“Sēkope mo ‘Īsoa,” Ngaahi Talanoa ʻo e Fuakava Motuʻá (2022)
“Sēkope mo ‘Īsoa,” Ngaahi Talanoa ʻo e Fuakava Motuʻá
Sēnesi 25–27
Sēkope mo ʻĪsoa
Ongo tautehina mo ha tāpuaki tukufakaholo ʻe taha
Naʻe maʻu ʻe ‘Aisake mo Lepeka ha ongo māhanga tangata, ko Sēkope mo ʻĪsoa. Ne hoko ʻa ʻĪsoa ko ha tangata taukei ʻi he tuli manú. Na‘e moʻui faingofua pē ‘a Sēkope mo muimui ki he ʻEikí.
Na‘e ʻuluaki fāʻele‘i ʻa ‘Īsoa. Naʻe faʻa maʻu ʻe he ‘uluaki fānaú ʻa e tāpuaki tukufakaholó mei he‘ene tamaí. ‘Oku ʻuhinga ‘a e tāpuaki tukufakaholó te ne tataki e fāmilí pea maʻu ha fonua mo e fanga manu lahi ange ke tokoni ʻi hono tauhi ‘o e fāmilí. Ka naʻe tokanga lahi ange ʻa ʻĪsoa kiate ia pē ʻi hono fāmilí, pea naʻá ne talangataʻa ki heʻene ongomātuʻá.
‘I ha ʻaho ʻe taha naʻe foki mai ‘a ʻĪsoa mei he tuli manú. Na‘á ne fuʻu fiekaia ‘aupito peá ne kole fakamamate kia Sēkope ke fafanga ia. Na‘e finangalo ‘a e ʻEikí ke maʻu ‘e Sēkope ‘a e tāpuaki tukufakaholó koe‘uhi naʻe ‘ikai taau ʻa ‘Īsoa ke maʻu ia. Na‘e kole ange ʻe Sēkope kia ʻĪsoa ke fakafetongi mo ia ʻa e tāpuaki tukufakaholó ‘aki ha meʻakai. Na‘e loto-fiemālie ʻa ‘Īsoa peá ne fakafetongi hono tāpuaki tukufakaholó kia Sēkope.
Sēnesi 25: 23, 29–34; Hepelū 11:20
Naʻe fie maʻu ʻe Lepeka mo ‘Aisake ʻa e meʻa naʻe lelei tahá maʻa ‘ena fānaú. Na‘á na loto-mamahi he hokohoko atu pē ʻa ‘Īsoa ke fakahoko ʻa e ngaahi me‘a naʻá ne loto ki aí kae ‘ikai ko e finangalo ʻo e ‘Eikí.
Na‘e fakaʻau ke motuʻa mo kui ʻa ‘Aisake. Kimu‘a peá ne maté, naʻá ne kole kia ‘Īsoa ke ne tuli ha manu pea ngaohi ha meʻakai maʻana ke ne kai mo fiefia ai.
Na‘e ʻilo‘i ʻe Lepeka naʻe taimi ke foaki ʻe ‘Aisake ʻa e tāpuaki tukufakaholó.
Na‘e kole ange ʻe Lepeka kia Sēkope ke ne mai ha ongo monumanu koeʻuhi ke ne ngaohi ʻe ia ʻa e meʻakaí kimuʻa pea foki mai ‘a ʻĪsoá. ʻE maʻu leva ‘e Sēkope ʻa e tāpuakí.
Naʻe teuteu ʻa Sēkope ʻo hangē ko ʻĪsoá peá ne ʻomi ʻa e meʻakaí ki heʻene tamaí. Na‘e foaki ʻe ‘Aisake ʻa e tāpuaki tukufakaholó kia Sēkope. ‘I he taimi ne foki mai ai ʻa ‘Īsoá, naʻá ne ‘ita ʻaupito kia Sēkope. Ka na‘e ʻalu ʻa e tāpuaki tukufakaholó kia Sēkope koeʻuhi naʻá ne tauhi ʻa e ngaahi fekau ʻa e ʻEikí pea naʻe ʻikai fakahoko ia ʻe ʻĪsoa.