“Fāmili ʻo ʻĀtama mo ʻIví,” Ngaahi Talanoa ʻo e Fuakava Motuʻá (2022)
“Fāmili ʻo ʻĀtama mo ʻIví,” Ngaahi Talanoa ʻo e Fuakava Motuʻá
Fāmili ʻo ʻĀtama mo ʻIví
Ko e fili ke muimui ʻi he ʻEikí
Hili e mavahe ʻa ʻĀtama mo ʻIvi mei he Ngoue ko ʻĪtení, naʻe hokohoko atu ʻena ako ki he palani ʻa e Tamai Hēvaní maʻanaua ʻi he māmaní. Naʻá na maʻu ha fānau tokolahi pea ne na akoʻi kinautolu ʻi he meʻa kotoa pē ne na ʻilo fekauʻaki mo e ʻEikí. Naʻe fili ha niʻihi ʻo e fānau ʻa ʻĀtama mo ʻIví ke talangofua ki he ʻEikí. Ka naʻe fili honau niʻihi ke talangataʻa.
Ne tauhi ʻe he fānau ʻa ʻĀtama mo ʻIví ha tohi ʻo e manatu. Ne nau hiki honau hisitōlia fakafāmilí ʻi he tohí. Ne nau tohi fekauʻaki mo e founga naʻe tokoniʻi ai kinautolu ʻe he ʻEikí.
Ko Keini mo ʻĒpelí ko ha toko ua kinaua ʻo e ngaahi foha ʻo ʻĀtama mo ʻIví. Naʻe ʻofa ʻa ʻĒpeli ʻi he ʻEikí peá ne fili ke muimui kiate Ia. Naʻe ʻikai talangofua ʻa Keini ki he ʻEikí. Naʻá ne fili ke angatuʻu.
Naʻe kei tupu pē e fāmili ʻo ʻĀtama mo ʻIví. Naʻe fāʻeleʻi mo ha kakai tokolahi ange. Ne nau maʻu kotoa ʻa e tauʻatāina ke fakahoko ha ngaahi filí. ʻI he fakalau ʻa e taimí, naʻe angatuʻu ha kakai ʻe niʻihi ki he ngaahi fekau ʻa e ʻEikí. Naʻe fekauʻi mai ʻe he ʻEikí ha kau palōfita ke akoʻi e kakaí ke fakatomala.