Dagiti Estoria iti Nasantuan a Kasuratan
Sumakay ni Jesus nga Agturong iti Jerusalem—Pasangbayen dagiti tao ti Mangisalakanda

Mateo 21:1–16

Sumakay ni Jesus nga Agturong iti Jerusalem

Pasangbayen dagiti tao ti Mangisalakanda

Aguray dagiti tao a mangsabat ken ni Jesus iti ruar ti Jerusalem.

Dumani panawen idin ti fiesta ti Paskua, maysa a napateg a fiesta para kadagiti Judio. Adu a tattao ti napan idiay Jerusalem para iti fiesta ti Paskua. Napan met ni Jesus ken dagiti disipulona. Idi nadamag dagiti tao nga umay ni Jesus napanda simmabat Kenkuana.

Mateo 21:1; Juan 12:12–13

Ni Jesus ken dagiti disipulona nga umas-asidegen iti Jerusalem.

Idi nakadanon ni Jesus ken dagiti disipulona iti Jerusalem, kiniddawna kadakuada a mangyegda Kenkuana iti maysa nga asno. Adun a tawen a nasapsapa, kinuna ti maysa a propeta nga umayto ti Mangisalakan a sipapakumbaba, a nakasakay iti maysa nga urbon nga asno.

Mateo 21: 1–7; kitaen met iti Zacarias 9:9

Sumrek ni Jesus iti Jerusalem.

Simrek ni Jesus iti siudad a nakasakay iti asno. Maragsakan unay dagiti tao a makakita Kenkuana. Pinasangbayda Isuna kas maysa nga ari. Nangikabilda kadagiti sanga ti palma ken lupot iti daga a pagnaan ti asno. Nagyamanda iti Dios ket impukkawda ti, “Hosana, Nagasat ti Ari ti Israel nga umay iti nagan ti Apo.”

Mateo 21:8–9; Lucas 19:36–38; Juan 12:13

Buyaen dagiti tao ni Jesus.

Nagsiddaaw ti adu a tattao idiay Jerusalem no ania ti mapaspasamak. “Siasino daytoy?” sinaludsodda. Insungbat dagiti dadduma a ni Jesus a taga Nazaret.

Mateo 21:10–11

Makita ni Jesus dagiti tao nga agpaspasukat iti kuarta iti templo.

Kalpasanna, napan ni Jesus iti templo. Sumagmamano a tattao sadiay ti agpaspasukat iti kuarta ken aglaklako kadagiti animal a maisakripisio. Ammo ni Jesus a saanda a napudno.

Mateo 21:12

Ibaga ni Jesus kadagiti tao nga agpaspasukat iti kuarta a pumanawda iti templo.

Saan a nagustuan ni Jesus a makagun-odda iti kuarta manipud kadagiti tao nga agtarigagay nga agdaydayaw iti templo. Pinaruarna ida iti templo ken binalintuagna dagiti lamisaanda. Kinunana, “Managananto ti balayko iti balay a pagkararagan; ngem pagbalinenyo met a rukib dagiti mannanakaw.”

Mateo 21:12–13; kitaen met iti Isaias 56:7; Jeremias 7:11

Agasan ni Jesus dagiti tao iti templo.

Immasideg dagiti tao a bulsek wenno saan a makapagna ken ni Jesus idiay templo, ket inagasanna ida. Impukkaw dagiti ubbing ti “Hosanna,” nga agdaydaydayaw ken ni Jesus ken kunkunada nga Isu ti Mangisalakan.

Mateo 21:14–15

Makisarita ni Jesus kadagiti saserdote ken eskriba.

Sumagmamano kadagiti saserdote ken eskriba ti nakapungtot idi nakitada ti inaramid ni Jesus ken nangngeganda no ania ti isasao dagiti ubbing. Impalagip ni Jesus kadakuada ti maipapan iti maysa a nasantuan a kasuratan a mangibaga nga aramiden ti Dios ti naan-anay a panagdaydayaw nga aggapu iti ngiwat dagiti ubbing.

Mateo 21:15–16; kitaen met iti Salmo 8:2