Nayanaken ti Mangisalakan

Natungpal ti kari ti Dios

Agbaniaga da Jose ken Maria iti Betlehem.

Nagnaed da Joseph ken Maria iti Nazaret. Dandanin aganak ni Maria. Masapul a mapan ti tunggal maysa iti ilina tapno agbayad iti buis. Kayatna a sawen a masapul a mapan da Jose ken Maria idiay Betlehem, ti ili a nakayanakan ni Jose. Masapul nga agbiaheda iti adayo tapno makadanonda sadiay.

Lucas 2:1–5

Saan a nalaka ken ni Maria ti panagdaliasatda. Gapu ta adu ti napan idiay Betlehem, awan ti masarakan da Jose ken Maria a lugar a paganakan ni Maria.

Lucas 2:6–7

Da Maria ken Jose a mangig-iggem iti kayyanak a maladaga a ni Jesus.

Nasarakanda ti lugar a gagangay a pagyaponan kadagiti animal. Iti daytoy nanumo a lugar, nayanak ni Jesus. Inay-ayat ken inaywanan da Maria ken Jose ti maladaga a Jesus. Binalkotda isuna iti lupot tapno matulonganda a saan a malamiisan ken komportable. Impaiddada tapno maturog iti maysa a kulluong, a gagangay a maus-usar a pangpakanan kadagiti animal.

Lucas 2:6–7

Maysa nga anghel nga agparparang iti maysa a grupo dagiti agpaspastor.

Iti asideg, dagiti pastor ti mangbanbantay kadagiti karneroda iti rabii. Pagammuan ta nagraniag ti lawag iti aglawlawda, ket nagparang ti maysa nga anghel. Nagbuteng dagiti pastor.

Ti anghel a mangibagbaga kadagiti pastor a nayanaken ni Jesus.

Imbaga ti anghel kadakuada a dida agbuteng, gapu ta addaan iti nakaskasdaaw a damag! Nayanaken ti Mangisalakan idiay Betlehem, ket mabalin a masarakanda a nakaidda iti maysa a kulluong. Kalpasanna ad-adu pay nga anghel ti immay, a kunkunada, “Dayag iti Dios iti kangatuan, ken ditoy daga talna, naimbag a pagayatan kadagiti tattao.”

Lucas 2:10–15

Dagiti pastor a mangkabkablaaw iti maladaga a Jesus.

Nagdardaras dagiti pastor a napan iti Betlehem ket nasarakanda ti maladaga a Jesus, kas iti imbaga ti anghel. Imbagada kadagiti tao dagiti nakaskasdaaw a banag a nakita ken nangngegda. Ammoda a naisangsangayan nga ubing ni Jesus.

Lucas 2:16–17

Ni Simeon a mangub-ubba iti maladaga a ni Jesus.

Impan da Maria ken Jose ti maladaga a Jesus iti templo tapno idatagda isuna iti Dios. Sadiay a naam-ammoda ti maysa a lalaki nga agnagan iti Simeon. Imbaga ti Espiritu Santo ken ni Simeon a maam-ammona ti Mangisalakan sakbay a matay. Inubbana ti maladaga ket kinunana nga isalakan ni Jesus ti amin nga annak ti Dios. Nasdaaw da Jose ken Maria iti imbagana.

Lucas 2:22–35

Ni Anna a mangkitkita iti maladaga a Jesus.

Iti templo adda maysa pay a tao nga agnagan iti Anna. Natay ti asawana adu a tawenen ti napalabas. Binusbos itan ni Anna ti amin a panawenna a nagdaydayaw iti Dios iti templo. Nagyaman iti Dios gapu iti gundaway a makitana ti Mangisalakan. Tunggal makaam-ammo iti maysa a tao nga agur-uray iti Mangisalakan, ibagana kadakuada ti maipapan ken Jesus.

Lucas 2:36–38

Dagiti masirib a lallaki a mangkitkita iti baro a bituen a nagparang iti tangatang.

Idi nayanak ni Jesus, dagiti masirib a lallaki iti sabali a daga nakitada ti baro a bituen. Ammoda a kaipapananna a nayanaken ti naisangsangayan nga ubing nga agbalinto nga anak ti Dios ken Mangisalakan iti lubong. Nangrugida iti atiddog a panagbiahe tapno sarungkaranda daytoy nga ubing ken agdaydayawda Kenkuana. Kayatda nga iyeg Kenkuana dagiti sagut tapno maipakitada ti panagayatda Kenkuana.

Mateo 2:1–7; kitaen iti Patarus ni Joseph Smith kadagiti notes, 2a

Dagiti masirib a lallaki a mangsapsapul iti Mangisalakan iti Jerusalem.

Kalpasan ti nabayag a panagbiaheda, dimteng dagiti masirib a lallaki iti Jerusalem. Kinunada a nayanak ti baro nga ari dagiti Judio, ti Mangisalakan, ket immayda nga agdaydayaw Kenkuana. Dinamagda no sadino ti pakasarakanda iti baro nga ari.

Mateo 2:1–2

Ibagbaga ni Herodes kadagiti tattaona a birokenda ti baro nga ari.

Nangngeg ti maysa nga ari nga agnagan iti Herodes a dagiti masirib a lallaki ket sapsapulenda ti baro nga ari. Madanagan isuna. Imbaga kenkuana dagiti saserdote ken eskribana a kinuna ti nasantuan a kasuratan a mayanak ti baro nga ari iti Betlehem. Imbaga ni Herodes kadagiti masirib a lallaki nga agsapulda idiay Betlehem ket kalpasanna agsublida tapno ipadamagda kenkuana no nasapulandan ti baro nga ari.

Mateo 2:3–8

Dagiti masirib a lallaki nga agdaydayaw iti maladaga a Jesus.

Simmangpet dagiti masirib a lallaki idiay Betlehem. Sinurotda ti bituen, a nangiturong kadakuada ken Jesus. Idi nasarakanda Isuna ken ni Maria ken Jose, inikkanda ni Jesus iti tallo nga espesial a sagut ken nagdaydayawda Kenkuana. Pinakdaaran ida ti Dios a saanda nga agsubli ken ni Herodes, isu a nagawidda iti sabali a dalan.

Mateo 2:9–12

Maysa nga anghel a mangibagbaga ken ni Jose a kasapulanna nga ipan ti pamiliana idiay Egipto.

Kalpasan a pimmanaw dagiti masirib a lallaki, adda natagtagainep ni Jose. Iti tagtagainep, imbaga ti maysa nga anghel ken ni Jose a makapungtot ni Herodes. Kasapulan nga ipan ni Jose da Maria ken Jesus idiay Egipto tapno natalgedda.

Mateo 2:13

Da Jose, Maria, ken Jesus a mapan idiay Egipto.

Dagus a bimmangon ni Jose. Pimmanaw a napan iti Egipto a kaduana da Maria ken Jesus bayat a rabii pay laeng.

Mateo 2:14

Da Jose, Maria, ken maladaga a Jesus iti pagtaenganda.

Nagyan da Maria, Jose, ken Jesus iti Egipto agingga nga imbaga kadakuada ti anghel a natayen ni Herodes ket natalgeddan nga agsubli. Kalpasanna, nagsublida tapno agyanda idiay Nazaret.

Mateo 2:15, 19–23