“Palōfita ko ʻĪnoké,” Ngaahi Talanoa ʻo e Fuakava Motuʻá (2022)
“Palōfita ko ʻĪnoké,” Ngaahi Talanoa ʻo e Fuakava Motuʻá
Sēnesi 5; Mōsese 6–7
Palōfita ko ʻĪnoké
Founga na‘e fakahaofi ai ha kolo koeʻuhi ko e tui ki he ‘Eikí
Na‘e folofola ange ʻe he ʻEiki ko Sīsū Kalaisí kia ʻĪnoke ke ne tala ki he kakaí ke nau fakatomala. Ka na‘e pehē ʻe ‘Īnoke naʻe ‘ikai ke ne lava ʻo lea lelei. Na‘á ne ilifia naʻa ʻikai fie fanongo ‘a e kakaí kiate ia.
Na‘e palōmesi ‘a e ʻEikí ke fakamālohia mo malu‘i ʻa ‘Īnoke neongo naʻe ‘ikai ke saiʻia ha kakai ʻe niʻihi ʻi he me‘a naʻe ako‘i ʻe ‘Īnoké.
Naʻe ʻoange ʻe he palōmesi ʻa e ‘Eikí ha loto-toʻa kia ʻĪnoke. Naʻe talangofua ʻa ʻĪnoke ki he ‘Eikí peá ne akoʻi ‘a e kakaí ʻaki ‘a e mālohi. Na‘á ne akoʻi fekau‘aki mo Sīsū Kalaisi, fakatomalá, papitaisó, pea mo e Laumālie Māʻoni‘oní. Na‘e tui ha kakai ʻe niʻihi kia ‘Īnoke pea naʻa nau fie muimui ki he ʻEikí.
Na‘e maʻu ‘e ʻĪnoke ʻa e mafai mei he ‘Otuá ke fai papitaiso. Ko e kakai kotoa pē ne tui kia ʻĪnoké naʻa nau papitaiso pea nau hoko ʻo ofi ange ki he ‘Eikí. Na‘e ʻikai ha taha na‘e masiva koeʻuhí na‘a nau fetokoniʻaki. Naʻe ui kinautolu ko Saione koeʻuhí na‘a nau nofo fakataha ʻi he ‘ofa mo e māʻoni‘oni.
‘I ha ʻaho ʻe taha naʻe fakahā ‘e he ʻEikí kia ʻĪnoke ʻi ha vīsone ʻa e me‘a kotoa ʻe hoko ‘i he māmaní. Na‘e mamata ʻa ‘Īnoke ki he moʻui, pekia mo e toetu‘u ʻa Sīsū Kalaisí. Ne ako ‘e ʻĪnoke ʻe fakafoki mai ʻa e ongoongoleleí ‘i he ngaahi ‘aho fakaʻosí. Na‘á ne mamata foki ki he Hāʻele ‘Anga Ua mai ʻa Sīsuú.
Ne iku pē, ʻo tui ʻa e kakai kotoa pē ʻi he kolo ʻo Saioné kia ‘Īnoke pea nau fakatomala. Koe‘uhí naʻa nau fetokoniʻaki mo nofo melino, naʻe ‘ave ʻe he ‘Eikí kinautolu ke nofo fakataha mo Ia.