Mataupu 22

Mataupu Faavae ma Feagaiga 59–62

Faatomuaga ma le Faasologa o Taimi

I le Aso Sa, 7 Aokuso, 1831, na maua ai e le Perofeta o Iosefa Samita le faaaliga o loo tusia i le Mataupu Faavae ma Feagaiga 59 a o i ai i le Itumalo o Jackson, Misuri. I le faaaliga lenei ua faatulaga mai ai e le Alii Ona faamoemoega mo le Au Paia o e sa le i leva ona taunuu atu i Siona, e aofia ai le tausia lelei o le Aso Sapati. Na faamautuina mai foi e le Alii o i latou e tausia Ana poloaiga, o le a maua faamanuiaga faaleagaga ma faaletino.

I le aso na sosoo ai, na sauni ai Iosefa Samita ma nisi o toeaina e tuua Initipene, Misuri, ma toe foi atu i Ohaio. I le faaaliga o loo tusia i le Mataupu Faavae ma Feagaiga 60, na faatonuina ai e le Alii ia toeaina e talai atu le talalelei a o latou malaga. I le aso lona tolu o la latou malaga, sa aafia ai le vaega i se tulaga matautia i le Vaitafe o Misuri. I isi aso e lua na sosoo ai, aso 12 ma le 13 Aokuso, sa maua ai e le Perofeta faaaliga e lua, ia o loo tusia i le Mataupu Faavae ma Feagaiga 61 ma le 62. O loo aofia ai upu o faatonuga, lapataiga, faamafanafanaga, ma faamalosiauga.

2–3 Aokuso, 1831Na faapaiaina ai le laueleele i le Itumalo o Siakisone, mo le faavaeina o Siona, ma sa faapaiaina ai foi se nofoaga mo le malumalu i Initipene, Misuri.

4 Aokuso, 1831Na faia se konafesi a le Ekalesia i le Itumalo o Siakisone, Misuri.

7 Aokuso, 1831Ina ua mavae se ma’i na feagai ai a o faimalaga mai Ohaio i Misuri ma le Au Paia i Kolesavile, sa maliu Polly Knight, le faletua o Iosefa Knight le Matua, i le Itumalo o Siakisone, Misuri.

7 Aokuso, 1831Na maua mai ai le Mataupu Faavae ma Feagaiga 59.

8 Aokuso, 1831Na maua mai ai le Mataupu Faavae ma Feagaiga 60.

9 Aokuso, 1831Na tuua e Iosefa Samita ma ni toeaina e toasefulu ia Misuri mo Katelani, Ohaio, ma malaga e ui atu i le Vaitafe o Misuri.

12–13 Aokuso, 1831Na maua mai ai le Mataupu Faavae ma Feagaiga 61 ma le 62.

27 Aokuso, 1831Sa taunuu ai Iosefa Samita i Katelani, Ohaio

Mataupu Faavae ma Feagaiga 59: Talaaga Faasolopito Faaopoopo

I le Aso Sa 7 Aokuso, 1831, sa auai atu ai le Perofeta o Iosefa Samita i le sauniga o le maliu o Polly Knight, le faletua o Iosefa Knight le Matua, ma o le tagata muamua lea o le Ekalesia ua maliu i Siona. O Polly o se tagata o le Paranesi a Kolesavile, ma sa tuua Ohaio ma le naunautai e fia vaai i le laueleele o Siona. E ui i lona gasegase ua ui, “sa le ioe o ia e taofi lona malaga mai,” na toe ta’ua ai e lana tama tama o Newel. “Na pau lava lona manao, po o lona manao silisili, ia tuvae i luga o le laueelele o Siona, ma ia tanumia lona tino i lena laueleele. … Sa tuuina mai ia te ia e le Alii le manaoga o lona loto, ma sa ola o ia e tuvae i lena laueleele” “Newel Knight’s Journal,” i le Scraps of Biography: Tenth Book of the Faith Promoting Series [1883], 70; tagai foi History of the Church, 1:199, footnote). I le aso lava lea o le falelauasiga o Polly Knight, sa maua ai e Iosefa le faaaliga o loo tusia i le Mataupu Faavae ma Feagaiga 59, lea o loo folafola mai ai faamanuiaga e faavavau mo le Au Paia faamaoni i Siona.

I le taumafanafana o le 1831, a o faamautu tagata o le Ekalesia i le Itumalo o Siakisone, Misuri, sa latou fetaiai ma se nuu i le laina tuaoi o a latou amioga sa matua feteenai lava ma tulafono ma tulaga faatonuina o le talalelei. Sa malosi taaloga faitupe, inuga, ma vesiga i tagatanuu, o nisi na o mai i laina tuaoi o Misuri e aloese ai mai le faamasinoga tonu o le tulafono. Sa matua iloagofie foi le le amanaiaina e nei tagatanuu o le aso Sapati sa le gata ina matauina e le Au Paia ae faapea foi i isi tagata faimalaga na o mai i Misuri. Sa matau e se tasi misionare Porotesano: “O le tausiga o le Sapati Kerisiano iinei e peiseai e le iloa. O se aso o faatauga, fiafiaga, inuga, taaloga faitupe, ma amioga masani aneti-Kerisiano” ( i le T. Edgar Lyon, “Independence, Missouri, and the Mormons, 1827–1833,” BYU Studies, vol. 13, no. 1 [1972], 16). Sa matauina e se tagata faimalaga i Misuri sisifo i le 1833 e faapea “na pau lava mea sa iloa ai o se Aso Sa [o] Taaloga Faitupe ma le pisapisao ma potopotoga taamilo i falekalapu” (Edward Ellsworth, in John Treat Irving Jr., Indian Sketches: Taken during an Expedition to the Pawnee Tribes (1833), ed. John Francis McDermott, new ed. [1955], xxii). I lea siosiomaga sa aotele mai ai e le Alii ia tulaga faatonuina o amio mo na Au Paia e faapotopoto i Siona.

Ata

Faafanua 8: O Misuri, Ilinoi, ma le Eria o Iowa o le Iunaite Setete

Mataupu Faavae ma Feagaiga 59

Ua aoao e le Alii le Au Paia e uiga i le aso Sapati ma folafola atu i ai faamanuiga faalelalolagi ma le faavavau i e faamaoni.

Mataupu Faavae ma Feagaiga 59:1–4. “O le a faapaleina … ma poloaiga e le itiiti”

O e faamaoni e maliliu “o le a malolo mai ia latou galuega uma” ma faapaleina i le lagi (MF&F 59:2).

Na folafola mai e le Alii ia faamanuiaga e faavavau i le Au Paia o e sa usiusitai i Lana talalelei ma sa o mai i le laueleele o Siona faatasi ma le manatu tasi i Lona viiga. Na Ia folafola mai foi le faapale, pe tauia, Ana Au Paia faamaoni “i poloaiga e le itiiti ma faaaliga i o latou taimi” (MF&F 59:4). Sa faamalamalama mai e Peresitene Dallin H. Oaks o le Au Peresitene Sili e faapea o poloaiga a le Alii o faamanuiaga:

“O poloaiga o se faamanuiaga … aua ua tuuina mai e lo tatou Tama o i le lagi ia i tatou ina ia fesoasoani ai ia tatou tuputupu ae ma atiina ae uiga auaumama e tatau ona tatou maua pe afai tatou te fia maua le ola e faavavau ma mau faatasi ma ia. O le tausia o poloaiga, tatou te agavaa ai mo ana faamanuiaga. …

“E tatau ona tatou olioli i poloaiga a le Atua ma aloaia o ni meaalofa taua mai se Tama i ana fanau” (“The Blessings of Commandments,” [Brigham Young University devotional, Sept. 10, 1974], 2, 4, speeches.byu.edu).

Mataupu Faavae ma Feagaiga 59: 5–8. “Ia e alofa atu i le Alii lou Atua”

Ina ua uma ona faamalamalama mai faapea o e faamaoni o le a faapaleina i faamanuiaga, poloaiga, ma faaaliga, sa faamamafa mai e le Alii ia ni poloaiga i le Au Paia, na amata i le poloaiga ia alolofa i le Atua ma o tatou loto atoa, manatu, mafaufau, ma le malosi atoa. Na faamalamalama mai e Peresitene Ezra Taft Benson (1899–1994) e faapea o le poloaiga ia alofa i le Atua e aofia ai vaega uma o o tatou olaga:

“Ia alofa i le Atua ma lou loto atoa, agaga, mafaufau, ma le malosi ua aofia uma ai ma siomia uma ai. E le o se taumafaiga faavaeluatai. O le tautinoga atoatoa o o tatou tagata—faaletino, faalemafaufau, faalelagona, ma faaleagaga—i se alofa o le Alii.

“O le lautele, loloto, ma le maualuga o lenei alofa o le Atua ua oo ifo i vaipanoa uma o le olaga o le tagata. O o tatou faanaunauga, pe faaleagaga pe faaletino, e ao ina mauaa i se alofa i le Alii. E ao ona taulai atu o tatou mafaufauga ma le valevalealofa i le Alii. …

“E tatau ona tatou tuu faamuamua le Atua i mea uma i o tatou olaga. E tatau ona muamua lava o Ia, e faapei ona Ia tautino mai i le uluai poloaiga o Ana Poloaiga e Sefulu: ‘Aua nei e fai mo oe ni atua ese i o’u luma’ (Esoto 20:3).

“Pe a tatou faamuamua le Atua, o isi mea uma lava o le a oo atu i o latou tulaga tatau po o le aveese foi mai o tatou olaga. O lo tatou alolofa i le Alii o le a pulea mea o loo manaomia mai lo tatou alofa, o mea o loo manaomia mai ai o tatou taimi, o mea tatou te fiafia i ai o loo tuliloaina, ma le faatulagaga o a tatou mea e faamuamua” (“O Le Poloaiga Sili—Alofa i le Alii,” Liahona, Iulai 1988, 4).

A tatou alolofa i le Atua ma o tatou loto atoa, e soloa’i faanatura mai lava lo tatou naunau e usitai i Ana poloaiga, auauna atu ia te Ia, ma alolofa i o tatou tuaoi e pei o i tatou lava (tagai MF&F 59:6). Afai tatou te alolofa moni i le Atua ma o tatou tuaoi, o le a tatou le mananao lava e agasala atu ia i latou e ala i le gaoi, mulilulua, fasioti tagata, po o le faia o “soo se mea faapena” (MF&F 59:6). Afai tatou te alolofa i le Atua o le a tatou faailoa atu Lona aao i o tatou olaga ma avatu le faafetai ia te Ia “i mea uma” (MF&F 59:7) ma o le a ofo atu ma le fiaifa ia te Ia se loto momomo, po o se loto ua salamo ma nutimomomo, agaga usiusitai (tagai MF&F 59:8).

Mataupu Faavae ma Feagaiga 59:8. “Ia e osi atu se taulaga … o le loto momomo ma le agaga salamo.”

Ina ua mavae Lona maliu ma le Toetu, sa ta’u atu e le Faaola ia Sa Nifae ua le tatau ona latou toe osi atu ni taulaga o le toto ia te Ia, ae o le a latou osi atu taulaga o se loto momomo ma se agaga salama (tagai 3 Nifae 9:19--20). Na saga ta’u faafia mai e le Alii lenei taulaga fou i faaaliga i ona po nei, e aofai ai ma le faaaliga i le Au Paia o e sa saili e faavaeina Siona (tagai MF&F 59:8; tagai foi MF&F 20:37; 56:17–18; 97:8).

O le i ai o se loto momomo ma se agaga salamo o lona uiga ua tatou lotomaualalo ma gauai atu i le finagalo o le Atua. O lona uiga ua tatou lagonaina le faanoanoa ona o le agasala ma ua naunau faamaoni e salamo ma ola e tusa ai ma le fuafuaga a le Atua…Na faamalamalama mai e Elder Bruce D. Porter (1952–2016) o le Fitugafulu le ala na faaaoao mai ai i le soifuaga o le Faaola le uiga o lena mea:

“O le a se loto momomo ma le agaga salamo?” Ae aisea foi ua manatu ai o se taulaga lena mea?

“E faapei o mea uma lava, o le soifuaga o le Faaola ua tuuina mai ai ia i tatou le faataitaiga atoatoa: e ui o Iesu le Nasareta sa matua aunoa ma se agasala, sa femaliuai o Ia i le olaga faatasi ai ma se loto momomo ma se agaga salamo, e pei ona sa faaalia mai i Lona gauai atu i le finagalo o le Tama. “Aua ou te le’i alu ifo mai le lagi e fai lo’u lava loto, ao le finagalo o Le ua auina mai a’u’ (Ioane 6:38). Na Ia fetalai atu i Ona soo, “Ia outou faaaoao ia te au; aua o a’u le agamalu ma le lotomaulalo” (Mataio 11:29). Ma ina ua oo mai le taimi e totogi ai le taulaga faaiu lea e aofia i le Togiola, sa lei solomuli Keriso e inu i le ipu oona ae sa gauai atoa atu i le finagalo o Lona Tama.

“O le gauai atoatoa atu o le Faaola i le Tama Faavavau, o le uiga tonu lea o se loto momomo ma se agaga salamo. O faataitaiga a Keriso ua aoao mai ai ia i tatou o le loto momomo o se uiga e faavavau o le tulaga faaleatua. A momomo o tatou loto tatou te nofouta lelei i le Agaga o le Atua ma iloa lo tatou faalagolago ia te Ia, i mea uma ua tatou maua ma o tatou tagata uma. O le taulaga e oo mai i lenei tulaga, o se taulaga o le faamaualuga i ona tulaga uma. E faapei o le omea vaivai i lima o se fai ipu omea tomai, o le loto momomo e mafai ona moloina ma faafoliga i lima o le Matai” (“O Se Loto Momomo ma se Agaga Salamo,” Ensign po o le Liahona, Nov. 2007, 31–32).

Sa fautuaina mai e Elder D. Todd Christofferson o le Korama a Aposetolo e Toasefululua se tasi auala e mafai ona tatou osi atu ai lenei taulaga i le Alii:

“E mafai ona e ofoina atu i le Alii le meaalofa o lou loto momomo po o le loto salamo, ma lou agaga nutimomoia, po o le agaga usitai. O le mea moni lava, o le meaalofa o oe lava—o le tagata o e i ai ma le ituaiga tagata ua avea ai oe.

“Pe o i ai ea se mea ia te oe poo lou olaga e le o mama, pe le o agavaa? Pe a mafai ona e lafoa’ia lena mea, o se meaalofa lena i le Faaola. Pe o i ai ea se mausa lelei po o se uiga tausaafia e le o maua i lou olaga? Pe afai e te taliaina ma avea o se vaega o lau amio, ua e avatua se meaalofa i le Alii” (“Pe a Liua Mai Oe,” Ensign po o le Liahona, Me 2004, 12).

Mataupu Faavae ma Feagaiga 59:9–15. “Ia tausia atili atoatoa oe lava i le le pisia mai le lalolagi”

I Ona toe taimi i le olaga nei, sa tatalo atu ai le Faaola ia le aveeseina e le Tama Ona soo “i le lalolagi” ae “tausi ia te i latou ina ne’i leaga” (Ioane 17:15). Toeitiiti atoa le lua afe tausaga mulimuli ane, sa maua e Ana Au Paia i Misuri i latou lava o lotolotoi ai i tagata e le tapasaina ma e le mafaufau, ae sa folafola atu e le Alii e mafai ona tumau lo latou le pisia mai le agasala ma le amioletonu o le lalolagi pe afai o le a latou tapuai ma faamamaluina o Ia “i [Lona} aso paia” (MF&F 59:9).

Sa faamalamalama mai e Elder Quentin L. Cook o le Korama a Aposetolo e Toasefululua le ala e fesoasoani ai le faamamaluina o le aso Sapati e tausisia ai i tatou ia le pisia mai le lalolagi: “O le faamamaluina o le Sapati o se aga o le amiotonu lea o le a faamanuiaina ai ma faamalolosia aiga, faafesootai atu ai i tatou i lo tatou Foafoa, ma faateleina ai le fiafia. E mafai ona fesoasoani le Sapati e tavavaeese ai i tatou mai mea faalavelave, e le talafeagai pe le mama. E mafai ai e i tatou ona i ai i le lalolagi ae e le o ni o le lalolagi” (“To’a le Tai ma Sitaili Faa-Bristol: Ia Agavaa mo le Malumalu—i Taimi Lelei ma Taimi Leaga,” Ensign or Liahona, Nov. 2015, 41–42).

Mataupu Faavae ma Feagaiga 59:9 “Ia avatu ai au faamanatuga i Lo’u aso paia”

Sa faamalamalama mai e Elder Jeffrey R. Holland o le Korama a Aposetolo e Toasefululua e faapea “o se faamanatuga e mafai ona avea o soo se tasi o le mau taga fai po o gaoioiga po o sauniga ia e soofaatasi atu ai i tatou ma le Atua ma ona mana e le faatuaoia” (“Of Souls, Symbols, and Sacraments,” in Jeffrey R. Holland and Patricia T. Holland, On Earth As It Is in Heaven [1989], 193). O taga fai e faalatalata atili ai i tatou i le Atua ma faatumuina ai i tatou i Lona mana e aofia ai le tatalo, usuina o viiga, tuuina atu ma le mauaina o faamanuiaga faaleperisitua, faasoa atu o molimau, suesue o tusitusiga paia, tuuina atu o auaunaga, ma le faafouina o feagaiga e ala i le aai ma feinu i le faamanatuga.

O le auai i le faatinoga o le sauniga o le faamanatuga ma le tapuai i le aso Sapati, tatou te maua ai le malosi e faasagatau atu ai i faaosoosoga ma le agasala.

Mataupu Faavae ma Feagaiga 59:10. Aisea ua poloaiina ai i tatou e le Alii e malolo mai a tatou galuega?

Ua atofa e le Alii le aso Sapati o se aso e malolo ai mai gaosa o a tatou galuega i aso taitasi. O se aso mo le faafouga faaleagaga ma le faaletinoSa faamamafa mai e Peresitene James E. Faust (1920–2007) o le Au Peresitene Sili nisi o faamanuiaga o le malolo mai a tatou galuega i le aso Sapati: “I se matauga i le olaga atoa, ua manino mai ai ia te au e faapea o le faatoaga e tausia le aso Sapati e foliga mai e tele atu mea na te faia i lana faatoaga nai lo le mea e i ai pe a faapea e faigaluega o ia i aso e fitu. O le a mafai e le enisinia ona tele atu mea na te faia ma sili atu fua i aso e ono nai lo aso e fitu. O le fomai, le loia, le fa’inifo, le sainitisi o le a tele atu mea e ausia e ala i le taumafai e malolo i le Sapati nai lo lona taumafai e faaaoga aso uma o le vaiaso mo lana galuega faapolofesa. Ou te fia fautuaina tagata aooga uma, afai latou te mafai, ia faatulaga lisi o a latou mea e fai ina ia aua nei faia a latou suesuega i le Sapati. Afai e faia e tagata aoao ma isi o sailia le upumoni lenei mea, o le a segia o latou mafaufau ma o le taitai e le Agaga e le mafuatiaina i latou i mea moni latou te mananao e aoao. E afua ona ua faapaiaina e le Atua lona aso ma faamanuiaina o se feagaiga e faavavau o le faamaoni. (TagaiEs. 31:16.)” (“O Le Aso o le Alii,” Liahona, Ian. 1992, 34).

E taua le manatuaina e faapea o le poloaiga a le Alii e malolo mai galuega faaletino i le Sapati e le o se valaaulia mo le paie. I le Mataupu Faavae ma Feagaiga 59:9–13, na faatonuina ai e le Alii le Au Paia i mea e tatau ona latou fai i le aso Sapati. Na aoao mai Peresitene Spencer W. Kimball (1895–1985): “O le Sapati o se aso paia e faia ai mea e agavaa ma paia. O le malolo mai galuega ma mea faafiafia e taua, ae e le lava lena. Ua valaau mai le Sapati mo mafaufauga ma faatinoga auau mama, ma afai e na ona nofonofo vale se tasi e leai se mea e faia i le Sapati, ua ia solia lava“ (Aoaoga a Peresitene O Le Ekalesia: Spencer W. Kimball [2006], 170).

Mataupu Faavae ma Feagaiga 59:10. “Avatu au tapuaiga i Le Silisili Ese”

Ina ia avatu a tatou tapuaiga i Atua Silisili Ese o le manatuaina lea, tapuai, ma auauna atu i le Alii ma o tatou loto atoa. O tapuaiga tatou te avatu i le Alii i Lona aso paia e atagia ai lo tatou alolofa ma le migao mo ma le faatuatua ia te Ia. Na aoao mai Peresitene Russell M Nelson o le Au Peresitene Sili:

“E faapefea ona tatou faapaiaina le aso Sapati? A o ou laitiiti, sa ou suesue i lisi na faia e isi e faatatau i mea e fai ma mea e le faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi. Faatasi ai ma lena malamalamaaga, sa ou le toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te au, ‘O le a le faailoga ou te manao e avatu i le Atua?’ O lena fesili e matua manino mai ai lava a’u filifiliga e uiga i le aso Sapati. ….

“Pe mafai faapefea ona e faamautinoa o lau amio i le Sapati o le a taitaia oe i le olioli ma le fiafia? E faaopoopo atu i lou alu i le lotu, ‘ai ma inu i le faamanatuga, ma le filiga i lou valaauga patino e auauna atu, o a nisi gaoioiga o le a fesoasoani ai e avea le Sapati ma se aso fiafia mo oe? “O le a se faailoga o le a e avatu i le Alii e faaalia ai lou alofa mo Ia?” (“O Le Sapati o se Mea Fiafia,” Ensign po o le Liahona, Me 2015, 130).

Mataupu Faavae ma Feagaiga 59:23 “Ta’uta’u atu au agasala … i luma o le Alii”

O le aso Sapati o se aso e mafaufau loloto ai ma manatunatu ma faailoa atu a tatou agasala i luma o le Alii. Na aoao mai Elder L. Tom Perry (1922–2015) o le Korama a Aposetolo e Toasefululua:

“Tatou te faailoa atu o i tatou uma e faia ni mea sese. E manaomia e i tatou taitoatasi ona ta’uta’u atu ma lafoai a tatou agasala ma mea sese i lo tatou Tama Faalelagi ma isi na tatou faatiga i ai. O le Sapati tatou te maua ai se avanoa taua e ofo atu ai nei—a tatou faamanatuga—i le Alii. …

“Na fautuaina mai e Elder Melvin J. Ballard, ‘Matou te mananao i Au Paia uma o Aso e Gata Ai e o mai i le la’o’ai o le faamanatuga aua o le nofoaga mo le sailiiliga ifo ai o le tagata lava ia, mo le suesue ifo ai o oe lava, lea e mafai ai ona tatou aoao e toe faalelei o tatou ala ma toe faasa’osa’o o tatou lava olaga, ma aumaia i tatou lava ia ogatusa ma aoaoga a le Ekalesia ma o tatou uso ma tuafafine’ [in Bryant S. Hinckley, Sermons and Missionary Services of Melvin Joseph Ballard (1949), 150]” (“O Le Sapati ma le Faamanatuga,” Ensign po o le Liahona, Me 2011, 8).

E alofa mutimutivale le Alii ia i latou o e “ta’uta’u atu a latou agasala ma lotomaualalo” (MF&F 61”2).

Mataupu Faavae ma Feagaiga 59:13–14. “Ina ia atoatoa lau anapogi”

I le aso Sapati e tatau ona tatou faapaia atu o tatou loto atoatoa i le Alii. Ua poloai mai le Alii e ao lava foi ona tatou saunia a tatou meaai “ma le manatu tasi o le loto” (MF&F 59:13), faatasi ma o tatou naunauga ma mafaufauga e taulai i mea a le Atua. A o tatou tuuto atu i tatou lava i le Alii, ona atoatoa lea o a tatou anapogi.

O le Sapati lava ia o se anapogi—o se anapogi mai galuega faaletino ma atugaluga o le lalolagi. E faapei ona tatou taofia i tatou mai meaai ma le feinu pe a anapopogi, tatou te taofia foi i tatou mai mea tatou te fiafia i ai i le aso Sapati ina ia tapuai atu ai ma auauna atili atu ma le atoatoa i le Alii.Na aoao mai Peresitene Russell M. Nelson: “E le tulimataia ‘lou lava fiafia’ [Isaia 58:13] i le Sapati e manaomia ai le pulea o oe lava. Atonu e manaomia ai le aloese mai mea e te manao i ai. Afai e te filifili e faafiafia oe lava i le Alii, o le a e le faatagaina oe lava e faia e faapei o soo se isi lava aso” (“O Le Sapatai o se Aso Fiafia,” Ensign po o le Liahona, Me 2015, 132).

Mataupu Faavae ma Feagaiga 59:16–21. “O i latou o e latou te le tautinoina lona aao i mea uma”

Ua folafola mai e le Alii ia faamanuiaga o le eleele ia i latou o e tausia ia paia le aso Sapati, “ma ua fiafia le Atua ua ia tuu mai nei mea uma i le tagata” (MF&F 59: 20). Peitai, tatou te faatausuai, pe faatiga i le Atua pe a tatou le faailoa atu Lona aao i mea uma ua Ia tuuina mai ia te i tatou ma faaali atu lo tatou lotofaafetai ia te Ia.Na faamalamalama mai e Elder Dieter F. Uchtdorf o le Korama a Aposetolo e Toasefululua le taua o le iloaina o le aao o le Alii i mea uma:

“Pe le o i ai ea ni mafuaaga ia i tatou e faatumulia ai i le lotofaafetai, e tusa lava po o a ni tulaga tatou te oo i ai? …

“E matua faamanuiaina lava i tatou pe a tatou faailoaina galuega alofilima a le Atua i tosimamanu ofoofogia o le olaga. O le lotofaafetai i lo tatou Tama i le Lagi e faalauteleina ai la tatou vaai ma manino ai lo tatou malamalama. Na te musuiaina le lotomaualalo ma faafaileleina le tigaalofa i o tatou uso a tagata faapea ai ma foafoaga uma a le Atua. O le lotofaafetai o se vaega taua o uiga paia uma faaKeriso! O se loto e tumu i le faafetai i le matua lea o uiga mama uma” (“Ia Lotofaafetai I Soo Se Tulaga,” Ensign po o le Liahona, Me 2014, 77).

Mataupu Faavae ma Feagaiga 59:23 “Filemu i lenei lalolagi”

Ua folafola mai e le Alii le “filemu i le lalolagi lenei ma le ola e faavavau i le lalolagi a sau” ia i latou o e aumaia i luma galuega o le amiotonu (MF&F 59:23). Sa faamalamalama mai e Elder Quentin L. Cook o le Korama a Aposetolo e Toasefululua le ituaiga o filemu e maua mai le usiusitai amiotonu i poloaiga a le Alii:

“Tatou te faamoemoe ma le naunautai ma tatalo mo le filemu lautele, ae o a tatou matafaioi o ni tagata taitoatasi ma aiga, tatou te ausia ai le ituaiga o filemu o le taui folafolaina o le amiotonu. O lea filemu o se meaalofa folafolaina o le misiona ma le taulaga togiola a le Faaola. …

“O le filemu lea ou te tautala i ai, ua le na o se toafimalie lē tumau. O se fiafia loloto e tumau ma faamalieina faaleagaga.

“Na faamatala mai e Peresitene Heber J. Grant le filemu o le Faaola faapea: ‘O Lona filemu o le a faatoafilemu ai o tatou mafatiaga, fusifusia ai o tatou loto nutimomoia, ufitia ai lo tatou inoino, e faaosofia ai i o tatou fatafata se alofa i uso a tagata lea o le a faatumulia ai o tatou agaga i le toafilemu ma le fiafia’ [Aoaoga a Peresitene o le Ekalesia: Heber J. Grant (2002), 226]” (“O Le Filemu o le Tagata Lava Ia: O Le Taui Lea o le Amiotonu,” Ensign po o le Liahona, Me 2013, 33).

Mataupu Faavae ma Feagaiga 60: Talaaga Faasolopito Faaopoopo

I le vaiaso muamua o Aokuso 1831, sa auai atu toeaina o e sa malaga i Misuri i se konafesi ale Ekalesia ma auai i le faapaiaga o le laueleele o Siona ma le nofoaga o le a fausia ai le malumalu. Ina ua maea la latou galuega, o le toatele o toeaina sa mananao e toe foi i Katelani, Ohaio (tagai The Joseph Smith Papers, Documents, Volume 2: July 1831–January 1833, 35). Sa fesili toeaina i le Perofeta o Iosefa Samita pe o le a le mea e tatau ona latou fai, ma sa ia maua ai le faaaliga lea e faamaumau i le Mataupu Faavae ma Feagaiga 60.

Mataupu Faavae ma Feagaiga 60

Ua poloaiina e le Alii ia toeaina e talai atu le talalelei a o latou toe malaga atu i Ohaio

Mataupu Faavae ma Feaigaiga 60:2. “Ua latou natia taleni ua ou tuu atu ia te i latou”

Na aoai e le Alii ia toeaina o e na lei faataunuuina lo latou tiutetauave e talai atu le talalelei. I le ta’ua ai o Lana faataoto i taleni (tagai Mataio 25:14–30), na fetalai ai le Alii, “Ua latou natia taleni ua Ou tuu atu ia te i latou, ona o [lo latou] fefefe i tagata” (MF&F 60:2). I lenei faaaliga, “o le taleni” e faasino i se malamalama ma le molimau i le talalelei toefuataiina. Ua aumai faatasi ma nei meaalofa faaleagaga le matafaioi e faasoa atu le malamalama o le tagata ma le molimau i isi.

Na aoao mai e le Perofeta o Iosefa Samita (1805–1844) e faapea o lo tatou “tiute silisili ma le aupito taua o le talai atu lea o le Talalelei” (Aoaoga a Peresitene o le Ekalesia: Iosefa Samita [2007], 330). Na faamalamalama mai e Elder Dieter F. Uchtdorf ia auala e mafai ona tatou faataunuu ai lenei tiutetauave:

“Au uo talavou e, atonu o le faamalosiauga a le Alii e ‘tatala o [outou] gutu’ [MF&F 60:2] i le asō e ono aofia ai le ‘faaaogaina o outou lima,’ e faailoa i le initoneti, ma tesi atu le feau o le talalelei i le lalolagi uma! Ae faamolemole ia manatua, ia faia ia mea uma i le nofoaga sa’o ma le taimi sa’o.

“… O faamanuiaga o tekinolosi i aso nei, e faailoa ai le faafetai ma le olioli i fuafuaga sili a le Atua mo Ana fanau i se auala e lagona ai e le gata i falefaigaluega ae i le lalolagi atoa. O nisi taimi o se fuaiupu se tasi o le molimau e mafai ona faatulagaina ai mea e tutupu e aafia ai le olaga o se tagata mo le faavavau.

“O le auala sili ona lelei e talai atu ai le talalelei, e ala lea i faataitaiga. Afai tatou te ola e tusa ai ma o tatou talitonuga, o le a faapea ona mātau e tagata. Afai e susulu atu foliga o Iesu Keriso i o tatou olaga, afai tatou te fiafia ma lelei ma le lalolagi, o le a fia iloa e tagata pe aisea. O se tasi o lauga silisili ua fofogaina mai i le galuega faafaifeautalai i lenei mafaufauga faigofie e faasino lea ia Sana Falanisisi o Asisi: ‘Talai atu le talalelei i taimi uma ma pe afai e tatau ai, faaaoga upu’ [i le William Fay and Linda Evans Shepherd, Share Jesus without Fear (1999), 22]” (“Faatalitali i le Auala i Tamaseko,” Ensign po o le Liahona, Me 2011, 76–77).

Mataupu Faavae ma Feagaiga 60:8. “O faapotopotoga a e ua amioleaga”

O le fasifuaitau “faapotopotoga a e ua amioleaga” e pei ona faaaoga i le Mataupu Faavae ma Feagaiga 60:8 ma isi faaaliga (tagai foi MF&F 61:33; 62:5) e le faapea o lona uiga o tagata uma o i lenei nofoaga o nofosala i le amioleaga tele. Ae, e peiseai e faasino le fasifuaitau i tagata o e lei i ai se iloa po o se malamalama i le talalelei toefuataiina a Iesu Keriso. A aunoa ma se malamalama i mataupu faavae o le talalelei ma sauniga faaola, ua latou ola i fafo atu o le feagaiga a le Atua. Ona o lenei mafuaaga na valaauina ai e le Alii ia faifeautalai e talai atu le talalelei i faapotopotoga po o nuu o tagata ma valaaulia i latou e salamo ma talia ia sauniga o le faaolataga.

Mataupu Faavae ma Feagaiga 60:13–14. “Aua e te faamaumauina lou taimi”

Na poloai atu le Alii i toeaina e talai atu le talalelei a o latou toe malaga i Ohaio ma sa lapataia i latou ia “aua nei faamaumauina [o latou] taimi” (MF&F 60:13). Na faapupula mai e Elder M. Russell Ballard o le Korama a Aposetolo e Toasefululua nisi o auala e mafai ona tatou faamaumau ai o tatou taimi ma le matautia o le faia o lena mea:

“O se tasi o auala e faaitiitia ai e Satani lou mataalia ma faavaivaia lou malosiaga faaleagaga o le faamalosiauina lea o oe e faaalu se vaega tele o lou taimi e faia ai mea e laitiiti sona taua. Ou te talanoa atu i nisi o mea e pei o le nofo ai lava mo le tele o itula e matamata i le televise po o vitio, taalo i taaloga i vitio i po uma, po o le faasee i luga o le Initoneti, po o le tuuto atu o le tele o taimi i taaloga, tauvaga, ma isi gaoioiga faafiafia.

“Aua tou te aveseseina au. … O tauvaga, taaloga, ma gaoioiga faafiafia, e oo lava i le televise e mafai ona mapu i ai ma faafou ai le malosi, aemaise lava i taimi ua e faatu ai pe lagona foi le mamafatu o mea ua faatulagaina. E te manaomia gaoioiga e fesoasoani ia te oe e toe fetuunai ai ma faamalolo o outou mafaufau. …

“Ae ou te tautala atu i le tuufau o mea ma le paleni ai. …

“O se tasi o aafiaga faataumaoi o le faamaumau o o tatou taimi o le lolo’u atu ai lea o i tatou mai le taulai atu i mea e sili ona taua. Ua matua toatele naua tagata ua naunau e nofonofo ma tuufau le olaga pe o le a lava le mea e tupu ia i latou. E tele le taimi e atiina ae ai uiga faaleatua o le a fesoasoani ai ia te oe ia avea o se tagata e paleni lelei. …

“… O le mea lea taulai atu le mea sili e te mafaia i mea o le olaga o le a toe taitai atu ai oe i le afioaga o le Atua—tausia o mea uma i lo latou paleni tatau” (“Be Strong in the Lord,” Ensign, July 2004, 13–14).

Mataupu Faavae ma Feagaiga 61: Talaaga Faasolopito Faaopoopo

I le aso 9 Aokuso, 1831, na tuua ai e le Perofeta o Iosefa Samita ma toeaina e toa 10 ia Initipene, Misuri, i paopao e agai atu i le Vaitafe o Misuri mo St. Louis. Sa faigata ona folau i le vaitafe ona o le tele o laau pauu sa gogoto i le vaitafe. I nai uluai aso o le faigamalaga, sa iai ni feeseeseaiga na tulai mai i le vaega, ma sa i ai mo sina taimi ia lagona o le le felagolagomai. I le aso lona tolu o le faigamalaga, o se laau na magoto i le vai na toetoe a sa’e ai le paopao sa iai Iosefa Samita ma Sini Rikitone. I le uunai atu o le Perofeta, sa tolauapi ai le aumalaga i auvai o le Vaitafe o Misuri i se nofoaga e igoa o le Pioga o McIlwaine. Ina ua mavae ona tuua o le Vaitafe ae tolauapi, sa vaaia ai e Viliamu W. Phelps i le ao ateatea “le Faaoosala, i lona mana aupito matautia, o folau i luga o le vaitafe” (Manuscript History of the Church, vol. A-1, itulau 142, josephsmithpapers.org). Sa talanoaina e le aumalaga o latou faigata, foia o latou lagona fefinauai, ma fefaamagaloai le tasi ma le isi. O le taeao na sosoo ai, na maua ai e le Perofeta le faaaliga ua tusia i le Mataupu Faavae ma Feagaiga 14.

Na tolauapi le Perofeta o Iosefa Samta ma isi i se mea i talaane o le nofoaga lea, e faasino i ai o le Pioga o McIlwaine, i autafa o le Vaitafe o Misuri a o faimalaga atu i le vai i St. Louis, Misuri, ia Aokuso 1831.

Mataupu Faavae ma Feagaiga 61

Ua tuuina atu e le Alii ia lapataiga ma faatonuga ia Iosefa Samita ma toeaina sa malaga i Ohaio.

Mataupu Faavae ma Feagaiga 61:3. “O atu faavavevave i luga o vai, ae o loo fano i le le talitonu tagata o loo nonofo ai i le isi itu ma le isi itu”

Ina ua malaga toeaina “faavavevave i luga o vai” o le Vaitafe o Misuri, sa le mafai ona latou talai atu le talalelei i tagata sa nonofo i itu uma o le vaitafe o e sa “fano i le le talitonu” (MF&F 61:3). E faapena foi, e i ai taimi tatou te le amanaiaina ai manaoga o i latou o loo vagaia i tatou ona ua tatou matua pisi tele e “o faavavevave” i o tatou olaga.Na aoao mai President Thomas S. Monson :

“Na faafia ona tuia lou loto ina ua e molimauina le tulaga manaomia o se tasi? E faafia ona e faamoemoe ia avea oe ma tagata e fesoasoani atu? Ae faafia ona faalavelavea le olaga i lea aso ma lea aso, ma tuu ai lava i isi e faia galuega fesoasoani, ma lou manatu o le mea moni lava o le a i ai se tasi e taulimaina lena manaoga.’

“Tatou te matua popole tele i le pisi o o tatou olaga. Ae a sei vaai lava i sina minute tatou te toe tepa ai ia tatou mea o fai, atonu tatou te iloa ai ua tatou faatofuina i tatou lava i mea e papau ma le taua.’ I se isi faaupuga, ua faatele ona faaalu le tele o o tatou taimi, e fai ai mea e matua le aoga lava i le fuafuaga autu o le olaga, ma ua faatuatuanai ai mea aupito sili ona taua” (“O le a se mea ua ou faia mo se tasi i le aso?” Ensign po o le Liahona, Nov. 2009, 85).

Mataupu Faavae ma Feagaiga 61:4–19. “I aso e gata ai … ua Ou fetuu ai vai”

O afioga a le Alii o loo i le Mataupu Faavae ma Feagaiga 61:4–19 e le o faasaina ai le Au Paia o Aso e Gata Ai mai le femalagaai i luga po o le feausi i vai. I le faamatalaina o le fetuu i luga o vai i aso e gata ai, atonu sa faatatau atu le Alii i fuaitau i le tusi o Faaaliga lea o loo faamatalaina ai e le Aposetolo o Ioane le faatafunaga o le a tupu i vai a o lei oo i le Afio Mai Faalua o Iesu Keriso (tagai Faaaliga 8:8-11; 16:2–6). I le Mataupu Faavae ma Feagaiga 61, o loo faatatau tonu atu le Alii i le matautia “o nei vai,” o lona uiga o le Vaitafe o Misuri (tagai MF&F 61:5, 18). I le taimi o lenei faaaliga, o le matautia o le Vaitafe o Misuri sa aofia ai faalavelave tutupu ona o faigata i folauga i le vai ma le pipisi o le kolela, o se faama’i sa masani ona sosolo ona o vai to’a (tagai “The Way of Journeying for the Saints of Christ,” Evening and Morning Star, Dec. 1832, 105).

Mataupu Faavae ma Feagaiga 62: Talaaga Faasolopito Faaopoopo

I le aso 13 Aokuso, 1831 sa feiloai ai le Perofeta ma toeaina sa malaga faatasi ma ia i Katelani, Ohaio, ma Ailama Samita, Ioane Murdock, Harvey Whitlock, ma Tavita Uitimera i Chariton, Misuri. E lei taunuu lava nei toeaina i Initipene, Misuri, ona o se isi itu sa latou talai atu le talalelei i le ala ma i se isi itu ona o le gasegase o Ioane Murdock na faatuai ai la latou malaga. Na faamatala mulimuli ane e Iosefa Samita e faapea “ina ua mavae tulaga fiafia lea na feiloai ai le usoga i le tasi ma le isi” sa ia maua le faaaliga o loo tusia i le Mataupu Faavae ma Feagaiga 62 (in Manuscript History of the Church, vol. A-1, page 145, josephsmithpapers.org).

Mataupu Faavae ma Feagaiga 62

Ua tauleleia e le Alii le faamaoni o se vaega o toeaina na malaga atu i Initipene, Misuri

Mataupu Faavae ma Feagaiga 62:3. “Ua faamanuiaina outou ona o le molimau na outou tuu atu ua tusi faamaumau i le lagi”

Sa faamalo atu le Alii i toeaina o e na lei o i Siona mo a latou molimau faamaoni sa latou faasoa atu i le taimi o la latou faigamalaga. E le pei o nisi o toeaina sa malaga faatasi ma le Perofeta o Iosefa Samita, lea na aoai e le Alii i lo latou le talai atu o le talalelei (tagai MF&F 60:2--3), o lenei vaega o faifeautalai sa latou talai atu ma le maelega ma le faamanuiaina le talalelei ma fausia le Ekalesia a o latou malaga atu i Siona. Sa aofia ai i nei faifeautalai faamaoni ia Levi Hancock, Zebedee Coltrin, Simeona Carter, ma Solomona Hancock. Sa latou papatisoina le silia ma le selau tagata i le ala (tagai The Joseph Smith Papers, Documents, Volume 2: July 1831–January 1833, ed. Matthew C. Godfrey and others [2013], 46). Sa faamanuiaina e le Alii le faamaoni o nei faifeautalai, i le faapea mai o a latou molimau sa “tusifaamaumauina i le lagi mo agelu e vaai i ai” (MF&F 62:3). E le gata i lea, sa tautino mai e le Alii e faapea ua faamagaloina agasala a nei faifeautalai.

E fiafia le Alii ia i latou o e tatala o latou gutu ma faasoa atu le molimau na Ia tuuina atu ia te i latou (tagai MF&F 62:3).

E ui o le faamagaloga e sau mai le Togiola a Iesu Keriso pe a tatou salamo ma ola e tusa ma Ana poloaiga, o le folafola atu o le talalelei ma fesoasoani i isi e o mai i le Faaola e mafai ona fesoasoani ia te i tatou e maua ai le faamagaloga o a tatou agasala. Na aoao mai Peresitene Spencer W. Kimball (1895–1985): “ua ta’u mai e le Alii ia i tatou e faapea o le a vave ona faamagaloina a tatou agasala pe a tatou aumaia agaga ia Keriso ma tumau ai ma le mausali i le tuuina atu o molimau i le lalolagi, ma e moni lava o i tatou uma taitoatasi o loo saili mo se fesoasoani faaopoopo mo le faamagaloina o a tatou agasala” (“E Ao I Tagata Uma,” Liahona, Nov. 1977, 5).

Mataupu Faavae ma Feagaiga 62:5–8. “Faautauta ma taitaiga a le Agaga”

I le tele o taimi sa i ai ni vaega eseese o toeaina sa fesili pe faapefea ona latou malaga, pe o le fea ala e ui ai, o le a le ituaiga auala e malaga ai, pe malaga faatasi uma foi pe o taitoalua. I nei mea taitasi uma sa tautino mai ai e le Alii, “ua le afaina ia te au” (MF&F 60:5; 61:22; 62:5).

E faatatau i lea tali, na aoao mai ai Elder David A. Bednar o le Korama a Aposetolo e Toasefululua:

“O le fetalaiga a le Alii e faapea o na mea e ‘le afaina ia te au’, muamua e foliga o se mea e ofo ai. E manino lava, e le o fetalai atu le Faaola i nei faifeautalai e le o popole ia latou mea la e fai. Ae, sa Ia faamamafaina le taua o le faamuamua o mea e tatau ona faamuamua, ma ia taulai atu i mea tonu. … Sa tatau ona faaaoga lo latou faatuatua, faaaoga le faautauta, galulue e tusa ai ma le taitaiga a le Agaga, ma ia fuafua le ala sili e malaga ai i o latou tofiga. O le mea e taua tele o le galuega sa valaauina i latou e faatino, o le faapefea ona oo iina sa taua ae e le taua tele. …

“O faamasinoga sili ona faigata tatou te faia e seasea ona i le va o le lelei ma le leaga po o le va o le isi mea mananaia ma mea el e mananaia. E masani lava o a tatou filifiliga e aupito sili ona faigata o le va o le lelei ma le lelei. I lea motugatala faatusi paia [e faasino i le MF&F 62:7–9], o solofanua, miula, ma kariota atonu o ni filifiliga aoga e tutusa mo faifeautalai e malaga ai. I se ala foi faapena, o oe foi ma au e ono faailoa maia i taimi eseese i o tatou olaga ni auala e sili atu i le tasi e talia po o filifiliga e mafai ona tatou filifili e tulimatai. E ao ina tatou manatuaina lenei mamanu mai tusitusiga paia a o tatou sagai atu i faaiuga taua. Afai tatou te tuu mea e sili atu ona taua ia faamuamua i o tatou olaga—o mea e pei o le avea ma soo tuuto, faamamaluina o feagaiga, ma le tausia o poloaiga—ona faamanuiaina lea o i tatou i musumusuga ma le faautautaga malosi a o tatou tulimatai atu i le ala e toe taitai atu ai i tatou i lo tatou aiga faalelagi” (“A Reservoir of Living Water,” [Brigham Young University fireside, Feb. 4, 2007], 5–6, speeches.byu.edu).

Sa faamalamalama mai e Peresitene Dallin H. Oaks le mafuaaga e tuu ai e le Tama Faalelagi le tele o faaiuga i lo tatou lava faautautaga:

“O se manao ia taitai e le Alii o se malosiaga, ae e manaomia ona o faatasi ma se malamalama e tuu mai e lo tatou Tama Faalelagi le tele o faaiuga mo a tatou lava filifiliga faaletagata lava ia. O faia o faaiuga faaletagata lava ia o se tasi o puna o le tuputupu ae lea e tatau ona tatou oo i ai i le olaga nei. …

“E ao ona tatou suesue i mea i o tatou mafaufau, faaaoga i ai mana e iloilo ai na tuu e le Foafoa i totonu o i tatou. Ona tatau lea ona tatou tatalo mo se taitaiga ma galulue ai pe a tatou mauaina. Afai tatou te le maua se taitaiga, e tatau ona tatou galulue i luga o la tatou faamasinoga sili” (“O o tatou Malosiaga E Mafai Ona Avea ma Mea Tatou te Pau ai,” Liahona, Me. 1995, 13–14).