“ ʻĀtama mo ʻIvi,” Ngaahi Talanoa ʻo e Fuakava Motuʻá (2022)
“ ʻĀtama mo ʻIvi,” Ngaahi Talanoa ʻo e Fuakava Motuʻá
Sēnesi 2–3; Mōsese 3–5; ʻĒpalahame 5
ʻĀtama mo ʻIvi
Ko hono ma‘u ʻo e taukeí ‘i hono fakahoko ha ngaahi filí
Ko ‘Ātama mo ‘Ivi ʻa e ‘uluaki ‘i he fānau ‘a e Tamai Hēvaní ke nofo ʻi he māmaní. Na‘á na nofo ‘i he ngoue fakaʻofo‘ofa ʻo ‘Ītení, ʻo ʻākilotoa kinaua ‘e ha ngaahi faʻahinga kehekehe ʻo e ‘akau īkí mo e ʻakau lalahí. Naʻe ʻaʻahi mo folofola ʻa e ʻOtua ko ʻetau Tamai Hēvaní mo e ʻEiki ko Sīsū Kalaisí kiate kinaua.
Sēnesi 2:8–9; 3:8; Mōsese 3:8–9; ʻĒpalahame 5:8, 14–19
Naʻe tuku ʻe he ʻOtuá ke na kai ʻa e fua ʻo e ʻakau kotoa pē tuku kehe ha [fuʻu ʻakau ʻe] taha. Kapau te na kai mei he ‘akau ʻo e ‘ilo ʻo e leleí mo e koví, kuo pau ke na mavahe mei he ngoué pea ‘e iku pē ʻo na mate. Na‘e loi ʻa Sētane kia ‘Ātama mo ʻIvi. Na‘e pehē ʻe Sētane kapau te na kai e fuá, te na ‘ilo ʻa e leleí mo e koví ka ‘e ʻikai te na mate.
Sēnesi 2:16–17; 3:1–5; Mōsese 3:9; 4:6–11; ʻĒpalahame 5:9, 12–13
Na‘e fili ʻa ‘Ivi ke ne kai ʻa e fuá.
Naʻe ʻoange ʻe ‘Ivi ha konga ʻo e fuá kia ‘Ātama. Na‘á ne fili foki ke ne kai ia.
Naʻe ʻaʻahi ʻa e ʻOtuá mo e ʻEikí kiate kinaua, ka naʻe ilifia ʻa ʻĀtama mo ʻIvi peá na toi. Naʻe fehuʻi kiate kinaua ʻe he ʻOtuá pe kuó na kai ‘a e fua ‘o e ‘akau ‘o e ʻilo ‘o e leleí mo e koví.
Naʻe tala ange ʻe ‘Ātama mo ʻIvi ki he ‘Otuá naʻá na fili ke kai ‘a e fuá. Koeʻuhi ko ʻena filí, naʻe pau ai ke na mavahe mei he Ngoue ko ʻĪtení. Na‘e fakamavaheʻi kinaua mei he ‘Otuá, ka naʻe ʻi ai ‘Ene palani maʻanaua. Naʻá na ʻiloʻi he taimí ni ʻa e tonú mei he halá pea naʻá na lava ʻo maʻu ha fānau.
Sēnesi 3:16–24; Mōsese 4:15–31
Na‘e palōmesi ‘a ʻĀtama mo ‘Ivi ke talangofua ki he ngaahi fekau kotoa pē ʻa e ʻOtuá. Naʻe akoʻi kinaua ke na fakahoko ʻa e feilaulauʻi ʻo e fanga manú. ‘I heʻena talangofuá, na‘á na ako lahi ange ʻo kau kia Sīsū Kalaisi ko e ʻAlo ʻo e ʻOtuá. Na‘á na fakatou ongoʻi ha fiefia lahi koe‘uhi he te Ne tokoniʻi hona fāmilí ke foki ki he ʻOtuá.