Lucas 2:39–52

Ti Ubing a ni Jesus

Panagsursuro ken panagdakkel

Dimmakkel ni Jesus iti ili ti Nazaret a kaduana da Maria ken Jose. Iti panaglabas ti panawen, ad-adda a nasursurona ti maipapan iti Nailangitan nga Ama. Nagsagana para iti trabaho a kayat ti Nailangitan nga Ama nga aramidenna.

Lucas 2:39–40; Doktrina ken Katulagan 93:12–14

Idi agtawen ni Jesus iti 12, napan idiay Jerusalem a kaduana ti pamilia ken gagayyemna tapno rambakanda ti fiesta ti Paskua. Nagyanda idiay iti uneg ti sumagmamano nga aldaw.

Lucas 2:41–43

Iti panagawidda, nadlaw da Jose ken Maria a saanda a kadua ni Jesus. Nagsublida idiay Jerusalem tapno sapulenda Isuna. Madanaganda unay.

Lucas 2:44–46

Kalpasan ti tallo nga aldaw a panangsapsapul da Maria ken Jose, kamaudiananna nasarakanda met lang ni Jesus. Adda Isuna iti templo, a makisarsarita iti sumagmamano a mannursuro maipapan iti nasantuan a kasuratan. Nagsalsaludsod kenkuana dagiti mannursuro. Nasdaawda iti kaadu ti ammo ken pannakaawat ni Jesus!

Lucas 2:46–47; kitaen met iti Patarus ni Joseph Smith iti footnote 46c

Imbaga ni Maria ken ni Jesus no kasano ti panagdanagda idi dida masarakan Isuna. Insungbat ni Jesus nga ar-aramidenna ti trabaho ti Amana. Nagsubli ni Jesus idiay Nazaret a kaduana ti pamiliana. Tinungpalna da Maria ken Jose.

Lucas 2:48–52

Intultuloy ni Jesus ti nagsursuro. Dimmakkel ken pimmigsa. Ay-ayaten Isuna ti Nailangitan nga Ama ken tinulonganna nga agsagana para iti misionna. Ay-ayaten ni Jesus dagiti tattao iti aglawlawna, ken ay-ayatenda Isuna.

Lucas 2:52