Maj–Jun 1844

Josef mo Haeram tufala i Givim Laef blong Tufala from Gospel

Profet i ded, be wok blong Lod i stap gohed

Josef Smit i bin wari. ?Wanem bae hapen long Jos sapos hem i ded? Hem i wantem mekemsua se wok blong Lod bae i stap gogohed. Nao hem i karem i kam tugeta ol Aposol mo givim long olgeta ol ki blong prishud we Jisas Kraes i bin givim long hem. Hemia i minim se ol Aposol oli save lidim Jos blong Lod mo mekem wok blong Hem. Hemia i mekem Josef i filim gud.

Saints, 1:519–20

Be i bin gat fulap pipol we oli bin kros long Josef. Sam long olgeta oli wantem blong kilim hem. Oli no laekem wanem we hem i stap tijim. Oli raet abaot hem long wan nius pepa blong mekem se plante moa man oli kros long hem mo Jos. Sam long olgeta oli wantem blong atakem Nauvu.

Saints, 1:526–28, 530–32, 533–34

Josef mo ol nara lida long Nauvu oli bin brekem daon ples blong printim nius pepa blong stopem ol man blong stap kros long olgeta. Hemia i mekem ol pipol oli kros moa. Gavena i talem long Josef blong go long siti blong Carthage blong wan jaj i disaed sapos hem i brekem loa. Josef i save se sapos hem i go long Carthage, ol pipol bae oli kilim hem i ded.

Doktrin mo Kavenan 135: 4; Saints, 1:533–37, 539–41

Be Josef i wantem ol Sent blong oli stap sef. Sapos hem i go long Carthage ating bae ol pipol oli nomo hambak long ol Sent long Nauvu. Josef i disaed blong go. Hem i blesem Ema mo ol pikinini blong hem, mo kisim olgeta mo talem tata.

Saints, 1:542–44

Brata blong Josef we i Haeram i go wetem hem. Jon Teila, Willard Richards, mo ol narafala fren. Taem oli go, Josef i stopem hos blong hem mo lukluk i go long Nauvu. “Ples ia i wan naesfala ples mo ol bes pipol we oli stap long wol ia,” hem i talem.

Saints, 1:543–45

Taem oli kasem Carthage, oli putum olgeta long kalabus. Taem olgeta i stap long kalabus, Haeram i ridim Buk blong Momon long olgeta. Josef i talem long ol man blong gad se Buk blong Momon i tru.

Saints, 1:546

Blong givim kamfot long ol fren blong hem, Jon Teila i singsing long wan hym abaot Jisas. I bin wan naesfala singsing, mo Haeram i askem hem blong singsing bakegen.

Saints, 1:549

Samtaem long dei ia, ol man we oli kros oli ron i kam insaed long kalabus. Oli pusum doa strong mo stat blong stap sut i go insaed long ol rum we Josef mo ol fren blong hem oli stap long hem. Jon Teila i kasem wan bigfala kil. Haeram mo Josef i bin ded.

Doktrin mo Ol Kavenan 135:1–2; Saints, 1:550–52

Ol Sent oli sore tumas taem oli faenemaot se Josef mo Haeram i bin ded. Be oli save se blong kilim Profet bae i no save stopem Jos. Hemia i Jos blong Sevya, mo Hem bae i gohed blong lidim. Jos bae i gohed blong gro mo bae blesem laef blong fulap pikinini blong God raon long wol.

Saints, 1:553–59