Famli blong Josef Smit

Wan famli blong fet

Josef Smit mo famli blong hem oli stap wok tugeta long fam blong olgeta.

Josef Smit i bin bon long 23 Disemba 1805, long not is blong Yunaeted Stet. Nem blong papa blong hem tu, Josef. Nem blong mama blong hem, Lusi. Hem i gat plante brata mo sista. Ol famli blong Josef oli ol fama. Oli biliv long God mo lavem olgeta wanwan.

Josef Smit—Histri 1:3–4

Josef Smit olsem wan yangfala boe. Oli kavremap leg blong hem wetem wan bandej. Mama blong hem i wari long hem.

Taem Josef i wan smol boe, hem i gat wan sik we i mekem wan problem long leg blong hem. Hemia i soa tumas long hem. Famli blong Josef oli traem blong helpem hem blong filim gud, be leg blong hem i stap soa tumas yet. Ol dokta oli traem blong mekem leg blong hem i kam gud, be oli no save.

Saints, 1:7

Josef Smit long bed. Brata blong hem i nildaon long saed blong bed. Mama blong hem i toktok wetem dokta blong hem long bakgraon.

Ol dokta oli talem se oli mas katemaot leg blong Josef blong sevem laef blong hem. Be mama blong hem i no save letem. Hem i askem sapos i gat eni narafala wei blong helpem Josef. Mekem se, ol dokta oli disaed blong katemaot wan pat blong bun insaed long leg blong hem nomo. Josef i save se hemia bae i soa bigwan, be hem i gat fet se God bae i helpem hem.

Saints, 1:7

Dokta blong Josef Smit i givim alkohol long hem from operesen we bae oli mekem long leg blong hem. Josef i no akseptem. Papa blong hem i holem hem.

Ol dokta oli wantem blong givim alkohol long Josef blong dring blong mekem hem i no filim soa. Be Josef i talem no. Hem i wantem papa blong hem blong i holem hem nomo.

Saints, 1:7

Mama blong Josef Smit i aot long bedrum taem ol dokta oli stap rere blong mekem operesen.

Josef i askem mama blong hem blong go aotsaed. Hem i no wantem hem blong luk bigfala soa we bae hem i filim long leg blong hem taem ol dokta bae oli katem leg blong hem.

Wan dokta i stap mekem operesen long leg blong Josef Smit. Papa blong hem i holemtaet hem blong givim sapot.

Papa blong Josef i bin holem hem taem ol dokta oli katemaot ol nogud pat blong bun blong leg blong hem. Hemia i soa bigwan, be God i helpem Josef blong no fraet. Afta sam yia, leg blong Josef i kam gud, be i soa yet, taem i wokbaot.

Saints, 1:6–7

Josef Smit mo famli blong hem long Niu Yok. Oli wok long ol mapol tri blong karemaot mapol sirap.

Taem Josef i kam bigwan, famli blong hem i muv i go long Niu Yok. Famli blong Josef oli pua. Oli wokhad blong kasem inaf kaekae blong famli blong olgeta. Josef i wan gudfala boe. Hem i hapi mo laekem blong laf mo gat gudtaem.

Saints, 1:5–9

Famli blong Josef Smit i stap sidaon mo filim pis tugeta, long tebol blong kaekae.

Josef Smit i lavem Jisas Kraes. Oli bin prea mo oli bin ridim Baebol tugeta. Be papa mo mama blong Josef, tufala i no sua long wijwan jos blong oli mas joenem. Wan naet, mama blong Josef, Lusi, i prea mo talem long God se hem i wantem blong faenem tru Jos blong Jisas Kraes. God i ansarem prea blong hem mo promesem hem se bae hem i faenem.

Saints, 1:10–11