“Ngaahi Misi Ueʻi Fakalaumālie ʻa Siosefá,” Ngaahi Talanoa ʻo e Fuakava Motuʻá (2022)
“Ngaahi Misi Ueʻi Fakalaumālie ʻa Siosefá,” Ngaahi Talanoa ʻo e Fuakava Motuʻá
Ngaahi Misi Ueʻi Fakalaumālie ʻa Siosefá
Ko e fāinga ʻa ha fāmili ke nau feʻofaʻakí
Kuo lauitaʻu ha lotu ʻa Lesieli mo Sēkope ke maʻu ha fohá. Naʻe tali ʻe he ʻEikí ʻena ngaahi lotú ʻi he taimi naʻe fāʻeleʻi ai ʻa Siosefá. Ko Siosefa ʻa e foha naʻe saiʻia taha ai ʻa Sēkopé, pea naʻá ne ʻoange kia Siosefa ha kote makehe. Naʻe meheka e ngaahi foha lalahi ʻe toko 10 ʻo Sēkopé.
ʻI he taʻu 17 nai ʻa Siosefá, naʻá ne maʻu ha misi ueʻi fakalaumālie naʻá ne tānaki e kēlení mo hono ngaahi tokouá ʻi he ngoueʻangá. Naʻe tuʻu hangatonu e haʻinga kēleni ʻa Siosefá. Ka naʻe punou hifo e ʻū haʻinga kēleni hono ngaahi tokouá ki he haʻinga kēleni ʻa Siosefá. ʻI he taimi naʻe talaange ai ʻe Siosefa ʻene misí ki hono ngaahi tokouá, naʻa nau ʻita kiate ia.
Naʻe toe ʻi ai ha misi ueʻi fakalaumālie ʻe taha ʻa Siosefa kimui ange. ʻI he misi ko ʻení, naʻe punou hifo ʻa e laʻaá, māhiná, mo ha fetuʻu ʻe 11 kiate ia. Naʻe talaange ʻe Siosefa ki hono fāmilí ʻene misí. Naʻe hā mei he misi ko ʻení, hangē ʻe puleʻi ʻe Siosefa ʻa e fāmilí. Naʻe fakaʻau ke fakalalahi ange e ʻita ʻa e ngaahi tokoua ʻo Siosefá kiate iá. Naʻe ʻikai ke nau saiʻia ʻi heʻene ngaahi misí.
ʻI ha ʻaho ʻe taha, naʻe mamaʻo e ngaahi tokoua ʻo Siosefá mei honau ʻapí ʻi hono fafanga e fanga sipí. Naʻe fekauʻi atu ʻe Sēkope ʻa Siosefa ke ʻalu ʻo vakai kinautolu.
Naʻe loto ha niʻihi ʻo e ngaahi tokoua ʻo Siosefá ke tamateʻi ia. Ne nau vete e kote ʻo Siosefá pea lī ia ki ha luo.
Lolotonga e ʻi he luó ʻa Siosefá, naʻe sio hono ngaahi tokouá ki he fononga ʻa ha kau fefonongaʻaki ki ʻIsipité. Naʻe fakakaukau e kau tautehiná ke fakatau ʻa Siosefa ko ha pōpula ki he kau fefonongaʻakí ʻaki ha konga siliva ʻe 20.
Naʻe ʻai leva ʻe he ngaahi tokoua ʻo Siosefá e toto ʻo ha kosi ʻi hono koté. Naʻe ʻalu e kau tautehiná ki heʻenau tamai ko Sēkopé ʻo fakaʻaliʻali ange hono koté. Ne nau loi kia Sēkope mo talaange naʻe tāmateʻi ʻa Siosefa ʻe ha fanga manu fekai.
Naʻe tangi ʻa Sēkope koeʻuhí naʻá ne fakakaukau kuo mate ʻa Siosefa.
Ka naʻe kei moʻui pē ʻa Siosefa. Naʻá ne mamaʻo mei ʻapi, ʻo moʻui ko ha pōpula ʻi ʻIsipite.