¶ 1 BEA nae toki tali e Jobe kia Jihova, o ne behe,

2 Oku ou ilo oku ke faa fai ae mea kotoabe, bea oku ikai ha mahalo e faa buli mei ate koe.

3 Kohai ia oku ne fufu ae fakakaukau i he tae ilo? koia, kuou buaki aia nae ikai teu ilo‘i; ae gaahi mea lahi hake fau iate au, aia nae ikai teu iloa.

4 Oku ou kole kiate koe ke ke fanogo mai, bea teu lea: teu eke kiate koe, bea ke fakaha mai kiate au.

5 Kuou fanogo kiate koe i he fanogo oe teliga: ka koeni kuo mamata e hoku mata kiate koe.

6 Koia oku ou fehia ai kiate au, o fakatomala i he efu moe efuefu.

¶ 7 Bea nae behe, hili ae folofola a Jihova aki ae gaahi lea ni kia Jobe, nae folofola a Jihova kia Elifasi mei Timani, Kuo tubu hoku houhau kiate koe, mo ho kaiga e toko ua: he oku ikai te mou lea aki kiate au ae mea oku totonu, o hage ko eku tamaioeiki ko Jobe.

8 Koia ke mou too ni kiate kimoutolu ae faga bulu e fitu, moe sibi tagata e fitu, o alu ki he eku tamaioeiki ko Jobe, bea o hake ae feilaulau tutu koeuhi ko kimoutolu; bea e hufia akimoutolu e he eku tamaioeiki ko Jobe: he teu ma‘u ia: telia naaku ta‘i kiate kimoutolu o hage ko hoo mou vale, koe mea i he ikai te mou lea aki kiate au aia oku totonu, o hage ko eku tamaioeiki ko Jobe.

9 Koia nae alu ai a Elifasi mei Timani, mo Bilitati mei Suaa, mo Sofaa mei Neama, o nau fai o hage koe fekau a Jihova kiate kinautolu: bea nae ma‘u e Jihova a Jobe foki.

10 Bea nae liliu e Jihova ae bobula o Jobe, i he ene hufia hono kaiga: bea nae fakama‘umea e Jihova kia Jobe o liuga ua hake i he mea naa ne ma‘u i mua.

11 Bea nae toki ha‘u kiate ia a hono gaahi kaiga kotoabe, mo hono gaahi tuofefine, mo kinautolu kotoabe naa nau kaumea mo ia i mua, o nau kai ma mo ia i hono fale: bea naa nau tegihia ia, o fakafiemalie ia i he gaahi kovi kotoabe nae omi e Jihova kiate ia: bea nae foaki e he tagata taki taha kotoabe kiate ia ae baaga, moe hau koula.

12 Bea nae tabuaki lahi hake e Jihova ae moui kimui a Jobe i he ene moui kimua: he naa ne ma‘u ae sibi e taha mano ma fa afe, moe kameli e ono afe, moe faga bulu taulua e taha afe, moe asi fefine e taha afe.

13 Bea naa ne ma‘u foki ae foha e toko fitu moe ofefine e toko tolu.

14 Bea naa ne ui ae higoa oe uluaki, ko Jimaima, moe higoa o hono toko ua, ko Kesaia, moe higoa o hono toko tolu, ko Keleni‐habuka.

15 Bea nae ikai ilo i he fonua kotoabe ha kau fefine hoihoifua o hage koe gaahi ofefine o Jobe: bea nae foaki ae tofia kiate kinautolu e he e nau tamai i he fakataha mo ho nau gaahi tuogaane.

16 Bea hili ae mea ni nae moui a Jobe i he ta‘u e teau ma fagofulu, o ne mamata ki hono gaahi foha, moe gaahi foha o hono gaahi foha, io, koe toutagata e fa.

17 Bea nae bekia a Jobe, kuo motua mo fonu i he gaahi aho.