“Talavou ko Tēvitá,” Ngaahi Talanoa ʻo e Fuakava Motuʻá (2022)
“Talavou ko Tēvitá,” Ngaahi Talanoa ʻo e Fuakava Motuʻá
Talavou ko Tēvitá
Ko ha kiʻi tamasiʻi tauhi sipi naʻe ui ke hoko ko e tuʻi
Naʻe fekauʻi ʻe he ʻEikí e palōfita ko Samuelá ke ne kumi ha tuʻi foʻou. Naʻe ʻikai toe muimui ʻa Saula, ko e tuʻi he taimi ko iá, ki he ʻEikí. Naʻe fakahā ʻe he ʻEikí kia Samuela ke fononga ki Pētelihema ʻo kumi ha tangata ko Sese. ʻE hoko ha taha ʻo e ngaahi foha ʻo Sesé ko e tuʻi foʻoú.
Naʻe kaukaua mo mālohi e ngaahi foha lalahi ʻo Sesé. Ka naʻe fakahā ʻe he ʻEikí kia Samuela ke ʻoua naʻá ne fakamāuʻi kinautolu ʻaki e anga ʻo ʻenau fakafōtungá.
Naʻe ʻeke ange ʻe Samuela kia Sese pe naʻe toe ʻi ai hano ngaahi foha kehe. Naʻe pehē ʻe Sese naʻe tokangaʻi ʻe hono foha siʻi taha ko Tēvitá, ʻa e fanga sipí. Naʻe ʻomi ʻa Tēvita kia Samuela.
Naʻe tupu siʻi ange ʻa Tēvita ʻi hono ngaahi tokouá pea ko ha tamasiʻi tauhi sipi pē. Ka naʻe ʻikai tokanga e ʻEikí pe naʻe fōtunga fēfē ʻa Tēvita. Naʻe ʻafioʻi ʻe he ʻEikí naʻe fonu e loto ʻo Tēvitá ʻi he tui. Naʻá Ne fakahā kia Samuela ʻe hoko ʻa Tēvita ko e tuʻí. Naʻe tāpuakiʻi ʻe Samuela ʻa Tēvita. Naʻe teuteuʻi ʻe he Laumālie ʻo e ʻEikí ʻa Tēvita ke hoko ko e tuʻi.