“Siona ko e Palōfitá,” Ngaahi Talanoa ʻo e Fuakava Motuʻá (2021)
“Siona ko e Palōfitá,” Ngaahi Talanoa ʻo e Fuakava Motuʻá
Siona 1–4
Siona ko e Palōfitá
Ko e ako ke falala ki he ‘aloʻofa ‘a e ʻEikí
Ne hoko ʻa Siona ko ha palōfita. Ne folofola ange ʻa e ʻEikí ke ne fakatokanga ki he kakai ‘i Ninivé ʻe faka‘auha honau koló kapau ʻe ‘ikai te nau fakatomala.
Ka na‘e fili ʻa e kakai ʻo Ninivé mo e kau ʻIsilelí. Na‘e ʻikai fie malanga ‘a Siona kiate kinautolu. Ko ia ai na‘á ne heka ‘i ha vaka ke folau mamaʻo mei Ninive.
Lolotonga e ‘i he vaká ʻa Sioná, na‘e tō mai ha fuʻu matangi mālohi. Na‘e ilifia ʻa e kau tangata ʻi he vaká koeʻuhi ko ʻenau moʻuí. Na‘a nau kole kia Siona ke lotu ki he ʻEikí ke fakahaofi kinautolu.
Na‘e ʻilo ‘e Siona kuo fekau‘i mai ʻe he ‘Eikí ʻa e matangí koe‘uhi naʻá ne hola mei he meʻa ne kole ange ‘e he ʻEikí ke ne fakahokó. Naʻe fakaʻamu ʻa Siona ke ne fakahaofi ʻa e kakai ʻi he vaká. Na‘á ne talaange kapau te nau lī ia ki tahi, ʻe tuʻu ʻa e matangí.
Na‘e ʻikai loto ‘a e kau tangatá ke lī ʻa Siona ki tuʻa mei he vaká. Na‘a nau feinga ke ʻaʻaloʻi ʻa e vaká ki ʻuta, ka naʻe mālohi fau ‘a e matangí. Naʻe faifai, pea nau lī ʻa Siona ki he loto tahí.
Naʻe tuʻu ʻa e matangí. Ka na‘e folo ‘a Siona ʻe ha fu‘u ika lahi.
Naʻe ʻi he loto kete ʻo e iká ʻa Siona ʻi ha ʻaho ‘e tolu mo e pō ʻe tolu. ‘I he taimi ko iá, naʻe lotu ‘a Siona pea fakatomala. Na‘á ne loto ke fakahoko ‘a e meʻa naʻe totonú pea fakafanongo ki he ʻEikí. Naʻe fanongo ʻa e ʻEikí ki he ngaahi lotu ‘a Sioná pea ʻai ʻa e iká ke puʻaki ʻa Siona ki tuʻa ʻi he fonua mōmoá.
Naʻe toe folofola ʻa e ʻEikí kia Siona ke malanga ki he kakai ʻo Ninivé. Ko e taimi ko ‘ení naʻe talangofua ʻa Siona. Na‘á ne fononga ki Ninive ‘o fakahā ki he kakaí ke nau fakatomala ka ʻikai ʻe fakaʻauha ʻe he ʻEikí ʻa honau koló. Na‘e fakatomala ʻa e tu‘í mo hono kakaí. Naʻe fakamolemole‘i ʻa kinautolu ‘e he ʻEikí pea na‘e ʻikai ke faka‘auha ʻa Ninive.
Ka na‘e loto-mamahi ʻa Siona he naʻe ʻikai ke fakaʻauha ʻa e kakaí. Na‘e ʻikai ke ne fakakaukau ʻoku totonu ke fakamolemoleʻi kinautolu.
Ke ako‘i ha lēsoni kia Sioná, naʻe fakatupu hake ʻe he ‘Eikí ha fuʻu ʻakau ke fakamalumaluʻi ʻa Siona mei he laʻaá. Na‘e mate leva ʻa e fu‘u ʻakaú, pea naʻe ongoʻi fakaʻofaʻia ai ʻa Siona.
Na‘e akoʻi ‘e he ʻEikí ha lēsoni kia Siona fekau‘aki mo ʻEne fānaú. Na‘e ako ʻe Siona ʻoku totonu ke ne loto-mamahi ‘i he taimi ʻoku ‘ikai ke fakatomala ai ʻa e kakaí pea ʻoku totonu ke ne fiefia ‘i he taimi ʻoku nau fakahoko ai iá.