Mataupu 12
Mataupu Faavae ma Feagaiga 29
Faatomuaga ma le Faasologa o Taimi
Ia Setema 1830, a o lei faia le konafesi lona lua a le Ekalesia i Feiete, Niu Ioka, na manatu nisi o uluai tagata o le Ekalesia o valoaga a le Tusi a Mamona e uiga ia Siona ma le faapotopotoina o le au filifilia a le Atua o le a le o toe mamao ona faataunuuina lea. Na fono se vaega o toeaina e toaono ma isi tagata o le Ekalesia ma fesili atu i le Alii e uiga i nei valoaga. O le tali atu i la latou talosaga, na maua ai e Iosefa Samita le faaaliga ua tusifaamaumauina i le Mataupu Faavae ma Feagaiga 29. I le faaaliga lenei na aoao ai i latou e le Alii e uiga i le faapotopotoina o le au filifilia a le Faaola a o lei oo i Lona Afio Mai Faalua ma e uiga i le togiolaina mai le Pau o Atamu ma Eva e ala i le Togiola a Iesu Keriso.
-
Iuni–Oketopa 1830Na faalau atu e Iosefa Samita le Mose 1–5 a o ia galue i le faaliliuga musuia o uluai mataupu o le Kenese.
-
Aokuso–Setema 1830Sa fenumiai tagata o le Ekalesia ona o faaaliga le mautinoa a Hiram Page.
-
Setema 1830Na maua mai ai le Mataupu Faavae ma Feagaiga 29.
-
Setema 1830Na maua mai ai le Mataupu Faavae ma Feagaiga 28 ma (e peiseai i tua o le Mataupu Faavae ma Feagaiga 29).
-
26–28 Setema, 1830Na faia le konafesi lona lua a le Ekalesia i Feiete, Niu Ioka.
-
Oketopa 1830Na tuua ai e Oliva Kaotui ma ana soa faifeautalai mo se misiona i le au sa Lamana.
Mataupu Faavae ma Feagaiga 29: Talaaga Faaopoopo Faasolopito
Ina ua siitia atu Iosefa Samita i Feiete, Niu Ioka, ia Setema 1830, na ia maua ai o loo fia iloa lava e le Au Paia le faataunuuina o valoaga a le Tusi a Mamona e faatatau ia Siona. Na tautala nei valoaga e uiga i le faapotopotoina o le aiga o Isaraelu ina ia mafai ona fausia Siona, po o le “Ierusalema Fou,” ma le toe foi mai o Iesu Keriso lea na folafola mai (tagai 3 Nifae 21:23–26; tagai foi 3 Nifae 16:18). Sa sailia e se vaega na aofia ai ni toeaina se toaono ma le isi toatolu o tagata o le Ekalesia mo se malamalama atili e tusa ai ma le oo mai o Siona ma le solitulafono a Atamu ma Eva. I le tali atu i la latou fesili, na maua ai e le Perofeta o Iosefa Samita le faaaliga o loo tusia i le Mataupu Faavae ma Feagaiga 29 (tagai The Joseph Smith Papers, Documents, Volume 1: July 1828–June 1831, ed. Michael Hubbard MacKay and others [2013], 177–78).
O upumoni o loo aoao mai i le Mataupu Faavae ma Feagaiga 29 ua faaopoopo i le malamalama o le Au Paia e uiga i le manaomia o Siona i aso amuli ma atonu ua faasa’o ai nisi o fenumiaiga faaleaoaoga faavae na afua mai i tusiga a Hiram Page (tagai i faamatalaga mo le Mataupu Faavae ma Feagaiga 29 i le tusi lesona lenei). Sa punouai le Perofeta o Iosefa Samita talu mai Iuni 1830 i le faaliliuga musuia o uluai mataupu o le Kenese, ma o nei faamatalaga na maua ai se faamaninoga e uiga i le solitulafono a Atamu ma Eva i le Faatoaga o Etena. E le gata i lea, o le Mataupu Faavae ma Feagaiga 29 ua aumaia ai ni upumoni taua e uiga i le faapotopotoina mai o Isaraelu ma le fuafuaga o le faaolataga a o lei tuua e Oliva Kaotui ma lana soa mo se misiona e folafola atu le talalelei ia sa Lamana.
Mataupu Faavae ma Feagaiga 29:1–21
Ua valaauina e Iesu Keriso Lona nuu e faapotopoto e sauniuni ai mo Lona Afio Mai Faalua.
Mataupu Faavae ma Feagaiga 29:1–2. “Faafofoga mai ia i le siufofoga o Iesu Keriso, lo outou Togiola, le O A’U Silisili”
I le taimi o lana galuega i le muai olaga, na faailoa atu ai e Ieova o Ia lava ia Mose o “O A’U” ma o le Atua o peteriaka anamua o Aperaamo, Isaako, ma Iakopo (tagai Esoto 3:13–15). O le faalaniga “O A’U’ o se suiga o “Ieova” ma e sau mai le veape Eperu o le faasinoga muamua i le tagata o lona uiga “o lea ou te i ai,” ma e faatusa i le natura faavavau ma le mamana uma o le Atua (tagai foi MF&F 68:6). I le taimi o masina taumafanafana a o lei maua mai le faaaliga o loo tusia i le Mataupu Faavae ma Feagaiga 29 na amata ai e le Perofeta o Iosefa Samita lana faaliliuga musuia o le tusi a Kenese i le Feagaiga Tuai. O le folasia mai e Iesu Keriso o Ia lava i le Mataupu Faavae ma Feagaiga 29:1–2 ua faamautu ai le upumoni e faapea o Ia lava o le Atua o le Feagaiga Tuai. O nei fuaiupu o loo faamautu ai foi e faapea, e faapei lava ona faapotopoto e Iesu Keriso ma puipuia, ma faasaoloto ia Isaraelu anamua ina o nofopologa ai i latou i Aikupito, o le a ia faapotopotoina foi Ana fanau i aso e gata ai i lalo o Lana puipuiga pe afai latou te faalogo i Lona siufofoga.
Sa nofo Iosefa Samita i le fale o Pita Uitimera le Matua i Feiete, Niu Ioka, i le taimi na ia maua mai ai le faaaliga o loo tusia i le Mataupu Faavae ma Feagaiga 29.
Mataupu Faavae ma Feagaiga 29:4-8. O le faapotopotoina o le au filifilia.
O si vaega toalaiti o toeaina na fono ma le Perofeta o Iosefa Samita i le taimi na tuuina mai ai lenei faaaliga, na latou aoao ai e faapea o tagata o le Ekalesia i lenei tisipenisione ua filifilia e folafola atu le talalelei ma faapotopoto mai le “au filifilia” a le Alii, o e ua faamatalaina e le Atua o i latou e “faalogo i [Lona] leo ma le faamaaaina o latou loto” (MF&F 29:7). O le au filifilia o i latou o e e filifilia e fesoasoani i le Alii i le galuega o le faaolataga (tagai MF&F 101:39–40; 115:5; 128:55–56). O le faapotopotoina o le au filifilia e tupu pe a talia e tagata taitoatasi le talalelei a Iesu Keriso, osifeagaiga ma le Atua, ma faapotopoto faatasi ma le Au Paia faamaoni. O lenei faapotopotoina o le aiga o Isaraelu e tatau ona tupu ina ia mafai ai ona saunia le nuu o le Atua mo “le aso pe a auina mai puapuaga ma faatafunaga i luga o e amioleaga” (MF&F 29:8).
Ia Oketopa 1830, sa auina atu ai Oliva Kaotui i se misiona ia sa Lamana e sauniuni mo le taimi o le a faailoa mai ai e le Alii le mea e faapotopoto i ai le Au Paia (tagai MF&F 29:8–9). Na aoaoina mulimuli ane e le Au Paia e faapea na faamoemoe le Alii mo tagata o le Ekalesia e faapotopoto i se tulaga faatulagaina lelei i le Itumalo o Siakisone, Misuri (tagai MF&F 57:1–3; 58:56). Peitai, o i latou na faapotopoto ane mulimuli i le Itumalo o Siakisone na tutuliese mai o latou fale, ma i’u ai ina sii atu le faapotopotoina i Sisifo Mamao, Misuri (tagai MF&F 115:7–8), ona o ai lea i Navu, Ilinoi (tagai MF&F 124:25–28, 55), ona mulimuli ane ai lea “i Sisifo” (MF&F 136:1). O le taimi nei, ua le o toe manaomia ona toe sii i se nofoaga patino faalefaafanua ina ia potopoto ai ma le Ekalesia. Ae, ua tatau ona fesoasoani le Au Paia o Aso e Gata Ai e atinae ia siteki o Siona po o fea lava o latou nonofo ai (tagai MF&F 101:20–22).
Na faamalamalama mai e Peresitene Spencer W. Kimball (1896–1985) e faapea: “O le faapotopotoina o Isaraelu e aofia ai le auai i le ekalesia moni ma le iloa o le Atua moni. … O le mea lea, o soo se tagata, o lē e taliaina le talalelei toefuataiina, ma o lē ua saili e tapuai i le Alii i lana lava gagana ma faatasi ma le Au Paia i atunuu o loo latou nonofo ai, ua usitaia le tulafono o le faapotopotoina o Isaraelu, ma ua avea ma sui e mauaina faamanuiaga folafolaina uma mo le Au Paia i nei aso mulimuli” (The Teachings of Spencer W. Kimball, ed. Edward L. Kimball [1982], 439).
Ua valaauina i tatou e le Atua “e faataunuu le faapotopotoina o [Lana] au filifilia” (MF&F 29:7).
Na aoao mai Peresitene Russell M. Nelson o le Au Peresitene Sili le ala e tulai mai ai le faapotopotoina o le au filifilia a le Atua i ona po nei.
“O iinei i le lalolagi, e taua tele le galuega faafaifeautalai i le faapotopotoina o Isaraelu. … Ma ua faapena foi ona o atu auauna a le Alii e folafola atu le Toefuataiga. I le tele o atunuu ua sailia e o tatou faifeautalai i latou ua faataapeapeina o Isaraelu.
“O le filifiliga e o mai ia Keriso e le o se tulaga tau i se nofoaga faaletino; ae o le tulaga tau i le tautinoga faaletagata lava ia. O tagata e mafai ona ‘aumaia i latou i le malamalama o le Alii’ [3 Nifae 20:13] e aunoa ma le tuua o o latou lava laufanua. E moni, i aso anamua o le Ekalesia, o le liliu mai e masani lava o lona uiga o le femalagaai foi lea. Peitai, i le taimi nei o loo ua faatinoina le faapotopotoina i totonu o atunuu taitasi. Ua poloaiina e le Alii le faatuina o Siona [tagai MF&F 6:6; 11:6; 12:6; 14:6] i itulagi taitasi na Ia tuuina i Ana Au Paia e fananau mai ai ma o latou tagatanuu. Ua valoia e tusi paia e faapea o tagata ‘o le a faapotopotoina i nuu o o latou tofi, ma faatuina i latou i o latou nuu uma ua folafolaina’ [2 Nifae 9:2]. ‘O atunuu uma o le nofoaga e faapotopoto ai mo ona lava tagata’ [Bruce R. McConkie, in Conference Report, Mexico City Mexico Area Conference 1972, 45]. O le nofoaga mo le faapotopotoina o le Au Paia i Pasila o loo i Pasila lava; o le nofoaga mo le faapotopotoina o le Au Paia i Nigeria o Nigeria lava; o le nofoaga mo le faapotopotoina o le Au Paia i Korea o Korea lava; ma faasolo ai lava faapena. O Siona o ‘e ua loto mama’ [MF&F 97:21]. O Siona o soo se mea lava e i ai le Au Paia amiotonu. O lomiga faasalalau, fesootaiga, ma potopotoga o mea ia e toetoe o tagata uma o le ekalesia ua maua ai aoaoga faavae, ki, sauniga ma faamanuiaga o le talalelei, tusa lava po o fea le mea e i ai” (“O le Faapotopotoina o Isaraelu ua Faataapeapeina,” Ensign po o le Liahona, Nov. 2006, 81).
Mataupu Faavae ma Feagaiga 29:9. O le a susunuina e faamaualuluga e pei o tagutugutu o saito.
Sa lapataia e le Alii e faapea o i latou o e “faamaualuluga, ma i latou o e ua fai amioleaga, o le a avea faapei o tagutugutu o saito” ma o le a susunuina i latou i Lona Afio Mai (MF&F 29:9). E ui o le faamaualuga o se agasala masani e aafia ai tagata uma i sina vaega, a o le tulaga lea “o e faamaualuluga” e faasino ia i latou o e e le mafai ona tatalia le mamalu o le Alii ona o le amioleaga. I se faaaliga mulimuli ane, sa faamanino mai ai e le Alii e faapea o lenei vaega e aofia ai “i latou o e pepelo, ma faataulaitu, ma mulilulua, ma faitaaga, ma soo se tasi e fiafia i le pepelo ma fai le pepelo. O i latou ia o e e mafatia i le toasa o le Atua i luga o le lalolagi” (MF&F 76:103–4).
Mataupu Faavae ma Feagaiga 29:9–13. “O le a Ou faaali atu a’u lava … ma le mana ma le mamalu tele”
O Le Afio Mai Faalua, na saunia e Grant Romney Clawson. O le a toe foi mai Iesu Keriso i le lalolagi ma le mana ma le mamalu tele.
Ina ua lata i le faaiuga o le soifuaga o le Faaola i le tino nei, sa fesili Ona soo ia te Ia pe o afea le gataaga o le lalolagi ae pe o a foi faailoga o le a tuuina mai pe a lata Lona Afio mai (tagai Mataio 24:3; MF&F 45:15–16). O le tautinoga a le Alii i Ana Au Paia i aso e gata ai e faapea “ua lata mai le itula” (MF&F 29:10). Pe a toe foi mai Iesu Keriso, o Ana Aposetolo “sa faatasi ma [Ia] i [Lana] auaunaga i Ierusalem” o le a tutu faatasi ma Ia, “ua faaoofuina i le ofutalaloa o le amiotonu, ma palealii i luga o o latou ulu” (MF&F 29:12). O lea faapupulaga ua ta’u mai ai la latou pule tautupu i le malo o le Atua.O le Mataupu Faavae ma Feagaiga 29:12–13 o loo ta’u mai ai e faapea “o le toatele lava lea o i latou o e na alolofa mai ia te au ma tausi i a’u poloaiga” o le a latou maua foi se palealii ma faaoofuina foi e faapei ona ofuina e le Faaola i lena aso, o se faatusa o lo latou tofi faavavau faatasi ma Ia i le Malo o le Atua (tagai foi MF&F 88:107; 109:75–76, 80).
Mataupu Faavae ma Feagaiga 29:14–21 O faailoga o le afio mai o le Atalii o le Tagata
Na faamatala mai e le Alii i se auiliiliga iloga nisi o ala o le a Ia “tauimasui ai i luga o e amioleaga” a o lei oo i Lona Afio Mai Faalua (MF&F 29:17). O le taunuuga aupito tulagaese o le a mafatia ai i latou o e le salamo “o le a le faamamaina i latou “ i le toto o le Alii” (MF&F 29:17; tagai foi MF&F 88:35). O nisi o mea faataumaoi o aso e gata ai o le a pei foi o mea ia na tutupu i taimi o le talafaasolopito, e pei o le taimi na auina mai ai e le Alii mala i luga oAikupito ina ia laveai ai le fanauga a Isaraelu mai le nofopologa (tagai Esoto 8:21; 9:23–25; 10:22) po o le taimi na faaumatia ai e amioleaga i Amerika a o lei oo ina faaali Atu le Alii Toetu ia sa Nifae (tagai 3 Nifae 8:5–7, 14–16, 22). O le valoaga faapea “o le ekalesia tele ma le inosia” o le a faaumatia i le afi (MF&F 29:21) e faasino i ‘au tuufaatasi a e amioleaga e tau faasaga ia Siona e pei ona muai ta’u mai i tusitusiga paia uma (tagai Esekielu 38:18–22; 39:17–20; 1 Nifae 14:10–17; 22:13–14; 2 Nifae 10:16; MF&F 88:94). Ua faamanino mai e le Alii e faapea e tatau ona aveesea e amioleaga mai le lalolagi—a le o le salamo po o le faatafunaga.O le Mataupu Faavae maFeagaiga 29 ua avea ma faamanatu alofa ma lapataiga ia tagata uma ia salamo ma sauniuni mo lena aso.
Na faamamafa mai e Peresitene Dallin H. Oaks o le Au Peresitene Sili le mafuaaga e taua ai ona sauniuni i le taimi nei mo le Afio Mai Faalua o le Alii.
“Uso e ma tuafafine, e faapei ona aoao mai e le Tusi a Mamona, “o le olaga lenei o le taimi lea mo tagata e saunia ai e feiloai ma le Atua;… o le aso o le olaga lenei o le aso lea mo tagata e fai ai a latou galuega” (Alema 34:32). Pe ua tatou saunia ea?
“I Lana faatomuaga i la tatou tuufaatasiga o faaaliga faaonapo nei ua tautino mai ai e le Alii, ‘Ina outou saunia ia, ina outou saunia ia mo mea o le a oo mai, ona ua latalata mai le Alii’ (MF&F 1:12).
“Ua lapataia pea lava i tatou e faapea e le mafai ona tatou iloa le aso po o le ituaso o Lona afio mai. …
“E faapefea pe afai o taeao e afio mai ai o Ia? Afai sa tatou iloa o taeao le aso tatou te fetaia’i ai ma le Alii—e ala i lo tatou oti faafuasei, po o Lona toetu faafuase’i mai foi—o le a sa tatou mea e fai i le aso? O a ni mea o le a tatou tautau atu? O a ni mea o tatou faia o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le tatou faia?
“E manaomia ona tatou faia o sauniuniga faaletino ma le faaleagaga mo mea na valoia i le taimi o le Afio Mai Faalua. Ma o le sauniuniga lava e tau le amana’iaina o le sauniuniga lea e tau le iloa ma sili atu ona faigata—o le faaleagaga” (“Sauniuniga mo le Afio Mai Faalua,” Ensign po o le Liahona, Me 2004, 8–9).
Mataupu Faavae ma Feagaiga 29:22–29
Ua faaali mai e le Faaola upumoni e uiga i le mea o le a tupu pe a mavae le Meleniuma, e aofia ai le Faamasinoga Mulimuli
Mataupu Faavae ma Feagaiga 29:22. “E toe amata e tagata ona teena le Atua”
O le Afio Mai Faalua o Iesu Keriso o le a aumaia ai le vaitau e afe-tausaga ua ta’ua o le Meleniuma, o lea nofo ai le Alii lava Ia i luga o le fogaeleele (tagai MF&F 29:11). O le a tele suiga taua o le a faaeseese ai tulaga i le taimi o le Meleniuma mai tulaga ua tatou iloa i le lalolagi i ona po nei. Mo se faataitaiga, i lena taimi “soo se mea e ole atu ai soo se tagata, o le a tuu mai ia te ia” (MF&F 101:27) ma o le la faaali mai e le Alii mea uma (tagai MF&F 101:32–34). Ua fetalai mai foi le Alii e faapea o le taimi o le Meleniuma “o le a noatia Satani” (MF&F 43:31) ma “o le a leai se mana e faaosoosoina ai soo se tagata” (MF&F 101:28). Ona o le mana o le Atua ma le amiotonu o tagata, o Satani “o le a le maua e ia se nofoaga i totonu o loto o le fanauga a tagata” (MF&F 45:55). O le mea e faanoanoa ai, i le faaiuga o le afe tausaga, o le a “toe amata e tagata ona teena le Atua” (MF&F 29:22) ma o Satani o le a “toe tatalaina o ia … mo na o se vaitau itiiti” (MF&F 43:31). Atonu e faigata ona malamalama pe aisea o le a toe teena ai le Atua e nisi sa maua faamanuiaga o le Meleniuma. Ae ui o lea, o le a i ai i latou o e, na fai mo latou le mana o le Atua, o le a teena lava le upumoni ma le iloa ma “latou fouvale e faasaga i le Atua ma le loto i ai” (3 Nifaei 6:18; tagai foi 4 Nifae 1:38; MF&F 29:44–45; 76:31).
Mataupu Faave ma Feagaiga 29:23–25. “O se lagi fou ma se lalolagi fou”
O le a liua le lalolagi, pe suia foi, pe a toe foi mai Iesu Keriso e nofotupu (tagai MF&F 63:20–21). O le toe foi i le tulaga “faaparataiso,” po o le teresitila, na i ai a o lei Pau Atamu ma Eva (Mataupu Faavae o le Faatuatua 1:10). I le faaiuga o le Meleniuma, o le lalolagi ma le lagi o loo siomia ai, o le a toe suia—o le taimi lea o le a avea ai ma malo selesitila mo i latou ua maua le mamalu faaselesitila (tagai MF&F 88:19–20).
Mataupu Faavae ma Feagaiga 29:26. O ai Mekaeli?
O Mekaeli o le aloalii le agelu sili o le sa tu i se tulaga o le pule e sosoo ma Iesu Keriso i le lalolagi i le muai olaga ma mulimuli ane avea ma Atamu, o le uluai tagata soifua na ola ai i le lalolagi (tagai Faaaliga 12:7–9; MF&F 27:11; 107:54–55). Na aoao mai e le Perofeta o Iosefa Samita (1805–1844) e faapea o Mekaeli o “le uluai tagata na umia faamanuiaga faaleagaga, o le na faaali atu i ai le fuafuaga o sauniga mo le faaolataga o ana fanau e oo i le iuga, ma o le na uluai faali i ai Keriso” (Aoaoga a Peresitene o le Ekalesia: Iosefa Samita [2007], 107)
Mataupu Faavae ma Feagaiga 29:30–50
Ua tautino mai e le Faaola na Ia laveaiina i tatou mai le Pa‘ū, ma ua Ia ofoina mai le faaolataga mai a tatou agasala
Mataupu Faavae ma Feagaiga 29:31–35. “Ua faaleagaga mea uma ia te au”
O le Atua “na foafoaina … mea uma faaleagaga ma le faaletino” (MF&F 29:31). O mea faaletino e fitoitonu i le olaga nei ma le natura le tumau o lenei lalolagi. A o tatou vaai i le eseesega o le va o mea faaleagaga ma mea faaletino, sa tautino mai e le Atua, “Ua faaleagaga mea uma lava ia te a’u” (MF&F 29:34). E pei ona tusia i le Mataupu Faavae ma Feagaiga 29:34–35, sa faamalamalama mai e le Alii e faapea Na te le i tuuina lava ia Atamu ma ana fanau ni poloaiga e faaletino. O poloaiga uma e faaleagaga, o lona uiga e i ai le faamoemoega e faavavau.
Na aoao mai e Peresitene Iosefa Filitia Samita (1876–1972), “I lo tatou olaga nei, po o le faaletino, tatou te mafaufau o mea na moomia e poloaiga a le Alii e foliga mai e faaletino, ae ua ia fetalai e leai lava se taimi na ia tuuina mai ai se tulafono e faaletino. MF&F 29:34.) O mea uma ia te ia, e faaleagaga, pe i se isi faaupuga, e faamoemoe ia faavavau. E le manatu le Alii i tulaga faaletino; o lana fuafuaga o le faataunuu lea o le tino ola pea ma le ola e faavavau o le tagata. O le mea lea, i lana silafaga, o poloaiga uma lava e tatau ona fitoitonu i lo tatou soifua manuia i le taimi nei, ua mafaufauina o ni laasaga i le ala i lona faaolataga e faavavau”(Church History and Modern Revelation [1953], 1:307–8).
Na faamalamalama mai e Elder Dieter F. Uchtdorf o le Korama a Aposetolo e Toasefululua le ala e tatau ai ona tatou mafaufau i itu faaletino ma le faaleagaga o a tatou taga fai.
“E pei o itu e lua o se tupe, o le faaletino ma le faaleagaga e le mafai ona tuueseeseina. …
“Ae paga lea, e i ai tagata ua le manatu i le faaletino ona ua latou mafaufau e itiiti sona taua. Ua latou faapelepele i le faaleagaga ae faaitiiti i le faaletino. E ui e taua le taulai atu o o tatou manatu i le lagi, ae tatou te misia le uiga moni o la tatou tapuaiga pe afai e le taulai atu foi a tatou auaunaga i o tatou uso a tagata. …
“Pei lava ona masani ai, e mafai ona tatou vaai atu i lo tatou faataitaiga atoatoa, o Iesu Keriso, mo se mamanu. E pei ona aoao mai ia Peresitene J. Reuben Clark, “Ina ua afio mai le Faaola i le lalolagi e lua ni ana misiona tetele; o le tasi o le faataunuuina o lana matafaioi o se Mesia, le togiola mo le pa’u, ma le faataunuuina o le tulafono; o le isi o le galuega lea na ia faia i ona uso ma tuafafine i la le tino i le faamaloloina o o latou puapuaga’ [in Conference Report, Apr. 1937, 22].
“I se ala tali tutusa lava, o lo tatou alualu i luma faaleagaga ua fusia faatasi e le mavavaeeseina ma auaunaga faaletino tatou te faia i isi.
“E faaatoaina e le tasi le isi. O le tasi e aunoa ma le isi o se tau’ole’ole lea i le fuafuaga o le fiafia a le Atua” (“O le Faia i le Ala a le Alii,” Ensign or Liahona, Nov. 2011, 53).
Mataupu Faavae ma Feagaiga 29:35. O le a le uiga o le faitalia?
Ina ua foafoaina Atamu e le Atua, na Ia faia Atamu “o se pule ia te ia lava” (MFF 29:35). Peitai, o lea faitalia, o loo tauaveina ai le tiutetauave o le taliaina o taunuuga o a la filifiliga: o faamanuiaga mo le amiotonu po o le ta’utsalaga mo le agasala (tagai MFF 93:28, 31–32). O le mea lea, o poloaiga a le Atua ua saunia ai mo i tatou le avanoa e ola ai i tulafono o loo Ia soifua ai ma olioli i faamanuiaga o loo Ia olioli ai.Na aoao mai e President Boyd K. Packer (1924–2015) o le Korama a Aposetolo e Toasefululua:
“O na upu faatusi paia, ‘’E mafai ona e filifili mo oe lava, aua ua tuuina atu ia te oe’ (Mose 3:17), ua folasia atu ai ia Atamu ma Eva ma a la’ua fanau lamatiaga uma o le olaga nei. I le olaga nei ua saoloto tagata e filifili, ma o filifiliga taitasi e fanau mai ai se taunuuga. O le filifiliga na faia e Atamu na faamalosia ai le tulafono o le faamasinotonu, lea e manaomia ai le faasalaga mo le le usitai o le oti.
“… Na auina mai se togiola e totogi le aitalafu ma faasaoloto ia tagata. O le fuafuaga lena. …
“Na faia se togiola. Ua ofoina mai ai e faavavau ma e le aunoa le faamagaloga mai le solitulafono ma mai le oti pe afai tatou te salamo. O le salamo o le vaega lea e solaese mai ai. O le salamo o le ki lea e mafai ona tatou tatalaina ai le falepuipui mai totonu. Ua tatou umia le ki i o tatou lima, ma ua ia i tatou le faitalia e faaaoga ai.
“Se saolotoga ina a maoae; se faitalia ina a taua ma maualuga o le tagata.
“E faapopoto e Lusifelo i ana ala poto a tatou filifiliga, e faasese ai i tatou e uiga i le agasala ma taunuuga. O ia, ma ana agelu faatasi ma ia, e tofotofoina i tatou ia aua nei agavaa, e oo lava i le amioleaga. Ae na te le mafaia, i le faavavau uma na te le mafaia lava, faatasi ai ma lona mana uma na te le mafai ona faaumatia atoatoa i tatou; e le mafai e aunoa ma la tatou maliega. Pe ana fai e oo mai le faitalia i le tagata e aunoa ma le Togiola, semanu o se meaalofa e oti ai” (“O le Togiola, Saolotoga Tiutetauave,” Liahona, Iulai 1988, 71).
Mataupu Faavae ma Feagaiga 29:36–43. O se malamalama fou i le fuafuaga a le Atua
Ina ua mavae ona amata e le Perofeta o Iosefa Samita lana faaliliuga musuia o le Tusi Paia ma faalau atu mea ua avea nei ma Mose 1 i le Penina Tau Tele, sa faaauau e ia i le taimi o le taumafanafana o le 1830 le galuega o le faaliliuga, faatasi ai ma Oliva Kaotui o lana tusiupu. O le faaliliuga a le Perofeta o le Kenese 1–5 ua i ai nei i le Penina Tau Tele e avea ma Mose 2–5. Na aofia i na mataupu le tala i le fouvale o Satani i le muai olaga, o ana taumafaiga e faaosooso Atamu ma Eva i le Faatoaga o Etena, ma le ‘aia e o tatou uluai matua o le fua na faasaina ma le tutulieseina mai le faatoaga. O upumoni faaleaoaoga faavae na maua e ala mai i le faaliliuga musuia o le Kenese na saunia moni ai le Perofeta ia maua upumoni faapena e uiga i le fuafuaga a le Atua ia na aotele mai i le Mataupu Faavae ma Feagaiga 29:30–45.
Mataupu Faavae ma Feagaiga 29:36–39. E sailil Satani ma ana agelu e faasese
O le mataupu faavae o le faitalia na faaaoga i le muai olaga, e pei ona molimauina ai i le fouvale a Lusifelo ma le mea moni e faapea “o le tasi vaetolu o ‘au o le lagi” na filifili e mulimuli ia Lusifelo nai lo le Atua (MF&F 29:36). O iinei i le olaga nei, o loo galulue ai Satani ma ona soo e tetee i le fuafuaga o le faaolataga a le Tama e ala i le tofotofoina ma le faaseseina o fanau a le Atua. Ae ui o lea, e gata lo latou mana pe a tatou faaaoga lo tatou faitalia e usitai ai i poloaiga a le Tama Faalelagi.Na faamatala mai e Peresitene James E. Faust (1920–2007) o le Au Peresitene Sili:
“E le tatau ona taofia i tatou e le fefe i le mana o Satani. E leai sona mana ia i tatou vagana ai ua tatou faatagaina o ia. O ia lava o se tagata palaai, ma afai tatou te tumau mausali, o le a solomuli o ia. Na fautua mai le Aposetolo o Iakopo: ‘Ia outou gauai outou lava i le Atua. ‘Tetee atu i le tiapolo, ona sola ese ai lea o ia ia te outou’[Iakopo 4:7]. Ua ta’ua foi e Nifae e faapea ‘e leai se mana e ia te ia i luga o loto o tagata o e amiotonu [1 Nifae 22:26].
“Ua tatou faalogo i tagata fai faaluma ma isi i lo latou ta’uamiotonuina pe faamalamalama o latou sese i le faapea mai, ‘O le tiapolo na mafua ai ona ou faia.’ E leai lava so’u manatu e mafai e le tiapolo ona faia se mea, e moni e mafai ona ia faaosooso i tatou ma e mafai ona ia faaseseina, ae e le o ia te ia se pule ia i tatou lea tatou te tuu atu ia te ia.
“O le mana e tetee atu ai Satani atonu e malosi atu nai lo lo tatou iloa. Na aoao mai le Perofeta o Iosefa Samita: ‘O tagata uma ua i ai lo latou tino [faaletino], e i ai la latou pule ia i latou e leai ni tino. E leai se pule a le tiapolo ia i tatou vagana ua tatou faatagaina o ia. O le taimi lava e fouvale ai i se mea mai le Atua, o iina foi e faaalia ai le mana o le tiapolo’ [Aoaoga a le Perofeta o Iosefa Samita, sel. Joseph Fielding Smith (1976), 181]. “Na ia ta’ua foi, ’O agaga leaga e i ai o latou noataga, tuaoi ma tulafono e pulea ai i latou’ [i le History of the Church, 4:576]. O lona uiga o Satani ma ana agelu e le mamana lava. …
“… O taumafaiga a Satani e mafai ona lepetia e i latou uma o e o mai ia Keriso e ala i le usiusitai i feagaiga ma sauniga o le talalelei. O so’o lotomaualalo o le Matai paia e le tatau ona faaseseina e le tiapolo. E le lagolagoina ma siitia ma faamanuiaina e Satani. Na te tuua i latou e na pueina i le maasiasi ma le faanoanoa. O le agaga o le Atua o se faatosinaga e lagolagoina ma siitiaina” (“Auauna atu i le Alii: Ma le Teena o le Tiapolo,” Liahona, Nov. 1995, 6–7).
Mataupu Faavae ma Feagaiga 29:41–42. O le a le “oti muamua” ma le “oti mulimuli”?
Ina ua aai e Atamu ma Eva le fua faasaina ma ua tutuli ese mai le Faatoaga o Etena, sa oo i la’ua i le oti faaleagaga, o lona uiga ua vavaeese i la’ua mai le mafutaga patino ma le Atua. Ua ta’ua e le Mataupu Faavae ma Feagaiga 29:41 lea “o le oti muamua,” ma e oo mai i fanau uma a le Atua i le olaga nei. “O le oti mulimuli” (MF&F 29:41) o se oti faaleagaga foi, ae e na o i latou ua iloa o atalii o le tiapolo pe a latou puapuagatia i le faasalaga e faavavau o le lafoaiina e faavavau mai le afioaga o le Atua e oo i ai (tagai Helamana 14:15–18; MF&F 76:34–37, 44). Ona ua latou filifili e fouvale i le Atua nai lo le salamo, “ua le mafai ai ona togiolaina i latou mai lo latou pau faaleagaga” (MF&F 29:44).
Ua fetalai le Alii e faapea o le a le oo lava Atamu ma Eva i le oti faaletino vagana ua la maua se avanoa e aoao ai “le salamo ma le togiolaina, e ala i le faatuatua i le suafa o le Alo Pele e Toatasi o le [Atua]” (MF&F 29:42).
Atamu ma Eva, saunia e DouglasFryer. Na tuliesea Atamu ma Eva mai le Faatoaga o Etena ona ua aai i le fua faasaina (tagai MF&F 29:40–41).
Na faamalamalama atili ePeresitene Dallin H. Oaks e uiga i le oti faaleagaga ma le ala e mafai ai ona tatou faatoilaloina le oti faaleagaga.
“O le faamatuu atu i faaosoosoga, na ‘vavae ese ai Atamu mai le mafutaga ma le Alii’ (Helamana 14:16). I tusitusiga paia o lenei vavaeesega ua ta’ua o le oti faaleagaga (tagai Helaman14:16; D&C 29:41).
“O le togiola o lo tatou Faaola na faatoilalo ai lenei oti faaleagaga. … O le taunuuga o lenei togiola, ‘o le a faasalaina tagata ona o a latou lava agasala, ae le o le solitulafono a Atamu’ (Mataupu Faavae o le Faatuatua 1:2).
“Ua togiolaina i tatou e lo tatou Faaola mai le agasala a Atamu, ae faapefea ia aafiaga o a tatou lava agasala? Talu ai ‘ua agasala tagata uma’ (Roma 3:23), ua tatou oti faaleagaga uma lava. O lea, na o le pau lo tatou faamoemoe mo le olaga o lo tatou Faaola. …
“Ina ia mafai ona tatou maua le manumalo na tuuina atu ai le soifua o lo tatou Faaola i le oti faaleagaga ua tatou pagatia ai ona o a tatou lava agasala, e tatau ona tatou mulimuli i tuutuuga na ia faatonuina mai. …
“O la tatou mataupu faavae lona tolu o le faatuatua o loo faamatala mai ai tuutuuga i upu nei: ‘Matou te talitonu e faasaoina tagata uma i le Togiola a Keriso, e ala i le usiusitai i tulafono ma sauniga o le Talalelei’” (“O le Malamalama ma le Ola o le lalolagi,” Liahona, Ian. 1988, 64–65).
MF&F 29:46–50. “Na togiolaina tamaiti mai le faavaeina o le lalolagi”
Ua faamalamalama mai e le Mataupu Faavae ma Feagaiga 29:46–50 e i ai i latou “ua i ai le malamalama” ma i latou “ua leai se malamalama” i le talalelei. O i latou ua i ai le malamalama ua poloaiina ia salamo (tagai MF&F 29:49), a o tamaiti laiti (ma i latou e “leai se malamalama”) e le afaina, ma o lea, e le mafai ai ona agasala. O tamaiti laiti e le mafai ona faaosoosoina e Satani “sei vagana ua amata ona latou tali atu i ona luma” (MF&F 29:47).
O le tautinoga a le Alii e faapea “ua togiolaina tamaiti laiti mai le faavaega o le lalolagi” (MF&F 29:46) e faasino i le mea moni o le fuafuaga a le Atua mo le faaolataga, e aofia ai le Togiola a Iesu Keriso, sa lauiloa ma malamalama i ai mai le taimi o lo tatou esetete i le muai olaga. O se tasi o faamanuiaga e le faatuaoia o le taulaga togiola a le Alii o tamaiti laiti ua togiolaina, o lona uiga o o latou sasi ua taulimaina i le Togiola a Iesu Keriso seia oo ina latou tali atu i luma o le Atua, i le taimi ua latou tauaveina ai le tiutetauave mo a latou lava taga fai. Na faamanino mulimuli ane e le Alii le tausaga e tali atu ai o le “valu tausaga le matua” (MF&F 68:27).
Na faamanino mai e Elder Bruce R. McConkie (1915–1985) o le Korama a Aposetolo e Toasefululua le taua o le fasifuaitau e faapea o tamaiti laiti “ua amta ona tali mai i o’u luma” (MF&F 29:47; ua faaopoopo le faatusilima): “O le tali atu e le faapea o le a atoatoa i luga o se tamaitiiti i soo se taimi i lona olaga. E faasolosolo lemu mai lava ona malamalama le tamaitiiti a o tuputupu ae o ia, i nai tausaga muamua o lona ola. Avea ma le e tali atu o se faagasologa, e le o se sini ia ausia pe a tuuina mai ni tausaga,aso,ma itula ua alu. … Ae peitai o le a oo mai le taimi e moni ai le oo o le tamaitiiti i tausaga tatau ma ua moni ma o le a i ai foi le agasala i olaga o nei tamaiti nei o le a tutupu malolosi ma ola lelei ae e pei ona masani ai. O le valu tausaga o tausaga ia ua tatau ai loa le papatisoga. (MFF 68:27.)” (“O le Faaolataga o Fanau Laiti,” Liahona, Mat. 1978, 6).
Na aoao mai e le perofeta o Mamona le mataupu faavae lenei i se tusi i lona atalii o Moronae:
“Ae o fanau laiti ua ola ia Keriso, mai lava i le faavaega o le lalolagi. …
Ma o ia o le e fai mai e manaomia e fanau laiti le papatisoga ua ia faafitia le alofa mutimutivale o Keriso, ma fai ma meanoa lana togiola ma le mana o lana togiola” (Moroni 8:12, 20).
Na aoao mai le Perofeta o Iosefa Samita e faapea: “O le aoaoga faavae o le papatisoina o tamaiti laiti, po o le faatulutulu, pe o le a lopala i seoli, o se aoaoga e le sa’o, e le lagolagoina e Tusitusiga Paia, ma e le ogatusa ma le uiga o le Atua. E togiolaina tamaiti laiti uma i le toto o Iesu Keriso, ma o le taimi e tuua ai e tamaiti lenei lalolagi, e aveina atu i latou i le fatafata o Aperaamo” (Teachings: Joseph Smith, 94–95).
Na faamatala e Elder Quentin L. Cook o le Korama a Aposetolo e Toasefululua le natura aoao o le fuafuaga o le alofamutimutivale a le Atua o le faaolataga: “O le aoaoga faavae ofoofogia sa faaalia i le Perofeta o Iosefa Samita ua tatala mai ai ia i tatou se fuafuaga o le faaolataga e faatatau i tagata uma, e aofia ai i latou e le faalogo ia Keriso i lenei olaga, o tamaiti laiti e oti a o lei aulia le tausaga e tali atu ai, ma i latou e leai se malamalama [tagai MF&F 29:46–50; 137:7–10]” (“O le Fuafuaga a lo Tatou Tama—Ua Lava ma Totoe mo Ana Fanau Uma,” Ensign po o le Liahona, Me 2009, 37).