ʻEkesōtosi 19–20; 24; 31–34; Teutalōnome 4–7

Mōsese ʻi he Moʻunga Sainaí

Ko hono tokoniʻi e kakaí ke nau manatuʻi ʻa e ʻEikí

Moʻunga ko Sainaí

Naʻe fononga ʻa Mōsese mo e kakai ʻIsilelí ʻi he toafá. Naʻa nau omi ki ha moʻunga naʻe ui ko e Moʻunga Sainaí.

ʻEkesōtosi 19:1

Mōsese ʻoku lotu

Naʻe kaka ʻa Mōsese ʻi he moʻungá ke fefolofolai mo e ʻEikí. Naʻe fakahā ʻe he ʻEikí kia Mōsese naʻá Ne fie fefolofolai mata ki he mata mo e kakai ʻIsilelí.

ʻEkesōtosi 19:3, 9–11

konga ʻao takatakai ʻi he moʻungá

Naʻe ō hake e kakai ʻIsilelí ki he moʻunga ko Sainaí, pea naʻe fakatupu ʻe he ʻEikí ha konga ʻao ke takatakaiʻi ʻa e moʻungá. Naʻe ʻi he konga ʻaó ʻa e ʻEikí. Naʻá Ne folofola ki he kakai ʻIsilelí pea ʻoange ha ngaahi fekau kiate kinautolu. Naʻe ngalulu e moʻungá ʻi Heʻene leá.

ʻEkesōtosi 19:16–19; 20:1–17; Teutalōnome 4:12–13, 33; 5:4–5

manavasiʻi ʻa e kakai ʻIsilelí

Naʻe ilifia e kakai ʻIsilelí Ne nau kole kia Mōsese ke fefolofolai mo e ʻEikí koeʻuhí ke lava ʻe Mōsese ʻo fakahā ange kiate kinautolu e finangalo ʻo e ʻEikí.

ʻEkesōtosi 20:18–19

kaumātuʻa ʻIsileli ʻi he moʻungá

Naʻe ʻave ʻe Mōsese ʻa ʻĒlone mo ha kaumātuʻa ʻIsileli ʻe toko 70 ki he moʻungá ke nau maʻu ha ngaahi akonaki lahi ange ʻa e ʻEikí. Naʻe hā ʻa e ʻEikí kiate kinautolu.

ʻEkesōtosi 24:1, 9–11

ko e tohi ʻa e ʻEikí ʻi he ongo maka lafalafá maʻa Mōsese

Naʻe folofola leva e ʻEikí kia Mōsese ke mavahe mei he kaumātuʻá pea ʻalu hake ʻo toe māʻolunga ange ʻi he moʻungá. Naʻe talangofua ʻa Mōsese. Naʻe fakaʻaongaʻi ʻe he ʻEikí Hono louhiʻi toʻukupú ke hiki ʻEne fonó mo e ngaahi fekaú ʻi ha ongo maka lafalafa. Naʻe akoʻi ʻe he ʻEikí kia Mōsese ʻi ha ʻaho ʻe 40 ha ngaahi meʻa lahi.

ʻEkesōtosi 24:12–18; 31:18

Ko hono ngaohi ʻe he kakai ʻIsilelí ha ʻuhikiʻi pulu koulá

Lolotonga e ʻi he Moʻunga Sainaí ʻa Mōsesé, naʻe fiu e kakai ʻIsilelí ʻi he tatali kiate iá. Ne nau talaange kia ʻĒlone ke nau ngaohi ha ngaahi maka fakamanatu ke nau lotu ki ai ʻo hangē ko ia naʻa nau fakahoko ʻi ʻIsipité. Naʻe tānaki ʻe ʻĒlone ʻenau koula kotoa pē ʻo ngaohi ʻaki ha ʻuhikiʻi pulu.

ʻEkesōtosi 32:1–4

lotu ʻa e kakai ʻIsilelí ki he ʻuhikiʻi pulu koulá

Naʻe hū e kakai ʻIsilelí ki he ʻuhikiʻi pulu koulá mo fai ha ngaahi feilaulau. Naʻa nau pehē ko e ʻuhikiʻi pulu koulá naʻá ne fakatauʻatāinaʻi kinautolu mei ʻIsipité, kae ʻikai ko e ʻEikí.

ʻEkesōtosi 32:4–6, 21–24

Ko e hifo ʻa Mōsese mei he moʻungá

Naʻe ʻafioʻi ʻe he ʻEikí ʻoku lotu e kakai ʻIsilelí ki ha ʻotua tamapua pea fakangaloʻi Ia. Naʻá Ne fekau kia Mōsese ke foki ʻo tala ki he kakaí ke nau fakatomala.

ʻEkesōtosi 32:7–10

Ko e talanoa ʻa Mōsese ki he kakai ʻIsilelí, kuo fakaʻauha ʻa e ʻuhikiʻi pulu koulá

Naʻe hifo mai ʻa Mōsese mei he Moʻunga Sainaí ʻo mamata ki he hū ʻa e kakai ʻIsilelí ki he ʻuhikiʻi pulu koulá. Naʻá ne loto mamahi ʻaupito. Naʻe teʻeki mateuteu e kakaí ke talangofua ki he fono mo e ngaahi fekau kuo tohi ʻe he ʻEikí. Naʻe maumauʻi ʻe Mōsese ʻa e ongo maká pea fakaʻauha ʻa e ʻuhikiʻi pulu koulá. Naʻá ne tokoniʻi e kakai ʻIsilelí ke nau fakatomala mo manatuʻi honau ʻOtua moʻoní.

ʻEkesōtosi 32:15–20, 25–29

Mōsese ʻoku lotu

Naʻe kole ʻe Mōsese ki he ʻEikí ke fakamolemoleʻi e kakai ʻIsilelí pea ke toe fakahoko ha ngaahi palōmesi mo kinautolu. Naʻe palōmesi ʻa Mōsese te ne tataki mo akoʻi kinautolu.

ʻEkesōtosi 32:30–34

Ko Mōsese mo e ongo maka ʻo e Fekau ʻe Hongofulú

Naʻe kole ʻe he ʻEikí kia Mōsese ke ne faʻu ha ongo maka foʻou pea foki ki he Moʻunga Sainaí. Naʻe fai ʻe he ʻEikí ha talaʻofa foʻou mo e kakai ʻIsilelí pea ʻoange kiate kinautolu ʻEne Fekau ʻe Hongofulú.

ʻEkesōtosi 20:2–17; 34:1–17, 28; Teutalōnome 6:24–25; 7:12–13