Dagiti Estoria iti Nasantuan a Kasuratan
Awaten ni Cornelio ken dagiti Gagayyemna ti Espiritu Santo—Para iti tunggal maysa ti ebanghelio

Dagiti Aramid 10

Awaten ni Cornelio ken dagiti Gagayyemna ti Espiritu Santo

Para iti tunggal maysa ti ebanghelio

Ni Cornelio ken ti pamiliana a tumultulong iti maysa a tao nga agkasapulan.

Ni Cornelio ket maysa a lider dagiti soldado a Romano. Namati isuna ken ti pamiliana iti Dios, ngem saanda a Judio ken saanda nga ammo ti maipapan ken ni Jesucristo. Imbinglay ni Cornelio dagiti adda kenkuana kadagiti napanglaw ken masansan nga agkararag iti Dios.

Dagiti Aramid 10:1–2

Agparang ti maysa nga anghel ken ni Cornelio.

Maysa a malem, immay ti maysa nga anghel ken ni Cornelio bayat ti panagayuno ken panagkararagna. Kinuna ti anghel, “Cornelio, naipangag ti kararagmo.” Nakita ti Dios ti kinaimbagna. Imbaga ti anghel ken ni Cornelio a birokenna ni Apostol Pedro, nga agnanaed iti siudad a maawagan iti Joppe. Ibaga ni Pedro ken Cornelio no ania ti aramidenna.

Dagiti Aramid 10:3–6, 30–32

Ibaga ni Cornelio kadagiti adipenna a birokenda ni Pedro.

Imbaga ni Cornelio kadagiti adipenna ti imbaga ti anghel. Imbaonna ida idiay Joppe tapno kiddawenda ken ni Pedro nga umay sumarungkar kenkuana.

Dagiti Aramid 10:7–8

Ni Pedro a nakaparintumeng ken agkarkararag.

Idiay Joppe, adda ni Pedro iti atep ti balay nga agkarkararag. Mabisin ket mapan koma manganen, idi kellaat a nakitana ti maysa a parmata.

Dagiti Aramid 10:9–10

Adda parmata ni Pablo.

Nakita ni Pedro ti maysa a kasla dakkel nga ules a maipabpababa manipud langit, a napno iti amin a kita ti animal ken tumatayab. Kalpasanna, nangngeg ni Pedro ti timek a mangibagbaga a nasken a kanenna dagita nga animal. Ngem dagitoy dagiti animal a saan a maipalubos a kanen dagiti Judio. Kinuna ti linteg ni Moises a narugit dagitoy. Saan a kinayat ni Pedro a kanen dagitoy.

Dagiti Aramid 10:11–14

Makita manen ni Pedro ti parmata.

Kinuna ti timek a no inaramid ti Dios ti maysa a banag a nadalus, saan koma a maawagan a narugit. Namitlo a naulit ti parmata. Pinampanunot ni Pedro no ania ti kaipapanan daytoy.

Dagiti Aramid 10:15–17

Ibaga ti maysa a timek ken ni Pedro a mapanda mangsabat kadagiti adipen ni Cornelio.

Iti dayta laeng a kanito, imbaga ti Espiritu ken ni Pedro a tallo a lallaki ti agsapsapul kenkuana. “Kumuyogka kadakuada,” kinuna ti Espiritu, “ta imbaonko ida.”

Dagiti Aramid 10:16–21

Kasarita ni Pedro dagiti adipen ni Cornelio.

Adipen ni Cornelio dagiti tallo a lallaki. Imbagada ken Pedro ti maipapan iti anghel a nakita ni Cornelio ket dinamagda no umay ni Pedro a mangisuro kenkuana. Gagangay a saan a sumrek dagiti Judio kadagiti pagtaengan dagiti tao a saan a Judio, ken saan nga insuro kadakuada dagiti Apostol ti ebanghelio. Ngem iti pananglagipna iti parmatana, inkeddeng ni Pedro ti mapan.

Dagiti Aramid 10:22, 28

Naam-ammo ni Pedro ni Cornelio ken ti pamiliana ken gagayyemna.

Idi simmangpet ni Pedro, ur-urayen isuna ni Cornelio a kaduana ti adu a gagayyem ken kapamiliana. Imbagana ken ni Pedro a nakasaganadan a dumngeg iti aniaman nga imbilin ti Dios nga ibagana kadakuada.

Dagiti Aramid 10:26, 33

Isuro ni Pedro ti maipapan ken ni Jesucristo.

Ita naawatan ni Pedro no ania ti isursuro ti Dios kenkuana iti parmata. Imbaga ni Pedro iti tunggal maysa a saan nga ay-ayaten ti Dios ti maysa a nasion wenno grupo dagiti tao nga ad-adda pay ngem iti sabali. Awaten ti Dios ti siasinoman a sumurot Kenkuana ken agaramid no ania ti umiso. Insuro ni Pedro ni Cornelio ken ti pamilia ken gagayyemna maipapan ken ni Jesucristo.

Dagiti Aramid 10:34–43

Binuniagan ni Pedro ti pamilia ken gagayyem ni Cornelio.

Bayat ti panangisurona, immay ti Espiritu Santo iti tunggal maysa a dumdumngeg. Inawis ida ni Pedro nga agpabuniagda iti nagan ni Jesucristo. Naammuan ni Pedro nga amin nga annak ti Dios ket maawat iti Simbaan ni Jesucristo. Naikasaba ti ebanghelio ni Jesucristo iti tunggal maysa.

Dagiti Aramid 10:44–48