Ti Maudi a Pangrabii

Ibinglay ni Jesus ti sakramento

Adda ni Jesus ken dagiti Apostolna iti Jerusalem tapno mangrambak iti Fiesta ti Paskua. Tinawen idi a rambakan dagiti tao a Judio ti Fiesta ti Paskua. Daytoy ti nangtulong kadakuada a manglagip nga, adu a tawenen ti napalabas, adipen idi dagiti pamiliada idiay Egipto, ket tinulongan ida ti Dios a makalibas.

Exodo 12:27

Naguummong ni Jesus ken dagiti Apostolna iti aglawlaw ti maysa a lamisaan.

Bayat ti kaaddada idiay Jerusalem, sangkamaysa a naaddaan iti naisangsangayan a fiesta ni Jesus ken dagiti Apostolna. Segseggaan idi ni Jesus ti panangiranudna kadakuada iti daytoy a pannangan.

Lucas 22:7–15

Ni Jesus a mangbugbuggo iti saka ti maysa kadagiti Apostolna.

Kalpasan ti pannanganda, pinunno ni Jesus ti maysa a malukong iti danum. Rinugianna a bugguan dagiti saka dagiti Apostolna.

Juan 13:4–5

Ni Pedro nga agsalsaludsod no apay a bugbugguan ni Jesus dagiti sakada.

Idi batang ni Pedro, dinamagna no apay nga ar-aramiden ni Jesus daytoy. Ti panagbuggo kadagiti saka ket maysa a banag a gagangay a dagiti laeng adipen ti mangaramid.

Juan 13:6

Ni Jesus a mangisursuro kadagiti Apostolna no kasano ti agiinnayat iti tunggal maysa.

Kinuna ni Jesus a bugbugguanna dagiti sakada tapno mangipakita iti maysa a pagwadan para kadakuada. Kayatna nga agsisinnerbi ken agiinnayatda iti tunggal maysa a kas iti panagayatna kadakuada. No aramidenda daytoy, maammuan dagiti tao nga isuda dagiti disipulona.

Jua 13:14–16, 34–35

Imbaga ni Jesus kadagiti disipulona nga asidegen a matay Isuna. Kinuna ni Pedro a natallugod isuna a matay para ken ni Jesus.

Juan 13:36–38

Ngem ammo ni Jesus a dumdumtengen dagiti narigat a panawen. Imbagana ken ni Pedro a sakbay nga agtaraok ti kawitan iti kabigatanna, mamitlo nga isao ni Pedro a dina am-ammo ni Jesus.

Juan 13:38

Ni Jesus a mangisursuro kadagiti Apostolna maipapan iti Espiritu Santo.

Ammo ni Jesus a mabalin a madanagan wenno mariribukan dagiti Apostolna. Inkarina nga ibaonto ti Dios ti Espiritu Santo kadakuada. Ti Espiritu Santo ti mangliwliwa kadakuada, mangisuro kadakuada, ken mangtulong kadakuada a manglagip no ania ti insuro ni Jesus kadakuada. Imbagana kadakuada a saanda a madanagan wenno mariribukan. Kinunana, “No ay-ayatendak, tungpalenyo dagiti bilbilinko.”

Juan 14:1, 15–16, 26–27

Ni Jesus a mangpirsapirsay iti tinapay para iti sakramento.

Kalpasanna, inaramid ni Jesus ti maysa a banag a naisangsangayan unay tapno matulonganna dagiti Apostolna a kanayon a manglaglagip Kenkuana. Intedna kadakuada ti sakramento. Umuna, binendisionanna ti tinapay, pinirsapirsayna, ket intedna daytoy kadagiti Apostolna. Imbaga ni Jesus kadakuada a panunotenda ti bagina no manganda iti tinapay. Indawatna kadakuada a manglaglagip a matay Isuna para kadakuada.

Mateo 26:26; Lucas 22:19

Ni Jesus a mangbembendision iti arak para iti sakramento.

Imbukbok ni Jesus ti arak iti maysa a tasa. Binendisionanna ti arak ket imbagana kadagiti Apostol nga inumenda daytoy. Imbaga ni Jesus kadakuada a panunotenda ti darana no inumenda iti arak. Indawatna kadakuada a lagipenda nga Isu ket agsagaba, agsayasay iti dara, ken matayto para iti saem ken basbasol ti amin a tattao tapno makapagbabawi ken mapakawantayo.

Mateo 26:27–28; Lucas 22:20

Ni Jesus a mangisursuro kadagiti Apostolna nga agtungpal kadagiti bilinna.

Kalpasanna, inlawlawag ni Jesus nga Isu ket maipada iti puon ti ubas, ken maipada dagiti disipulona kadagiti sanga. No agtalinaed a naisilpo ti sanga iti puon ti ubas, agbunga daytoy. Matay ti sanga a saan a naisilpo iti ubas ket saan a makapagbunga. Kayat ni Jesus a kanayon nga agtalinaed a nasinged Kenkuana dagiti disipulona babaen ti panagiinnayatda iti tunggal maysa ken panangtungpalda kadagiti bilinna.

Juan 15:4–12

Ni Jesus ken dagiti Apostolna a magmagna nga agturong iti Getsemani.

Kalpasan ti panangisurona kadagitoy a banag, nagkanta ni Jesus ken dagiti Apostolna iti maysa a himno. Nagnada nga agturong iti minuyongan a maawagan iti Getsemani.

Mateo 26:30