Kau Fakamaau 4–5

Tēpola ko e Palōfita Fefiné

Ko ha taki naʻá ne tokoniʻi ʻa ʻIsileli ke falala ki he ʻEikí

Tēpola ko e palōfita fefiné

Ko Tēpolá ko ha palōfita fefine ia, ko ha taki faivelenga ʻo ʻIsileli naʻe ueʻi fakalaumālie ʻe he ʻEikí. Naʻe ʻikai toe tauhi ʻe hono kakaí e ngaahi fekau ʻa e ʻEikí, pea naʻe puleʻi kinautolu ʻe he kau Kēnaní. Hili ha taʻu ʻe uofulu, naʻe kamata ke lotua ʻe he kakai ʻIsilelí e tokoni ʻa e ʻEikí.

Kau Fakamaau 4:1–5

Tēpola ʻoku lotu

Naʻe ongona ʻe he ʻEikí ʻenau ngaahi lotú. Naʻá Ne folofola kia Tēpola ke tānaki fakataha ha kau tau ʻa ʻIsileli ke tauʻi e kau Kēnaní.

Kau Fakamaau 4:6

Tēpola ʻoku talanoa ki ha kau sōtia

Naʻe tokolahi e kau sōtia mo e ʻū saliote ʻa e kau tau Kēnaní. Naʻe manavahē heni ʻa e kau tau ʻIsilelí, ka ne ʻikai ilifia ʻa Tēpola. Naʻá ne ʻiloʻi ʻe tokoniʻi kinautolu ʻe he ʻEikí.

Kau Fakamaau 4:3, 7

Ko e kole ʻa Pēlaki kia Tēpola ke haʻú

Ko Pēlaki ʻa e taki ʻo e kau tau ʻIsilelí. Naʻe ʻikai ke ne loto ke fai ha tau. Ka naʻá ne fakakaukau kapau ʻe ʻalu ʻa Tēpola mo e kau taú, ʻe maluʻi kinautolu ʻe he ʻEikí. Naʻe loto lelei ʻa Tēpola ke ʻalu. Naʻá ne kikiteʻi ʻe ikunaʻi ʻe ha fefine ʻa Sisela, ko e taki ʻo e kau tau Kēnaní.

Kau Fakamaau 4:8–9

Ko Tēpola mo e kau taú ʻi he tumutumu ʻo e moʻungá

Naʻe fakatahataha mai e kau tau ʻIsilelí ki ha moʻunga, pea naʻe fakatahataha e kau Kēnaní ki he teleʻá. Naʻe talaange ʻe Tēpola kia Pēlaki ke nau hifo mei he moʻungá. Naʻá ne palōmesi ange ʻe maluʻi kinautolu ʻe he ʻEikí.

Kau Fakamaau 4:12–14

ngaahi saliote ʻoku tafia atu ʻe he matangí

Naʻe tuku mai ʻe he ʻEikí ha fuʻu ʻuha, pea naʻe tafia atu e ngaahi saliote ʻa e kau Kēnaní ʻi he vaí. Naʻe melemo ha kau Kēnani tokolahi ʻi he vaitafé, ka naʻe hola ʻa Sisela.

Kau Fakamaau 4:15, 17; 5:4–5, 19–22

Ko hono fakaafeʻi ʻe Saeli ʻa Sisela ki he fale fehikitakí

Naʻe nofo ha fefine ko Saeli ʻi ha fale fehikitaki ofi mai. Naʻá ne sio ki he lele ʻa Siselá peá ne talaange ke toitoi ʻi hono fale fehikitakí. Naʻe ʻiloʻi ʻe Saeli ko ha taki ia ʻo e kau tau Kēnaní pea naʻá ne tāmateʻi ia koeʻuhí ke ʻoua naʻá ne toe fakamamahiʻi ha kakai tokolahi ange.

Kau Fakamaau 4:15–21

Ko e vakai ʻa Tēpola ki he melino ʻa e koló

Naʻe hoko ʻo moʻoni e kikite ʻa Tēpolá. Naʻe ʻulungia ʻa Sisela ʻi ha fefine toʻa. Naʻe hivaʻi ʻe Tēpola ha foʻi hiva ke tokoni ki he kakai ʻIsilelí ke manatuʻi e founga naʻe fakahaofi ai kinautolu ʻe he ʻEikí. Naʻe tauhi ʻe he kau ʻIsilelí e ngaahi fekaú pea nau nofo melino ʻi ha taʻu ʻe 40.

Kau Fakamaau 5:1, 24–27, 31