Dagiti Estoria iti Nasantuan a Kasuratan
Isubli ni Jesus ti Biag ni Lazaro—“Siak ti panagungar, ken ti biag”

Juan 11:1–46

Isubli ni Jesus ti Biag ni Lazaro

“Siak ti panagungar, ken ti biag”

Da Maria, Marta, ken Lazaro.

Nagnaed da Maria, Marta, ken Lazaro iti siudad a maawagan iti Betania. Namatida ken ni Jesus, ket inayatna ida. Da Maria ken Marta ket kakabsat a babbai ni Lazaro.

Juan 11:1, 5

Agsakit ni Lazaro.

Nagsakit iti nakaro unay ni Lazaro. Adda ni Jesus iti sabali a siudad. Nangipatulod da Maria ken Marta iti mensahe Kenkuana tapno ipakaammoda Kenkuana a masakit ti gayyemna.

Juan 11:1–3

Kuna ni Jesus nga isublinanto ti biag ni Lazaro.

Naguray ni Jesus iti dua nga aldaw. Kalpasanna imbagana kadagiti disipulona a mapandanto idiay Betania. Madanagan dagiti disipulo gapu ta kayat ti dadduma a tattao iti asideg ti Betania a mangdangran ken ni Jesus. Ngem kayat ni Jesus a tulongan ni Lazaro. Kinuna ni Jesus a natayen ni Lazaro, ket Isu ti mangisubli iti biagna.

Juan 11:6–16

Masabat ni Marta ni Jesus.

Sinabat ni Marta ni Jesus iti ruar ti siudad. Kinunana a no nasapsapa nga immay ni Jesus, saan koma a natay ni Lazaro. Inkari ni Jesus nga agbiagto manen ni Lazaro.

Juan 11:17–24

Kasarita ni Marta ni Jesus.

Kinuna ni Jesus, “Siak ti panagungar, ken ti biag.” Dinamagna ken ni Marta no mamati Kenkuana. Kinunana, “Mamatiak a sika ti Cristo, ti Anak ti Dios.”

Juan 11:25–27

Da Marta, Maria, ken Jesus.

Nagsubli ni Marta iti balay ket imbagana ken ni Maria nga immay ni Jesus. Immay ni Maria ket nagruknoy iti sakaanan ni Jesus, nga agsangsangit maipapan iti kabsatna. Nagsangit met ni Jesus. Inayatna da Lazaro, Maria, ken Marta.

Juan 11:28–36

Mapan ni Jesus iti kueba a nakaitaneman ni Lazaro.

Mapan da Jesus, Marta, ken Maria, ken dadduma pay iti kueba a nakaitaneman ni Lazaro. Maysa a dakkel a bato ti nangabbong iti paglukatan. Kinuna ni Jesus a yakarda ti bato.

Juan 11:38–39

Idawat ni Jesus ken ni Marta a mamati Kenkuana.

Ngem imbaga ni Marta ken ni Jesus nga uppat nga aldaw a natayen ni Lazaro. Impalagip ni Jesus ken ni Marta maipapan iti karina. Indawatna kenkuana a mamati.

Juan 11:39–40

Ibaga ni Jesus ken ni Lazaro a rummuar.

Kalpasanna, nagkararag ni Jesus iti Amana. Nagyaman iti Dios ta kanayon a dumdumngeg Kenkuana. Kayat ni Jesus a mamati dagiti tao nga imbaon ti Dios Isuna nga agbalin a Mangisalakan. Kalpasanna, impukkaw ni Jesus, “Lazaro, rummuarka.”

Juan 11:41–43

Rummuar ni Lazaro iti kueba.

Rimmuar ni Lazaro iti kueba. Nabalkot pay laeng Isuna kadagiti kawes ken lupot a nakaitabonanna. Imbaga ni Jesus kadagiti tao nga ikkatenda ti balkotna. Adu kadagiti tao a mangbuybuya iti dayta nga aldaw ti namati itan a ni Jesus ket pudno a Mangisalakan, ti Anak ti Dios.

Juan 11:44–45