Vahe 4
1 Oku valoki‘i a Jobe e Elifasi koe mea i he ene tae maonioni. 7 Oku ne fakaha oku ikai ki he maonioni ae gaahi tautea ae Otua, ka ki he agahala. 12 Koe mea fakamanavahe nae ha mai kiate ia, ke fakavaivai‘i ai i he ao oe Otua ae mea oku ogoogolelei ai ae kakai.
¶ 1 BEA toki leaage ai a Elifasi mei Timani, o ne behe,
2 Kabau te mau ahiahi ke lea kiate koe, te ke ita ai? ka kohai te ne faa taofi ia eia mei he lea?
3 Vakai, kuo ke akonekina ae toko lahi, bea kuo ke fakamalohi‘i ae nima vaivai.
4 Nae boubou hake e hoo gaahi lea aia nae meimei higa, bea kuo ke fakamalohi‘i ae foi tui vaivai.
5 Ka koeni kuo hoko ia kiate koe, bea ke vaivai; oku ala ia kiate koe, bea oku ke bubutuu.
6 He kofaa eni hoo manavahe, hoo falala, hoo amanaki lelei, moe agatonu a ho gaahi hala?
7 Oku ou kole kiate koe, ke ke fakamanatu, kohai ha tae agahala nae auha? bea koe botu fe nae motuhi ai ae maonioni?
8 Io o hage be koia kuou mamata ki ai, ko kinautolu oku keli ae agahala, mo tūtū‘i ae fai kovi, oku nau utu be ia.
9 I he ifi ae Otua oku nau auha, bea koe mānava o hono fofoga oku nau ojiojigamalie ai.
10 Oku fakagata ae gugulu oe laione, moe le‘o oe laione fekai, bea oku mafejifeji ae kau nifo oe faga laione mui.
11 Oku auha ae motua laione koe majiva mea kai, bea koe fagaga oe laione malohi kuo fakahe‘i mamao.
12 Koeni, nae ai ha mea nae omi fufu kiate au, bea nae ogo‘i e hoku teliga ae fafana o ia.
13 I he gaahi mahalo mei he gaahi mea ha mai oe bo, oka to ae mohe mau ki he kakai,
14 Nae hoko mai kiate au ae manavahe, moe tetetete, aia nae fakagalulu ai hoku gaahi hui kotoabe.
15 Bea nae toki maali ai ae laumalie i hoku ao; bea nae vavana hake ae fulufulu o hoku jino:
16 Nae tuu mai ia, ka nae ikai teu ilo hono aga: nae i hoku ao ae fakatātā, nae logo be, bea neu ogo‘i ae le‘o, nae behe,
17 E faa agatonu lahi hake ae tagata ki hono Otua? e maonioni lahi hake ae tagata ki hono Tubuaga?
18 Vakai, oku ikai te ne falala ki he ene kau tamaioeiki, bea ko ene kau agelo oku ikai ke ne fakamalo ki ai.
19 Kae hua noa akinautolu oku nofo i he gaahi fale umea, ko ho nau tuuga oku i he efu, bea oku taomia akinautolu o hage be koe ane?
20 Oku ta hifo akinautolu mei he bogibogi o a‘u ki he efiafi: oku nau auha o taetuku, ka oku ikai tokaga ki ai ha taha.
21 Bea ikai oku mole atu ae lelei kotoabe oku iate kinautolu? oku nau mate, io i he tae ha boto.