អំពីរបៀបដែលការសិក្សាព្រះគម្ពីរមរមន អាចការពារយើងពីការបង្រៀនខុសឆ្គង ? ( សូមប្រាកដថា សិស្សរកឃើញគោលការណ៍នេះ ៖ ពេលយើងសិក្សាព្រះគម្ពីរមរមន ហើយអនុវត្តការបង្រៀនរបស់វា យើងត្រូវបានពង្រឹងដើម្បីទាស់នឹងអារក្ស និងការបង្រៀន និងគំនិតខុសឆ្គងនៃសម័យរបស់យើង ) ។
តើមានផលប្រយោជន៍អ្វី នៅក្នុងការរៀនអំពីយុទ្ធសាស្ត្ររបស់សាតាំង ពីមុនពេលដែលអ្នកជួបវាពិតនោះ ?

សូមឲ្យសិស្សបីបួននាក់ប្ដូរវេនគ្នាអានឮៗចេញពី នីហ្វៃទី២ ២៨:៣-៩ ខណៈដែលសិស្សក្នុងថ្នាក់រកមើលពីគំនិតខុសឆ្គងដែលនីហ្វៃបានមានប្រសាសន៍ថា នឹងមានជាទូទៅក្នុងជំនាន់យើងនេះ ។ អ្នកអាចលើកទឹកចិត្តដល់សិស្សឲ្យគូសចំណាំពាក្យ និងឃ្លាសំខាន់ៗ ។ សូមអញ្ជើញសិស្សឲ្យចែកចាយអ្វីដែលពួកគេបានរកឃើញ ហើយសួរ ៖

តើអ្វីខ្លះជាឧទាហរណ៍អំពីគំនិតខុសឆ្គងនាសម័យទំនើបនេះ ? ( ឧទាហរណ៍នានាអាចរួមមានដូចតទៅនេះ ៖ សាបេក្ខនិយមខាងសីលធម៌, ការជឿដែលថា ដោយសារសេចក្ដីស្រឡាញ់ដ៏មហិមារបស់ព្រះសម្រាប់យើង នោះទ្រង់នឹងមិនដាក់ទោសទៅលើអំពើបាប, និងការប្រកាន់ទាស់នឹងពួកគ្រីស្ទាន ដែលជាញឹកញាប់ត្រូវបានមើលឃើញថាជាអ្នកកាន់សាសនាងងឹតងងល់ ឬហួសហេតុ ) ។

ដើម្បីជួយឆ្លើយនឹងសំណួរនេះ សូមចែកចាយសេចក្ដីថ្លែងការណ៍ខាងក្រោមនេះដោយអែលឌើរ អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ ៖ សូមឲ្យសិស្សស្ដាប់រកការបង្រៀនខុសឆ្គងដែលពួកគេបានជួបប្រទះ ។

រូបភាព
អែលឌើរ អិម រ័សុល បាឡឺដ

« ពួកព្យាការីក្លែងក្លាយ និងពួកគ្រូបង្រៀនក្លែងក្លាយ គឺជាពួកអ្នកដែលប្រកាសថា ព្យាការី យ៉ូសែប ស្ម៊ីធ ជាអ្នកបោកប្រាស់ចម្លងសំណៅ ពួកគេមានការសង្ស័យថា ការនិមិត្តដំបូងជាបទពិសោធន៍ដ៏ពិតមួយ ឬយ៉ាងណា ។ ពួកគេប្រកាសថា ព្រះគម្ពីរមរមន និងកិច្ចការផ្សេងៗទៀតដែលមានចែងក្នុងសាសនា ពុំមែនជាបញ្ជីព្រះគម្ពីរពីបុរាណនោះទេ ។ ពួកគេក៏ព្យាយាមបំលែងធម្មជាតិនៃក្រុមព្រះផងដែរ ហើយពួកគេបដិសេធថា ព្រះបានប្រទាន និងបន្តប្រទានវិវរណៈនៅសព្វថ្ងៃនេះ ដល់ព្យាការីរបស់ទ្រង់ដែលត្រូវបានតែងតាំង និងគាំទ្រ ។ …

« ប្រហែលអ្វីដែលហិនហោចខ្លាំងបំផុត គឺពួកគេបដិសេធនឹងការមានព្រះជន្មរស់ឡើងវិញ និងដង្វាយធួនរបស់ព្រះគ្រីស្ទ ដោយប្រកែកថា គ្មានព្រះឯណាអាចសង្គ្រោះយើងបានឡើយ ។ ពួកគេបដិសេធនូវសេចក្ដីត្រូវការដើម្បីមានព្រះអង្គសង្គ្រោះមួយអង្គ ។ និយាយឲ្យខ្លីទៅ ពួកអ្នកបង្ខូចទាំងនេះ ព្យាយាមបកស្រាយគោលលទ្ធិនៃសាសនាចក្រជាថ្មី ដើម្បីឲ្យសមទៅនឹងទស្សនៈប្រឌិតទុកមុនរបស់ពួកគេផ្ទាល់ ហើយនៅក្នុងដំណើរការនោះ ក៏បដិសេធព្រះគ្រីស្ទ និងតួនាទីជាព្រះមេស៊ីរបស់ទ្រង់ ។

« ពួកព្យាការីក្លែងក្លាយ និងគ្រូបង្រៀនក្លែងក្លាយក៏ជាពួកអ្នកដែលព្យាយាមផ្លាស់ប្ដូរគោលលទ្ធិដែលព្រះប្រទាន និងគោលលទ្ធិដែលផ្អែកលើព្រះគម្ពីរ ដែលការពារភាពស័ក្ដិសិទ្ធិនៃអាពាហ៍ពិពាហ៍ លក្ខណៈដ៏ទេវភាពនៃក្រុមគ្រួសារ និងគោលលទ្ធិចាំបាច់សម្រាប់សីលធម៌ផ្ទាល់ខ្លួន ។ ពួកគេគាំទ្រដល់ការផ្ដល់និយមន័យជាថ្មីដល់សីលធម៌ ដើម្បីធ្វើឲ្យសមដល់អំពើកាមគុណ ផិតក្បត់ និងទំនាក់ទំនងភេទដូចគ្នា » ( « Beware of False Prophets and False Teachers » Ensign ខែ វិច្ឆិកា ឆ្នាំ ១៩៩៩ ទំព័រ ៦៣–៦៤ ) ។

សូមអញ្ជើញសិស្សឲ្យស្រាវជ្រាវ នីហ្វៃទី២ ២៨:១២-១៥ ដោយស្វែងរកលទ្ធផលទាំងឡាយនៃការជឿលើការបង្រៀនខុសឆ្គងទាំងនេះ ។

តើអ្វីខ្លះ ជាលទ្ធផលមួយចំនួននៃការជឿលើការបង្រៀន និងគំនិតខុសឆ្គងទាំងនោះ ?

សូមបង្ហាញសេចក្ដីថ្លែងការណ៍ខាងក្រោមពីអែលឌើរ អូលីសេស សូរ៉េស នៃគណៈប្រធានពួកចិតសិបនាក់ ហើយសូមឲ្យសិស្សម្នាក់អានវាឮៗ ៖

រូបភាព
អែលឌើរ អូលីសេស សូរ៉េស

« យើងមិនអាចអនុញ្ញាតឲ្យខ្លួនយើង ត្រូវបោកបញ្ឆោតដោយសារដំណឹងដ៏មានប្រជាប្រិយ ដែលពិភពលោកងាយនឹងទទួល ហើយដែលជំទាស់នឹងគោលលទ្ធិ និងគោលការណ៍ពិត នៃដំណឹងល្អរបស់ព្រះយេស៊ូវគ្រីស្ទនោះឡើយ ។ សារដំណឹងរបស់លោកិយជាច្រើន គឺពុំតំណាងអ្វីក្រៅពីការព្យាយាមឲ្យសង្គមយើង ដោះសារចំពោះអំពើបាបនោះឡើយ » ( « Yes, We Can and Will Win! » Ensign ឬ Liahona ខែ ឧសភា ឆ្នាំ ២០១៥ ទំព័រ ៧៥ ) ។

តើអែលឌើរ សូរ៉េស បានមានប្រសាសន៍ថា អ្វីទៅជាគោលលបំណងនៃសារដំណឹងដ៏មានប្រជាប្រិយភាពជាច្រើននោះ ដែលជំទាស់នឹងដំណឹងល្អនៃព្រះយេស៊ូវគ្រីស្ទ ? ( សូមជួយសិស្សឲ្យរកឃើញសេចក្តីពិតនេះ ៖ សាតាំងប្រើប្រាស់ការបង្រៀនក្លែងក្លាយ ដើម្បីទាក់ទាញចិត្តយើងឲ្យប្រព្រឹត្តអំពើបាប ។ អ្នកអាចយោងទៅ អាលម៉ា ៣០:៥៣ សម្រាប់ព័ត៌មានបន្ថែមទៀតអំពីសេចក្ដីពិតនេះ ) ។

សូមចែកសិស្សជាបីក្រុម ។ សូមសរសេរវគ្គបទគម្ពីរដូចតទៅនេះដាក់លើក្ដារខៀន ហើយចាត់ឲ្យក្រុមនីមួយៗ សិក្សាវគ្គបទគម្ពីរមួយ ៖ យ៉ាកុប ៧:១–៧, អាលម៉ា ១:២–៦ ឬ អាលម៉ា ៣០:១២–១៨ ។ សូមឲ្យសិស្សរកមើលការបង្រៀនក្លែងក្លាយមួយចំនួនដែលបានបង្រៀនដោយសេរេម នីហូរ និងកូរីហូរ ហើយឲ្យសរសេរវានៅលើក្ដារខៀន ខាងក្រោមចំណងជើងត្រឹមត្រូវ ។

សេរេម ( យ៉ាកុប ៧:១-៧ )

នីហូរ ( អាលម៉ា ១:២-៦ )

កូរីហូរ ( អាលម៉ា ៣០:១២-១៨ )

តើអ្នកធ្លាប់បានឃើញការបង្រៀន និងគំនិតខុសឆ្គង ដូចដែលមានសរសេរនៅលើក្ដារខៀននេះ ជះឥទ្ធិពលលើសមាជិកសាសនាចក្រនៅសព្វថ្ងៃនេះយ៉ាងដូចម្ដេចខ្លះ ?

សូមអញ្ជើញសិស្សឲ្យប្រៀបធៀប យ៉ាកុប ៧:៥, ៨–១២ និង អាលម៉ា ៣០:៣៩–៤៤ ដើម្បីឃើញពីអ្វីដែលពង្រឹងដល់យ៉ាកុប និងអាលម៉ា ទាស់នឹងការបង្រៀនក្លែងក្លាយរបស់សេរេម និងកូរីហូរ ។ ( កំណត់សម្គាល់ ៖ ការប្រៀបធៀបគឺជាជំនាញការសិក្សាព្រះគម្ពីរមួយ ។ ការកត់ចំណាំពីភាពដូចគ្នា ឬខុសគ្នា « រវាងការបង្រៀន មនុស្ស ឬព្រឹត្តិការណ៍ ដែលអាចនាំសេចក្តីពិតនៃដំណឹងល្អឲ្យមានការផ្ដោតកាន់តែខ្លាំងឡើង » [ ការបង្រៀន និងការរៀនដំណឹងល្អ ៖ ក្បួនខ្នាតសម្រាប់គ្រូបង្រៀន និងអ្នកដឹកនាំថ្នាក់សិក្ខាសាលា និង ថ្នាក់វិទ្យាស្ថានសាសនា ( ឆ្នាំ ២០១២ ) ទំព័រ ២២ ] ) ។

តើអ្វីដែលបានពង្រឹងយ៉ាកុប និងអាលម៉ាទាស់នឹងការបង្រៀនក្លែងក្លាយ ? ( ចម្លើយអាចរួមមានដូចតទៅនេះ ៖ បទពិសោធន៍ខាងវិញ្ញាណពីមុនៗមក ចំណេះដឹងអំពីព្រះគម្ពីរ ចំណេះដឹងដែលទទួលបានពីព្រះវិញ្ញាណបរិសុទ្ធ និងទីបន្ទាល់អំពីព្រះគ្រីស្ទ ) ។
តើគោលការណ៍មួយណា ដែលយើងអាចរៀនពីការឆ្លើយតបរបស់យ៉ាកុប និងអាលម៉ា ចំពោះការបង្រៀនក្លែងក្លាយទាំងនេះ ? ( សូមជួយសិស្សឲ្យរកឃើញគោលការណ៍នេះ ៖ នៅពេលយើងពឹងផ្អែកលើទីបន្ទាល់របស់យើងអំពីព្រះគ្រីស្ទ ហើយស្វែងរកការដឹកនាំពីព្រះវិញ្ញាណបរិសុទ្ធ នោះយើងអាចយកឈ្នះទៅលើឧបសគ្គទាំងឡាយដែលកើតមានចំពោះសេចក្ដីជំនឿរបស់យើងបាន ) ។
តើទីបន្ទាល់របស់អ្នកបានពង្រឹងអ្នកឲ្យទាល់នឹងការបង្រៀនក្លែងក្លាយ និងការរិះគន់អំពីជំនឿរបស់អ្នកដោយរបៀបណា ?

សូមលើកទឹកចិត្តសិស្សឲ្យចែកចាយអ្វីដែលពួកគេកំពុងធ្វើ ដើម្បីការពារខ្លួនឯងពីការបង្រៀនក្លែងក្លាយ ដែលអាចកាត់បន្ថយសេចក្ដីជំនឿរបស់ពួកគេទៅលើព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ ។

នីហ្វៃទី២ ២៦:២៩, នីហ្វៃទី៣ ១៨:២៤, ២៧:២៧

ការដឹងពីគ្រោះថ្នាក់ទាំងឡាយនៃឧបាយកលផ្នែកសង្ឃ

សូមប្រាប់សិស្សថា គ្រោះថ្នាក់ខាងវិញ្ញាណមួយចំនួនចំពោះសាសនាចក្រ គឺមកពីសមាជិកនៅក្នុងសាសនាចក្រតែម្ដង ។ សូមឲ្យសិស្សម្នាក់អាន នីហ្វៃទី២ ២៦:២៩ ឮៗ ខណៈដែលសិស្សក្នុងថ្នាក់រកមើលគ្រោះថ្នាក់ខាងវិញ្ញាណដែលនីហ្វៃបានពិពណ៌នា ។

យោងតាមវគ្គបទគម្ពីរនេះ តើអ្វីជាឧបាយកលផ្នែកសង្ឃ ? ( ពេលមនុស្សផ្សាយដំណឹងល្អដើម្បីបានកិត្តិនាមផ្ទាល់ខ្លួន ឬបានទ្រព្យសម្បត្តិជាជាងសម្រាប់សុខុមាលភាពនៃបុត្រាបុត្រីព្រះ ) ។
តើនៅក្នុងរបៀបណាខ្លះ ដែលឧបាយកលផ្នែកសង្ឃ បង្កើតជាគ្រោះថ្នាក់ខាងវិញ្ញាណដល់សមាជិកសាសនាចក្រនោះ ?

ដើម្បីជួយឆ្លើយសំណួរទាំងនេះ សូមអញ្ជើញសិស្សម្នាក់ឲ្យអានសេចក្ដីថ្លែងការណ៍ខាងក្រោម ដោយអែលឌើរ អិម រ័សុល បាឡឺដ ៖

រូបភាព
អែលឌើរ អិម រ័សុល បាឡឺដ

« ចូរយើងប្រយ័ត្ននឹងព្យាការីក្លែងក្លាយ និងគ្រូបង្រៀនក្លែងក្លាយ ទាំងបុរស និងស្ត្រី ដែលជាអ្នកប្រកាសតែងតាំងខ្លួនឯងពីគោលលទ្ធិនៃសាសនាចក្រ ហើយដែលព្យាយាមផ្សាយដំណឹងល្អដ៏ខុសឆ្គងរបស់ពួកគេ និងទាក់ទាញអ្នកដើរតាមដោយការឧបត្ថម្ភនូវការរួបរួមគំនិត សៀវភៅ និងកំណត់ហេតុដែលមានអត្ថន័យប្រកួតនឹងគោលលទ្ធិគ្រឹះនៃសាសនាចក្រ ។ សូមប្រយ័ត្ននឹងអស់អ្នកទាំងឡាយណាដែលនិយាយ និងផ្សព្វផ្សាយផ្ទុយពីព្យាការីដ៏ពិតរបស់ព្រះ និងដែលបានញ៉ាំងឲ្យអ្នកដទៃប្ដូរសាសនាយ៉ាងសកម្មដោយមិនខ្វល់ពីសុខុមាលភាពដ៏អស់កល្បជានិច្ចរបស់អស់អ្នកទាំងឡាយដែលពួកគេបានទាក់ទាញចិត្តនោះ » ( « Beware of False Prophets and False Teachers » Ensign ខែ វិច្ឆិកា ឆ្នាំ ១៩៩៩ ទំព័រ ៦៣ ) ។

តើអ្នកអាចការពារខ្លួនឯង និងអ្នកផ្សេងទៀតពីឧបាយកលផ្នែកសង្ឃបានដោយរបៀបណា ?
តើអ្នកអាចការពារគោលលទ្ធិនៃសាសនាចក្រ ពេលអ្នកផ្សេងទៀតនិយាយផ្ទុយពីព្យាការីថ្ងៃចុងក្រោយរបស់ព្រះ យ៉ាងដូចម្ដេចដែរ ?

សូមប្រាប់ដល់សិស្សថា ព្រះអង្គសង្គ្រោះបានបង្រៀនពួកសិស្សរបស់ទ្រង់ ពីរបៀបដែលពួកអ្នកដែលជាតំណាងទ្រង់គួរបង្រៀន និងជះឥទ្ធិពលលើអ្នកដទៃទៀត ។ សូមឲ្យសិស្សអានដោយស្ងាត់ស្ងៀមពី នីហ្វៃទី៣ ១៨:២៤ និង នីហ្វៃទី៣ ២៧:២៧ ដោយស្វែងរករបៀបដែលការបម្រើដំណឹងល្អដ៏ពិតខុសគ្នាពីឧបាយកលផ្នែកសង្ឃ ។

តើការជំរុញ និងសកម្មភាពរបស់គ្រូបង្រៀន និងអ្នកដឹកនាំដ៏សុចរិត ខុសគ្នាពីការជំរុញ និងសកម្មភាពរបស់ពួកអ្នកដែលធ្វើខុសខាងឧបាយកលផ្នែកសង្ឃយ៉ាងដូចម្ដេចដែរ ? ( សិស្សគួររកឃើញសេចក្ដីពិតដូចតទៅនេះ ៖ ពួកសិស្សរបស់ព្រះយេស៊ូវគ្រីស្ទ ស្វែងរកបម្រើ និងផ្ដល់ពរដល់អ្នកផ្សេងទៀតដោយការចង្អុលបង្ហាញពួកគេឲ្យទៅរកទ្រង់ ) ។

មរ៉ូណៃ ៧:១២–១៧, អេធើរ ៤:១១–១២

ការញែកដឹងសេចក្តីពិត និងការណ៍ខុសឆ្គង

សូមឲ្យសិស្សគិតអំពីគ្រាមួយដែលមាននរណាម្នាក់សង្ស័យ ឬរិះគន់ការជឿអំពីសាសនារបស់ពួកគេ ។ សូមអញ្ជើញសិស្សម្នាក់ ឬពីរនាក់ចែកចាយដោយសង្ខេបពីបទពិសោធន៍របស់ពួកគេ ។

សូមអញ្ជើញសិស្សបីបួននាក់ប្ដូរវេនគ្នាអានឮៗពី មរ៉ូណៃ ៧:១២–១៧ និង អេធើរ ៤:១១–១២ ខណៈដែលសិស្សក្នុងថ្នាក់ផ្ទៀងតាម ដោយរកមើលរបៀបដើម្បីញែកឲ្យដឹងថាអ្វីមកពីព្រះអម្ចាស់ និងអ្វីមកពីអារក្ស ។

តើអ្នករៀនអ្វីពីវគ្គបទគម្ពីរនេះ អំពីរបៀបដែលយើងអាចវិនិច្ឆ័យរវាងល្អ និងអាក្រក់ ? ( សូមប្រាកដថា សិស្សយល់ពីគោលការណ៍ដូចតទៅនេះ ៖ អ្វីគ្រប់យ៉ាងដែលមកពីព្រះ អញ្ជើញយើងឲ្យធ្វើល្អ ជឿលើព្រះយេស៊ូវគ្រីស្ទ និងស្រឡាញ់ ហើយបម្រើព្រះ ) ។

សូមឲ្យសិស្សម្នាក់អានឮៗនូវសេចក្ដីថ្លែងការណ៍ខាងក្រោមដោយប្រធាន អ៊ែសរ៉ា ថាហ្វ ប៊ែនសឹន ៖

រូបភាព
ប្រធាន អ៊ែសរ៉ា ថាហ្វ ប៊ែនសឹន

« សូមឲ្យខ្ញុំប្រាប់ពីការសាកល្បងបី ដើម្បីចៀសវាងពីការដែលត្រូវគេបញ្ឆោត ។ …

« ១. តើបទដ្ឋានព្រះគម្ពីរនិយាយអ្វីខ្លះអំពីបញ្ហានេះ ? …

« ២. ការណែនាំទីពីរគឺ ៖ តើប្រធានសាសនាចក្រទាំងឡាយនៅថ្ងៃចុងក្រោយនេះត្រូវតែនិយាយអ្វីខ្លះស្តីពីប្រធានបទនោះ—ជាពិសេសប្រធានសាសនាចក្រដែលកំពុងរស់នៅ ? …

« ៣. ការល្បងទីបី និងចុងក្រោយ គឺព្រះវិញ្ញាណបរិសុទ្ធ—ការសាកល្បងនៃព្រះវិញ្ញាណ ។ … ការសាកល្បងនេះអាចមានប្រសិទ្ធិភាពពេញលេញបាន បើសិនសមត្ថភាពទំនាក់ទំនងរបស់អ្នកណាម្នាក់ជាមួយព្រះមានភាពស្អាតស្អំ និងគុណធម៌ និងមិនប្រឡូកប្រឡាក់ជាមួយនឹងអំពើបាប » ( នៅក្នុង Conference Report ខែ តុលា ឆ្នាំ ១៩៦៣ ទំព័រ ១៦–១៧ ) ។

ដើម្បីបញ្ចប់ សូមឲ្យសិស្សពិចារណាពីរបៀបដែលពួកគេអាចប្រើប្រាស់ព្រះគម្ពីរ ពាក្យសម្ដីរបស់ព្យាការី និងព្រះវិញ្ញាណបរិសុទ្ធកាន់តែប្រសើរ ដើម្បីឃើញពីការបង្រៀនក្លែងក្លាយ និងចៀសវាងពីការដែលត្រូវគេបោកបញ្ឆោត ។ អ្នកអាចលើកទឹកចិត្តពួកគេឲ្យសិក្សា យ៉ាកុប ៧, អាលម៉ា ១ និង អាលម៉ា ៣០ កាន់តែពិស្ដារ ហើយពិចារណាពីរបៀបដែលជំពូកទាំងនេះអាចជួយពួកគេបែងចែកកាន់តែច្បាស់រវាងសេចក្ដីពិត និងការណ៍ខុសឆ្គង ។

ការអានរបស់សិស្ស

នីហ្វៃទី២ ២៦:២៩, ២៨:៣–៩, ១២–១៥, យ៉ាកុប ៧:១–១២, អាលម៉ា ១:២–៦, ៣០:១២–១៨, ៣៩–៤៤, នីហ្វៃទី៣ ១៨:២៤, ២៧:២៧, អេធើរ ៤:១១–១២, មរ៉ូណៃ ៧:១២–១៧, យ៉ូសែប ស្ម៊ីធ—ម៉ាថាយ ១:២២ ។
នែល អិល អាន់ឌើរសិន « Spiritual Whirlwinds » Ensign ឬ Liahona ខែ ឧសភា ឆ្នាំ ២០១៤ ១៨–២១ ។