ការគោរពប្រតិបត្តិនាំមកនូវពរជ័យ

សេចក្ដីផ្ដើម

ការគោរពប្រតិបត្តិរបស់យើងតាមបញ្ញត្តិទាំងឡាយរបស់ព្រះ ជារបៀបមួយដែលយើងបង្ហាញពីការដឹងគុណរបស់យើងចំពោះពរជ័យដ៏អស្ចារ្យទាំងឡាយរបស់ទ្រង់ ។ ព្រះអង្គសង្គ្រោះជាគំរូដ៏ល្អឥតខ្ចោះអំពីការគោរពប្រតិបត្តិ ។ បំណងប្រាថ្នារបស់យើងដើម្បីគោរពប្រតិបត្តិ រីកចម្រើនឡើង ពេលដែលសេចក្ដីស្រឡាញ់របស់យើងចំពោះព្រះកើនឡើង ។ ការគោរពប្រតិបត្តិតាមព្រះបញ្ញត្តិទាំងឡាយ ធ្វើឲ្យព្រះអាចប្រទានជំនួយដែលយើងត្រូវការ ពេលយើងព្យាយាមសម្រេចនូវកិច្ចការដ៏ពិបាកៗ ។

ការអានពីសាវតា

ថូម៉ាស អេស ម៉នសន « Obedience Brings Blessings » Ensign ឬ Liahona ខែ ឧសភា ឆ្នាំ ២០១៣ ទំព័រ ៨៩–៩២ ។
រ៉ូបឺត ឌី ហែល « If Ye Love Me, Keep My Commandments » Ensign ឬ Liahona ខែ ឧសភា ឆ្នាំ ២០១៤ ទំព័រ ៣៥–៣៨ ។

យោបល់សម្រាប់ការបង្រៀន

នីហ្វៃទី១ ២:២–៤, ៩–១៣, ១៦, ១៩–២០, ម៉ូសាយ ២:២០–២៤, ៤១

តាមរយៈការគោរពប្រតិបត្តិរបស់យើង យើងបង្ហាញពីការដឹងគុណរបស់យើងចំពោះព្រះ ហើយទទួលបានពរជ័យកាន់តែធំធេងពីទ្រង់ ។

សូមបង្ហាញសេចក្ដីថ្លែងការណ៍ខាងក្រោមនេះដោយអែលឌើរ យ៉ូសែប ប៊ី វ៉ឺតលីន ( ឆ្នាំ ១៩១៧–២០០៨ ) ក្នុងកូរ៉ុមនៃពួកសាវកដប់ពីរនាក់ ហើយសូមឲ្យសិស្សម្នាក់អានវាឮៗ ៖

រូបភាព
អែលឌើរ យ៉ូសែប ប៊ី វ៉ឺតលីន

« តើយើងអាចថ្វាយសងនូវបំណុល ដែលយើងជំពាក់ព្រះអង្គសង្គ្រោះយ៉ាងដូចម្តេចទៅ ? ទ្រង់បានសងបំណុលមួយ ដែលទ្រង់ពុំបានជំពាក់សោះ ដើម្បីឲ្យយើងបានរួចពីបំណុលមួយ ដែលយើងមិនអាចសងរួចឡើយ ។ ដោយសារទ្រង់ នោះយើងនឹងរស់នៅជារៀងរហូត ។ ដោយសារតែដង្វាយធួនដ៏ឥតព្រំដែនរបស់ទ្រង់ នោះអំពើបាបរបស់យើងត្រូវបានសម្អាតចេញ ដែលអនុញ្ញាតឲ្យយើងដកពិសោធន៍នូវអំណោយទានដ៏មហិមាបំផុតនៃគ្រប់អំណោយទានទាំងឡាយនៃព្រះ ៖ គឺជាជីវិតដ៏នៅអស់កល្បជានិច្ច ។

« តើអំណោចបែបនោះ អាចមានស្លាកតម្លៃមួយទេ ? តើយើងអាចសងសំណងដល់អំណោយបែបនោះឬទេ ? » ( « Earthly Debts, Heavenly Debts » Ensign ឬ Liahona ខែ ឧសភា ឆ្នាំ ២០០៤ ទំព័រ ៤៣ ) ។

សូមទុកពេលឲ្យសិស្សមួយភ្លែត ដើម្បីពិភាក្សាពីចម្លើយដែលអាចមាន ចំពោះសំណួរចុងក្រោយដែលបានសួរដោយអែលឌើរ វ៉ឺតលីន ។ សូមលើកទឹកចិត្តសិស្សឲ្យរកមើលគោលការណ៍ និងគោលលទ្ធិនានា អំឡុងពេលរៀនមេរៀននេះ ដែលជួយឆ្លើយនឹងសំណួរនេះ ។

សូមអញ្ជើញសិស្សឲ្យអាន ម៉ូសាយ ២:២០-២៤ ដោយស្ងាត់ស្ងៀម ។ សូមឲ្យសិស្សរកមើលអ្វីដែលស្ដេចបេនយ៉ាមីន បានបង្រៀនអំពីរបៀបដែលយើងគប្បីមើលខ្លួនយើងនៅក្នុងទំនាក់ទំនងជាមួយនឹងព្រះ ។

តើអ្នកគិតថា ហេតុអ្វីបានជាស្ដេចបេនយ៉ាមីនបានបង្រៀនថា មិនថាយើងធ្វើអ្វីនោះទេ យើងនៅតែជា « អ្នកបម្រើដ៏ឥតប្រយោជន៍ » របស់ព្រះ ?
ទោះបីយើងមិនដែលអាចសងបំណុលរបស់យើងចំពោះព្រះ តើខគម្ពីរទាំងនេះប្រាប់យើងថា យើងអាចធ្វើអ្វីបានខ្លះ ដើម្បីបង្ហាញការដឹងគុណរបស់យើងចំពោះអ្វីៗទាំងអស់ដែលទ្រង់បានធ្វើសម្រាប់យើង ? ( សូមជួយសិស្សឲ្យរកឃើញនូវគោលការណ៍ដូចតទៅនេះ ៖ នៅពេលយើងទទួលស្គាល់បំណុលដ៏អស់កល្បជានិច្ចរបស់យើងចំពោះព្រះ នោះយើងមានបំណងប្រាថ្នាដើម្បីបម្រើទ្រង់ និងកាន់តាមព្រះបញ្ញត្តិរបស់ទ្រង់ ) ។

សូមប្រាប់សិស្សថា ដំណើររឿងមួយដ៏អស្ចារ្យនៅក្នុងព្រះគម្ពីរ ក្នុងចំណោមដំណើររឿងទាំងឡាយអំពីការគោរពប្រតិបត្តិដល់ព្រះ គឺមាននៅជំពូកដំបូងៗនៃព្រះគម្ពីរមរមន ដែលកត់ត្រាពីរបៀបដែលព្យាការីលីហៃ និងក្រុមគ្រួសាររបស់លោកបានឆ្លើយតប នៅពេលដែលពួកគេត្រូវបានស្នើដោយព្រះ ឲ្យធ្វើអ្វីដែលពិបាកខ្លាំងបំផុត ។ សូមឲ្យសិស្សម្នាក់អាន នីហ្វៃទី១ ២:២–៤ ឮៗ ។

ហេតុអ្វីវាអាចជាការពិបាកសម្រាប់ក្រុមគ្រួសារលីហៃ ក្នុងការគោរពតាមព្រះបញ្ញត្តិរបស់ព្រះ ដែលតម្រូវឲ្យចាកចេញពីក្រុងយេរូសាឡិម ?

សូមអញ្ជើញសិស្សឲ្យសិក្សា នីហ្វៃទី១ ២:៩-១៣, ១៦ ដោយរកមើលភាពខុសគ្នារវាងលក្ខណៈ និងឥរិយាបថរបស់លេមិន និងលេមយួល ជាមួយនឹងរបស់នីហ្វៃ ក្នុងការឆ្លើយតបទៅនឹងព្រះបញ្ញត្តិនេះ ។ ( កំណត់ចំណាំ ៖ សកម្មភាពនេះនឹងលើកទឹកចិត្តដល់សិស្សឲ្យអនុវត្តជំនាញសិក្សាព្រះគម្ពីរដ៏សំខាន់ គឺការប្រៀបធៀប និងការធ្វើឲ្យមានភាពផ្ទុយគ្នា ) ។

តើពាក្យ ឬឃ្លាណាខ្លះ ដែលពិពណ៌នាអំពីការឆ្លើយតបរបស់លេមិន និងលេមយួល ? ( ពួកគេរឹងរូស ពួកគេរអ៊ូរទាំ ហើយពួកគេពុំដឹងពីទំនាក់ទំនងនៃព្រះ ) ។
តើនីហ្វៃឆ្លើយតបយ៉ាងដូចម្ដេច ទៅនឹងព្រះបញ្ញត្តិដែលឲ្យចាកចេញពីក្រុងយេរូសាឡិម ? ( លោកបានបន្ទាបខ្លួន លោកមានបំណងប្រាថ្នាចង់ដឹងពីការណ៍ទាំងឡាយរបស់ព្រះ លោកមានសេចក្ដីជំនឿទៅលើពាក្យសម្ដីរបស់ឪពុកលោក ដែលជាព្យាការីម្នាក់ ហើយលោកបានអធិស្ឋាន ) ។
ហេតុអ្វីនីហ្វៃបានឆ្លើយតបទៅនឹងពាក្យសម្ដីរបស់ឪពុកលោក ខុសគ្នាពីរបៀបដែលពួកបងប្រុសលោកឆ្លើយតប ?

សូមទុកពេលឲ្យសិស្សមួយភ្លែត ដើម្បីសញ្ជឹងគិតថាតើពួកគេដូចជាលេមិន និងលេមយួលជាង ឬដូចជានីហ្វៃជាង ពេលដែលពួកគេត្រូវបានស្នើដោយព្រះអម្ចាស់ ឬអ្នកដឹកនាំនៃសាសនាចក្ររបស់ទ្រង់ ដើម្បីធ្វើអ្វីមួយដែលពិបាកនោះ ។

សូមអញ្ជើញសិស្សម្នាក់ឲ្យអាន នីហ្វៃទី១ ២:១៩–២០ ឮៗ ។ សូមឲ្យសិស្សក្នុងថ្នាក់ផ្ទៀងតាម ហើយរកមើលពីការសន្យារបស់ព្រះអម្ចាស់ចំពោះនីហ្វៃ ។

តើសេចក្ដីថ្លែងអ្វីនៅក្នុងខគម្ពីរទាំងនេះ ដែលសង្ខេបពីអ្វីដែលព្រះអម្ចាស់បានសន្យាដល់នីហ្វៃ ? ( សូមប្រាកដថា សិស្សយល់ពីគោលការណ៍ដូចតទៅនេះ ៖ ប្រសិនបើយើងកាន់តាមព្រះបញ្ញត្តិទាំងឡាយ នោះយើងនឹងចម្រើនឡើងនៅលើដែនដី ។ អ្នកអាចចង្អុលបង្ហាញថា នេះជាប្រធានបទមួយក្នុងចំណោមប្រធានបទដែលត្រូវបានលើកឡើងដដែលៗយ៉ាងញឹកញាប់បំផុត នៅក្នុងព្រះគម្ពីរមរមន ។ អ្នកអាចលើកទឹកចិត្តសិស្សឲ្យរកមើលរបៀបជាច្រើន ដែលប្រធានបទនេះត្រូវបានលើកឡើងដដែលៗ នៅពេលពួកគេសិក្សាព្រះគម្ពីរមរមន ) ។
តើគុណសម្បត្តិអ្វីខ្លះ ដែលព្រះអម្ចាស់បានកោតសរសើរនីហ្វៃ ? តើអ្នកគិតថា ហេតុអ្វីវាសំខាន់ សម្រាប់យើងម្នាក់ៗដើម្បីមានគុណសម្បត្តិទាំងនេះ នៅក្នុងទំនាក់ទំនងរបស់យើងជាមួយព្រះអម្ចាស់ ?
ថ្វីបើការគោរពប្រតិបត្តិ មិនតែងតែងទទួលនូវលទ្ធផលជាការចម្រើនខាងសាច់ឈាមក្ដី ប៉ុន្តែតើពរជ័យអ្វីខ្លះ ដែលយើងអាចរំពឹងថាជាលទ្ធផលនៃការគោរពប្រតិបត្តិដល់ព្រះអម្ចាស់ ? ( ដើម្បីជួយសិស្សឲ្យឆ្លើយនឹងសំណួរនេះ សូមគិតពីការអាន ម៉ូសាយ ២:៤១ ) ។

នីហ្វៃទី២ ៣១:៦–១០, ១៥–១៦, ម៉ូសាយ ១៥:៧, នីហ្វៃទី៣ ១១:១១, ១២:១៩–២០, ៤៨

ការធ្វើតាមគំរូរបស់ព្រះអង្គសង្គ្រោះ ក្នុងការគោរពប្រតិបត្តិ ជួយយើងឲ្យមកឯទ្រង់ និងព្រះវរបិតា

សូមបង្ហាញសេចក្ដីថ្លែងការណ៍ខាងក្រោមនេះដោយអែលឌើរ រ៉ូបឺត ឌី ហ៊ែល ក្នុងកូរ៉ុមនៃពួកសាវកដប់ពីរនាក់ ៖

រូបភាព
អែលឌើរ រ៉ូបឺត ឌី ហ៊ែល

« មេរៀនទាំងអម្បាលម៉ាន ដែលយើងរៀនចេញពីឆាកជីវិតរបស់ព្រះអង្គសង្គ្រោះ គ្មានមេរៀនណាមួយដែលច្បាស់ និងមានអំណាចជាងមេរៀននៃការគោរពប្រតិបត្តិឡើយ » ( « If Ye Love Me, Keep My Commandments » Ensign ឬ Liahona ខែ ឧសភា ឆ្នាំ ២០១៤ ទំព័រ ៣៥ ) ។

តើគំរូអ្វីខ្លះចេញពីឆាកជីវិតរបស់ព្រះអង្គសង្គ្រោះ ដែលបង្ហាញពីការគោរពប្រតិបត្តិរបស់ទ្រង់ ?

ដើម្បីជួយសិស្សបន្ថែមទៀត សូមពិភាក្សាសំណួរនេះ ហើយសុំពួកគេឲ្យអាន ម៉ូសាយ ១៥:៧ និង នីហ្វៃទី៣ ១១:១១ ដោយរកមើលអ្វីដែលព្រះយេស៊ូវមានព្រះឆន្ទៈនឹងធ្វើ ដើម្បីគោរពប្រតិបត្តិតាមព្រះវរបិតាទ្រង់ ។

សូមអញ្ជើញសិស្សឲ្យប្ដូរវេនគ្នាអាន នីហ្វៃទី២ ៣១:៦-១០, ១៥-១៦ ឮៗ ខណៈសិស្សក្នុងថ្នាក់រកមើលអ្វីដែលយើងអាចរៀនចេញពីគំរូរបស់ព្រះអង្គសង្គ្រោះ អំពីសារៈសំខាន់នៃការគោរពប្រតិបត្តិ និងពរជ័យដែលបានមកពីការគោរពប្រតិបត្តិ ។

តើយើងអាចរៀនអ្វីខ្លះ មកពីគំរូរបស់ព្រះអង្គសង្គ្រោះ អំពីសារៈសំខាន់នៃការគោរពប្រតិបត្តិ ? តើយើងអាចរៀនអ្វីខ្លះ ចេញពីគំរូរបស់ទ្រង់អំពីពរជ័យទាំងឡាយដែលបានមកពីការគោរពប្រតិបត្តិ ? ( សូមប្រាកដថា សិស្សរកឃើញគោលការណ៍នេះ ៖ ពេលយើងធ្វើតាមគំរូរបស់ព្រះអង្គសង្គ្រោះ អំពីការគោរពប្រតិបត្តិដល់ព្រះវរបិតាទ្រង់ នោះយើងនឹងបន្តនៅលើផ្លូវតូចចង្អៀត ដែលនាំទៅរកសេចក្ដីសង្គ្រោះ ) ។

សូមបង្ហាញសេចក្ដីថ្លែងការណ៍ខាងក្រោមនេះដោយអែលឌើរ រ៉ូបឺត ឌី ហែល ហើយសុំសិស្សម្នាក់ឲ្យអានវាឮៗ ៖

រូបភាព
អែលឌើរ រ៉ូបឺត ឌី ហែល

« ការគោរពប្រតិបត្តិដែលមានភាពចាស់ទុំខាងវិញ្ញាណ គឺ ‹ ការគោរពប្រតិបត្តិរបស់ព្រះអង្គសង្គ្រោះ › ។ ការគោរពប្រតិបត្តិនោះ ត្រូវបានជំរុញដោយសេចក្ដីស្រឡាញ់ដ៏ពិតចំពោះព្រះវរបិតាសួគ៌ និងព្រះរាជបុត្រាទ្រង់ ។ …សេចក្ដីស្រឡាញ់របស់យើងចំពោះព្រះអង្គសង្គ្រោះ គឺជាគន្លឹះដើម្បីគោរពប្រតិបត្តិដូចជាព្រះអង្គសង្គ្រោះ » ( « If Ye Love Me, Keep My Commandments » ទំព័រ ៣៦–៣៧ ) ។

ហេតុអ្វីសេចក្ដីស្រឡាញ់ចំពោះព្រះវរបិតាសួគ៌ និងព្រះយេស៊ូវគ្រីស្ទ គឺជា « គន្លឹះ » ដើម្បីគោរពប្រតិបត្តិតាមព្រះបញ្ញត្តិទាំងឡាយរបស់ទ្រង់ ?

សូមចង្អុលបង្ហាញថា ព្រះយេស៊ូវគ្រីស្ទដែលមានព្រះជន្មរស់ឡើងវិញ បានបង្រៀនពួកសាសន៍នីហ្វៃ អំពីគោលបំណងទាំងឡាយនៃការគោរពតាមព្រះបញ្ញត្តិទាំងឡាយ ។ សូមឲ្យសិស្សម្នាក់អាន នីហ្វៃទី៣ ១២:១៩-២០, ៤៨ ដោយស្ងាត់ស្ងៀម ដើម្បីរកមើលគោលបំណងទាំងនេះ ។

យោងតាមខទាំងនេះ តើព្រះអង្គសង្គ្រោះបានមានព្រះបន្ទូលថា អ្វីទៅជាមូលហេតុដែលយើងត្រូវបានប្រទានឲ្យនូវព្រះបញ្ញត្តិទាំងឡាយនេះ ? ( សិស្សគួរតែរកឃើញគោលការណ៍ដូចតទៅនេះ ៖ ពេលយើងមកឯព្រះគ្រីស្ទ ហើយកាន់តាមព្រះបញ្ញត្តិទាំងឡាយ នោះយើងអាចក្លាយកាន់តែដូចជាទ្រង់ និងព្រះវរបិតារបស់យើងដែលគង់នៅស្ថានសួគ៌ ហើយយើងនឹងត្រូវបានសង្គ្រោះ ) ។
តើការគោរពប្រតិបត្តិរបស់អ្នក បានជួយអ្នកឲ្យមកឯព្រះអង្គសង្គ្រោះតាមរបៀបណាខ្លះ ?

សូមទុកពេលមួយភ្លែតឲ្យសិស្ស ដើម្បីសញ្ជឹងគិត អ្វីដែលពួកគេអាចធ្វើ ដើម្បីកាន់តែមានការគោរពដល់ព្រះបញ្ញត្តិទាំងឡាយរបស់ព្រះវរបិតាសួគ៌ ដើម្បីឲ្យពួកគេអាចក្លាយកាន់តែដូចជាទ្រង់ និងព្រះរាជបុត្រារបស់ទ្រង់ ។

នីហ្វៃទី១ ៣:៤–៧, ១៥–១៦, ៤:១–២, ៧:១២, ១៧:១–៣១, ១៨:១–៤

ព្រះអម្ចាស់ប្រទានជំនួយដល់ពួកអ្នកទាំងឡាយដែលគោរពប្រតិបត្តិ

សូមអញ្ជើញសិស្សឲ្យពិចារណាពីពេលមួយ ដែលការកាន់តាមព្រះបញ្ញត្តិជាក់លាក់មួយរបស់ព្រះ ហាក់ដូចជាពិបាក ឬពេលដែលការបំពេញការហៅបម្រើ ឬការចាត់តាំងមួយក្នុងសាសនាចក្រជួបនឹងឧបសគ្គ ។ សូមរំឭកសិស្សថា នីហ្វៃ និងពួកបងប្រុសរបស់លោកបានប្រឈមនឹងគ្រោះថ្នាក់ ហើយអាចទាំងស្លាប់ផង ពេលដែលព្រះបានបញ្ជាឲ្យពួកគាត់ត្រឡប់ទៅក្រុងយេរូសាឡិមវិញ ដើម្បីទៅយកផ្ទាំងលង្ហិននោះ ។ សូមឲ្យសិស្សម្នាក់អាននីហ្វៃទី១ ៣:៤-៧ ហើយរកមើលគោលការណ៍មួយ ដែលពួកគេបានរៀនចេញពីគំរូរបស់នីហ្វៃ ដែលអាចបង្កើនសមត្ថភាពផ្ទាល់ខ្លួនរបស់ពួកគេក្នុងការគោរពប្រតិបត្តិ ។

តើគោលការណ៍អ្វី ដែលយើងអាចរៀនចេញពីការឆ្លើយតបរបស់នីហ្វៃ ចំពោះព្រះបញ្ញត្តិដ៏លំបាករបស់ព្រះ ? ( សូមសរសេរគោលការណ៍ដូចតទៅនេះនៅលើក្តារខៀន ពេលដែលសិស្សរកវាឃើញ ៖ ប្រសិនបើយើងព្យាយាមធ្វើអ្វីដែលព្រះអម្ចាស់ដាក់បញ្ញត្តិ នោះទ្រង់នឹងរៀបចំផ្លូវមួយសម្រាប់យើង ដើម្បីសម្រេចបានការណ៍នោះ ) ។

ដើម្បីជួយសិស្សយល់ពីគោលការណ៍នេះ សូមសរសេរបទគម្ពីរយោងខាងក្រោមនេះនៅលើក្ដារខៀន ហើយទុកពេលឲ្យសិស្សស្រាវជ្រាវវា ដោយរកមើលពីរបៀបដែលនីហ្វៃបានឆ្លើយតប នៅពេលកំពុងព្យាយាមសម្រេចឲ្យបាននូវការណ៍ដ៏លំបាក ដែលលោកត្រូវបានបញ្ជាឲ្យធ្វើ ៖ នីហ្វៃទី១ ៣:១៥–១៦, ៤:១–២, ៧:១២ ។ បន្ទាប់ពីសិស្សចែកចាយនូវអ្វី ដែលពួកគេបានរកឃើញហើយ សូមពន្យល់ថា ក្រោយមក នីហ្វៃបានពិពណ៌នាពីរបៀបមួយចំនួន ដែលព្រះអម្ចាស់ជួយដល់ពួកអ្នកដែលកាន់តាមព្រះបញ្ញត្តិទាំងឡាយរបស់ទ្រង់ ។ សូមឲ្យសិស្សអាន នីហ្វៃទី១ ១៧:១–៤ ហើយរកមើលរបៀបទាំងឡាយដែលព្រះអម្ចាស់ជួយយើង ។ សូមឲ្យសិស្សគូសពណ៌ចំណាំផងដែរ នូវឃ្លារបស់នីហ្វៃដែលថា « ដូច្នេះហើយ ទើបយើងឃើញថា » ដែលត្រូវបានប្រើពេញក្នុងព្រះគម្ពីរមរមន ដើម្បីរៀបចំអ្នកអានឲ្យផ្ដល់នូវចំណាប់អារម្មណ៍ជាពិសេស ដល់ពាក្យពេចន៍ដែលមានបន្ទាប់ពីនោះទៀត ។

នៅពេលសិស្សចែកចាយចម្លើយរបស់ពួកគេ សូមសរសេរពាក្យពេចន៍ដូចតទៅនេះនៅលើក្ដារខៀន ៖

ចិញ្ចឹមបីបាច់

ពង្រឹង

ប្រទានមធ្យោបាយ

សូមអញ្ជើញសិស្សឲ្យចំណាយពេលពីរបីនាទី ដើម្បីមើលត្រួសៗនូវដំណើររឿងនៅក្នុង នីហ្វៃទី១ ១៧:៥-៣១; ១៨:១-៤ ដោយរកមើលគំរូនានានៃរបៀបដែលព្រះអម្ចាស់បានចិញ្ចឹមបីបាច់ ពង្រឹង ឬប្រទានធម្យោបាយសម្រាប់ក្រុមគ្រួសារលីហៃ ។

តើព្រះអម្ចាស់បានចិញ្ចឹមបីបាច់ ឬពង្រឹងដល់ក្រុមគ្រួសាររបស់លីហៃ តាមរបៀបណាខ្លះ ? តើទ្រង់បានប្រទានមធ្យោបាយដើម្បីជួយពួកគេដោយរបៀបណា ?
តើពរជ័យអ្វីខ្លះដែលត្រូវបានប្រទានដោយព្រះអម្ចាស់ដល់ក្រុមគ្រួសាររបស់លីហៃ ដែលស្រដៀងគ្នាទៅនឹងពរជ័យទាំងឡាយដែលយើងត្រូវការនាពេលសព្វថ្ងៃនេះ ?
តើពេលណាដែលអ្នកបានទទួលបទពិសោធន៍នៃជំនួយពីព្រះអម្ចាស់ តាមរបៀបមួយនៃរបៀបទាំងឡាយនេះ ពេលដែលអ្នកបានខំប្រឹងប្រែងដើម្បីគោរពប្រតិបត្តិដល់ទ្រង់ ?

សូមរំឭកសិស្សថា ពេលព្រះអម្ចាស់ស្នើយើងឲ្យមានការគោរពប្រតិបត្តិ នោះគឺដើម្បីទ្រង់អាចប្រទានដល់យើងនូវពរជ័យនៅក្នុងការខិតខំប្រឹងប្រែងរបស់យើង ដើម្បីក្លាយដូចជាទ្រង់ ។ សូមចែកចាយសេចក្ដីថ្លែងការណ៍ខាងក្រោមដោយប្រធាន ហារ៉ូល ប៊ី លី ( ឆ្នាំ ១៨៩៩-១៩៧៣ ) ៖

រូបភាព
ប្រធាន ហារ៉ូល ប៊ី លី

« ក្នុងចំណោមព្រះបញ្ញត្តិទាំងអស់របស់ព្រះ ព្រះបញ្ញតិមួយដែលសំខាន់បំផុត គឺជាព្រះបញ្ញត្តិមួយដែលអ្នកមានការពិបាកបំផុតក្នុងការកាន់តាមវានៅសព្វថ្ងៃនេះឯង ។ … ដាក់ព្រះបញ្ញត្តិនោះឲ្យត្រឹមត្រូវ ហើយបន្ទាប់មកអ្នកចាប់ផ្ដើមគោរពព្រះបញ្ញត្តិបន្ទាប់មួយទៀត ដែលពិបាកបំផុតសម្រាប់អ្នកដើម្បីគោរពតាម ។ នោះជារបៀបដើម្បីស្អាងខ្លួនអ្នកឡើង ដោយការរក្សាព្រះបញ្ញត្តិរបស់ព្រះ » (Teachings of Presidents of the Church: Harold B. Lee [ ឆ្នាំ ២០០០ ] ទំព័រ ៣០ ) ។

សូមអញ្ជើញសិស្សឲ្យគិតអំពីព្រះបញ្ញត្តិមួយ ដែលពួកគេឃើញថាមានការពិបាកយ៉ាងខ្លាំងដើម្បីគោរពប្រតិបត្តិតាម ។ សូមលើកទឹកចិត្តពួកគេឲ្យដាក់ផែនការមួយដើម្បីកាន់តែគោរពប្រតិបត្តិច្រើនជាងនេះ ដើម្បីកាន់តែមានភាពសក្ដិសមពេញលេញ ក្នុងការទទួលជំនួយពីព្រះអម្ចាស់ ។

ការអានរបស់សិស្ស

នីហ្វៃទី១ ២:១–២០, ៣:៤–៧, ១៥–១៦, ៤:១–២, ៧:១២, ១៧:១–៣១, ១៨:១–៤, នីហ្វៃទី២ ៣១:៦–១០, ១៥–១៦, ម៉ូសាយ ២:២០–២៤, ៤១, ១៥:៧, នីហ្វៃទី៣ ១១:១១, ១២:១៩–២០, ៤៨ ។
ថូម៉ាស អេស ម៉នសន « Obedience Brings Blessings » Ensign ឬ Liahona ខែ ឧសភា ឆ្នាំ ២០១៣ ទំព័រ ៨៩–៩២ ។