“ʻĒpalahame mo Sela,” Ngaahi Talanoa ʻo e Fuakava Motuʻá (2021)
“ʻĒpalahame mo Sela,” Ngaahi Talanoa ʻo e Fuakava Motuʻá
Sēnesi 11–15; 17; ʻĒpalahame 1–2
ʻĒpalahame mo Sela
Ko ha palōmesi ke tāpuekina e faʻahinga ‘o e tangatá
Na‘e nofo ʻa ‘Ēpalahame ʻi he kolo ko ʻUá. Naʻe loto ʻa e kau taulaʻeiki faiangahala aí ke feilaulauʻi ia ki honau ngaahi ʻotua tamapuá. Na‘e lotu ʻa ‘Ēpalahame, pea naʻe fakahaofi ia ‘e he ʻEikí.
Hili iá na‘e fekau ʻe he ‘Eikí ʻa ʻĒpalahame mo hono uaifi ko Selá ke na mavahe mei ʻUa pea fononga ki ha fonua mamaʻo. Na‘á Ne palōmesi ke tāpuekina kinaua ‘i heʻena fonongá.
Sēnesi 12:1–3; ʻĒpalahame 2:2–4
Naʻe falala ʻa ‘Ēpalahame mo Sela ki he ʻEikí peá na mavahe mei ʻUa. Ka naʻá na ongoʻi loto-mamahi koe‘uhí he naʻe ‘ikai ke na lava ʻo maʻu ha fānau. Na‘e fakafiemālieʻi kinaua ‘e he ʻEikí. Na‘á Ne talaʻofa ange te na ma‘u ha fānau.
Sēnesi 11:30–31; 15:1–6; 17:2–16; ʻĒpalahame 2:6–9
Na‘e lotu ʻa ‘Ēpalahame ki he ʻEikí ke ‘ilo lahi ange fekauʻaki mo Ia. Naʻe ‘aʻahi e ʻEikí kia ‘Ēpalahame pea naʻá Ne ui Ia ko Sihova. Naʻe fakahoko ʻe Sihova ha fuakava mo ʻĒpalahame. Na‘á Ne talaʻofa ange ‘e maʻu ‘e ʻĒpalahame e lakanga fakataulaʻeikí. Na‘á Ne talaʻofa ange foki ʻe tāpuekina e faʻahinga kotoa pē ʻi he māmaní, ʻo fakafou ‘i he hako ʻo ‘Ēpalahamé.
Lolotonga e fononga ʻa ‘Ēpalahame mo Selá, ne na fie ma‘u ke kumi ha meʻakai. Naʻá na feinga ke nofo ‘i ha fonua naʻe ui ko Kēnani. Na‘e ʻikai ha me‘akai ai, ko ia naʻe pau ke na fononga ki ‘Isipite. Ka naʻe fakatuʻutāmaki kiate kinaua ke na nofo ʻi ʻIsipite.
Sēnesi 12:10–20; ‘Ēpalahame 2:21–25
Naʻe mavahe ʻa ‘Ēpalahame mo Sela mei ʻIsipite peá na foki ke nofo ‘i Kēnani. Ne na ʻave mo kinaua ha me‘akai mo ha fanga monumanu mei ʻIsipite. Naʻe kau ʻa Kēnani ʻi he konga fonua naʻe talaʻofa ange ʻe he ʻEikí maʻanauá.
Sēnesi 13:1–4, 12; ‘Ēpalahame 2:19
Na‘e tauhi foki ʻe he ‘Eikí ʻEne talaʻofa ʻe ma‘u ʻe ‘Ēpalahame ʻa e lakanga fakataula‘eikí. Naʻe fetaulaki ʻa ʻĒpalahame mo Sela ʻi ha ʻaho ʻe taha mo ha tu‘i angatonu ko hono hingoá ko Melekisēteki. Na‘e totongi vahehongofulu ʻa ‘Ēpalahame kiate ia.
Na‘e maʻu ‘e ʻĒpalahame e lakanga fakataulaʻeikí meia Melekisēteki. Ko e lakanga fakataula‘eiki tatau ʻeni naʻe ma‘u ʻe he ongo palōfita ko ʻĀtama mo Noá.
Liliu ʻa Siosefa Sāmitá, Sēnesi 14:36–40; ʻĒpalahame 1:2–4; Tokāteline mo e Ngaahi Fuakava 84:14
Na‘e fiefia ‘a ʻĒpalahame mo Sela ʻi Kēnani, ka na‘á na kei loto-hohaʻa pē koe‘uhí naʻe ‘ikai haʻana tama. Na‘e pau ke na falala ki he talaʻofa ‘a e ʻEikí ʻa ia ʻe ʻi ai ha ‘aho ʻe tokolahi ai hona hakó pea tāpuekina ai ʻa e māmaní hono kotoa.