Pakanen ni Jesus ti Rinibu a Tattao

Isu ti Tinapay ti Biag

Naammuan ni Jesus a napapatay ni Juan Bautista. Napan iti maysa a lugar nga adayo kadagiti ili tapno agmaymaysa.

Mateo 14:13

Ni Jesus a makisarsarita iti grupo dagiti tao.

Idi nangngeg dagiti tao no sadino ti napanan ni Jesus, sinurotda isuna. Nakita ida ni Jesus, ket nariknana ti panagayat kadakuada. Binusbosna ti intero nga aldaw a nangbendision ken nangpaimbag kadakuada.

Mateo 14:13–14

Kiddawen ni Jesus kadagiti Apostol nga ikkanda dagiti tao iti kanenda.

Idi mumalemen, mabisbisinen dagiti tao. Impagarup dagiti Apostol a rumbeng nga ibaon ni Jesus dagiti tao kadagiti ili tapno mangalada iti kanenda. Ngem kayat ni Jesus nga agtalinaedda. Kiniddawna kadagiti Apostol nga ikkanda dagiti tao iti kanenda.

Mateo 14:15–16

Masarakan ni Andres ti maysa nga ubing a lalaki nga addaan iti bassit a taraon.

Nasarakan ni Apostol Andres ti maysa nga ubing a lalaki nga addaan iti lima a tinapay ken dua a babassit nga ikan a maited kadagiti tao. Ngem adda 5,000 a lallaki, agraman dagiti babbai ken ubbing, a masapul a mangan. Kasano a mapakanda ti nakaad-adu a tattao nga addaan iti kasta a bassit a taraon?

Mateo 14:17, 21; Juan 6:8–10

Agkararag ken bendisionan ni Jesus ti taraon.

Imbaga ni Jesus kadagiti Apostolna nga iyegda ti taraon Kenkuana. Imbagana kadagiti tao nga agtugawda iti karuotan. Kalpasanna nagkararag ni Jesus tapno agyaman iti Nailangitan nga Ama gapu kadagiti tinapay ken ikan ken tapno bendisionanna dagitoy. Kalpasanna, pinispisina dagiti tinapay ken ikan.

Mateo 14:18–19; Juan 6:10–11

Inted dagiti Apostol ti taraon kadagiti tao.

Kiniddaw ni Jesus kadagiti Apostolna nga itedda ti tinapay ken ikan kadagiti tao. Tunggal maysa ket nangan, ket nabsog ti amin. Kalpasan a nanganda, adda pay laeng 12 a basket a napno kadagiti natda a taraon!

Mateo 14:20; Juan 6:11–13

Agsubli dagiti tao, nga agsapsapul iti ad-adu pay a taraon.

Iti simmaruno nga aldaw, nagsubli dagiti tao ket nasarakanda manen ni Jesus. Ngem ammo ni Jesus nga adu kadakuada ti mangsursurot kenkuana gapu laeng ta inikkanna ida iti kanenda. Impalagip ni Jesus kadakuada a ti taraon ket agpaut laeng iti apagbiit. Adda nasaysayaat nga ipapaayna kadakuada.

Juan 6:14, 24–27

Isursuro ni Jesus nga Isu ti Tinapay ti Biag.

Kinuna ni Jesus, “Siak ti tinapay ti biag.” Ti tinapay ti mangted kadatayo iti biag ditoy daga. Ngem ni Jesucristo ti makaited kadatayo iti agnanayon a biag a kadua ti Nailangitan nga Amatayo.

Juan 6:35–58

Mariribukan dagiti tao iti isursuro ni Jesus.

Adu a tattao ti saan a mangayat iti isursuro ni Jesus. Pimmanawda ket inkeddengda a saandan a sumurot ken ni Jesus.

Juan 6:60, 66

Ibaga ni Pedro ken ni Jesus a saanto a panawan dagiti Apostol.

Kalpasanna kinuna ni Jesus kadagiti Apostolna, “Ket dakayo, kayatyo met ti pumanaw?” Simmungbat ni Pedro, “Apo, siasino pay ti papananmi? Adda kenka dagiti sao a makaited iti biag nga agnanayon.” Saan a pimmanaw dagiti Apostol. Ammoda a ni Jesucristo ti Mangisalakan ken Anak ti Dios.

Juan 6:67–69