¶ 1 BEA nae nofo a Jekobe i he fonua nae aunofo ki ai ene tamai, io, i he fonua ko Kenani.

2 Koe hako eni o Jekobe. Nae hogofulu ma fitu ae ta‘u o Josefa, bea nae tauhi eia ae faga manu, o fakataha mo hono gaahi taokete; bea nae nofo ae tama moe ogo tama a Bila, bea moe fānau a Siliba, koe ogo jinifu o ene tamai: bea nae omi e Josefa ki he ene tamai e nau ogoogo kovi.

3 Bea nae ofa lahi hake a Isileli kia Josefa i he ene fānau kotoabe, koeuhi ko hono foha ia i he ene motua; bea ne gaohi maana ae kofutua bulebule.

4 Bea kuo mamata hono gaahi taokete, oku ofa lahi hake e nau tamai kiate ia, i hono taokete kotoabe, naa nau fehia ai kiate ia, bea nae ikai te nau lea lelei kiate ia.

5 Bea miji e Josefa ae miji, bea ne tala ia ki hono gaahi taokete; bea nae ajili ai e nau fehia kiate ia.

6 Bea behe eia kiate kinautolu, Oku ou kole ke mou fanogo ki he miji ni, kuou miji aki;

7 He naa tau nonoo ae gaahi u koane i he goue, bea vakai, nae tuu hake eku u koane, o tuu totonu; bea vakai, ko hoo mou gaahi u koane naa nau tutuu hake o takatakai ia, o nau bunou ki he eku u koane.

8 Bea behe e hono gaahi taokete kiate ia, He koe mooni te ke bule kiate kimautolu? bea te ke malohi kiate kimautolu? bea ajili ai e nau fehia kiate ia i he ene miji, mo ene gaahi lea.

¶ 9 Bea miji ia ae miji e taha, bea ne tala ia ki hono gaahi taokete, o behe, Vakai, kuou miji ae miji e taha, bea vakai, koe laa moe mahina, moe fetuu e hogofulu ma taha, naa nau bunou kiate au.

10 Bea ne fakaha ki he ene tamai, mo hono gaahi taokete: bea valoki ia e he ene tamai, o ne behe kiate ia, Koeha ae miji ni kuo ke miji aki? koe mooni e behe au mo hoo fa‘e, mo ho gaahi taokete, he mau bunou akimautolu kiate koe, ki he kelekele?

11 Bea nae meheka a hono gaahi taokete kiate ia; ka nae tokaga ene tamai ki he lea.

¶ 12 Bea nae alu hono gaahi taokete ki Sikemi, ke fafaga ae faga manu ae nau tamai.

13 Bea behe e Isileli kia Josefa, Ikai oku fafaga e ho gaahi taokete ae faga manu i Sikemi? ha‘u, bea teu fekau koe kiate kinautolu. Bea behe eia, Ko au eni.

14 Bea behe eia kiate ia, Ke ke alu, o vakai be oku lelei a ho gaahi taokete, bea lelei moe faga manu; bea ke ha‘u o tala mai. Bea ne fekau ia mei he telea o Hebeloni o ne hoko ki Sikemi.

¶ 15 Bea nae ilo ia e he tagata e taha, bea vakai, nae alu he be ia i he fonua; bea fehui ae tagata kiate ia, o behe, Koeha oku ke kumi?

16 Bea ne behe, Oku ou kumi hoku gaahi taokete; oku ou kole kiate koe, fakaha kiate au ae botu oku nau fafaga ai ae faga manu.

17 Bea beheage e he tagata, Kuo nau o, he naaku fanogo ki he e nau behe, Tau o ki Totani. Bea nae muimui a Josefa ki hono gaahi taokete, bea ne ilo akinautolu i Totani.

18 Bea kuo nau mamata kiate ia, i he ene kei mamao, i he heeki ke ne ofi kiate kinautolu, naa nau alea fakataha, ke tamate‘i ia.

19 Bea naa nau fealeleaaki, o behe, Vakai, oku ha‘u ae faa miji ni.

20 Bea koia ke tau tamate‘i ia bea li ia ki ha luo, bea te tau behe, kuo kai ia e ha manu fekai; bea te tau vakai, be e hoko o fefe ene gaahi miji.

21 Bea fanogo ki ai a Lubeni, o ne fakahaofi ia mei ho nau nima; o ne behe, Oua naa tau tamate‘i ia.

22 Bea behe e Lubeni kiate kinautolu, Oua naa ligi toto, kae li ia ki he luo ni, oku i he toafa, bea oua naa ala ha nima kiate ia; naa ne behe koeuhi ke ne too ia mei ho nau nima, ke toe atu ia ki he ene tamai.

¶ 23 Bea kuo hoko atu a Josefa ki hono gaahi taokete, bea behe, naa nau too ae kofutua o Josefa meiate ia, ae kofutua bulebule nae iate ia;

24 Bea nau ave ia o li ki he luo; bea nae maha be ae luo, nae ikai i ai ha vai.

25 Bea nau nofo ki lalo ke kai ma: bea i he haga hake ho nau mata o jio, bea vakai, nae ha‘u ae fonoga oe kakai Isimeli, nae ha‘u mei Kiliate, moe nau faga kameli, nae fakaheka ki ai ae gaahi akau namu lelei, moe bulu moe bulu nanamu, koe nau fetuku ia ki Ijibite.

26 Bea lea a Juta, o behe ki hono gaahi taokete, Koeha hono aoga, oe tau tamate‘i ho tau tehina, bea fufu hono toto?

27 Ha‘u, ke tau fakatau ia ki he kau Isimeli, kae oua naa iate ia ho tau nima: he ko ho tau tehina ia mo ho tau kakano. Bea loto ki ai a hono gaahi taokete.

28 Bea alu o ofi ki ai ae kakai Mitiani koe kau fakatau: bea naa nau toho hake a Josefa mei he luo, bea nau fakatau a Josefa ki he kau Isimeli, aki ae koga siliva e uofulu; bea naa nau ave a Josefa ki Ijibite.

¶ 29 Bea toe alu a Lubeni ki he luo; bea vakai, nae ikai i he luo a Josefa; bea haehae eia hono gaahi kofu.

30 Bea toe ha‘u ia ki hono gaahi tokoua, o ne behe, Kou ikai ae tama; bea ko au, teu alu kife?

31 Bea naa nau too ae kofutua o Josefa, o nau tamate‘i ae uhiki‘i koji, o nau unu ae kofutua i he toto:

32 Bea nau fakau ke ave ae kofutua bulebule ki he e nau tamai; o nau behe, Kuo mau ilo ae mea ni; bea ke vakai, be koe kofutua o ho foha be ikai.

33 Bea ne ilo ia, o ne behe, Koe kofutua ia o hoku foha; kuo kai ia e he manu fekai; kuo haehae nai, o fakaikiiki a Josefa.

34 Bea haehae e Jekobe hono gaahi kofu, bea ne ai ae tauagaa, bea ne tegihia hono foha o aho lahi.

35 Bea tuu hake hono gaahi foha mo hono gaahi ofefine ke nau fakafiemalie‘i ia; ka nae ikai te ne tali ae fakafiemalie; bea ne behe, He teu alu hifo tagi be ki he faitoka ki hoku foha. Nae behe ae tagi a ene tamai koeuhi koia.

36 Bea nae fakatau ia e he kakai Mitiani ki Ijibite, kia Botifa, koe matābule a Felo, koe bule oe kau leo.