¶ 1 BEA nae hoko o behe, i he ene motua a Aisake, bea kuo kui hono mata, bea nae ikai te ne faa jio, naa ne ui ki hono uluaki foha ko Isoa, o ne behe kiate ia, Ko hoku foha: bea ne behe kiate ia, Vakai, ko au eni.

2 Bea behe eia, Vakai mai, kuou motua, bea oku ikai teu ilo ae aho o eku mate.

3 Bea koeni, oku ou kole kiate koe, ke ke too hoo nāunāu, a hoo tagakaho, mo hoo kaufana, bea ke alu ki he vao mo ke kumi maaku ha manu.

4 Bea ke gaohi maaku ha meakai ifo lelei, o hage ko eku manako, bea ke omi ia kiate au keu kai; koeuhi ke tabuaki koe e hoku laumalie, i he heeki ai teu mate.

5 Bea nae fanogo a Lebeka ki he lea a Aisake ki hono foha ko Isoa. Bea nae alu a Isoa ki he vao ke kumi ha manu mo omi ia.

¶ 6 Bea lea a Lebeka ki he ene tama ko Jekobe, o behe, Vakai mai, naaku fanogo nae lea hoo tamai ki ho tokoua ko Isoa, o behe,

7 Omi maaku ha manu, mo gaohi maaku ae meakai lelei, koeuhi keu kai ia, mo tabuaki koe i he ao o Jihova, i he heeki ai teu mate.

8 Bea koeni, eku tama, ke ke talagofua ki hoku le‘o, o hage koia teu fekau kiate koe.

9 Alu leva ki he faga koji, mo ke omi mei ai ae ogo uhiki‘i koji lelei e ua: bea teu gaohi aki ia ki hoo tamai, ae meakai lelei, o hage ko ene manako.

10 Bea te ke ave ia ki hoo tamai, koeuhi ke ne kai, bea koeuhi ke ne tabuaki koe i he heeki ai te ne bekia.

11 Bea nae beheage e Jekobe ki he ene fa‘e ko Lebeka, Vakai mai, koe tagata fulufulu a Isoa ko hoku tokoua, bea koe tagata molemole au.

12 E ala nai e he eku tamai kiate au, bea teu ha atu kiate ia koe kākā; bea teu omi kiate au ha malaia, kae ikai ha tabuaki.

13 Bea beheage e he ene fa‘e kiate ia, Ko eku tama, ke iate au be ho malaia, ka ke tui be ki hoku le‘o, bea ke alu o omi ia kiate au.

14 Bea nae alu ia o fetuku mo omi ia ki he ene fa‘e; bea gaohi ai e he ene fa‘e ae meakai lelei, o hage koe manako a ene tamai.

15 Bea too e Lebeka ae gaahi kofu lelei o ene uluaki tama ko Isoa, aia nae iate ia i he fale, bea ne ai ia ki he ene tama ki mui ko Jekobe.

16 Bea ne ai ae kili‘i koji ki hono mima moe  botu molemole o hono kia.

17 Bea ne atu ae meakai lelei, moe ma kuo ne gaohi, ki he nima o ene tama ko Jekobe.

¶ 18 Bea nae alu ia ki he ene tamai, o ne behe, Ko eku tamai; bea behe eia, Ko au eni; ka kohai koe hoku foha?

19 Bea behe e Jekobe ki he ene tamai, Ko au Isoa, ko ho uluaki; kuou fai o hage ko hoo fekau kiate au; bea oku ou kole kiate koe, ke ke tuu hake, bea ke nofo o kai mei he eku manu, koeuhi ke ke tabuaki au.

20 Bea beheage e Aisake ki hono foha, Hoku foha nae fefe‘i hao ma‘u vave behe mai ia? Bea ne behe kiate ia, Koeuhi nae omi ia kiate au e Jihova ko ho Otua.

21 Bea behe e Aisake kia Jekobe, Ko hoku foha oku ou kole ke ke unuunu mai, koeuhi keu ala kiate koe keu ilo be ko hoku foha ko Isoa mooni koe, be ikai.

22 Bea unuunu atu a Jekobe ki he ene tamai ko Aisake; bea ne fāfā ia o ne behe, Koe le‘o, koe le‘o o Jekobe, ka koe nima koe nima o Isoa.

23 Bea nae ikai te ne ilo ia, koeuhi nae fulufulu hono nima, o hage koe nima o hono taokete, ko Isoa: bea naa ne tabuaki ia;

24 Bea behe eia, Ko hoku foha ko Isoa mooni koe? bea beheage eia, Ko au ia.

25 Bea behe eia, Omi ke ofi ia kiate au, bea teu kai ae kano‘i manu a hoku foha, koeuhi ke tabuaki koe e hoku laumalie. Bea ne omi ia o ofi kiate ia, bea ne kai ai: bea ne omi kiate ia ae uaine, bea ne inu ai.

26 Bea behe e he ene tamai ko Aisake kiate ia; Ko hoku foha ke ke unuunu mai, o uma kiate au.

27 Bea unuunu atu ia, bea uma kiate ia; bea ne nanamu ki he nanamu o hono gaahi kofu, o ne tabuaki ia, o behe, Vakai, koe nanamu o hoku foha, oku tatau moe nanamu oe goue kuo tabuaki‘i e Jihova:

28 Koia ke foaki kiate koe e he Otua ae hahau mei lagi, moe mahu oe kelekele, bea moe koane, moe uaine, o lahi:

29 Ke tauhi koe e he gaahi kakai, bea ke bunou ae gaahi buleaga kiate koe; ke ke eiki koe ki ho kaiga, bea ke bunou ae gaahi tama a hoo fa‘e kiate koe; ke malaia ia te ne kabe‘i koe, bea ke monuia ia oku ne tabuaki‘i koe.

30 Bea behe, kuo hili ae tabuaki e Aisake a Jekobe, bea nae heeki ke meimei alu ia mei he ao o ene tamai ko Aisake, mo ene ha‘u a hono taokete ko Isoa, mei he ene tuli manu.

31 Bea kuo gaohi eia foki ae meakai ifo lelei, bea ne omi ia ki he ene tamai, bea behe eia ki he ene tamai, Ke tuu hake eku tamai, mo kai ae kano‘i manu a hono foha, bea ke tabuaki au e ho laumalie.

32 Bea beheage e he ene tamai ko Aisake kiate ia, Kohai koe? Bea talaage eia, Ko au, ko ho foha, ko ho uluaki ko Isoa.

33 Bea tetetete lahi aubito a Aisake, o ne behe, Kohai? Kofaa ia naa ne ma‘u ae kano‘i manu, o omi kiate au, bea naaku kai i he mea kotoabe, bea naaku tabuaki ia i he heeki ai te ke ha‘u koe? io bea koe mooni e monuia ia.

34 Bea kuo fanogo a Isoa ki he gaahi lea a ene tamai, bea tagi ia i he le‘o lahi mo fakamamahi, o ne behe ki he ene tamai, Ke ke tabuaki au, io, ko au foki, a eku Tamai.

35 Bea beheage eia, Nae ha‘u a ho tehina i he kākā, bea kuo ne faao o ave a ho tabuaki.

36 Bea behe eia, Ikai kuo totonu ae fakahigoa ia ko Jekobe? he kuo tuo ua ene muaki‘i au: naa ne too o ave ae lelei oe taokete iate au; bea ko eni kuo ne too hoku tabuaki. Bea behe eia, Kuo ikai ha tabuaki te ke tuku maaku?

37 Bea talaage e Aisake kia Isoa, o ne behe; Vakai mai, kuou gaohi ia ko hoo eiki, bea ko hono gaahi kaiga kuou foaki kiate ia ko ene kau tamaioeiki: bea kuou tokoni aki ia ae koane moe uaine: bea koeni, koeha teu fai kiate koe hoku foha?

38 Bea beheage e Isoa ki he ene tamai, He oku taha be hoo tabuaki a eku tamai? ke ke tabuaki au, io, ko au foki a eku tamai. Bea hiki hake e Isoa hono le‘o, bea tagi.

39 Bea beheage e he ene tamai ko Aisake kiate ia, Vakai, ko ho nofoaga e i he lelei oe kelekele, bea moe hahau oe lagi mei oluga.

40 Bea te ke moui i hoo heleta, bea te ke tauhi a ho tehina; bea e hoko, o behe, oka ke ka hoko ki he bule, te ke toki feji‘i hono haamoga mei ho kia.

¶ 41 Bea nae fehia a Isoa kia Jekobe, koeuhi koe tabuaki nae tabuaki aki ia e he ene tamai; bea behe e Isoa i hono loto, Ko eni kuo ofi ae gaahi aho ke tegihia a eku tamai, bea teu toki tamate‘i hoku tehina ko Jekobe.

42 Bea nae fakaha kia Lebeka ae gaahi lea a ene uluaki tama ko Isoa: bea fekau ia ke ui a ene tama ki mui ko Jekobe, o ne behe kiate ia, Vakai, ko ho taokete ko Isoa, oku ne fakafiemalie‘i ia, i he ene behe, ke ne tamate‘i koe.

43 Bea koeni eku tama, ke ke muitala ki hoku le‘o; bea ke tuu o hola ki hoku tuogaane ko Lebani, i Halani;

44 Bea ke nofo mo ia i he aho niihi, ke oua ke oji ae ita a ho taokete.

45 Ke oua ke afe ae ita a ho taokete meiate koe, bea e galo iate ia, aia kuo ke fai kiate ia; bea teu toki fekau o omi koe mei ai: he koe umaa eku majiva iate kimoua oji be, i he aho be taha?

46 Bea behe e Lebeka kia Aisake, Kuou fiu i he eku moui, koeuhi koe gaahi ofefine o Heti; he kabau e fili e Jekobe ha unoho i he gaahi ofefine o Heti, o hage ko kinautolu ni ae gaahi ofefine oe fonua, koeha hono aoga o eku moui kiate au?