“Hekaʻā,” Ngaahi Talanoa ʻo e Fuakava Motuʻá (2022)
“Hekaʻā,” Ngaahi Talanoa ʻo e Fuakava Motuʻá
Hekaʻā
Ko e palani ʻa e ʻEikí maʻa Hono ʻofefiné
Ko Hekaʻā ʻa e sevāniti ʻa Selá. Naʻe motuʻa ʻa Sela pea ʻikai haʻane fānau. Naʻá ne talaange ki hono husepāniti ko ʻĒpalahamé, ke mali mo Hekaʻā kae lava ke na maʻu ha fānau. Naʻe mali ʻa ʻĒpalahame mo Hekaʻā, pea ʻikai fuoloa kuo feitama ʻa Hekaʻā.
Naʻe kamata ke fekeʻikeʻi ʻa Hekaʻā mo Sela. Naʻe fili ʻa Hekaʻā ke hola ki he toafá.
ʻI he fononga ʻa Hekaʻaá, naʻe fakaʻau ke ne fuʻu ongosia mo fieinua. Faifai peá ne aʻu ki ha feituʻu naʻe ʻi ai ha vai peá ne mālōlō ai.
Naʻe ʻafioʻi ʻe he ʻEikí e ngaahi faingataʻaʻia ʻa Hekaʻaá pea ʻi ai ha palani ke tokoniʻi ia. Naʻá Ne fekau atu ha ʻāngelo ke kole kiate ia ke foki kia ʻĒpalahame mo Sela. Naʻá Ne palōmesi ange ʻe tupu e fāmili ʻo Hekaʻaá ʻo tokolahi. Naʻá Ne talaange ko ha kiʻi tamasiʻi ʻa e pēpē te ne fanauʻí pea ʻoku totonu ke ne fakahingoa ia ko ʻIsimeli.
Naʻe falala ʻa Hekaʻā ki he ʻEikí peá ne talangofua ki he ʻāngeló. Naʻá ne foki kia ʻĒpalahame mo Sela. Naʻe fāʻeleʻi ʻe Hekaʻā ha pēpē tangata, pea naʻe fakahingoa ia ko ʻIsimeli. Naʻe ʻiloʻi ʻe Hekaʻā ʻoku tokangaʻi ia ʻe he ʻEikí.