“Ko e Kau Tau ʻa Kitioné,” Ngaahi Talanoa ʻo e Fuakava Motuʻá (2022)
“Ko e Kau Tau ʻa Kitioné,” Ngaahi Talanoa ʻo e Fuakava Motuʻá
Ko e Kau Tau ʻa Kitioné
Ko e Falala ki he ʻEikí ʻi he taú
Naʻe tāpuekina e kakai ʻo ʻIsilelí ʻi ha ngaahi taʻu lahi. Ka naʻa nau fili ke talangataʻa ki he ʻEikí. Ke tokoni ke nau manatuʻi Iá, naʻe tuku ʻe he ʻEikí honau ngaahi filí, ko e kau Mitianí, ke ʻave ʻenau meʻakaí mo e fanga monumanú. Naʻe fiekaia e kakai ʻIsilelí, ko ia ne nau manatuʻi e ʻEikí mo lotu kiate Ia ki ha tokoni.
Ko Kitioné ko ha tangata ia mei ha fāmili masiva. Naʻe fekauʻi mai ʻe he ʻEikí ha ʻāngelo ke ui ia ke fakatauʻatāinaʻi ʻa ʻIsileli. Naʻe fifili ʻa Kitione pe ko e hā naʻe fili ai ia ʻe he ʻEikí.
Naʻe fakahā ʻe he ʻEikí kia Kitione ke fakaʻauha e ngaahi feituʻu naʻe lotu ai ʻa e kakai ʻIsilelí ki he ngaahi ʻotua loí. ʻI he talangofua ʻa Kitioné, naʻe ʻita ʻa e kakaí.
Naʻe loto e kakai ʻIsilelí ke nau tāmateʻi ʻa Kitione. Ka naʻe fakalotoʻi kinautolu ʻe he tamai ʻa Kitioné ke ʻoua naʻa nau fakamamahiʻi ia. Naʻe maluʻi ʻa Kitione.
Naʻe ʻikai fakakaukau ʻa Kitione te ne lava ʻo fakatauʻatāinaʻi ʻa ʻIsileli. Naʻe ʻi ai ha kau sōtia ʻe toko 135,000 tupu ʻi he kau tau ʻa Mitianí. Ka naʻe foaki ʻe he ʻEikí kia Kitione ʻa e potó mo e mālohí.
Naʻe finangalo e ʻEikí ke ʻiloʻi ʻe he kakai ʻIsilelí te nau lava ʻo ikuna ʻaki Hono mālohí, kae ʻikai ko e ivi ʻonautolú. Neongo naʻe toko 32,000 pē e kau sōtia ʻa ʻIsilelí, ka naʻe kole ʻe he ʻEikí kia Kitione ke fakafoki ki ʻapi ha kau sōtia pē naʻe ilifia. Hili e foki ʻa ha toko 22,000 ki ʻapí, naʻe toe pē ha kau sōtia ʻe 10,000 ʻa ʻIsileli.
Naʻe folofola e ʻEikí ʻoku kei fuʻu tokolahi pē e kau sōtia ʻe toko 10,000. Naʻá Ne folofola kia Kitione ke ʻave e kau taú ki he vaí. Ko kinautolu ʻe inu hangatonu mei he vaí ʻaki honau ngutú, ke fakafoki ki ʻapi. Ko kinautolu ʻe fakaʻaongaʻi honau nimá ke inu mei he vaí, ke nau nofo. Kuo toe pē ʻeni ha kau tangata ʻe toko 300.
Naʻe faifai pea mateuteu e kau ʻIsilelí ke tau. Naʻe fakahā ʻe he ʻEikí kia Kitione e founga ke ikunaʻi ai ʻa e kau Mitianí. Naʻe talaange ʻe Kitione ki heʻene kau taú ke fakaʻaongaʻi e talupité mo e māmá ke fakailifiaʻi kinautolu. Naʻe puputuʻu ʻi he longoaʻá mo e māmá e kau Mitianí ʻo kamata ai ke nau fetauʻaki. Pea nau kaikaila ʻo hola.
Koeʻuhí naʻe falala ʻa Kitione ki he ʻEikí, naʻe ikunaʻi ʻe he kau ʻIsilelí e kau tau Mitianí ʻaki ha kau sōtia pē ʻe toko 300. Naʻe fakatauʻatāinaʻi ʻe he ʻEikí e ʻapitanga ʻo ʻIsilelí.