Nagungaren

Parmeken ni Jesucristo ti ipapatay para iti amin

Pumanaw dagiti disipulo ni Jesus iti tanemna.

Inkabil dagiti disipulo ni Jesus ti bagina iti tanem. Kayatda nga aramiden ti ad-adu pay a panangaywan iti bagina, ngem dandanin ti Aldaw a Panaginana. Plinanoda ti agsubli kalpasan ti Aldaw a Panaginana a mangileppas.

Lucas 23:52–56

Agsubli ni Maria Magdalena ken dadduma pay iti tanem.

Nasapa a bigat iti maikatlo nga aldaw kalpasan ti ipapatay ni Jesus, napan ni Maria Magdalena ken ti dadduma pay iti tanem.

Lucas 24:1; Juan 20:1

Idi simmangpetda, nakitada a naitulid ti bato a nangabbong iti tanem. Napanda iti tanem, ket awan ti bagi ni Jesus idiay.

Lucas 24:2–3; Juan 20:1

Ibaga ni Maria kada Pedro ken Juan a maysa a tao ti nangala iti bagi ni Jesus.

Nagtaray ni Maria tapno ibaga kada Pedro ken Juan a maysa a tao ti nangala iti bagi ni Jesus. Nagtaray da Pedro ken Juan a napan iti tanem.

Juan 20:2–4

Makita da Pedro ken Juan nga awan ti bagi ni Jesus iti tanem.

Idi nakadanonda iti tanem, simrek da Pedro ken Juan iti uneg. Nakitada nga awanen ti bagi ni Jesus. Adda pay laeng idiay ti lupot a nakabungonanna.

Juan 20:5–7

Makita ni Maria ti dua nga anghel iti tanem.

Nagawid da Pedro ken Juan, ngem nagtalinaed ni Maria iti abay ti tanem, nga agsangsangit. Kimmita iti tanem ket nakitana ti dua nga anghel. Dinamagda kenkuana no apay nga agsangsangit. Kinunana nga adda nangala iti bagi ni Jesus, ket dina ammo no sadino ti ayanna.

Juan 20:11–13

Damagen ni Jesus ken ni Maria no apay nga agsangsangit.

Kalpasanna dimteng ni Jesus, ngem saan nga ammo ni Maria nga Isu daytoy. Dinamag ni Jesus kenkuana, “Babai, apay nga agsangsangitka?” Impagarup ni Maria nga Isu ti hardinero. Dinamagna Kenkuana no ammona no sadino ti ayan ti bagi ni Jesus.

Juan 20:14–15

Tumaliaw ni Maria ket makitana ni Jesus.

Kinuna ni Jesus, “Maria.” Timmaliaw isuna. Ita ammonan a ni Jesus daytoy! Kinunana Kenkuana, “Maestro.” Kiniddaw ni Jesus kenkuana nga ibagana kadagiti dadduma a disipulo a kasapulanna ti mapan iti Nailangitan nga Amana. Nasarakan ni Maria dagiti dadduma a disipulo ket imbagana kadakuada a nakitana ni Jesus ken sibibiag manen!

Juan 20:16–18

Agparang ni Jesus ken makisarita kadagiti Apostolna.

Iti dayta a sardam, naguummong ti adu kadagiti Apostol. Inrikepda dagiti ridaw, ta mabutengda amangan no padasen dagiti lider dagiti Judio ti mangbirok kadakuada. Idi kuan, nakitada ni Jesus a nakatakder iti tengngada. Idi damo nagbutengda. Impagarupda nga espiritu Isuna. Kinuna ni Jesus, “Talna koma ti adda kadakayo.”

Lucas 24:33–38; Juan 20:19

Sagiden ti maysa kadagiti Apostol ti ima ni Jesus.

Inawis ni Jesus dagiti Apostol a mangsagid kadagiti ima ken sakana. Kayatna a maammuanda nga adda bagina, saan laeng nga espiritu. Kaduada pay ketdi a nangan iti ikan ken diro. Naragsakan unay dagiti disipulo a nakakita Kenkuana!

Lucas 24:39–44; Juan 20:20

Isuro ni Jesus ti maipapan iti ipapatay ken Panagungarna.

Kalpasanna, tinulongan ni Jesus dagiti Apostolna a makaawat kadagiti nasantuan a kasuratan a nangisuro maipapan iti ipapatay ken Panagungarna. Kayatna nga isuroda iti tunggal maysa a gapu Kenkuana, mabalinda ti agbabawi ken mapakawan. Dagiti Apostol ti agbalin a saksina.

Lucas 24:44–48

Kasarita ni Tomas iti dua pay nga Apostol.

Awan ni Apostol Tomas idiay idi immay ni Jesus. Kinunana a dina patien a sibibiag ni Jesus malaksid no makitana dagiti lamma ti lansa kadagiti imana.

Juan 20:24–25

Walo nga aldaw kalpasanna, naguummong dagiti disipulo. Nagparang manen ni Jesus. Iti daytoy a gundaway adda ni Tomas sidiay.

Juan 20:26

Agparintumeng ni Tomas iti sanguanan ni Jesus.

Inawis ni Jesus ni Tomas a mangsagid kadagiti sugat kadagiti ima ken bakrangna. Imbagana ken ni Tomas, “Pukawem ta duaduam, ket mamatika.” Kinuna ni Tomas, “Apok ken Diosko.” Ita patien ni Tomas a nagungar ni Jesus. Kinuna ni Jesus a mabendisionan dagiti tao no mamatida, uray no dida pay nakita Isuna.

Juan 20:27–29