Pakauna
Maipapan iti Baro a Tulag
Ti Estoria maipapan ken ni Jesucristo ken dagiti pasurotna
Adda dua a paset ti Biblia: ti Daan a Tulag ken ti Baro a Tulag. Ti Daan a Tulag addaan kadagiti sinurat dagiti propeta manipud iti nabayagen a panawen. Dadduma kadagitoy a propeta ti nagsurat nga inkari ti Dios nga ibaonna ti maysa a Mangisalakan. Isu ti Anak ti Dios ken mangisalakan kadatayo manipud iti basol ken patay tapno agbiagtayo manen a kadua ti Dios.
Isaias 53:3–5; Jacob 7:11; Moises 4
Isalaysay ti Baro a Tulag no kasano a natungpal daytoy a kari. Isalaysayna ti maipapan iti pannakayanak ni Jesucristo, ti Anak ti Dios.
Lucas 2:4–7
Saritaen met ti Baro a Tulag ti maipapan iti biag ni Jesus. Isu ket nakipagnaed kadagiti Judio ken nangisuro kadatayo no kasano ti agbiag tapno makasublitayto iti Nailangitan nga Amatayo.
Mateo 5:1–2
Binendisionan ken nagserbi ni Jesus kadagiti tao. Adu ti inaramidna a milagro para kadakuada, kas iti panangagas kadagiti tao a masakit ken panangpagungarna kadagiti natay.
Mateo 4:23
Pinili ni Jesus ti sangapulo-ket-dua kadagiti pasurotna nga agbalin nga Apostol. Inikkanna ida iti turay a mangidaulo iti Simbaanna.
Lucas 9:1–2
Gapu ta ay-ayatennatayo, inawat ni Jesus iti bagina ti amin a saem, ladingit, ken basoltayo. Natay Isuna para kadatayo. Kalpasanna, iti maikatlo nga aldaw, naparmekna ti ipapatay ket nagungar! Sibibiag ni Jesucristo ken gapu kenkuana, mabalintayo ti agbabawi kadagiti basoltayo ken agbiag manen kalpasan a mataytayo.
Dagiti tao a makaam-ammo ken mangay-ayat ken Jesus ti nangisurat ti maipapan amin kadagitoy. Nangaramid dagiti Apostolna kadagiti surat a mangtulong kadagiti kameng ti Simbaan a mangbangon iti pammatida ken Jesucristo. Dagiti banag nga insuratda ket naisalbar iti adu, adu a tawen. Ita, mabalinyon a basaen dagitoy iti Baro a Tulag ken masursuro no kasano a suroten ni Jesucristo.
Lucas 1:1–4