“Siope,” Ngaahi Talanoa ʻo e Fuakava Motuʻá (2021)
“Siope,” Ngaahi Talanoa ʻo e Fuakava Motuʻá
Siope 1–3; 19; 38–42
Siope
Ko e falala ki he ʻofa ʻa e ʻEikí
Ko ha tangata lelei ʻa Siope naʻe ʻofa ki he ʻEikí pea tauhi ʻEne ngaahi fekaú. Naʻá ne maʻu mo hono uaifí ha fānau ʻe toko 10, pea naʻá ne ma‘u ha ngaahi tākanga monumanu tokolahi mo e koloa lahi.
Na‘e tuku ‘e he ʻEikí ke ʻahiʻahiʻi ‘a e tui ʻa Siopé. Na‘e aʻusia ‘e Siope ha ngaahi meʻa faingata‘a.
ʻI ha ʻaho ʻe taha na‘e kaihaʻasi ‘a e tokolahi ʻo e fanga monumanu ‘a Siopé. Kimui angé ne tutu ʻe ha afi ‘a e koloa kotoa pē ʻa Siopé pea ne tāmate‘i kotoa ai ʻene kau tamaioʻeikí mo e fanga monumanu kehé. Hili ia na‘e holoki ʻe ha afā e fale ʻo e foha ʻo Siopé. Na‘e ʻi loto e fānau ʻa Siopé, pea ne nau mate kotoa ai. Na‘e ʻikai ke ʻi ai ha meʻa ʻa Siope mo hono uaifí ʻe toe ka ko ʻena moʻui leleí pē.
Na‘e loto-mamahi ʻa Siope mo hono uaifí. Naʻe mole e me‘a kotoa meiate kinaua, naʻa mo ‘ena fānaú. Ka na‘e kei tui pē ʻa Siope ki he ʻEikí. Na‘e ʻikai ke ne tukuaki‘i ʻa e ‘Eikí ki he meʻa na‘e hokó.
Hili ia naʻe puke lahi ‘aupito ʻa Siope. Naʻe ‘ufiʻufi ʻa hono sinó ‘e ha ngaahi pala fakamamahi lahi. Na‘e fifili ʻa Siope mo hono uaifí pe ko e hā ne hoko ai ‘a e ngaahi meʻa kovi kotoa ko ʻení.
Naʻe folofola e ʻEikí kia Siope pea fakahā kiate ia ʻa e māmaní, ko e ngaahi fetu‘ú, mo e ngaahi meʻa moʻui kotoa pē. Na‘e akoʻi ‘e he ʻEikí kia Siope ha lēsoni mahuʻinga. Na‘e fakatupu e ngaahi me‘a kotoa pē ke tokoni ki he fānau ʻa e Tamai Hēvaní ke nau ako fekau‘aki mo Hono ʻAlo ko Sīsū Kalaisí pea muimui kiate Ia.
Naʻe fakatomala ʻa Siope mo ne kole ki he ‘Eikí ke fakamolemoleʻi ia ʻi heʻene veiveiuá. Na‘á ne palōmesi ke falala ki he ‘Eikí. Na‘e ʻafio‘i ʻe he ‘Eikí naʻe ʻofa ʻa Siope ‘iate Ia. Na‘á Ne fakamoʻui ‘a Siope pea tāpuekina ia ‘aki ha toe fānau tokolahi ange mo e koloa naʻe liunga ua hono lahí ʻi he meʻa naʻá ne maʻu kimuʻá.