Juan 10:1–18

Ni Jesus ti Naimbag a Pastor

“Denggen dagiti karnerok ti timekko, ken am-ammok ida”

Imbaga ni Jesus kadagiti tao iti Jerusalem a maipada Isuna iti naimbag a pastor. Maipada dagiti disipulona, wenno pasurotna, kadagiti karnerona. Ay-ayaten ti naimbag a pastor dagiti karnerona. Ammona ti nagan ti tunggal maysa.

Juan 10:3, 14; kitaen met iti Helaman 15:13

Ammo dagiti karnero ti timek ti naimbag a pastor. No awaganna ida, dumngeg ken agtulnogda.

Juan 10:4, 27

Aywanan ti naimbag a pastor dagiti karnerona. Iturongna ida kadagiti berde a pagpastoran, kas iti panangiturong kadatayo ni Jesucristo iti biag nga agnanayon.

Juan 10:9–10, 28

No matangdanan ti maysa a tao a mangaywan kadagiti karnero, saanda a sumurot kenkuana, gapu ta saanda nga ammo ti timekna. No umay ti peggad, agtaray ti matangdanan a tao. Saan a maseknan kadagiti karnero a kas iti aramiden ti naimbag a pastor.

Juan 10:5, 12–13

Ti naimbag a pastor saan a tumaray no adda peggad. Agtalinaed isuna a mangsalaknib kadagiti karnerona. Natallugod pay isuna a mangted iti biagna gapu kadakuada, kas iti panangted ni Jesucristo iti biagna gapu kadatayo tapno maaddaantayo iti biag nga agnanayon.

Juan 10:11, 17–18

Imbaga ni Jesus kadagiti tao idiay Jerusalem nga adda pay dagiti dadduma a karnerona nga agnaed kadagiti sabali a lugar. Kinuna ni Jesus a sarungkarannanto pay ida, ket denggendanto dagiti pannursurona. Isarita ti Libro ni Mormon maipapan ken ni Jesus a sumarsarungkar kadagiti dadduma pay a karnerona kadagiti America.

Juan 10:16; 3 Nephi 15:11–24