Epril–Julae 1836

Misin Blong Parli long Kanada

Soem fet long ol promes blong Lod

I no long taem afta we oli dediketem Ketlan Tempol, plante long ol lida blong Jos oli go givim seves long ol misin blong prijim gospel.

Doktrin mo Ol Kavenan 88:81; 109:22–23; 112:28–29; Saints, 1:249

Parli Prat i laekem blong serem gospel. Be hem i tingting blong stap long haos from se waef blong hem, we nem blong hem Thankful, i sik. Tufala no gat tumas mane.

Saints, 1:249

Hiba Kimbol, fren blong Parli mo wan long ol Aposol, i kam blong visitim hem. Hem i givim wan blesing mo talem se bae Parli i go prijim gospel long Kanada. Long blesing ia, Hiba i promes se bae Thankful bae i kam gud bakegen. Hem i promes se waef blong hem bae i gat wan pikinini boe mo bae Lod i helpem Parli i karem mane we hem i nidim.

Saints, 1:249–50

Thankful mo Parli tufala i mared blong 10 yia. Tufala i nogat eni pikinini. Be tufala i gat fet long promes blong Lod. Iven sapos bae i had blong longwe long Thankful long Kanada, Parli i aot blong go serem gospel.

Saints, 1:250

Long Kanada, Parli i lukaotem ol ples blong hem i save tijim ol pipol. Hem i askem sapos hem i save tij insaed long ol jos mo ol narafala bilding. Evriwan i talem no.

Saints, 1:252–53

Afta Parli i mitim Jon mo Leonora Teila. Tufala i lavem Jisas Kraes mo Baebol. Jon i askem Parli sapos wanem hem i stap tijim i defren long Baebol.

Saints, 1:252–53

Parli i talem se hem i tijim abaot Jisas Kraes, ol profet, baptaes, mo Tabu Spirit. Evri samting ia i stap long Baebol. Jon i askem, “?Be Josef Smit mo Buk blong Momon?” Parli i talem long Jon se Buk blong Momon i tru, olsem Baebol, mo Josef Smit i wan profet blong God.

Saints, 1:253

Jon i bilivim wanem Parli i talem. Hem i ridim Buk blong Momon mo i save se i tru. Jon mo Leonora i invaetem ol fren blong olgeta, Josef, Mercy, mo Meri Filding mo ol narafalawan blong kam harem Parli i tij. Plante pipol oli bin baptaes mo joenem Jos.

Saints, 1:254–55

Parli i hapi, be hem i wantem blong gobak long Thankful long Ketlan. Parli i talem tata long ol niu fren blong hem blong Kanada. Taem hem i stap sekhan long olgeta, oli givim mane long hem blong helpem famli blong hem.

Saints, 1:255–56

Taem we Parli i kasem haos, hem i faenemaot se Thankful i stap kam oraet. Parli i karem sam moa kopi blong Buk blong Momon mo gobak long Kanada blong serem gospel. Naoia Thankful i folem hem.

Saints, 1:256

I no long taem afta Thankful mo Parli i faenemaot se bae tufala i gat wan bebi. Tufala i tingbaot blesing we Hiba i givim long Parli. Tufala i filim se evri promes we Lod i talem long blesing ia i stap kamtru.

Saints, 1:256