Vahe 12
1 Oku tali a Jobe ki hono gaahi kaiga nae valoki‘i ia. 7 Oku ne fakamooni ki he akonaki oe mafimafi ae Otua.
¶ 1 BEA nae tali e Jobe, o ne behe,
2 Ta ko kimoutolu be ae kakai, bea e mate mo kimoutolu ae boto.
3 Ka oku ai hoku loto o hage be ko kimoutolu; oku ikai teu jii hifo au kiate kimoutolu: io, kohai oku ikai ke ne ilo ki he gaahi mea behe ni?
4 Oku ou tatau mo ha taha oku taukaea e hono kaugaabi, o behe, oku ne ui ki he Otua, bea oku ne talia ia: oku kata manukia ae tonuhia moe agatonu.
5 O hage koe māma kuo fakatukutuku‘i, oku behe aia oku meimei hekea hono va‘e i he mahalo oia oku fiemalie.
6 Oku monuia ae gaahi fale oe kau kaihaa, bea oku nofo fiemalie be akinautolu oku fakahouhau ki he Otua; oku atu lahi e he Otua ki ho nau nima.
7 Kae fehui eni ki he faga manu, bea te nau ako‘i koe; moe faga manu oe atā, bea te nau tala kiate koe:
8 Bea lea ki he fonua, bea te ne ako‘i koe: bea e fakaha kiate koe e he gaahi ika oe tahi.
9 Kohai oku ikai te ne ilo i he mea ni kotoabe koe nima o Jihova kuo ne fai eni?
10 Aia oku i hono nima ae moui ae mea moui fulibe, moe mānava oe kakai kotoabe.
11 Ikai oku ahiahi‘i e he teliga ae gaahi lea? bea kamata e he gutu hono kai?
12 Bea oku iate ia oku talu mei mua ae boto; bea koe ilo i he gaahi aho lahi.
13 Oku iate ia ae boto moe malohi, oku iate ia ae fakakaukau moe ilo.
14 Vakai, oku ne holoki hifo, bea e ikai faa toe fokotuu ia: oku ne tabuni ki he tagata, bea oku ikai ke faa matoo.
15 Vakai, oku ne taofi ki he gaahi vai, bea matuu ia: oku ne fekau atu foki ia, bea oku fulihi eia ae fonua.
16 Oku iate ia ae malohi moe boto: oku oona ae kākāia mo ia oku kākā.
17 Oku ne taki bobula ae kau fakakaukau, bea ne fakavale‘i ae kau fakamāu.
18 Koe ha‘i oe gaahi tu‘i kuo ne vete, ka ne ha‘iha‘i ho nau nootaga vala aki ae ha‘i.
19 Oku ne taki bobula ae gaahi houeiki, bea oku ne li ki lalo ae malohi.
20 Oku ne too atu ae lea ae kau boto, bea too moe ilo ae mātua.
21 Oku ne liligi ae manukia ki he gaahi houeiki, bea ne vete ae noo oe malohi.
22 Oku ne fakaha ae gaahi mea lilo mei he fakabouli, bea ne omi ki he māma ae ata oe mate.
23 Oku ne fakatokolahi ae gaahi buleaga, bea ne fakaauha akinautolu: oku ne fakalahi ae gaahi buleaga, bea toe fakajiijii ia.
24 Oku ne too o ave ae loto oe gaahi eiki oe kakai o mamani, o ne bule ke nau alu fano i ha toafa tae ha hala.
25 Oku nau tautaufā i he bouli tae ha māma, bea oku ne bule ke nau feheaki fano o hage ha kona.